Pulea o le Ita o Oe ma Isi

O LOO tatou ola i se sosaiete o tagata ua fai ma masani le ita. O le feomaʻi o taavale afi, o tauvaga m le fesuisuiaʻi o mea, o le lē femalamalamaaʻi, o faamasinoga lē tonu, po o isi tulaga faigata o le oalga i aso uma, ua mafua ai le tele o omiga. Ua tele naua omiga, ma toeitiiti lava o tagata uma ua tofu ma lona lava uiga aasa. O lea, e tatau ona tatou aʻoaʻoina ina ia faatoʻatoʻa. E mafai lava ona tatou amata aso taʻitasi ma se uiga mautinoa—e faaalia le onosai, faapalepale, ma se faalogona lelei. O le toatele lava o i tatou e iai ō tatou aiga e alolofa ia i tatou. E iai foʻi Kerisiano uso Kerisiano faamaoni i le faapotopotoga, ma i mea uma lava, o loo ia i latou le Leoleo mamoe alofa o Ieova le Atua. O lea, e leai se mea e fefe ai i se mafuaaga e tasi e tupu ai se ita; se logona tuua toatasi, pe tuulafoaʻiina.—Salamo 23:1-6; Eperu 13:5, 6.

Peitaʻi, afai ua tatou lagona le ita pe fesagaʻi foʻi ma le ita o se tasi, e mafai lava ona tatou pulea lelei ina ia maua ai lo tatou fiafia ma le ola lelei. Faapefea? Ua taʻu mai e le Tusi Paia ia i tatou: “E sili ona lelei o le ua gesegese i le ita i le ua malosi; e sili foi le ua pule i lona loto i le na te aea le aai.” (Faataoto 16:32) Na i lo o le faataalise ona ita, e tatau lava ona tatou manatunatu i le iʻuga atonu o le a aumai e a tatou gaoioiga. O le faitau o le tasi e oo i le sefulu atonu o le a taofia ai i tatou mai le faia o se mea, atonu tatou te faanoanoa mulimuli ane ai.—Faataoto 14:17.

I le tulaga faapea ua teʻi lava ua tatou ita a e leiloa le pogai, e tatau lava ona tatou fesili atu ma le faamaoni ma le loto maulalo mo se fesoasoani. O le faailoa atu i isi, a e maise lava i latou e alolofa ia i tatou, o mea tatou te fefefe ai po o le manaomia foʻi o se fesoasoani e lē o se vaivaiga; a e o se auala poto ma le lototele. Ona tatou mafai lea ona maua le iʻo o le faafitauli. Fai mai le Tusi Paia: “E faaleaogaina mafaufauga pe a leai se filifiliga; a e faatumauina i le toatele o faipule (fautua).”—Faataoto 15:22.

O le taumafai ia malamalama i mafuaaga ua amio ai nisi e pei ona latou faia, o le a fesoasoani ai ia i tatou e pulea a tatou gaoioiga tau i faalogona. E lē gata foʻi i lea, afai tatou te tali atu i se tagata ita, “ou te iloa lelei lava le mea ua e ita ai,” atonu o le a vave lava ona toe teʻa lona ita. Ua fautua mai le Tusi Paia: “O le māfaufau o le tagata e faagesegese ai lona ita; o lona viiga foi lea, ina ua le manatua lona agaleagaina.”—Faataoto 19:11.

Pe tatou te faamanuʻaina ea se tasi e aunoa ma le mafaufauina, e tatau lava ona tatou faatoese atu iai. Mo se faaaʻoaʻoga, afai ua tu se tasi i lou tamatamaʻi vae, atonu o le a oo ina e ita. A e ina ua faamālulū atu ia te oe, ona teʻa ai lea o lou ita. Atonu po o tiga pea lou vae, a e ua maualuga lou faaaloalo. E faapena foʻi amioga lelei i la tatou vaega, faatasi ai ma le faaloalo masani ma le maloloina lelei, e mafai ona liua ai le ita ma maua ai le faaaloalo ia i tatou i lo tatou feagai ai ma a tatou tane po o avā, fanau, uo, ma tagata o le faapotopotoga Kerisiano.—Faataoto 16:24; Kolose 4:6; 1 Peteru 3:8.

O le feagai ai ma tualga e mafua ai ona tatou ita, e fesoasoani lea tatou te iloa ai pe faapefea ona talanoa e uiga i lo tatou ita e aunoa ma le osofaia o le isi tagata. E iai se eseesega iloga i le va o faaupuga ita (“Lou vale!” pe “Toe itiiti oʻu alu atu tuma lou isu!”) ma le faailoa atu o le ita o se tasi (“Ua tumu aʻu i le lē fiafia” pe “Ua ou lagona le tiga”) E masani lava ona lē manuia faaupuga ita ona e faatupu ai foi le ita o le isi tagata, a o le faailoa atu o lou faalogona e lē o se osofaʻi atu, ma atonu o le a uunaia ai le isi tagata e toe faia se faaleleiga. E pei ona fai mai le Tusi Paia. “O le tali filemu e liliueseina ai le ita; a o le upu faatiga e tupu ai le ita. O le tagata lotoa, na te faatupuina le misa; a o lē faatoatoa, e tuu lelei ia te ia le finauga.”—Faataoto 15:1, 18.

Ita Amiotonu

O le toatele o i tatou e masani lava ona ita mai lea taimi i lea taimi. Ua taʻua mai foi e le Tusi Paia faapea e oo lava ia Ieova e ita. (Sefanaia 2:2, 3; 3:8) O lea, e lē o se mea e ofo ai ona o le tagata na faia i Lona faatusa e mafai foʻi ona tupu ai se mea faapena. (Kenese 1:26) O lea, o le lagona ita e lē o iai se agasala.

Peitaʻi, afai e ita Ieova, o lona uiga e iai pea se mafuaaga tatau: Ona ua solia mataupu silisili amiotonu. Ma o lana tali mai e saʻo pea ma tonu ma e lelei foʻi ona pulea. A e i tagata lē lelei atoatoa, e ese. E masani lava ona tatou ita pe a afaina ō tatou loto faamaualuga pe o na o se vaivaiga foʻi faaletagata. (O lea, e manaomia ai ona vaai lelei i le auala e taulimaina ai lo tatou ita. E pei ona lapataʻi mai le aposetolo o Paulo. “A outou ita, aua le agasala ai; aua neʻi goto le la o ita pea outou. Aua foi neʻi tuuina atu e outou se mea e mautu ai le tiapolo.” (Efeso 4:26, 27.) Ioe, e mafai ona faaaogā e Satani le lē pulea o lo tatou ita. Auā o le mea moni, o le “lotoa (ita)” ua faitauina faatasi i “galuega a le tino” e lē mafai ai e se tagata ona ulu atu i le Malo o le Atua.—Kalatia 5:19-21.

O le ma lena na fautua mai ai le aposetolo o Iakopo: “O lenei, oʻu uso pele e, e tatau i tagata uma ona . . . ia faagesegese ona ita; auā e le tupu mai ai le amiotonu a le Atua i le ita o le tagata.” (Iakopo 1:19, 20, NW) E tusa lava pe tatou te ita ona o se mafuaaga saʻo, e mafai e lo tatou lē lelei atoatoa ona taʻitaʻiina aut ai i tatou e tali atu i se auala lē pulea ma le sese. O lea, e tatau lava ona taʻitaʻiina pea i tatou i le mataupu silisili. “Le au pele e, aua le taui atu ma sui, a ia outou tuu atu i le toasa; auā ua tusia, Ua faapea mai le Alii (Ieova), O ia te aʻu le taui ma sui, ou te taui atu.” (Roma 12:19) Ia manatau foʻi, ona o tagata lē lelei atoatoa, e mafai ai ona atonu ua faaseseina i tatou. O lea la, e matuā sese ona vave faamasinoina nisi i le igoa o le toasa amiotonu.—Iakopo 2:13; 4:11, 12; 5:9.

Ua tatou ola nei i ona po o le iʻuga e tusa ai ma le Tusi Paia. I nei aso e agta ai, “ua ita foi nuu” faasaga i le Malo o le Atua, ma o le Tiapolo foʻi ua sili ona “lotoa tele, auā ua na iloa ua saasaa ona po.” (Faaaliga 11:17, 18; 12:10-12) O le mea lea, o lo tatou ola e tusa ai ma le Afioga a le Atua ua na o lea le puipuiga moni mo i tatou. (Salamo 119:105) Toeitiiti lava ona tuuina mai lea e le Atua o le faamasinoga i luga o atunuu ma o le a faamamāina ai le lalolagi mai tagata amioletonu uma. (Isaia 35:10; 65:23; Mika 4:3, 4) I le taimi nei, e manaomia lava ona tatou mautinoa tatou te lē o faataʻitaʻi i ala o lenei lalolagi ita. O le pulea lelei o lo tatou ita o le a fesoasoani e faasaoina ai lo tatou alofa tau i faaipoipoga, i le autasi faa-Kerisiano, ma le filemu ma le fiafia totino. Ma o le mea aupito sili ona tāua, o le a fesoasoani ai ia i tatou e olioli pea i le finagalo o Ieova ma lana faamanuiaga.—Salamo 119:165.