LESONA 02

Ua Faailoa Mai i le Tusi Paia se Faamoemoe

Maua le Lomiga Lolomi

O loo feagai tagata i so o se vaipanoa o le lalolagi ma faafitauli, lea e iʻu ai i faanoanoaga, popolega ma tigā. Pe na e fesagaʻia ni faafitauli, ma oo ai iā te oe ni faalogona faapena? Atonu o e mafatia ona o se maʻi, po o le maliu foʻi o se tasi e pele iā te oe. E te ono fesili ifo, ʻPe e mafai ona foʻia mafatiaga o le olaga?’ Ua saunia mai e le Tusi Paia se tali maufaatuatuaina mo lenā fesili.

1. O le ā le faamoemoe o loo faailoa mai i le Tusi Paia?

E lē gata o loo faamatala mai i le Tusi Paia le māfuaaga ua faatumulia ai lenei lalolagi i faafitauli, ae o loo faailoa mai ai foʻi le tala lelei. E lē tumau ona iai faafitauli, ae ua toeitiiti lava aveesea. E mafai e folafolaga o loo i le Tusi Paia ona aumaia “se lumanaʻi ma se faamoemoe.” (Faitau le Ieremia 29:11, 12.) O nei folafolaga, e fesoasoani iā i tatou e onosaia ai faafitauli i le taimi nei, maua ai se vaaiga saʻo, ma maua ai le fiafia tumau.

2. E faapeʻī le lumanaʻi o loo faamatala mai i le Tusi Paia?

O loo faamatala mai i le Tusi Paia le lumanaʻi “e lē toe iai se oti, po o se faanoanoa, po o se tagiauē, e lē toe iai foʻi se tigā.” (Faitau le Faaaliga 21:4.) O le a lē toe iai faafitauli ia e faapogaia ai mafatiaga i aso nei e pei o le mativa, faiga lē tonu, ma maʻi o le tino. Ua folafola mai foʻi, o le a fiafia tagata i se olaga e faavavau i le lalolagi Parataiso.

3. E faapefea ona e mautinoa o le a taunuu moni folafolaga a le Tusi Paia?

E toʻatele tagata e naunau e faataunuu mea lelei e mafaufau i ai, ae e latou te lē mautinoa pe e taunuu moni na mea. E ese mai ai la folafolaga a le Tusi Paia. E mafai ona atiaʻe lo tatou maufaatuatuaina o na folafolaga, e ala i le ʻmatuā iloiloina o Tusitusiga Paia.’ (Galuega 17:11) A o e suʻesuʻeina le Tusi Paia, e mafai ona e filifili pe e te talitonu i mea o loo taʻua ai e faatatau i le lumanaʻi.

SAʻILIʻILI ATILI

Iloilo nisi o mea o loo folafola mai i le Tusi Paia o le a faataunuu i le lumanaʻi. Ua faapefea ona fesoasoani le faamoemoe o loo i le Tusi Paia i tagata i aso nei?

Tuufaatasiga o ata: O vaaiga eseese o loo faatusatusa ai tulaga o o loo fesagaʻia e tagata i aso nei, ma le tulaga ua folafola mai i le Tusi Paia o le a iai i le lumanaʻi. O nisi vaaiga o loo i le isi itulau.

4. Ua folafola mai i le Tusi Paia le faamoemoe o le ola e faavavau i se tulaga lelei atoatoa

Tagaʻi i le lisi o folafolaga o loo i le Tusi Paia. O lē fea o nei folafolaga e te fiafia i ai? Aiseā?

Faitau mau o loo i autafa o nei folafolaga, ona talanoa lea i fesili nei:

Pe e aogā nei mau iā te oe? Pe e aogā i ou tauaiga ma au uō?

Faaata le ola i se lalolagi

O LE A LĒ TOE IAI . . .	O LE A OLIOLI TAGATA UMA I . . .
se tigā, soifua matua, po o le oti.—Isaia 25:8.	le toe faatutū mai o ē pele ua maliliu.—Ioane 5:28, 29.
se maʻi po o aafiaga tumau o le tino.—Isaia 33:24; 35:5, 6.	le mauaina o le soifua mālōlōina lelei ma toe faafouina le malosi e pei o le malosi o le talavou.—Iopu 33:25.
ni faiga lē tonu.—Isaia 32:16, 17.	le tele o meaʻai, fale lelei, ma galuega e maua ai le faamalieina.—Salamo 72:16; Isaia 65:21, 22.
ni mafatiaga ona o taua.—Salamo 46:9.	le tele o le filemu.—Salamo 37:11.
ni manatunatuga e tigā ai pe toe manatua foʻi na mea.—Isaia 65:17.	le ola e faavavau i se tulaga lelei atoatoa.—Salamo 37:29.

O se tamaitiiti na maʻi ae ua malosi o loo fusi lona tinā.

O se tamāloa na aafia i le soifua matua, ua toe talavou ma o loo tulei se uilipaelo e tumu i fualaau ʻaina.

5. E mafai e folafolaga a le Tusi Paia ona faaleleia olaga

O le toʻatele o tagata ua lotovaivai ma oo ai lava ina feita ona o faafitauli o loo siʻomia ai i latou. E taumafai malosi nisi e faaleleia le tulaga o mea. E faapefea i folafolaga a le Tusi Paia e uiga i le faaleleia o le tulaga o mea, ona fesoasoani i tagata i aso nei? Faaali le VITIŌ, ona talanoa lea i fesili nei:

VITIŌ: Na Ou Manaʻo e Faatoʻilalo Faiga lē Tonu (4:07)

Tuufaatasiga o ata: O se vaaiga mai le vitiō ʻNa Ou Manaʻo e Faatoʻilalo Faiga lē Tonu.’ 1. O Rafika ma isi tagata o loo aoina vavae a o talavou. 2. Na maofa Rafika i le vaaia o tagata mai atunuu eseese o loo autasi, i se tauaofiaga a Molimau a Ieova na ia auai ai mo le taimi muamua.

I le vitiō, o ā faiga lē tonu na feagai ma Rafika?
E ui e leʻi aveesea faiga lē tonu, ae na faapefea ona fesoasoani le Tusi Paia iā te ia?

E mafai ona fesoasoani le faamoemoe mo le lumanaʻi o loo i le Tusi Paia iā i tatou, e foʻia ai le lotovaivai ma manumalo ai i o tatou faafitauli. Faitau le Faataoto 17:22 ma le Roma 12:12, ona talanoa lea i fesili nei:

Pe e mafai e le faamoemoe o loo i le Tusi Paia ona fesoasoani e faaleleia lou olaga i le taimi lenei? Aiseā?

UA FAAPEA MAI NISI: “E lē mautinoa pe e taunuu moni folafolaga a le Tusi Paia e faatatau i le lumanaʻi.”

Aiseā e tāua ai lou iloiloina o faamaoniga?

AOTELEGA

Ua aumaia i le Tusi Paia le faamoemoe, ma fesoasoani iā i tatou e feagai ai ma luʻi, e ala i le folafola mai o se lumanaʻi fiafia.

Fesili Autalu

Aiseā e tatau ai ona iloa e tagata le faamoemoe?
O le ā ua taʻu mai i le Tusi Paia e faatatau i le lumanaʻi?
E faapefea i le iai o se faamoemoe i le lumanaʻi ona fesoasoani iā i tatou i le taimi lenei?

Le aso na uma ai le lesona:

Sini

Ia faamasani i folafolaga a le Tusi Paia e ala i le faitau i mau o loo i lenei lesona.

Isi sini:

Your other goal

MANATU FAAOPOOPO

Ia aʻoaʻo atili le auala e fesoasoani ai le faamoemoe iā te oe pe a feagai ma faafitauli.

“Faamoemoe—O Fea E te Maua Ai?” (Ala Mai!, Iulai-Setema 2004)

Iloilo pe faapefea ona fesoasoani le faamoemoe mo le lumanaʻi, iā i latou o loo feagai ma maʻi faaumiumi.

“Aafia i se Maʻi Faaumiumi—Pe e Mafai Ona Fesoasoani le Tusi Paia iā te Oe?” (Mataupu i le jw.org)

Pe a e matamata i lenei vitiō o musika, ia faaata o loo e olioli faatasi ma lou aiga i totonu o le Parataiso o loo folafola mai e le Tusi Paia mo le lumanaʻi.

Faaāta le Taimi (3:37)

Faitau i le auala na suia ai le olaga o se tasi na tetee malosi i suiga, ina ua ia aʻoaʻoina le faamoemoe mo le lumanaʻi o loo i le Tusi Paia.

“Ou te Lē o Toe Mafaufau e Suia Mea o Loo Tutupu i le Lalolagi” (Le Olomatamata, Iulai 1, 2013)