Talavou O E Faafiafiaina le Finagalo o Ieova
“Ma e faafiafia loʻu loto; ona ou mau tali ai lea i lē faifai mai.”—FAATAOTO 27:11.
1. Ua faapefea ona aafia Le Na Foafoaina i tatou ma ō tatou matua i le auala o ola ai o tatou olaga?
TUSA LAVA pe ua e iloa pe leai, e i ai le eseesega i le auala o loo e faaaogā ai lou ola. Mo se faaaʻoaʻoga, e i ai se eseesega i ou matua. “O le atalii poto na te faafiafia lona tamā,” ua faamatala mai e le Tusi Paia, “a o le tama valea e faanoanoa ai le tinā.” (Faataoto 10:1; 23:24, 25) A e o le mea e sili ona tāua, o le auala o loo e faaaogā ai lou ola e mafai ona fiafia pe faanoanoa ai foʻi Le Na Foafoaina i tatou, o Ieova le Atua. “Loʻu atalii e, ia poto oe,” ua timaʻi mai ai Ieova “ma e faafiafia loʻu loto; ona ou mau tali ai lea i lē faifai mai.”—Faataoto 27:11.
2. O le ā le finauga faitaulia na lagā e Satani, ma ua faapefea ona aafia ai i tatou?
2 O lē o loo faifai ia Ieova, o ia o Satani le Tiapolo. I le faatoaga i Etena, sa lagā ai e Satani le finauga faitaulia e manaomia ai se tali mai le Atua. Ina ua mafaia e foliga mai ma le faigofie, e le Tiapolo Eva ma mulimuli ane o Atamu, e solia le tulafono a le Atua, ua i ai la se faamaoniga o lona luʻia o Ieova. I se faaupuga, na faufaualuga Satani: “Tau lava ina tuʻu mai se avanoa ona mafai lea ona ou faaliliueseina soo se tasi mai le auauna atu ia te oe.’ (Iopu 1:6-12) O le mea lea, na tapa ai e Ieova le faaupuga mafana ua faamauina i luga, faapea ua avatu e lona atalii le “tali” ia te Ia ina ia mafai ai ona Ia fesagai ma le luʻi a Satani.
3. Ai se ā sa faatatau patino ai le olega a Ieova ia Iesu, ma o ai isi o le a latou faafiafia foʻi le finagalo o le Atua?
3 Peitaʻi, o ai patino na faatatau i ai e Ieova lenei olega, i le taʻua o ia o “lou atalii”? O Iesu Keriso ua i ai i le ala tutasi o le alo o le Atua, i le avea o lona Atalii pele e toatasi. (Ioane 1:14) E le gata i lea, e ese ai mai ia Atamu, o le na lē taulau i Le Na Foafoaina o ia, ua na o Iesu le tagata lelei atoatoa na femaliuaʻi i luga o le lalolagi, ua na o ia lava le tagata ua mafaia ona faamaonia i le tulaga atoatoa faapea e mafai ona tausia le faamaoni i le Atua. (1 Korinito 15:45) O lea, o le faaupuga a Ieova e faatatau tonu lava ia Iesu. Ma sa leʻi faaamasiasia e Iesu lona Tamā. E ala i ona ala faamaoni na mafai ai e Iesu ona tuuina atu se tali i le Atua i le luʻi gugutu a Satani faapea e lē mafai e le fanau a tagata ona auauna faamaoni ia te Ia i lalo o tofotofoga. (Eperu 2:14; 12:2) E faaopoopo i ai, o i latou uma o le a pule faatasi ma Keriso i le lagi o le a latou faafiafiaina foʻi le finagalo o Ieova ona o lo latou faamaoni i le Atua e oo lava i le oti.—Faaaliga 2:10.
4. Pe a filifili le mea e faia i lou olaga, o le a le mataupu faitaulia e tatau ona e manatunatu i ai?
4 A e faapefea ona tatou i aso nei, e aofia ai ma outou le au talavou? O tou auai ea i lenei finauga pe mata o le a faamaoni le fanau a tagata i le Atua pe leai? Ioe o loo aofia ai outou! (Salamo 147:11; 148:12, 13) Atonu tou te lē o iloa, a e o le auala o loo faaaogā ai outou olaga e lagolagoina ai le itu a le Atua o le finauga po o le itu a Satani. E faafiafiaina ai a lē o Ieova o Satani. E moni lava, o le valaau po o le olega a Ieova e mafai ona manatu i ai o loo tuusaʻo, mai lava ia te oe: “Loʻu atalii e, [po o le afafine], ia poto oe, ma e faafiafia loʻu loto; ona ou mau tali ai lea i lē faifai mai.” (Faataoto 27:11) Pe le o le faafiafiaina o le finagalo o Le Na Foafoaina oe o se sini faamalie loto lea ia e mauaina?
O Le Pogai e Poto Ai
5. Ai se ā e poto ai le faafiafia o le finagalo o Ieova?
5 Matau ua faalaeiau mai Ieova, “Ia poto oe.” Ai se ā e avea ai i tatou o ē popoto pe a tatou faafiafia le finagalo o Ieova? Auā o Ieova o se Tamā alofa o lē finagalo i le mea e silisili ona lelei mo i tatou, ma o so o se mea e fetalai mai ai o ia iā i tatou e fai, e mo lo tatou lelei. E pei ona fai mai le Isaia 48:17, 18: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai. E! ana uai mai ou taliga i aʻu poloaiga, po ua tusa ma se vaitafe lou manuia; ma lau amiotonu, e tusa lea ma peau o le sami.”
6. (a) O le ā o faaalia a i o loo finagalo Ieova ia e olioli i le ola? (e) O ā iʻuga e lē mafai ona e alofia?
6 E pei o se matua alofa, ua faapena ona finagalo Ieova ia e olioli atoatoa i lana meaalofa tāua o le ola. O lea, ua ia fetalai ai: “Le taulealea e, ina olioli ia i lou tama itiiti, ia fiafia foi lou loto i aso o lou taulealea, ma ia e savali i ala ua e loto i ai, ma mea e vaai i ai ou mata.” O le mea moni, i nei e lē o se valaaulia e faia mea uma e lelei i lau lava vaai pe ua e manao i ai. Ua faaalia lenei i le lapataiga ua mulimuli mai: “A ia e iloa e faamasinoina oe e le Atua ona o na mea uma.” (Failauga 11:9) Ioe, e lē mafai ona e alofia le iʻuga o au gaoioiga; o le a e nofo vaavaaia i le Atua ona o mea ua e faia. E mautinoa lava le tulafono: “O le mea e luluina e le tagata, o le mea lava lea e seleseleina mai ai e ia.”—Kalatia 6:7.
7, 8. (a) E mafai faapefea ona e faateʻa ese le tiga ma taumamao i mala? (e) O afea e faatauvaa ai le taulealea ma le tamaitiiti o le olaga?
7 O le mafuaaga lena ua faaopoopo mai ai Ieova: “O lenei, ina faatea ese ia le tiga [po o le pogai o popolega] i lou loto, ma tuu ese atu le leaga i lou tino; auā o le tama itiiti ma le taulealea e faatauvaa ia.” (Failauga 11:10) Ioe, o le mea poto ona aloese mai gaoioiga e faapogaia ai ona lutia i faafitauli mulimuli ane. E moni, o le a i ai i latou o le a faapea mai e i ai se mea ua e misia—e te lē o ‘ola moni’ seʻiloga ua e onā, faia feusuaiga lē mamā, po o o le faia o isi lava mea e “faaulaula”. A e paga lo latou valea! “E mautinoa lava lo latou lē aogā,” na auē ai ma loimata se tasi talavou aʻoga ina ua uma ona faia le faitaaga. “O loʻu popole ua leai sona tusa.”
8 O lea o outou talavou, ia utagia ma le poto fautuaga a le Atua ina ia aveesea mai ai i ō outou loto so o se pogai o popolega po o faanoanoaga, e pei o lena na oo i ai nisi talavou o ē na tausisi i se auala e faaleagaina ai po o le olaga manatu faapito. Na matauina e se tagata tusitala o le 17 senituri faapea: “O le vaega aupito sili o galuega a le fanau a tagata, i o latou uluaʻi tausaga, o le faaleagaina lea o o latou tausaga mulimuli.” E moni, a e paga le faanoanoa! Pe a faamaumauina e se talavou lona malosi faaletino ma lona tomai i se auala e sili atu ai ona faigata ona tausaga mulimuli o se tagata matua, o le mea moni o lona talavou ma ona tausaga muʻa ua maimau! (Faataoto 22:3) O lea ia poto! Mulimuli i nei apoapoaiga faaopoopo: “O lenei, ia e manatua le na faia oe i ona po o lou taulealea.”—Failauga 12:1.
9. O ā aogā o le a e olioli ai pe a manatua Ieova i ona po o lou taulealea?
9 Afai e manatua e Ieova i ona po o lou taulealea, o le a e maua ai la ni aogā totino. O le a le gata ina e aloese ai mai le lutia ma faigata e pei o ni mala a e o le a e olioli nei i se olaga fiafia tauia, i le auauna atu i le Silisili o Le Na Faia oe. E faaopoopo i ia, o le a e teuina ma le poto ʻoa i le lagi e aogā mo oe e oo i le faavavau lava. (Mataio 6:19-21) A e manatua nei Ieova e ala i le faia o lona finagalo, o le a ia manatu oe ma tauia oe e tusa ai ma “mea e manao i ai lou loto,” ioe, o se olaga fiafia, e atoatoa i le Parataiso e faavavau!—Salamo 37:4; 133:3; Luka 23:43; Faaaliga 21:3, 4.
O le a Lou Lagona e Uiga ia Ieova?
10. (a) Ai se ā e lē tatau ai ona avea lau filifiliga e auauna ia Ieova e na o se faaiʻuga e filifili ma le poto e aunoa ma se lagona? (e) O le ā le isi olega atili na faia e Ieova?
10 A e ui i lea o lau filifiliga e auauna ia Ieova e lē mafai ona tau o se faaiuga ua fuafua lelei i le poto e aunoa ma se lagona. O Satani o se fili e poto leaga ma afai o e manatu i na o ni lelei mo oe lava, o le a lē pine a e taaina oe i se faiga manatu faapito e tosoese ai oe mai i lou auauna atu ia Ieova. O lea, e le na ona valaaulia oe e Ieova ia e poto. E leai, a e ua ia ole atu foʻi mo se tuuina atu totino ia te ia. Na fetalai Iesu: “E te alofa i le Alii [o Ieova] lou Atua ma lou loto atoa.” (Mataio 22:37) E te iloa le uiga o le alofa atu ia Ieova ma le loto atoa?
11. (a) O le ā le uiga o le tuuina atu o lou loto ia Ieova? (e) Ua faapefea pe faapefea i uunaiga saʻo o le loto ona tosina i tatou e faia le finagalo o le Atua?
11 O lou loto, e faasino lea i lou tagata i totonu, o ou lagona, ou uiga, ma ou faalogona loloto, faatasi ai ma ou mafaufauga. O lea o le alofa atu ia Ieova ma lou loto atoa o lona uiga e te alofa faapelepele ia te ia ma i lō mea uma lava i lse olaga o lau filifiliga maoti ia faafiafiaina lona finagalo i le avatua lea o se tali ia te ia e tusa ai ma le faifai mai a Satani. O lena fautuaga ma faalogona loloto o le alofa ma le manatu mamafa i le Atua o le a avatu ai ia te oe ni uunaiga malolosi ina ia faia lona finagalo, e tusa lava pe foliga mai e manaia tele ona faia o se tasi mea. Sa ia Iosefa talavou se alofa faapena mo Ieova, o lea ina ua tauanau o ia e se fafine lauiloa: “Ta te momoe,” na tali atu Iosefa: “Pe faapefea ona ou faia lenei mea leaga tele ma ou agasala ai i le Atua?”—Kenese 39:7-9.
12. (a) E faapefea ona faaalia ua e avatu lou loto ia Ieova? (e) Afai e leʻi avatu lou loto ia Ieova, o ā fesili e tatau ona e manatunatu i ai?
12 E te faailoa atu lou alofa ia Ieova ma lou loto atoa pe a e alu atu ia te ia i le tatalo ma taʻu atu ia te ia e te manao e fai oe mo ia, e te manao e auauna ia te ia e oo i le faavavau. I lenei auala e tuuina atu ai oe ia Ieova. Ua e faia lenei mea? Afai e leai, ai se ā ua le faia ai? O le ā o taofia oe? Ua lava ea lou matua e malamalama ai ma talisapaia le finauga sili i le va o Ieova ma Satani? Ma pe o e manao ea e faafiafia le finagalo o Ieova? E mautinoa lava e le o manao Satani e te alofa ia Ieova ma lou loto atoa. Ua manao o ia ia te oe ma le manatu faapito “e fai a oe,” faamalie a lou tagata. O ai o le a e faafiafia, o Ieova po o Satani? Ia mafaufau loloto i lena mea.
13. Afai ua e tuuina atu ma papatisoina, o ā fesili e tatau ona e fesiligia ai oe lava?
13 Afai ua e tuuina atu oe lava i le Atua ma faatinoina i le papatisoga i le vai, pe ua faaalia ea e ala o lou olaga ua avea aʻiaʻi lou loto i le Atua? O fea o i ai ou faanaunauga, lou alofa, taulaʻi? i le fia maua o se taavale fou? le sailia o tupe e faatau ai lavalava po o isi lava mea totino? O faanaunauga o ai e faamuamua—o ou lava po o Ieova? Ua e tali atu ea i le faaupuga a Ieova e tuʻu atu lou loto atoa ia te ia?
14. (a) O le ā se mea totino tāua ua i talavou? (e) Ai se ā o se mea e faanoanoa ai pe a lē manatua e se taulealea Le Na Faia o ia?
14 Ona o ē matutua ua lava lo latou tomai ma e masani foʻi ona tele le poto, ua i ai la i le au talavou se mea totino e mafai ona latou faaaogā e faafiafia ai le Atua. “O le matagofie o taulelea, o lo latou malosi lea,” ua fai mai ai le Tusi Paia. (Faataoto 20:29) O lea ia faaaogā nei lena malosi. Manatua Le Na Foafoaina oe i ona po o lou taulealea “a o leʻi oo mai aso leaga” o le tagata matua, pe a oo ina vaivai le tino ua le lava le malosi o totoga ma le gaoioi e pei ona tatau ai. Paga le faanoanoa mo se tagata ua le taulau ona manatua Le Na Foafoaina o ia i ona po o lona taulealea ma i lona tagata matua ua leai se mea e toe vivii atu ai o ia i le Atua! E “matua faatauvaa lava!” (Failauga 12:1-8) O le mea lea, o se tulaga poto le manatu o Le Na Foafoaina oe a o i ai lou malosi ma le malaulau. Atiina aʻe se tala o le auaunaga faamaoni i le Atua, o lē na te manatua oe i le faamasinoga tonu o lona finagalo malie, ioe, i le ola e faavavau.—Eperu 6:10-12; Failauga 12:13, 14.
Na Latou Faafiafia le Finagalo o le Atua
15. O ā faaaʻoaʻoga faale-Tusi Paia ua i ai o talavou o e na faaaogā lo latou malosi i le auaunaga a le Atua?
15 Ua tumu le Tusi Paia i faaaʻoaʻoga o talavou o ē na faaaogā lo latou “matagofie”— lo latou malosi— i le auaunaga a le Atua. O “taulealea” tiotio ma le gaoioi vavave na ō e sipai le Nuu o le Folafolaga. (Iosua 6:22, 23; 2:15, 16, 23) O Tavita, i le taimi o le 20 o ona tusaga, na ia aauina atu “taulelea e toasefulu” ma le savali e talosagaina le agalelei o Napalu. (1 Samuelu 25:4, 5) Ina ua toe fausia e sa Iutā i lalo o le kovana o Neemia pa o Ierusalema, a o i lalo o faamatalaga o osofaiga, o ai na faia le galuega mamafa, ma le mataʻutia? “Na vaeluaina ai aʻu auauna [talavou],” o le tala lea a Neemia, “sa ia fai galuega le tasi vaega, a o le tasi vaega na latou uʻu i tao, ma talita, ma aufana, ma ofutau.”(Neemia 4:16) Ina ua tāia e Ieova Anania ma lana avā o Safaira i le oti ona o lo la pepelo, ona ave lea e “taulelea” ia te i laua i fafo ma tanu.—Galuega 5:5, 6, 10.
16. O ā ni gaoioiga faaleagaga na auai ni talavou i aso ua mavae?
16 Ioe, e fiafia le finagalo o Ieova pe a faaavanoa e talavou i latou lava mo so o se auaunaga e manaomia ai i lena taimi. E ui i lea ua aafia pea talavou i gaoioiga faaleagaga sa manaomia ai e sili atu na i lo le malosi faaletino ma le lavatia. “Ou te itiiti au,” sa faailoa atu ai e Eliu. A e peitaʻi sa faaaogā o ia e Ieova e faasaʻoina Iopu. (Iopu 32:4-6) O Samuelu e na o se “tama“ ina ua amata ona auauna i le falefetafaʻi i Sailo. (1 Samuelu 2:18) E ui lava o le “teine itiiti” o lē sa auauna o se pologa i le fale o Naamanu, a e sa ia faalauiloa atu ma le lē fefe mea e mafai ona faatino e le perofeta a Ieova. (2 Tupu 5:2-4) Ina ua tofia e Ieova Ieremia e avea ma perofeta, sa faapea atu Ieremia “O aʻu o le tama itiiti.” (Ieremia 1:5, 6) “A o ia tama e toafa”—o Tanielu ma ana uo Eperu e toatolu—maeu ni auauna mataina a Ieova sa i ai i le tafeaga i Papelonia! (Galuega 23:16-22) Ona i ai lea o le tama talavou o Timoteo, o le na iloa Tusi Paia a o itiiti ma faaaogā lona talavou i le auaunaga ia Ieova.—2 Timoteo 3:15; Filipi 2:19-23; 1 Korinito 4:17.
Faafiafia le Finagalo o Ieova i Aso Nei
17. Ai se ā e tatau ai ona tatou faatalitalia o le a i ai ni talavou i aso nei o e faafiafia le finagalo o Ieova, ma pe o tatou vaaia ea?
17 Ma e le na o talavou o aso ua mavae sa faafiafia le finagalo o Ieova i a latou auaunaga faamoni. “O ona aso e gata ai, o loo faapea mai le Atua, e iu ina ou liligi ifo ai loʻu Agaga i luga o tagata uma lava; ona perofeta mai lea o outou atalii ma o outou afafine, e iloa faaaliga e o outou taulelea.” (Galuega 2:17; Ioelu 2:28) O lea e tatau ona tatou faatalitali ai ma le tonu le toatele o talavou Kerisiano o loo faafiafiaina Ieova i nei aso e gata ai. Ma o loo tatou vaaia! Ona o Molimau a Ieova e i ai o latou sese, e pei foʻi o i tatou, e toatele o loo agaigai i luma i se auala e sili ona lelei i le avea ma Kerisiano. O loo latou manatu mamafa i le faafiafiaina o le finagalo o Ieova.—Faataoto 27:11; 3:1.2.
18, 19. O le ā le galuega e manaomia ona faia i aso nei, ma ai se a ua talafeagai lelei ai mo le au talavou?
18 I nei aso e gata ai, o le finagalo o Ieova ia tuuina atu se molimau sili faalekelope e uiga i lona Malo, lea e aafia ai se taumafaiga tele. (Mataio 24:14) Ua manaomia ona fausia ni Maota o le Malo mo le tapuaiga, faapena foʻi ma ni fale e tetele atu mo fonotaga matagaluega. I le tele o atunuu, ua manaomia ai le faateteleina o fale gaosi mea mo le saunia o lomiga faale-Tusi Paia, atoa foʻi ma ni faaopoopoga i nofoaga i aiga Peteli. O le saunia o nei fausaga fou e manaomia ai galuega mamafa, ma e pei ona fausia o le pa i aso o Neemia, o loo faia foʻi e talavou malolosi ma le lavatia le tele o le galuega.
19 Ua faapena foʻi ona faia e nei talavou le tele o galuega mamafa faaletino o loo manaomia i le lomia, tuufaatasi, ma auina atu i vaa le faitau afe o tone o lomiga faale-Tusi Paia i tausaga taitasi. O le mea moni, i le ofisa autu o Molimau a Ieova i Niu Ioka, e aofia ai ma Watchtower Farms, e sili atu i le 1,400 talavou e 25 tausaga le matutua ma lalo ifo. Ma o la latou auaunaga e lē o faatapulaaina i galuega mamafa faaletino latou te faia i le vaiaso; i le faaiʻuga o vaiaso latou te auai i le galuega talaʻi mai lea fale i lea fale ma i sauniga faa-Kerisiano faatasi ma faapotopotoga. Maeu lo latou faafiafia o le finagalo o Ieova!
20. (a) O le ā se sao o talavou i le faiva faapaeonia? (e) O ā fesili e tatau i talavou e lē o auai i le faiva sauatoa ona fesili ifo ai ia i latou lava?
20 I le Iunaite Setete, ua galulue soʻotauau ma nei talavou e sili atu i le 12,700 isi o lea lava tupulaga o e o loo auauna o ni faifeau paeonia sauatoa. I isi vaega o le lalolagi, e sili atu i le faitau sefulu afe o e talavou o loo paeonia ai. Afai o oe o se talavou e lē o auauna sauatoa nei i le faiva, e mafai ea ona e faataʻatia ni sini e faamuamua ai Ieova i lou olaga, na i lo o le na ona faanaunau e maua se galuega e lelei le totogi, ona faaipoipo ai lea ma fai se aiga? O e malamalama ea i le finauga sili faalevateatea? O e naunau moni ea e vaai atu ua faamamāina le suafa o Le Sili Na Foafoaina Mea mai faifaiga? Afai o lea, e lē o se mea tatau ea la ona e fai mea uma e te mafaia i le auaunaga ia Ieova? Ma pe le aofia ai ea i lena, pe a mafai mo le toatele o outou, tauofo e auauna i aiga Peteli po o le auai i le galuega paeonia?
21. (a) O le ā le valaau mai ia Ieova e tatau ona e tali atu i ai, ma e faapefea? (e) Ai se ā tatou te mautinoa ai e toatele foʻi le au talavou o le a tali atu i le valaau a Ieova e pei ona sa faia e Isaia?
21 Faalogo! Ua valaaulia outou e Ieova, ioe, ole atu ia te outou, ina ia avatu mo ia se tali mo faifaiga a Satani. E mafai ona e faalogo e pei o Isaia, i le fetalai mai a Ieova: “O ai ea ou te auina atu? O ai foi e alu atu mo i matou?” Ai se ā e le avea ai ma se ua poto a tali atu e pei o Isaia: “O aʻu lenei, ina auina atu aʻu.” (Isaia 6:8) Ua matou mautinoa o le a sili atu ona toatele outou le au talavou o le a tali atu auā ua folafola mai e le Afioga a le Atua: “E faitaulaga ma le loto ou tagata i le aso o lou malosi . . . E ia te oe le sau o lou taulealea [o teine foʻi].” (Salamo 110:3; 148:12, 13) Ma pe a e tali atu, e mafai ona e maua le olioli i le iloa o loo silasila Ieova ma faamaonia o loo e faafiafia lona finagalo!
PUSA MO LE AUTALUGA
◻ Ai se ā e tāua ai ia Ieova le auala o loo faaaogā ai o tatou olaga?
◻ Ai se ā e poto ai ona faafiafia le finagalo o Ieova?
◻ E faapefea ona mafai ona tatou faaalia ua avatu o tatou loto ia Ieova?
◻ O ai i taimi ua mavae na faafiafia le finagalo o Ieova, mana faapefea?
◻ O ai o loo latou faafiafia le finagalo o Ieova i aso nei, ma e faapefea?
[Faamatalaga faaopoopo i le itulau 17]
A solia e le au talavou tulafono a le Atua, latou te seleseleina mai ai ni tulaga ogoogo
[Ata i le itulau 18]
Sa faafiafiaina e talavou le finagalo o le Atua i lo latou fesoasoani lea e toe fausia pa o Ierusalema