O le Soifuaga o Iesu ma Lana Faiva

Faamanuiaina i le Tele o Fautuaga

Na seʻi faatoā uma lava ona maua e le au soʻo se faamatalaga o le faataoto e uiga i le lūlū saito. A e ua latou mananao nei e fia iloa atili. “Ia e faamatala mai ia te i matou,” ua latou talosaga atu, “le faataoto i le titania i le fanua.”

Maeu le ese o uiga o le ʻau soʻo mai le toatele o tagata i le matafaga! E leai se faanaunau moni o ni na tagata e fia iloa le uiga o i tua o faataoto, a e ua faamalieina lava i na o mea ua faaauivi ua faataatia mo i latou. I le faaeseesega o lena motu o tagata i le matafaga ma ona soʻo e naunau i tala, ua faapea atu Iesu:

“O le fua tou te fua atu ai, e toe fuaina mai ai ia te outou; o outou o e faalogologo, e faaopoopoina ia te outou.” O loo fuaina atu e le au soʻo ia Iesu le naunau faamaoni ma le uaʻi atu ma o lea ua faamanuiaina ai i latou i le mauaina atili o fautuaga.

O lea, i le tali atu i le fesili a ona soʻo, ua faamatala atu e Iesu: “O lē lulu le saito lelei, o le Atalii lea o le tagata; a o le fanua, o le lalolagi lea; o le saito lelei, o tagata ia o le malo; o le titania, o le fanau ia a le ua leaga; o le ua ita mai na na luluina ia mea, o le tiapolo lea; o le seleselega, o le gataaga lea o le lalolagi; o e selesele, o agelu ia.”

Ina ua uma ona faailoa atu taualumaga taitasi o lana faataoto, ona faamatala atu loa lea e Iesu iʻuga. I le faaiʻuga o faiga o mea, ua ia fetalai atu ai; o le a tuu eseeseina ai e “e selesele”, po o agelu, le vaotuitui faafaatusa o Kerisiano mai “tagata ia o le malo.” Ona faailogaina ai lea “o le fanau ia a le ua leaga” mo le faaumatiaga, peitaʻi o tagata o le Malo o le Atua, “o e amiotonu,” o le a susulu malosi atu i le malo o lo latou Tamā.

Ona toe faamanuia foʻi lea e Iesu ona soʻo naunau i isi foʻi faataoto e tolu. Muamua, ua ia fetalai atu: “E tusa foi le malo o le lagi i le oa ua natia i le fanua; ua iloa e le tasi, ona nanā ai lea e ia; ua alu foi ma le fiafia, ma faatau atu ana mea uma, i le faatau aʻi mai lea fanua.”

“E tusa foʻi,” ua ia toe faaauau atu ai, “le malo o le lagi ma le tagata faatauoa, ua sailiili penina lelei; ua iloa e ia le tasi penina tau tele, ona alu ai lea o ia, ua faatau atu ana mea uma, i le faatau aʻi mai.”

O Iesu lava ia ua tusa ma le tagata ua maua le oa na natia ma e pei foʻi o le tagata faatauoa o lē na maua se penina tautele. Na ia faatau atu mea uma, e pei, o le tuua o lona tulaga mamalu i le lagi ina ia avea o se tagata maulalo. O lea, i le avea o se tagata i luga o le lalolagi, na puapuagatia o ia i faifaiga ma sauaga o le inoino, ua faamaonia ai le tatau po o le aogā ona avea ma Pule o le Malo Atua.

Ua taatia nei i luma o soʻo o Iesu se luʻi ina ia latou faatau atu foʻi mea uma ina ia maua ai le taui sili ofoofogia o le avea a lē o se pule faatasi ma Keriso ia po o se tagatanuu faalelalolagi o le Malo. Pe o le a tatou manatu ea o le faia o se sao i le Malo o le Atua e avea o se mea aupito sili ona tautele na i lo so o se isi lava mea i le olaga, e pei o se oa e lē mafaatauina po o se penina tautele?

Na mulimuli lava, ona faatusaina e Iesu le “malo o le lagi” i se upega ua lafo i le vai, ua maua ai iʻa eseese uma. Pe a faavasegaina iʻa eseese, ona lafoaʻi ai lea o iʻa leaga a e taofi iʻa lelei. O lea, ua fetalai atu Iesu, e faapea foʻi le gataaga o le faiga o mea; e o atu le au agelu e vavae ese i ē amio leaga mai ē amiotonu, a e taofia ē amio leaga mo le faafanoga.

O Iesu lava ia ua amataina lenei fuafuaga o le fai faiva, i le taʻua o ona uluaʻi soʻo o “fai faiva i tagata.” I lalo o le taʻitaʻiga a agelu, ua faaauau ai pea le galuega o le fai faiva i le faagasologa o senituri. Ua lē pine a e oo mai le taimi e ao mai ai le “upega,” lea ua na faaatagia faalapotopotoga i luga o le lalolagi ua fai mai o Kerisiano.

E ui lava ua lafo atu na iʻa leaga i le fanoga e faavavau, a e faafetai ona ua faitauina i tatou faatasi ma iʻa lelei’ ua taofia. I le faaalia o lena naunau faamaoni e pei ona sa faia e soʻo o Iesu mo le poto atili ma le malamalama, o le a faamanuiaina i tatou e lē gata i le tele o fautuaga a e faapea foʻi ma le faamanuiaga a Ieova o le ola e faavavau. Mataio 13:36-52; 4:19; Mareko 4:24, 25.

◆ Ua faapefea ona ese le au soʻo mai le motu o tagata sa i le amataga?

◆ O ai po o le ā ua faatagia e lē lūlū saito, le fanua, le saito lelei, lē o loo leaga, le seleselega, ma ē selesele?

◆ O ā isi faataoto faaopoopo e tolu na saunia e Iesu, ma o le ā e mafai ona tatou aʻoaʻoina mai ai?