Talavou ua Faafiafiaina le Finagalo o Ieova

Ua saunia faapitoa nei mataupu o suʻesuʻega mo talavou Molimau a Ieova. O lea, matou te faalaeiauina ai talavou ina ia suʻesuʻe ma le faaeteete i lenei mataupu, ma ia faia ni sao se tele pe a talanoaina i le Suʻesuʻega o Le Olomatamata a le faapotopotoga.

“Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.”—Faataoto 27:11.

1, 2. (a) Faamatala po o le tosina atu i mea a le lalolagi o lona uiga o le a lē talafeagai ai ona avea oe ma se Kerisiano. (Roma 7:21) (e) O le ā ua e aʻoaʻoina mai i le faaaʻoaʻoga a Asafo? (Tagaʻi i le pusa, itulau e 13.)

SEʻI mafaufau faapea o loo e faia se faatauga ofu. A o e matamata solo, na tau ai lau vaai i se ofu manaia lava e te fiafia i ai. E foliga mai e matuā fetaui lelei le lanu ma le sikaili mo oe, ma e matuā taugofie lava. Ae ina ua e matuā vaavaai totoʻa lava i ai, na faateʻia oe, ina ua e vaai i le pito o le ofu, e tuai lava le ie ma e leaga le suʻiga. E foliga manaia mai le ofu, ae lē lelei. Pe o le a e faaaluina ea au tupe i se ofu leaga faapena?

² E mafai ona faatusatusa atu le tulaga e pei ona taʻua i luga, ma le tulaga e mafai ona e faafesagaʻia i le avea ai ma se talavou Kerisiano. O lau uluaʻi vaaiga i mea a lenei lalolagi, e matuā faatosina lava e pei o le ofu lea sa taʻua. O se faaaʻoaʻoga, atonu e ō atu au aumea i le aʻoga ma fiafia i ni patī, faaaogā fualaau faasāina, faia inugāʻava, faia ni tuugātala e lē popole i āuga e oo i ai, ma faia feusuaʻiga a o leʻi faaipoipo. Pe e te tosina atu ea i nisi taimi i lenā ituaiga o olaga? Po o e moomoo ea e fia faataʻitaʻi laʻitiiti i lo latou saʻolotoga? Afai o le tulaga lenā, aua le vave ona faia se faaiʻuga faapea o oe ua matuā leaga ma ua lē talafeagai ai ona avea ma se Kerisiano. O le mea moni, ua faailoa mai e le Tusi Paia e mafai ona malolosi faatosinaga a le lalolagi e oo lava i se tasi o loo manaʻo e faafiafia le Atua.—2 Timoteo 4:10.

3. (a) Aiseā e lē aogā ai le saʻilia o mea a le lalolagi? (e) E faapefea ona faamatalaina e se tasi Kerisiano le faatauvaa o le saʻilia o mea a le lalolagi?

³ O lea la, faamolemole seʻi tagaʻi totoʻa i mea o loo ofoina atu e le lalolagi iā te oe, e pei lava ona e vaavaai i se laʻei sa e manaʻo e faatau. Ia fesili ifo iā te oe lava, ‘Po o le ā le lelei o lenei faiga o mea?’ Ua taʻua e le Tusi Paia e faapea “e mavae atu foʻi le lalolagi.” (1 Ioane 2:17) O so o se fiafiaga lava e maua mai i le lalolagi o le a lē tumau i se tulaga e sili ona lelei. Ae lē gata i lea, o amioga e lē faaleatua e iai ni ona āuga mataʻutia. E mautinoa e lē aogā. Ua taʻua e se tasi Kerisiano o lē sa ia onosaia le mea e taʻua o “tigā ona o le faaaogā sesē o le taimi o lona talavou” e faapea: “Atonu e foliga manaia mai ma faatosina le lalolagi. Ma e manaʻo iā te oe ia e talitonu e mafai ona e maua le fiafia e aunoa ma ni tigā. Peitaʻi e manino mai e lē mafai ona tupu lenā mea. O le a faaaogā oe e le lalolagi, ma pe a uma, ona lē toe amanaia loa lea o oe.”a Aiseā la o le a maumau ai fua lou talavou i na tulaga maulalo o le olaga?

Puipui Mai i “Lē o Loo Leaga”

4, 5. (a) O le ā sa talosaga atu ai Iesu i lona tamā, a o latalata lona maliu? (e) Aiseā na talafeagai lelei ai lenei talosaga?

⁴ Ua tauivi talavou Molimau a Ieova e ʻalofia le faauō ma lenei lalolagi, ona ua latou iloaina le lē aogā o mea o loo ia ofoina mai. (Iakopo 4:4) Pe o oe ea o se tasi o nei talavou faamaoni? Afai o lea, e avatu la le faamalō iā te oe. O le mea moni, e lē faigofie ona teena omiga mai aumea ma e tū ese mai iā i latou, peitaʻi e mafai ona fesoasoani se tasi iā te oe.

⁵ A o latalata i lona maliu, na tatalo ai Iesu iā Ieova ina ia “tausi” i ona soo “mai lē o loo leaga.” (Ioane 17:15) Na faia e Iesu lenei talosaga mo se māfuaaga lelei. Sa silafia e Iesu o le a lē faigofie mo ona soo ona tausia le faamaoni, po o le ā lava lo latou matutua o loo iai. Aiseā? O se tasi o māfuaaga, sa silafia lelei e Iesu, o le a fesagaʻi ona soo ma se fili malosi e lē vaaia o “lē o loo leaga,” o Satani le Tiapolo. Ua faapea mai le Tusi Paia o lenei meafaiola agaga leaga “o loo fealualuaʻi o ia e pei o se leona tagi, ua saʻili se tasi e ʻaina e ia.”—1 Peteru 5:8.

6. E faapefea ona tatou iloa e leai se alofa o Satani mo talavou?

⁶ I le faagasologa o talafaasolopito, na fiafia ai Satani e aumaia faiga sauā e sili ona mataʻutia i tagata. Seʻi manatu i mala mataʻutia na aumaia e Satani iā Iopu ma lona aiga. (Iopu 1:13-19; 2:7) Atonu e te manatua ni mea na tutupu i lou vaitaimi e faaalia ai le agaga sauā o Satani. E lē o faaalia e Satani se alofa i talavou aua loo fealuaʻi solo o ia e pei o se manu feʻai, e saʻili se tasi na te ʻaina. O se faataʻitaʻiga, i le amataga o le senituri mumua T.A., na faia ai e Herota se faufauga leaga ina ia fasiotia tama tane uma lava e taʻi lua tausaga pe laititi ifo foʻi i Peteleema. (Mataio 2:16) E foliga mai o Satani na ia uunaia Herota ina ia faia se taumafaiga e fasiotia ai le tama, o lē o le a iai se aso e avea ai ma Mesia folafolaina a le Atua ma aumaia le faamasinoga iā Satani! (Kenese 3:15) E manino lava, e leai se alofa o Satani mo talavou. E na o le pau lava lona sini o le faaleagaina lea o le tele o tagata na te mafaia. Ua matuā moni lenei mea i le taimi lenei, ona ua lafo ese Satani mai i le lagi i luga o le lalolagi, “ua lotoa tele, auā ua na iloa ua saasaa ona pō.”—Faaaliga 12:9, 12.

7. (a) E faapefea ona matuā ese Ieova pe a faatusatusa atu iā Satani? (e) O le ā le finagalo o Ieova e faatatau i lou fiafiaga i le olaga?

⁷ I se eseesega tele, o Satani, e “lotoa tele,” a o Ieova e “mutimutivale le alofa.” (Luka 1:78) O ia o le faataʻitaʻiga atoatoa o le alofa. O le mea moni, o lenei uiga lelei ua mātauina ai Lē na Foafoaina i tatou ua faamatala mai e le Tusi Paia e faapea: “O le Atua, o le alofa lava ia.” (1 Ioane 4:8) Pagā le eseesega o le atua o lenei faiga o mea, ma le Atua ua faaeaina oe e tapuaʻi atu i ai! O loo saʻili Satani e ʻaina se tasi, ae o Ieova “ua lē finagalo ia fano se tasi.” (2 Peteru 3:9) E tautele iā te Ia ola o tagata uma e aofia ai ma oe. Ina ua apoapoaʻi mai Ieova iā te oe i lana Afioga ina ia aua nei faia sau vaega i le lalolagi, e lē o taumafai o ia e taofia lou fiafia i le olaga pe faasāsā foʻi lou saʻolotoga. (Ioane 15:19) I le tuufaafeagai ai, o loo tausia oe e Ieova mai lē o loo leaga. E finagalo lou Tamā faalelagi ina ia e maua se mea e sili atu ona lelei na i lo fiafiaga o lenei lalolagi e vave ona mavae atu. E finagalo o Ia, ina ia e maua le “ola moni,” le ola e faavavau i le lalolagi parataiso. (1 Timoteo 6:17-19) E finagalo Ieova ia e taulau manuia, ma o loo ia uunaia oe ina ia ausia lenā sini. (1 Timoteo 2:4) Ae e lē gata i lea, ua faalautele atu e Ieova se valaaulia faapitoa mo oe. O le ā lenā valaaulia?

Ia “Faafiafia Loʻu Loto”

8, 9. (a) O le ā le meaalofa e mafai ona e avatu iā Ieova? (e) E tusa ai ma le mea na tupu iā Iopu, na faapefea ona faifai Satani iā Ieova?

⁸ Pe sa e faatauina ea se meaalofa mo sau uō mamae, ma ua e vaaia ona foliga fiafia i le faateʻia ma le faafetai i le mauaina o le meaalofa? Atonu na umi se taimi na e mafaufau ma manatunatu ai po le ā le ituaiga meaalofa e talafeagai lelei mo lenā tagata. O lea la, seʻi mafaufau i le fesili lenei: O le ā le ituaiga meaalofa e mafai ona e ofoina atu i Lē na Foafoaina oe, o Ieova le Atua? Muamua lava, e foliga mai e lē fetaui lea fesili. O le ā e manaʻomia e Lē Silisili Ese mai i tagata? O le ā se mea na te lē o mauaina e mafai ona tatou avatu iā te ia? Ua tali mai le Tusi Paia i le Faataoto 27:11 e faapea: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.”

⁹ E pei ona e iloaina mai i lou suʻesuʻeina o le Tusi Paia, o Satani le Tiapolo o ia lea o loo faifai iā Ieova. Na ia taʻua e faapea e lē o auauna tagata iā Ieova ona o le alofa, ae ona o ni māfuaaga manatu faapito. Na faapea mai Satani, afai e mafatia i latou i faigatā, o le a vave lava ona latou lafoaʻia le tapuaiga moni. O se faaaʻoaʻoga, seʻi mafaufau i le mea na taʻu atu e Satani iā Ieova e faatatau i le tagata amiotonu o Iopu: “Ua e lē siʻosiʻomia ea i le aupa o ia, ma lona fale, atoa ma ana mea uma i itu uma? ua e faamanuia le galuega a ona lima, ua e faateleina foʻi ana manu i le fanua. A e peitaʻi ia e aapa atu lou aao, ma e tago atu i ana mea uma, pe na te lē faifai ai ea iā te oe i ou lava luma?”—Iopu 1:10, 11.

10. (a) E faapefea ona tatou iloa na fesiligia e Satani le faamaoni o isi ae lē na o Iopu? (e) O faapefea ona e aafia i le finauga o le pule silisili ese?

¹⁰ E pei ona faaalia mai i tala o le Tusi Paia, na fesiligia e Satani e lē gata i le faamaoni o Iopu ae faapea foʻi le faamaoni o isi o loo auauna i le Atua e aofia ai ma oe. O le mea moni, pe a tautala e faatatau i tagata lautele, na faapea atu Satani iā Ieova: “O mea uma foʻi ua i ai i le tagata, [e lē na o Iopu ae ma isi foʻi] e avatua e ia e sui aʻi lona ola.” (Iopu 2:4) Po o e iloa lau matafaioi i lenei finauga tāua? Na fetalai Ieova e pei ona faaalia mai i le Faataoto e 27:11, e iai se mea e mafai ona e avatu iā te ia, e fai ma faamaoniga e tali atu ai i lē o faifai mai, o Satani. Seʻi mafaufau, o loo talosaga mai le Pule Silisili Ese Aoao iā te oe ina ia fai sau tali i le finauga sili lea ua leva ona lāgā. Maʻeu se matafaioi ofoofogia ma se faaeaga tutasi o loo iā te oe! Pe e mafai ona e faia le mea o fetalai atu ai Ieova iā te oe? Sa faia faapena e Iopu. (Iopu 2:9, 10) Sa faia foʻi e Iesu, faapena foʻi ma le lē mafaitaulia o isi i le faagasologa o le talafaasolopito, e aofia ai le toʻatele o talavou. (Filipi 2:8; Faaaliga 6:9) E mafai ona e faia le mea lava lenā. O se tasi o mea e ao ona faamautinoa, e tatau ona faia se gaoioiga. O le auala o loo e gaoioi ai, o le a faaalia ai po o e lagolagoina faifaiga a Satani po o le tali a Ieova. O lē fea o le a e filifili e te lagolagoina?

O Loo Manatu Mai Ieova iā te Oe!

11, 12. Afai e te filifili e auauna pe lē auauna iā Ieova, pe o le a aafia ai ea o ia? Faamatala.

¹¹ Pe e afāina iā Ieova po o le ā le filifiliga e te faia? Pe ua lē lava ea tagata ia na tumau i le faamaoni e avatu ai se tali saʻo iā Satani? Ua faamaonia le sesē o tuuaʻiga a le Tiapolo i lona faapea mai e lē o auauna tagata i le Atua ona o le alofa. Ae peitaʻi, o loo finagalo pea Ieova ina ia e tū i lana itu i le finauga o le pule silisili ese, auā e manatu mai o ia iā te oe. Na fetalai Iesu: “E faapea lo outou Tamā o i le lagi, e lē finagalo ia ina ia fano se tasi o i latou nei e faatauvaa.”—Mataio 18:14.

¹² E manino lava, ua fiafia le finagalo o Ieova i le ala ua e filifilia. Ae sili atu ai ona tāua, e aafia o ia i lau filifiliga ua fai. Ua faamanino mai e le Tusi Paia, e mafai e gaoioiga lelei po o gaoioiga leaga a tagata ona aafia ai faalogona loloto o Ieova. O se faaaʻoaʻoga, ina ua faaonoono soo Isaraelu iā Ieova, sa “tigā” lona finagalo. (Salamo 78:40, 41) A o lumanaʻi le Lolo i aso o Noa, ‘ua leaga tele lava tagata, ma ua tigā ai lona finagalo.’ (Kenese 6:5, 6) Ia manatunatu po o le ā le uiga o lenei mea. Afai ua e uia se ala sesē, ua e faapogaia la le tigā i le finagalo o lē na Foafoaina oe. E lē o le uiga o lenei mea faapea e vaivai le Atua pe pulea o ia e faalogona. O lona uiga moni, e alofa o ia iā te oe ma e manatu mai mo lou lelei. Ae i le isi itu, pe a e faia le mea saʻo, e faafiafiaina ai le finagalo o Ieova. E fiafia o ia ona e lē gata ua maua se isi tali e avatu iā Satani aemaise ai foʻi ua mafai ona avea o ia ma Lē na te tauia mai oe. O lona finagalo lenā. (Eperu 11:6) Maʻeu se tamā alofa ua e maua, o Ieova le Atua!

Anoanoaʻi Faamanuiaga i le Taimi Nei

13. E faapefea i le auauna iā Ieova ona aumaia ai faamanuiaga i le taimi nei?

¹³ O faamanuiaga tatou te maua mai i le auaunaga iā Ieova e lē faatoʻā maua i le lumanaʻi. Ua faamanuiaina le tele o talavou Molimau a Ieova i le olioli ma le faamalieina i le taimi nei, mo ni māfuaaga lelei. Na tusi le faisalamo e faapea: “E tonu feʻau a Ieova, e faafiafia ai le loto.” (Salamo 19:8) E sili ona silafia e Ieova le mea lelei mo i tatou na i lo tagata. Na faailoa mai e Ieova e ala i le perofeta o Isaia e faapea: “O aʻu o Ieova, o lou Atua, o loo aʻoaʻo iā te oe i mea e aogā, o loo taʻitaʻiina oe i le ala e te ui ai. E! ana uaʻi mai ou taliga i aʻu poloaʻiga, po ua tusa ma se vaitafe lou manuia; ma lau amiotonu, e tusa lea ma peau o le sami.”—Isaia 48:17, 18.

14. Ua mafai faapefea ona fesoasoani mataupu silisili a le Tusi Paia iā te oe e ʻalofia le tigā ona o aitalafu?

¹⁴ O le usitaia o mataupu silisili o le Tusi Paia o le a fesoasoani iā te oe e ʻalofia ai le tele o puapuaga ma le loto tigā. O se faaaʻoaʻoga, ua faapea mai le Tusi Paia, o i latou o ē atiina aʻe le manaʻo i tupe “ua tuʻia ai ua ati i latou e i latou i puapuaga e tele.” (1 Timoteo 6:9, 10) Pe na tofo au aumea i le ogaoga o le tigā ona o le manaʻo i tupe e pei ona taʻua i le mau? O nisi tama ma teine talavou ua iai ni aitalafu tetele ona ua latou mafaufau e tatau lava ona latou mauaina ituaiga aʻega fou o laʻei taugatā o loo aʻe mai. O le tigāina e tau totogi mo se taimi faaumiumi ia tupe tului mo mea sa e lē gafatiaina ona totogi, o se ituaiga o nofo pologa e matuā tigā lava!—Faataoto 22:7.

15. I ā auala ua mafai ai e mataupu silisili o le Tusi Paia ona puipuia ai oe mai tigā e māfua ona o feusuaʻiga lē mamā?

¹⁵ Seʻi manatu foʻi i le mataupu e faatatau i feusuaʻiga lē mamā. I tausaga taʻitasi i le lalolagi atoa, e lē mafaitaulia talavou ua maua i le maʻitaga ae leʻi faaipoipo. O nisi ua fanaua mai ni tamaiti ae leai se faanaunauga po o se agavaa e tausia aʻe ai. O nisi ua faia le faapaʻūtama ma ua mafatia ai i āuga o se lotofuatiaifo ua ōia. Ae ua iai tama ma teine talavou ua aafia i faamaʻi pipisi e pei o le AIDS ona o feusuaʻiga. O le mea moni, o le āuga e sili ona leaga i se tasi ua ia iloa Ieova, o le faaleagaina ai o le faiā ma Ieova.b (Kalatia 5:19-21) Ona o se māfuaaga lelei ua faapea mai ai le Tusi Paia: “Inā sosola ese ia outou i le faitaaga.”—1 Korinito 6:18.

Auauna i le “Atua Fiafia”

16. (a) E faapefea ona tatou iloa e finagalo Ieova ina ia e fiafia i lou talavou? (e) Aiseā ua faatulaga ai e Ieova taʻiala mo oe e mulimuli i ai?

¹⁶ Ua faamatalaina e le Tusi Paia Ieova o le “Atua fiafia.” (1 Timoteo 1:11, NW) E finagalo o ia ina ia e fiafia foʻi. Ua faapea mai lana Afioga: “Inā olioli ia i lou tamaitiiti. Ia fiafia lou loto i aso o lou tauleʻaleʻa.” (Failauga 11:9) E silafia mamao e Ieova āuga o le a oo i ai ona o amioga lelei ma amioga leaga. O le māfuaaga lenā na ia apoapoaʻi atu ai iā te oe e faapea: “O lenei, ia e manatua lē na faia oe i ona pō o lou tauleʻaleʻa, a o leʻi oo mai aso leaga, a o leʻi oo mai foʻi tausaga e te faapea ai, E leai soʻu fiafia i ai.”—Failauga 12:1.

17, 18. Na faaalia faapefea e se tasi talavou Kerisiano lona fiafia ona o le auauna iā Ieova, ma o le a faapefea ona e maua lenā lava fiafia?

¹⁷ E toʻatele talavou ua latou maua le fiafiaga sili ona o le auauna iā Ieova i aso nei. O se faaaʻoaʻoga, ua faapea mai Lina e 15 tausaga: “Ua mafai ona ou maua le mautinoa ma faaaloalogia ai aʻu lava. Ona o le taumamao mai i le ulaula ma le faaaogāina o fualaau faasāina ua ou maua ai se tino e mālōlōina lelei. Ua ou maua taʻitaʻiga aogā mai le faapotopotoga, lea ua mafai ai ona fesoasoani iā te aʻu e faafetaiaʻia ai omiga malolosi a Satani. O faatasiga faalaeiau i le Maota o le Malo ua ou maua ai le fiafia. Ae e laualuga i na mea uma, ua ou ai maua se faamoemoe sili o le ola e faavavau i le lalolagi.”

¹⁸ E toʻatele talavou Kerisiano e pei o Lina o loo faia ni taumafaiga malolosi mo le faatuatua, ma ua aumaia ai e lenei mea le olioli iā i latou. Ua latou iloa e ui ina tele faafitauli ma omiga i o latou olaga, ae e iai moni lava se fuafuaga ma se lumanaʻi. O lea la, ia faaauau ona e auauna i le Atua o lē e manatu mamafa moni lava mo lou lelei. Ia e faafiafia lona finagalo, ma o le a ia faafiafiaina oe i le taimi nei seʻia oo i le faavavau!—Salamo 5:11.

[Faamatalaga pito i lalo]

Pe E te Manatua?

• O ā ni faigatā ua e fesagaʻia mai i “lē o loo leaga,” o Satani?

• E mafai faapefea ona e faafiafia le finagalo o Ieova?

• Ua faaalia faapefea e le Tusi Paia o loo manatu mai Ieova iā te oe?

• O ā ni faamanuiaga e maua ona o le auauna iā Ieova?

[Pusa/Ata i le itulau 13]

Se Tagata Amiotonu na Toetoe Lava a Faia se Mea Sesē

O Asafo o se sa Levī iloga i le faimusika, i le malumalu o Ieova i Isaraelu anamua. Na ia tuufaatasia pese sa faaaogā i tapuaiga i le lautele. E ui lava i lona faaeaga tutasi sa iai, ae na tosina Asafo i uiga e lē faaleatua o ana aumea, o ē na solia le tulafono a le Atua e aunoa ma ni āuga leaga na oo iā i latou. Mulimuli ane na taʻutino mai Asafo e faapea: “Toe ina papeva oʻu vae; e toetoe lava ina see oʻu vae; auā na ou mataʻua i ē vālea; na ou vaai i le manuia o ē ua amio leaga.”—Salamo 73:2, 3.

Mulimuli ane, na alu Asafo i le malumalu o le Atua ma tatalo ai e faatatau i lea mataupu. I le toe iloiloina o le mataupu i le itu faaleagaga, sa ia iloa ai e inoino Ieova i le amioleaga ma i se taimi, o le a seleseleina ai e ē amioleaga ma ē amiotonu mea sa latou lūlū. (Salamo 73:17-20; Kalatia 6:7, 8) O le mea moni, o ē amioleaga o loo iai i latou i mea maseesee. O le iʻuga, o le a faatoʻilaloina i latou pe a faaumatia e Ieova lenei faiga o mea faalēmataʻu.—Faaaliga 21:8.

[Ata i le itulau 15]

O Ieova o lē e manatu mamafa moni lava mo lou lelei, a o le sini o Satani o le taumafai e ʻaina oe

[Ata i le itulau 16]

E toʻatele talavou ua latou maua le fiafiaga sili ona o le auauna iā Ieova ma o latou uso Kerisiano