O le Soifuaga o Iesu ma Lana Faiva

Faafilemuina o se Afā Tele

Sa faatumuina lea aso o Iesu i galuega, e aofai ai le aʻoaʻo atu i le motu o tagata i luga o le matafaga, ma mulimuli ane o le faamatalaina atu i ona lava soo o faataoto i na o ona soo. Ina ua po, ona ia fetalai atu la: “Ina tatou o atu ia i le tasi itu.”

I le itu i sasae o le matafaga o le Sami Kalilaia e i ai se nuu tu ese o Tekapoli lona igoa e sau ma i le upu Eleni deʹka, o lona uiga “sefulu,” ma poʹlis, o lona uiga o le “aai.” O aai o Tekapoli o le ogatotonu o aganuu faa-Eleni, e ui lava o le mea moni o ni aiga foʻi o le toatele o Siu. Peitaʻi, e itiiti lava se galuega a Iesu i ia aai. E oo lava i lenei asiasiga, e pei ona o le a tatou iloa mulimuli, na faasaina o ia mai le nofo umi ai iinā.

Ina ua talosaga atu Iesu ina ia latou ō atu i le isi matafaga, ona ave ai loa lea o ia e le ʻau soʻo i le vaa. Peitaʻi, sa leʻi lilo lo latou o ese atu. Sa leʻi pine a e faaee foʻi ma vaa o isi tagata e ō faatasi ma i latou. E lē mamao tele le alu atu i le isi itu. E pei lava ona masani ai, o le Sami Kalilaia ua na o se vaituloto tele e tusa o le 13 maila (21 km) 0 le umi, ma se faatatauga e 7 ma le afa maila (12 km) le lautele.

Ua mautinoa lava le matuā vaivai o Iesu. O lea, e leʻi pine ona latou ō ese atu, a e taoto atu loa i se aluga i le taumuli o le vaa ma moe gase loa. O nisi o le au aposetolo o ni tautai agavaa, e masani lava ona fagogota mo se taimi i le Sami Kalilaia. O lea ua latou faatonutonuina ai le folauga.

E lē o se malaga faigofie lenei. Auā e vevela le foagatai o le sami, lea e tusa o le 700 futu (210 m) i lalo i le loloto o le sami, ma o le malūlū o le savili i mauga o loo latalata ane, ma o nisi e agaʻi mai ai matagi malolosi faafuaseʻi i le vai. O le mea la lena ua tupu nei. E leʻi pine lava a e oso mai galu tetele ma taia i le tino o le vaa ma osofaia ai, ua oo ai ina tāli goto. Peitaʻi, o loo tofa pea Iesu!

Na vave lava ona taumafai tautai matapala e uli le vaa. E mautinoa lava sa latou fetaiaʻi foʻi ma afā muamua. A e o le taimi la lea, ua uma a latou taumafaiga. Ona o le matatau mo o latou ola, ua latou fafagu ai ia Iesu. ‘Le Alii e, e te lē manatu mai ea ia te i matou? O le a fano i matou?’ Ua latou alalaga ai. ‘Laveai mai i matou o le a matou malelemo!’

Ona tulai lea o ia, ua vavao atu e Iesu i le matagi ma le vai: ‘E! inā filemu ia.’ Ona mate ai lea o le matagi tele, ma ua malū foi le sami. Ona faliu atu lea i ona soʻo, ua fesili atu: ‘Se ā le mea tu te fefefe ai? Tou te leʻi faatuatua lava ea?’

I lena mea, na oo ai se mataʻu tele i le ʻau soo, ‘Po o ai moni ea lenei, tagata? sa latou tuufesili ai le tasi i le isi. ‘Auā ua ia vavao i le matagi ma le vai, ma ua faalogo lava ia te ia.’

Maeu se mana ua faaalia e Iesu! Maeu se mautinoa ina ua iloa e i ai le mana i lo tatou Tupu i luga o mea faanatura, ma pe a liuliu alo atoatoa mai o ia i lo tatou lalolagi i le taimi o lana pulega o le Malo, o le a nonofo uma tagata i le saogalemu mai mala matautia faanatura!

I se taimi ina ua toafilemu le matagi, ona taunuu manuia ai lea o le Iesu ma ona soʻo i le matafaga i le itu i sasaʻe. Atonu na faasaoina foi isi vaa mai le matagi malosi, ma foʻi saogalemu atu ai i aiga. Mareko 4:35-5:2; Mataio 8:18, 23-28; Luka 8:22-27.

◆ O le ā le Tekapoli, ma o fea e tu ai?

◆ O ā taualumaga faaletino ua faapogaia ai afā matautia i le Sami Kalilaia?

◆ Ina ua lē mafai e lo latou tomai i folauga ona faasaoina i latou, o le ā ua faia nei e soʻo?

[Ata atoa i le itulau 8]