Ia Usuina Viiga ia Ieova

“Ou te pese ia Ieova, auā ua matuā manumalo o ia.”—ESOTO 15:1.

1. O ā uiga o Ieova ua mafua ai ona tatou vivii atu ia te ia?

E FAASEFULUTOLU ona aumaia e le Salamo 150 le poloaiga ina ia vivii atu ia Ieova po o Ioa. Ua folafola mai e le fuaiupu mulimuli e faapea: “Ia vivii atu ia Ioa o mea uma lava e mānava. Ia outou vivii atu ia Ioa.” Ona o i tatou o ni Molimau a Ieova, ua tatou iloa ai le onomea le avatu ia Ieova o la tatou viiga. O ia o le Pule Silisili Ese, o Lē Silisili ona Maualuga, o le Tupu o le vavau, o Lē na Foafoaina i tatou, o Lē e Agalelei ia i tatou. E lē mafaatutusaina o ia, e tutasi, e lē mafaatusatusalia i le tele o itu. E silafia e ia mea uma, o ia o le pule silisili, e atoatoa lana faamasinoga tonu, ma o le faaperesonaina foi o le alofa. E silisili lona lelei i lo isi uma; e faamaoni o ia. (Luka 18:19; Faaaliga 15:3, 4) Po ua onomea ea la ia te ia la tatou viiga? Ma le mautinoa lava o ia lea ua tatau i ai!

2. O ā mafuaaga ua ia i tatou e faaali atu ai le faafetai ia Ieova?

² Ua onomea ia Ieova, e lē gata i la tatou tapuaiga ma viiga, ae o la tatou faafetai foi mo mea uma ua ia faia mo i tatou. O ia o Lē na Foai mai ‘mea lelei uma ma meaalofa uma e atoatoa ona lelei.’ (Iakopo 1:17) O ia o le Faavae, le Puna, o le ola uma. (Salamo 36:9) O mea uma ua tatou olioli ai i le avea ma tagata, ua tatou maua mai ia te ia, auā o ia Lē Sili na Foafoaina i tatou. (Isaia 42:5) O ia foi Lē na Foai maia faamanuiaga uma faaleagaga lea ua tatou maua e ala mai i lona agaga, lana faalapotopotoga, ma lana Afioga. Ua faamagaloina a tatou agasala ina ua ia saunia lona Alo e avea ma o tatou togiola. (Ioane 3:16) Ua ia i tatou le faamoemoe o le Malo i le ‘lagi fou ma le lalolagi fou lea o le a mau ai le amiotonu.’ (2 Peteru 3:13) Ua tatou maua se aufaatasiga lelei ma uso Kerisiano. (Roma 1:11, 12) Ua tatou maua le mamalu ma faamanuiaga i le avea o ana Molimau. (Isaia 43:10-12) Ma ua ia i tatou le faaeaga tautele o le tatalo. (Mataio 6:9-13) E moni lava, e tele a tatou mafuaaga e faafetai atu ai ia Ieova!

Auala e Mafai ona Tatou Vivii atu ai ia Ieova

3. I ā auala eseese e mafai ona tatou vivii atu ai ia Ieova ma faaali atu lo tatou faafetai ia te ia?

³ I le avea ma auauna tuutoina a Ieova, e mafai faapefea ona tatou vivii atu ia te ia ma faaalia atu lo tatou loto faafetai? E mafai ona tatou faia e ala i le faia o se sao i le faiva faa-Kerisiano—le molimau atu mai lea fale i lea fale, le faia o toe asiga, le faia o suesuega faale-Tusi Paia, ma le auai i le molimau atu i alatetele. E mafai foi ona tatou vivii atu ia te ia e ala i le molimau atu lē fuafuaina i so o se mea lava e maua ai le avanoa. E lē gata i lea, e mafai ona tatou vivii atu ia Ieova e ala i a tatou amio saʻo, e oo lava foi i le tulaga mamā ma le onomea tatou te laei ma teteu ai. E masani lava ona viiviia Molimau a Ieova i le avea ma ni faataitaiga lelei i nei vala. Ae sili ai, e mafai ona tatou vivii atu ia Ieova ma faafetaia o ia e ala i le tatalo.—Tagai i le 1 Nofoaiga a Tupu 29:10-13.

4. O le ā se tasi o auala e sili ona matagofie e mafai ona tatou vivii atu ai i lo tatou Tamā alofa faalelagi?

⁴ E faaopoopo atu i ai, o se tasi o auala e sili ona matagofie tatou te vivii atu ai i lo tatou Tamā alofa faalelagi, o le matuā viiviia lea o ia ma ona lelei i pese o viiga o le Malo. E toatele tagata pepese ma tagata fatupese e ioe faapea, o le vaega e sili atu ona matagofie e faaaogā i musika, o le leo o le tagata. Ua matuā tauivi tagata popoto i musika taualoa (classic) e tusia pese e usuina toatele e se aufaipese, talu ai e sili ona faamalieina le loto i le faalogologo atu a o siisii aʻe i luga leo o tagata a o pepese.

5. O ā mafuaaga e ao ai ona uigā ia i tatou le usuina o pese o le Malo?

⁵ Maeu se olioli o Ieova e faafofoga mai i pesega a tagata, ae maise lava pe a latou usuina atu pese o le viiga ma le faafetai! E mautinoa la, e tatau ona uigā ia i tatou le usuina o pese o le Malo i a tatou faatasitasiga—sauniga a le faapotopotoga, fonotaga matagaluega, aso faapitoa o fonotaga, tauaofiaga itumalo, ma tauaofiaga faavaomalo. Ua tumu la tatou tusipese i fatuga mālie, o lona matagofie lea ua viiviia soo mai e tagata i tua. O le tele lava o le uigā ia i tatou o le agaga o le usuina o pese o le Malo, o le tele foi lea o lo tatou faafiafiaina o isi ma aogā foi ia i tatou.

Usuina o Viiga ia Ieova i Taimi o le Tusi Paia

6. Na faapefea ona faaali atu e tagata Isaraelu lo latou talisapaia o le faasaoina o i latou i le Sami Ulaula?

⁶ Ua taʻu mai e le Afioga a le Atua ia i tatou e faapea, na pepese manumalo Mose ma le fanauga uma a Isaraelu ina ua faasaoina i latou mai le itu taua a Farao i le Sami Ulaula. Na amata le latou pese i upu faapea: “Ou te pese ia Ieova, auā ua matuā manumalo o ia; o le solofanua atoa ma le na tietie ai, ua ia lafoina i le sami. O Ioa, o loʻu malosi ia, ma laʻu pese, ua fai foi o ia moʻu olataga; o loʻu Atua lenei, ou te faaneenee i ai.” (Esoto 15:1, 2) E mafai lelei ona tatou vaaia faalemafaufau le matuā lotomu ma le olioli o le fanauga a Isaraelu a o latou usuina na upu ina ua mavae lo latou faasaoina faavavega!

7. O ā isi faataitaiga mataina ua tusia i Tusitusiga Eperu e uiga i le usuina e le fanauga a Isaraelu o pese e vivii ai ia Ieova?

⁷ I le 1 Nofoaiga a Tupu 16:1, 4-36, ua tatou faitau ai sa viia Ieova e ala i pesega ma le tatāina o mea faimusika i le taimi ina ua aumai e Tavita le Atolaau i Ierusalema. O se faatasiga olioli moni lava lena. Sa iai foi pesega o viiga ia Ieova faatasi ma le tātāina o musika i le taimi na faaulufale ai e le tupu o Solomona le malumalu i Ierusalema. Ua tatou faitau i le 2 Nofoaiga a Tupu 5:13, 14 e faapea: “O e ili pu ma e o pepese ua peiseai o se toatasi, ua tasi le leo i le viiga ma le faamanu ia Ieova; ua latou pepese faatasi ma pu, ma sumepalo, ma laaupese, e vivii atu ai ia Ieova, o loo faapea atu, Auā e lelei o ia, auā e faavavau lava lona alofa, Ona tumu ai lea o le fale i le ao, o le fale lava o Ieova. Ua le mafai ai le au faitaulaga ona tutū e auauna ona o le ao; auā na tumu le fale o le Atua i le pupula o Ieova.” O le ā ua faaalia i lena mea? O lona uiga sa faafofoga Ieova i lenei viiga o pesega ma sa fiafia foi lona finagalo i ai, e pei ona faaalia i le ao faavavega. Mulimuli ane, na iai isi aufaipese tetele e lua na pepese i le taimi na ati ai pa o Ierusalema i aso o Neemia.—Neemia 12:27-42.

8. O le ā e faaalia ai sa uigā i tagata Isaraelu le usuina o pese?

⁸ O le mea moni, o pesega o se vaega tāua lea o le tapuaiga i le malumalu, lea na faavasega ese ai le toʻa 4,000 o sa Levī mo lea auaunaga tau i pesega. (1 Nofoaiga a Tupu 23:4, 5) O i latou nei sa faatasi atu i tagata pepese. O musika, ae maise lava tagata pepese, sa latou faia se vaega tāua i le tapuaiga, e lē ina ia faamautū ai vaega tāua o le Tulafono, ae ina ia sauniunia ai le agaga moni mo le tapuaiga. Sa fesoasoani i tagata Isaraelu e tapuai ia Ieova i le auala olaola. Mātau sauniuniga ma le uai atu i auiliiliga na tuuina atu i lenei vala: “O le faitau aofai o i latou, atoa ma o latou uso o e na aʻoaʻoina i pesega ia Ieova, o i latou uma e na popoto, e lua selau ma le valu o sefulu ma le toavalu.” (1 Nofoaiga a Tupu 25:7) Seʻi mātau le uigā na latou usuina ai viiga ia Ieova. Sa aʻoaʻoina i latou i le usuina o pese, ma na avea ai ma ē popoto i pesega!

9. O le ā le faamamafaga ua tuuina atu e Tusitusiga Kerisiano Eleni i le usuina o pese?

⁹ I le oo mai i le uluai senituri o o tatou aso taatele, o le ā ua tatou iloaina? I le po na faalataina ai Iesu, e tiga ona tele mea na mamafa i lona mafaufau, ae na ia lagona pea le manao e faaiuina lona faamanatuina o le Paseka ma le faavaeina o le Faamanatuga o lona maliu, i le peseina o viiga ia Ieova. (Mataio 26:30) Ua tatou faitauina foi e faapea, i le “tulua o po ma ao,” ina ua uma ona sasaina ma faafalepuipuiina Pauro ma Sila, sa “tatalo ai ma pepese . . . i le Atua; ua faalogo foi ia te i laua e ua noanoatia.”—Galuega 16:25.

Peseina o Viiga —Se Vaega Tāua o La Tatou Tapuaiga

10. O ā poloaiga ua aumaia e le Afioga a le Atua e faatatau i le viviiina o ia i pese?

¹⁰ Pe atonu ea o e lagona e faapea, o le usuina o pese o le Malo, ua lē tāua tele lea mo oe e uai atu i ai lou loto? Afai o lou manatu lena, pe ua lē tatau ea ona e toe fefuafautai le mataupu, e tusa ai o le tāua o loo faatulaga ai e Ieova le Atua ma Iesu Keriso le usuina o viiga? Ioe, ua tumu le Afioga a le Atua i poloaiga ina ia vivii atu ia Ieova ma usu atu viiga ia te ia! Mo se faaaoaoga, i le Isaia 42:10, tatou te faitau ai e faapea: “Pepese ia Ieova i le pese fou, o lona viiga mai le tuluiga o le lalolagi, outou o e ō ifo i le sami, atoa ma e o tumu ai; outou nuu tu matafaga, ma e o nonofo ai.”—Tagai foi i le Salamo 96:1; 98:1.

11. O le ā le timaiga na aumai e le aposetolo o Pauro e tusa ai o le usuina o pese?

¹¹ Na iloa e le aposetolo o Pauro o le usuina o pese e mafai ona faagaeetia ai i tatou, o lea na ia timai faalua mai ai ia i tatou e faatatau i le mataupu. Ua tatou faitau i le Efeso 5:18, 19 e faapea: “Ia faatumuina outou i le Agaga. Ia outou fetautalatalaai i salāmo, ma pese, ma siva faaleagaga, ia faaneenee atu ma pepese atu i le Alii i o outou loto.” Ma i le Kolose 3:16, tatou te faitau ai faapea: “Ia nofo le afioga a Keriso i totonu ia te outou ia tele lava, i le poto uma lava, ia outou aʻoaʻo ma apoapoai le tasi i le tasi i salāmo, ma pese, ma siva faaleagaga, o loo pepese atu ai ma le faafetai i le Alii i o outou loto.”

12. O ā faaaoaoga ua ia i tatou e iloa ai ua fesoasoani a tatou pese ia i tatou ina ia aʻoaʻo atu ma timai ai le tasi i le isi?

¹² Mātau i faataitaiga taitasi, e taʻua soo ai e Pauro le usuina o pese, ina ua ia taʻua ‘salamo, o viiga i le Atua, o pese faaleagaga, o le usuina o pese mai o outou loto.’ Ua ia muai taʻu atu foi ona manatu i uso i Kolose i le faapea atu, ona o lenei mea, e mafai ai ona tatou “aʻoaʻo ma apoapoai le tasi i le tasi.” Ma e mautinoa lo tatou faia faapea, e pei ona vaaia i matua o a tatou pese—“Ia Vivii ia Ieova, Foafoaga Uma!” (numera 5), “Ia Mausali, ia Lē Maluelue!” (numera 10), “Ia Olioli i le Faamoemoe o le Malo!” (numera 16), “Aua Neʻi Matatau ia i Latou!” (numera 27), “Ia Vivii atu ia Ieova Lo Tatou Atua!” (numera 100), ua na o ni nai faaaoaoga na.

13. Ua faapefea ona faaalia e le “auauna faamaoni ma le mafaufau” le tāua o le usuina o pese e avea o se vaega o la tatou tapuaiga?

¹³ Ina ia tusa ai ma nei poloaiga, ua faatulagaina ai e le “auauna faamaoni ma le mafaufau” e faapea, i taimi tatou te potopoto ai—i sauniga a le faapotopotoga, i fonotaga matagaluega, i aso faapitoa o fonotaga, i tauaofiaga itumalo, ma tauaofiaga faavaomalo—e ao ona amata ma faaiu i le usuina o pese o le Malo. (Mataio 24:45) E lē gata i lena, ua fuafuaina pese ina ia usu i isi taimi a o faagasolo nei faatasitasiga. Talu ai e masani lava ona amata a tatou sauniga i le usuina o se pese o le Malo, pe ua lē ao ea la ona avea o se mea tāua le taunuu tonu i le taimi, ina ia lava le taimi e auai ai i lea vaega o la tatou tapuaiga? Ma talu ai e faaiu foi sauniga i le usuina o pese, pe ua lē ao ea ona tatou faatali ai pea seia uma le pese faaiu ma le tatalo lea e mulimuli mai?

14. O ā faaaoaoga ua ia i tatou o pese ua fetaui le filifilia mo a tatou polokalama?

¹⁴ Ua filifilia ma le faaeteete pese mo a tatou sauniga ina ia ogatusa ma le polokalama. Mo se faaaoaoga, i Tauaofiaga Itumalo o “Aʻoaʻoga Mai le Atua” i le 1993 i le gagana Samoa, na usuina ai le pese numera e 70 (132), “Leoleo Lou Loto!”—lea na sosoo atu ina ua uma lauga e tolu sa talanoaina ai fili e tolu—Satani, le lalolagi, ma le tino agasala, ma faalaeiauina ai Kerisiano ina ia tetee atu i nei fili. E faapena foi i le pese numera e 73 (157), “Tapuai i a Ieova a o Iti,”—lea e tumu i timaiga mo talavou, na sosoo atu loa lava ina ua uma le tala na faamatilatila ai matafaioi a talavou. I le pese numera 39 (70), “Ia Pei o Ieremia,” na faatomua ai se faasologa o lauga na faavae aʻe i valoaga a Ieremia. Ma ina ua maeʻa ni lauga faasolo i vala eseese o la tatou faiva faa-Kerisiano, ona sosoo mai ai lea o le pese numera e 68 (133), “Lūlū le Fatu o le Malo,” o se pese e sili ona faagaee ai mo le auaunaga. O le faaeteetega foi lena o loo faia i le filifiliina o pese mo le Suesuega o Le Olomatamata, le Sauniga o le Auaunaga, ma le Aʻoga o le Faiva Faatiokarate. O lona uiga la, pe afai e avatuina e toeaina lauga lautele ma faaali atu pese e ao ona faaaogā e amata ai le polokalama, e ao ia i latou ona filifilia se pese e fetaui ma le matua o a latou lauga.

15. E ono mafai faapefea e le taitaifono ona faalaeiau atu le talisapaia mo le pese o le a usuina?

¹⁵ Pe a faasilasila atu le pese o le a usuina, atonu e faalaeiau atu e le taitaifono le talisapaia mo le pese e ala i le taʻu atu o lona ulutala po o le matua. Tatou te lē usuina numera ae o matua faale-Tusi Paia. O le a fesoasoani foi i le faapotopotoga ina ia talisapaia atili le pese pe afai e taʻu atu le mau o loo tusia i lalo ifo o le matua. Atonu foi e toe fai atu nai nisi manatu, e pei o le faapea atu, e ao i tagata uma ona latou lagona le uiga o le pese.

Faaalia le Talisapaia o le Lelei o Ieova e Ala i Pesega

16. E mafai faapefea ona tatou maua le agaga o a tatou pese?

¹⁶ Talu ai o upu o a tatou pese o le Malo ua iai le tele o uiga, tatou te manaomia ai ona uai atu i upu a o usuina. Tatou te fia maua tonu le uiga o pese taitasi. O nisi pese, e pei o na o loo faatatau i le fua o le agaga o le alofa, o pese na e matuā ootia ai le loto. (Kalatia 5:22) O pese na tatou te usuina ma le naunautai ma le mafana. O isi pese e faatatau i le olioli, ma e ao ona tatou taumafai e usuina ma le fiafia. Ae o isi foi pese o pese savali, e iai le lagona lotoa, ma e ao la ona aasa le usuina o nei pese ma ia iai se lagona matuā maumauai. I la tatou Aʻoga o le Faiva Faatiokarate, ua fautuaina ai i tatou ina ia faaali atu le mafana ma lagona alofa, faapea ma le aasa i a tatou taulimaga. Ae sili atu ona tāua pe a faaali atu le mafana, o lagona alofa, ma le aasa pe a usuina a tatou pese.

17. (a) O le ā le aoaiga na faia i tagata Isaraelu lē faamaoni lea tatou te lē fia faatatauina i a tatou pesega? (e) O ā iuga e iai pe a tatou matuā utagiaina le timaiga o iai i a tatou pese?

¹⁷ Afai tatou te usuina a tatou pese o le Malo ae o loo tatou mafaufau i isi mea, e lē o talisapaia atoatoa le uiga o upu, pe ua lē pei ea i tatou o tagata Isaraelu lē faamaoni o ē na aoaia talu ai, sa latou vivii atu i le Atua i o latou laugutu, ae o o latou loto sa mamao lava mai ia te ia? (Mataio 15:8) Tatou te lē fia faatatauina ia i tatou lena aoaiga i le auala o loo tatou usuina ai pese o le Malo, a ea? O le usuina o pese o le Malo i se uiga talafeagai, o le a tatou faagaeeina ai e lē gata o i tatou lava, ae faapea foi i latou o loo faalogologo, e aofia ai ē talavou. Ioe, afai e uigā ia i latou uma o loo pepese i o tatou Maota o le Malo timaiga o loo iai i nei pese, o le a avea lenei o se faalaeiauga malosi ina ia maelega ai i le faiva ma alofia ai mailei o le faia o mea sese.

18. O le ā le aafiaga na oo i se tasi fafine ona o le usuina o pese o le Malo?

¹⁸ E tele taimi, ua maofa ai tagata o i fafo pe a tatou usuina pese o le Malo. Na lomia e Le Olomatamata le mataupu lenei i se isi taimi e faapea: “O le faapea atu o [a tatou] pesega e mafai foi ona auauna ina ia maua ai e tagata le poto e uiga ia Ieova le Atua, na faaalia lea i se mea na tupu i se fafine, o lē na papatiso i le Fonotaga i le 1973 o le ‘Manumalo Mai le Atua,’ lea na faia i le Yankee Stadium, i le aai o Niu Ioka. Sa asiasi atu o ia lava mo le uluai taimi i se Maota o le Malo i lona nuu, ma nofo ai o ia mo sauniga uma e lua. A o pepese le faapotopotoga . . . ‘Ia Taulai atu Lau Vaai i le Taui!,’ sa matuā maofa o ia e lē gata i upu a o le auala foi na latou usuina ai, o lea na ia mautinoa ai o le nofoaga moni lea sa ia manao ai. Ina ua uma, ona ia talanoa atu lea i se tasi o Molimau ma talosaga atu i ai mo se suesuega faale-Tusi Paia, ma sa agaigai ai i luma o [ia] i le taimi lava lea seia oo ina avea ma molimau Kerisiano a Ieova.”

19. O le ā le faalaeiauga faaiu ua aumaia e faatatau i le usuina ma le loto atoa o a tatou pese o le Malo?

¹⁹ I le tele lava o a tatou sauniga, e itiiti ai lava ni nai avanoa e maua e le aofia e faaalia atu ai o latou lagona alofa ma le talisapaia. Ae e mafai e i tatou uma lava ona faaalia le auala o loo tatou lagona ai e uiga i le lelei o Ieova, e ala i le auai ma le loto i le usuina o pese o le Malo. E lē gata i lea, pe ua tatou lē maua ea ni agaga lelei, pe a tatou auaufaatasi? E tatau foi la ona tatou lagona le fia pepese! (Iakopo 5:13) O le mea moni lava, o le tele o lo tatou talisapaia o le lelei o Ieova ma lona alofa tunoa, o le a tatou usuina atu ai ma le loto atoa viiga ia te ia.

E Faapefea ona E Tali?

◻ O ā mafuaaga autū e lua mo le vivii atu ia Ieova?

◻ O ā auala eseese e mafai ona tatou vivii atu ai ia Ieova?

◻ O le ā se tasi o auala e sili ona matagofie e mafai ona tatou vivii atu ai ia Ieova?

◻ O ā faaaoaoga faale-Tusi Paia ua tatou iloa e faatatau i le vivii atu ia Ieova i pese?

◻ E mafai faapefea ona ia i tatou se uiga talafeagai i lo tatou usuina o pese o le Malo?

[Pusa i le itulau 11]

Ia Olioli i na Pese!

E foliga mai e iai nisi o fai sina faafaigata ia i latou le aʻoaʻoina o le tele o pese. Peitai, o nisi faapotopotoga e lē o se faafitauli tele ia i latou le usuina o le tele o nei pese. Atonu e pau lava le mea manaomia, o ni nai taumafaiga atili ina ia aʻoaʻoina vaega na e foliga mai e tau lē masani ai i le uluai taimi. E masani loa i ai i na pese, e masani lava ona sili atu le talisapaia e le faapotopotoga o na pese, na i lo o pese e lē o manaomia ai ni taumafaiga i le aʻoaʻoina. Ona mafai lea e tagata uma o le faapotopotoga ona usuina ma se lagona mautinoa. Ioe, e mafai ona latou olioli i na pese!

[Pusa i le itulau 12]

Usu Pese o le Malo i Faatasiga Faasamasamanoa

O lo tatou usuina o pese o le Malo e lē tatau ona muta mai i le Maota o le Malo. Na usuina e Pauro ma Sila viiga ia Ieova a o iai i le falepuipui. (Galuega 16:25) Ma na faapea mai le soʻo o Iakopo: “Ua fiafia ea se tasi? ina pese ia [“i viiga i le Atua,” NW].” (Iakopo 5:13, faaopoopoga i lalo) E fiafia tagata uma o loo iai i ni faatasiga faasamasamanoa. Aisea la e lē usuina ai pese o le Malo? E mafai ona matuā faafiafiaina ai pe afai e usuina a o ta se piano po o se kitara. A lē o lena foi, o loo iai ni kaseti o pese piano o a tatou pese o le Malo; ua iai i le tele o aiga Molimau le pusa atoa ua iai nei kaseti. E lē gata ina lelei e tātā ma usu faatasi ai, ae e matuā lelei foi e avea o se musika matagofie o loo lalago mai i tua.

[Ata i le itulau 8, 9]

Ina ua uma ona faasaoina i latou mai le Sami Ulaula, sa faaali atu e Isaraelu lo latou olioli i pesega

[Ata i le itulau 10]

O pesega fiafia o se vaega lea o le tapuaiga faa-Kerisiano i aso nei