Le Tāua o Pesega i le Tapuaiga Moni

PE MAFAI ona e faaataina i lou mafaufau se lalolagi e leai ni pese? Ua lē toe faalogoina ai le pepese fiafia o tamaiti po o le leo malie o le manutagi po o le manu e pei o se tagi o se logo lona leo? Ua lē toe faalogoina le tagi o le seʻu, le ʻata oolo a le kookaburra? E fiafia lava ona o le a lē tupu lenei mea. A e o na manatunatuga loloto ua faatāuaina ai le tasi o le tele o meaalofa a le Atua i tagata: le meaalofa o pese.

O Ieova o le Atua o Pesega

Ai se ā ua aumaia ai e pesega le fiafia ma le olioli ia i tatou? Mo le mea e tasi, ona e olioli Ieova lava ia ma e fiafia o ia i pesega o viiga mai ana mea faiola. E mafai ona e faaataina i lou mafaufau le sauniga na alalaga olioli uma ai le au agelu i le ofoofogia o le foafoaga faalelalolagi a Ieova? Pe e mafai ona e vaai faalemafaufau i lou laulaututū ma le meia faatasi ma le au leoleo mamoe i le po o le tau e afu ai mea o le fanau mai o Iesu o se tagata, o loo fiafia tele i le leo o le au agelu e toatele ua pepese: “O le viiga i le Atua i mea aupitoaluga?—Luka 2:13, 14; Iopu 38:7.

O le tasi auala ua faaalia ai e Ieova o ia o le Atua o pesega o le faia lea o pesega o le vaega o le tapuaiga moni i Isaraelu. Mulimuli ane, na toe faaalia ai foi e le Atua le sootaga vavalalata i le va o pesega ma le tapuaiga moni i Faaaliga na faaali atu i le aposetolo o Ioane. I se tasi o vaaiga faavaloaga o se aufaipese ofoofogia—ua atoa e 144,000—o loo pepese i se pese fou mataʻina i luma o le nofoalii o le Atua.—Faaaliga 14:3

Pesega i Taimi a o Leʻi i ai Kerisiano

O le malualii o le Atua ma ana gaoioiga matautia na faagaeeina ai foi ana aununa faalelalolagi ina ia auai foi i pesega. Seʻi logo i tino āuga e faagaee ai na i ai i pesega a tagata Isaraelu i le taimi a o faatoʻā mavae lava lo latou laveaiina faavavega mai le nofo pologa i Aikupito. Sa uunaʻia loto o Mose ma ona uso Isaraelu i faalogona ootia a o latou pepese i le pese manumalo e taʻua ai mea na faia e Ieova ia Farao ma ana ʻau.—Esoto 15:1-21.

Mulimuli ane i le tala faasolopito o Isaraelu, na oo mai ai le aso sili ona tāua, ina ua tuuina le atolaau o le feagaiga i totonu o lona fale fetafai na faatuina faapitoa mo lea fuafuaga, i lalo o le taʻitaʻiga a le Tupu o Tavita. Maeu se tāua o lena mea i tala faasolopito! Sa lē gata i pesega mataʻina a e faapea foi ma le musika o le faaili sa faatasi ai, lea na faagaee ai le solu, na faaopoopo atu i le matagofie o le aso.—1 Nofoaiga a Tupu 16:4-36.

O le naunau o Tavita i musika faatasi ai ma lona tomai e ta le napeli na faamamafaina ai lona maelega e siitia musika ma pepese i le tapuaiga moni. I le Salamo 33:1, 3, (NW) ua tatou faalogo ai i lana aioi mai ma le faalogona aasa i ē tapuai ia Ieova ina ia pepese leo tetele i le Atua ma o latou loto atoa: “Ia alalaga olioli ona o Ieova, o outou o ē amiotonu . . . Ia outou faia le mea sili i le taina o le napeli faatasi ma le alaga olioli.”

Pesega i Taimi o Kerisiano

I taimi o uluai Kerisiano, na faia ai foi e pese se vaega tāua i le tapuaiga moni. Na pepese faatasi Iesu ma ona aposetolo ina ua mavae le talisuaga afiafi a o leʻi oo i le maliu o Iesu. (Mareko 14:26) I le fale puipui sa pepese leo tetele ai Paulo ma Sila ina ia lagona e tagata uma. (Galuega 16:25) Sa aasa foi le aposetolo o Paulo e uiga i le faaaogāina o pese e pei lava o Tavita. E sili atu na i lo o le faatasi, sa ia faamalosiau atu ai i uso talitonu ina ia usu pese o viiga ia Ieova.—Efeso 5:18, 19; Kolose 3:16.

I le tapuaiga a Kerisiano i aso nei, e lauiloa tele ai foi pesega. I le 1905 na faasalalauina ai le tusipese Hymns of the Millennial Dawn (Pese Lotu o le Tafaoata o le Meleniuma). Ua faamatalaina e le itulau o le ulutala e uiga i ona pese e 333 faapea “O se Tuufaatasiga Matagofie o Salamo ma Pese Lotu ma Viiga ma Pese Faaleagaga e Fesoasoani ai i Tagata o le Atua e Pepese ma Faia Fatuga i le Alii i o Latou Loto.”

Ona oo lea i le 1928 ona saunia ai lea o se tusipese na toe teuteuina e 337 ona pese. Sa taʻua o Songs of Praise to Jehovah (Pese o Viiga ia Ieova), ma o loo faapea mai lona faamatalaga amata: “O le a iloa o nei Pese ua ōgatasi ma upu moni tauatua lea e faamalamalamaina nei.” A e peitai, a o faagasolo tausaga ma ua faateleina le malamalama o le upu moni, na oo ai ina manino faapea o nisi o nei pese sa i ai ni aafiaga mai lotu sese i manatu sa faaaogā ai. E faaopoopo atu i ai, sa manaomia pese tau i le Malo ina ia faalaeiau ai i le talaʻiina o le tala lelei, a o faasolo ina faateleina le tāua o le faalauiloaina atu i le lautele.—Mataio 24:14; Eperu 13:15.

I le 1944 na saunia ai le Kingdom Service Songbook (Tusipese o le Auaunaga o le Malo), e 62 ona pese. E tusa ma le luasefulu tausaga mulimuli ane, i le 1966, na tatalaina ai (i le faa-Peretnnia) le tusi “Pepese atu Faatasi ma Musika i o Outou Loto.” E 119 pese o le Malo o loo i ai i totonu o lenei tusipese ma o loo ia faaaofia uma ai vala eseese o le olaga faa-Kerisiano ma le tapuniga, e aofia ai ma le molimau atu i isi ma vivii atu ai ia Ieova le Atua ma Iesu Keriso.

Toe itiiti lava mavae atu le isi luasefulu tausaga, o le vaitaimi lea ua agaʻi atu pea ina faateleina le malamalama o le upu moni. (Faataoto 4:18) Sa iloa ai foi le manaomia ona faia se isi tusipese. O lea, i le 1984 na oo mai ai le tatalaina o le tusipese ua faaigoaina Sing Praises to Jehovah (Ia Pepese i Viiga o Ieova). E 225 pese o le Malo o loo i ai, i upu ma fati na fatuina atoa e auauna tuuina atu a Ieova mai itu uma o le lalolagi.

Faaaogā Atoa Pesega Faatiokarate

O le ata o loo faaalia i itulau e lua i le faaiʻuga o lenei tusipese fou ua faagaeetia ai i tatou e faaaogā atoatoa pese faatiokarate i sauniga faa-Kerisiano. O tagata pepese i le malumalu ua aʻoaʻoina, o loo faaatagia ai i inā le sii aʻe ma le manino o o latou loto ma o latou leo i pesega i le Atua.—1 Nofoaiga a Tupu 25:7.

E mafai foi ona tatou pepese faapena i a tatou sauniga faa-Kerisiano, ia tatala o tatou fofoga ma pepese mai i o tatou loto. A e peitai, e lē o i tatou uma e faia lena mea. Atonu pe ona o le faamaualuga o le a faapogaia ai i tatou e misia le olioli o le pepese atu ia Ieova e aunoa ma le ma, tusa lava po o le ā le ituaiga leo o ia i tatou. Atonu pe ua tatou manatu mamafa tele i manatu a tagata ia e i o tatou tafatafa. Sa i ai foi le faafitauli faapena o Mose—e lē i pese a o le tautala. Pe afai tatou te matamuli e pepese ona o le leai o so tatou tomai, atonu la o le a fesoasoani ia i tatou le tali na tuuina atu e Ieova ia te ia. Na fesili atu Ieova ia Mose: “O ai ea na na faia le gutu o le tagata? . . . E le o aʻu ea o Ieova?” (Esoto 4:11) E mautinoa lava, o le a fiafia Ieova e faafofoga a o tatou faaaogāina so o se tomai ua ia tuuina mai ia i tatou ina ia usuina ai ma le leo tele ona viiga!

Seʻi manatu foi, i pesega ma le leo tetele o Paulo ma Sila a o i ai i le fale puipui. Sa leʻi i ai se mamā i inā, ma sa leʻi i ai ni a la mea ta musika, po o ni tusipese e mulimuli ai. Seʻi vaai faalemafaufau i lenei sauniga: “O le tulua o po ma ao ua tatalo ai ma pepese o Paulo ma Sila i le Atua; ua faalogo foi ia te i laua e ua noanontia.” (Galuega 16:25) Pe sa faia ea lenei mea ona faapea sa toleniina Paulo po o Sila i ni leo e pepese ai? Masalo e leai. O lo la manatu autū ia pepese leo tetele mai i le loto! O le ā lo tatou manatu autū pe a usuina pese o viiga?

E Mafai ona Faaleleia i Tatou Uma

Ua talafeagai ai lava le fautuga a le fai musika o Tavita i inei: “Ia outou faia le mea sili i le taina o le napeli faatasi ma le alaga olioli.” (Salamo 33:3, NW) O le mea lena o loo faatalitalia e Ieova mai ana auauna uma—e leai lava se isi mea e sili atu, e lē itiiti ifo foi na i lo o lo ‘tatou faia o le mea sili.’ Afai tatou te faia le mea lava lena, e mafai ona tatou faatalitalia o le a faamanuia e Ieova a tatou taumafaiga, ma o le a faafiafiaina i tatou—ma i nisi taimi e faateia ai i tatou—ona o le a faapena foi ona faaleleia ai a tatou taumafaiga.a

O nisi nei o fautuaga aogā atonu o le a fesoasoani e faaleleia le lelei o lau pese: Taumafai e faalogologo pea i pese fou o le Malo, i le faaaogāina o lipine ua uma ona puʻeina po o pese lapotopoto pe a mafai. Mo nisi, o le usuina o pese i le aiga po o ni nai faatasitasiga iti ma uso talitonu ua faamaonia lava le aogā ma le fiafia ai. I sauniga a le faapotopotoga, e tāua tele le ta ia lava le leo o mea fai musika ina ia lagona e i latou uma o loo pepese. E faigofie ai ona mulimuli atu i le fati ma e faateleina ai le mautinoa i le vaega a i latou o loo pepese. E ao i lē o loo faasilasilaina mai le pese ona taʻua le matua o le pese, atonu o le a oo ai foi ina matauina lona talafeagai, na i lo o le na ona iloa o le numera o le pese.

Mātua, pe tou te faamalosiau ea i a outou fanau e usu ma le aasa pese o le Malo ma ia mai i o latou loto? O aiga ua latou faamalosiau i a latou fanau iti e pepese mai le loto, ma ia malamalama, ua tele taimi ua latou iloa ai le lelei o le fesoasoani a lena pesega i le tutupu aʻe faaleagaga.

E Tele Aogā

E tele aogā e maua mai i le pese leo tele ma mai le loto. O le a oo ina malosi ai lo tatou aafia totino i le tapuaiga i le lautele. O le a faamalosiau ai ē o tutū i o tatou tafatafa e pepese leo tetele pe a latou faalogo i lo tatou pepese ma le leai o se mea e mā ai. O le a aogā foi mo le faapotopotoga atoa, ona o le a faateleina ai le faasalalau atu o leo!

E faaopoopo atu i ai, o le malosi o pesega e avatu ai se molimau lelei ia i latou fantoʻā auai i sauniga. O le a matauina ai foi e i latou o ui ane i tafatafa o o tatou Maota o le Malo, atoa foi ma tuaoi e nonofo latalata ane, i a tatou pesega malie, e pei lava ona lē taumatea foi na oo i na pagota sa faalogo ia Paulo ma Sila. Sa iʻu lava ina fiafia ai nisi sa faalogologo i ai e fia iloa atili e uiga i le upu moni.

O le mea aupito sili ona tāua, o le faaleleia o a tatou pese o le a avatu ai le viiga sili o Ieova, le Puna o musika ma pesega, o lē ua tatau ona viia i pese na i lo o isi uma lava.

[Faaopoopoga i lalo]