Pe o le a E Maua ni Aogā mai Feagaiga a le Atua?
“E manuia nuu uma lava ia te oe. O lenei, ua manuia e ua faatuatua faatasi ma Aperaamo lē na faatuatua.”—KALATIA 3:8, 9.
1. O le ā ua faaalia i tala faasolopito e uiga i āuga a le tele o pulega?
“O PULE sauā faafiaagalelei [pe, faamalamalamaina]” o le taʻu lena na taʻua ai nisi o pule i Europa i lona 18 o senituri. Sa ‘lelei o latou uiga i le puleaina o o latou tagata ma se agalelei faatamā, peitai sa sese a latou fuafuaga ma na lē taulau ai a latou taumafaiga e toe faaleleia.’a (The Encyclopedia Americana) O lenei mea na faapogaia ai ni fouvalega sa leʻi pine a e lofia atoa ai Europa.
2, 3. Ua faapefea ona ese Ieova mai tupu faaletagata?
2 Maeu le ese o Ieova mai i taʻitaʻi faaletagata e leʻi mafai ona valoia. E mafai lava ona faigofie ona tatou iloa manaoga tiga o le fanau a tagata mo se suiga o le a mulimuli ane aumaia ai vaifofo moni mo faamasinoga lē tonu ma puapuaga. Peitai e lē manaomia ona tatou popole faapea o le gaoioiga a le Atua i le aumaia o lenei tulaga e faalagolago atu i manatu lē mautinoa. I totonu o le tusi ua aupito sili ona faasalalauina i le lalolagi, ua ia faamaumauina ai lana folafolaga i le aumaia o faamanuiaga e faavavau i le fanau talitonu a tagata. O le a oo mai lenei mea e tusa lava po o le ā le uluai atunuu o le tagata, lanu, aʻoaʻoga, po o lona tulaga faavafealoai. (Kalatia 3:28) Peitai pe mafai ona e faalagolago i lenei mea?
3 Na siitia mai e le aposetolo o Paulo se vaega o le faamautinoaga a le Atua na tuuina atu ia Aperaamo: “E moni lava, ou te matuā faamanuia ia te oe.” Na faaopoopo atu Paulo e faapea, talu ai “e le mafai ona pepelo ai le Atua,” ua tatou “tago atu [ai] i le faamoemoega ua tuu i o tatou luma.” (Eperu 6:13-18) O lo tatou mautinoa e uiga i na faamanuiaga e mafai ona faamalosia atili i le matauina o le auala maopoopo ua faataatia ai e le Atua le faavae mo le faataunuuina o lenei mea.
4. Na faapefea ona faaaogā e Ieova feagaiga eseese e faataunuuina ai lana fuafuaga?
4 Ua uma ona tatou iloa faapea na faia e le Atua se feagaiga ma Aperaamo e aofia ai se fanau o lē o le a avea ma mea faigaluega i le faamanuiaina “o atu nuu uma lava o le lalolagi.” (Kenese 22:17, 18) Sa oo ina avea le nuu o Isaraelu ma fanau faaletino, peitai i le uiga e sili ona tāua faaleagaga, na faamaonia ai Iesu Keriso e avea o le vaega autū o le fanau a Aperaamo. O Iesu foi o le Alo, po o le Fanau, a le Aperaamo Sili, o Ieova. O Kerisiano o ē e “o Keriso” i latou na faia aʻe ai le vaega lona lua o le fanau a Aperaamo. (Kalatia 3:16, 29) Ina ua uma ona faavaeina le feagaiga faa-Aperaamo, ona faaopoopo atu lē tumau lea e le Atua le feagaiga o le Tulafono i le nuu o Isaraelu. Na faamaonia i lenei mea o Isaraelu sa o ni tagata agasala o ē na manaomia se faitaulaga e tumau ma se taulaga lelei atoatoa. I lenei mea na leoleoina ai le gafa o le Fanau ma fesoasoani ai ina ia iloa o ia. I le isi itu, o le feagaiga o le Tulafono sa faaalia ai foi faapea o le a aumaia e le Atua se nuu o tupu ma ositaulaga. A o aogā pea le Tulafono, na faia ai e le Atua se feagaiga ma Tavita ina ia i ai se faasologa tautupu i Isaraelu. O le feagaiga o le Malo faa-Tavita na faasino atu foi i se tasi e i ai se pulega e tumau i luga o le lalolagi.
5. O ā fesili po o faafitauli o loo tumau pea ona manaomia le faaleleia?
5 Peitai, sa i ai ni vala po o ni sini autū o nei feagaiga sa foliga mai e leʻi atoa pe na manaomia ona faamalamalamaina. Mo se faaaʻoaʻoga, afai o le Fanau o loo sau o le a avea ma tupu i le gafa o Tavita, o le a faapefea la ona avea o ia o se ositaulaga tumau o lē e sili atu mea na te faia na i lo o ositaulaga muamua? (Eperu 5:1; 7:13, 14) Pe e mafai e lenei Tupu ona pule e sili atu na i lo o se oganuu faalelalolagi ua faatapulaaina? O le a faapefea e le vaega lona lua o le fanau ona taʻuagavaaina ina ia i ai i le aiga o le Aperaamo Sili? Ma e tusa lava pe e mafai ona latou faia faapea, o le ā le puleaga o le a iai ia i latou, talu ai o le toatele o ia sui e leʻi tupuga mai ia Tavita? Seʻi tatou vaai pe na faapefea ona faia e le Atua ni laasaga faaletulafono i le faia o ni feagaiga faaopoopo na o le a foia ai nei fesili, ma tatalaina ai le auala mo lo tatou faamanuiaga e faavavau.
Le Feagaiga mo se Ositaulaga Faalelagi
6, 7. (a) E tusa ai ma le Salamo 110:4, o le ā le feagaiga faaopoopo na faavaeina e le Atua? (e) O le ā le talaaga ua fesoasoani ia i tatou e malamalama ai i lenei feagaiga faaopoopo?
6 E pei ona sa tatou iloa, i totonu o le vaega faatapulaa o le feagaiga o le Tulafono, na osia ai e le Atua se feagaiga ma Tavita mo sē o le a tupuga mai (le fanau) o lē o le a pule tumau i luga aʻe o se oganuu faalelalolagi. Peitai na faaalia mai foi e Ieova ia Tavita faapea o le a oo mai se ositaulaga e faavavau. Na tusia e Tavita: “Ua tauto Ieova, e le salamo lava ia, O oe lava o le ositaulaga e faavavau, e uiga faatasi ma Mekisateko.” (Salamo 110:4) O le ā sa i tua o lenei fetalaiga faatautoga a le Atua lena na iʻu i se feagaiga totino i le va o Ieova ma le Ositaulaga o loo sau?
7 O Mekisateko sa avea ma tupu o Salema anamua, lea e mautinoa sa i le itu lea na mulimuli ane fausia ai i inā le aai o Ierusalema (o se igoa na aofia ai “Salema”). O le faamatalaga e uiga ia la feutagaiga ma Aperaamo ua faatāuaina ai faapea sa avea o ia o se tupu o lē na tapuai i “le Atua silisili ese.” (Kenese 14:17-20) Peitai, o le faamatalaga a le Atua i le Salamo 110:4 ua faaalia ai o Mekisateko sa o se ositaulaga foi, na faia ai o ia ma tagata tutasi. O ia o se tupu ma o se ositaulaga, ma sa auauna o ia i le mea lea na mulimuli ane tauaveina ai e tupu faa-Tavita ma ositaulaga faasa-Levī o latou tiute tauatua ua faatulagaina.
8. Faatasi ai ma ai na faia ai lenei feagaiga mo se faitaulaga e uiga faatasi ma Mekisateko, ma o le ā le iʻuga?
8 Ua aumaia e Paulo ia i tatou ni auiliiliga faaopoopo e uiga i lenei feagaiga mo se ositaulaga e pei o Mekisateko. Mo se faaaʻoaʻoga, ua ia faapea mai o Iesu Keriso o ia lea na “taʻua e le Atua o le faitaulaga sili e uiga faatasi ma Mekisateko.” (Eperu 5:4-10; 6:20; 7:17, 21, 22) E ui lava ina manino mai faapea o Mekisateko sa i ai ni ona mātua faaletagata, a e leai se faamaumauga o lona gafa. O lea na i lo o le ulu atu o Iesu i se tulaga maualuga o le ositaulaga e uiga faatasi ma le gafa faamaumauina o Mekisateko, o lona tofiaina na tuusaʻo lava mai le Atua. O le tulaga faaositaulaga o Iesu o le a lē tuuina atu i se isi, auā e “tumau o ia o le faitaulaga e faavavau.” Ua faia lenei mea, auā o aogā o lana auaunaga faaositaulaga o le a oo i le faavavau. E mafai ona faamanuia moni ai i tatou i le i ai o se faitaulaga o lē “e mafai ai ia te ia ona faaola pea lava i e faalatalata atu i le Atua ona o ia” ma faatonu ma taʻitaʻi ē faatuatua e faavavau.—Eperu 7:1-3, 15-17, 23-25.
9, 10. Ua faapefea i le iloa e uiga i lenei feagaiga lona lima ona faalauteleina lo tatou malamalama e uiga i le auala o le a faataunuuina ai le fuafuaga a le Atua?
9 O le isi mea moni iloga, o le vaega a Iesu i le avea o se Tupu ma Ositaulaga, e oo atu lava lea i tala atu o tuaoi o le lalolagi. I le mau lava lea o loo ia taʻua ai lenei feagaiga mo se faitaulaga e pei o Mekisateko, na tusi ai Tavita: “Ua tulei mai le afioga a Ieova i loʻu Alii, Ia e nofo i loʻu itu taumatau, seia ou faia e ua ita ia te oe ma mea e tu ai ou vae.” I lea, ua mafai ai ona tatou iloa faapea o Iesu—o le Alii o Tavita—o le a i ai sona nofoaga i le lagi faatasi ma Ieova, o lea mea na tupu i lona afio aʻe i le lagi. Mai le lagi, ua mafai ai e Keriso ona tuuina mai le pulega faatasi ma lona Tamā ina ia faatoilaloina fili ma faaoo mai le faamasinoga.—Salamo 110:1, 2; Galuega 2:33-36; Eperu 1:3; 8:1; 12:2.
10 O le mea lea, e ala i lo tatou iloaina e uiga i lenei feagaiga lona lima, ua tatou maua ai se vaaiga lautele i le auala maopoopo, ma le maeʻaeʻa o le a faataunuuina ai e Ieova lana fuafuaga. Ua faavaeina faapea o le vaega muamua o le fanau o le a avea foi o se ositaulaga i le lagi ma faapea o lana pule e pei o se Tupu ma se Ositaulaga o le a oo atu i le vateatea uma.—1 Peteru 3:22.
Le Feagaiga Fou ma le Vaega Lona Lua o le Fanau
11. O ā ni fenuminumiaiga na i ai e tusa ai ma le vaega lona lua o le fanau?
11 Ina o tatou muai talanoaina le feagaiga faa-Aperaamo, na tatou matauina ai faapea o Iesu sa avea o le vaega muamua o le fanau e ala i aiā faalenatura. Na ia fanau saʻo mai lava i le gafa o le tamā matua o Aperaamo, ma i le avea o se tagata lelei atoatoa, na avea ai o ia o se Atalii na talia lelei o le Aperaamo Sili. A e faapefea la e uiga i tagata o ē ua i ai le faaeaga o le avea ma vaega lona lua o le fanau a Aperaamo, “o suli foi e tusa ma le mea na folafolaina”? (Kalatia 3:29) Ona o le lē lelei atoatoa, o se vaega o le aiga o Atamu agasala, o le a lē taʻuagavaaina ai i latou ina ia i ai i le aiga o Ieova, le Aperaamo Sili. Pe e mafai faapefea ona foia le toʻatugā o le lē lelei atoatoa? E lē mafai e le fanau a tagata ona faia lena mea, peitai e lē faigata i le Atua.—Mataio 19:25, 26.
12, 13. (a) Na faapefea ona valoia e le Atua le isi feagaiga? (e) O le ā le vaega faapitoa o lenei feagaiga e aogā ai lo tatou uaʻi atu i ai?
12 A o aogā pea le Tulafono, na valoia e le Atua e ala i lana perofeta: “Ou te osia ai le feagaiga fou ma le aiga o Isaraelu, ma le aiga o Iuta. E le pei o le feagaiga na ou osia ma o latou tamā . . . o laʻu feagaiga lea na latou solia, . . . ou te tuuina laʻu tulafono i totonu ia te i latou, ma ou tusi ai i o latou loto; e fai foi aʻu mo latou Atua, o i latou foi e fai moʻu nuu. E lē toe aʻoaʻo foi . . . Ia outou iloa Ieova; auā e iloa aʻu e i latou uma lava, . . . auā ou te faamagalo i a latou amio leaga, ma ou te le toe manatua a latou agasala.”—Ieremia 31:31-34.
13 Ia matau faapea o se vaega o lenei feagaiga fou o le faamagaloina o agasala, e manino mai i se auala sa ‘lē pei’ o le fuafuaga na faia i taulaga na osia i manu i lalo o le Tulafono. Na faasusulu atu e Iesu le malamalama i lenei mea i le aso na maliu ai o ia. Ina ua uma ona faatasi ma ona soʻo i le faamanatuina o le Paseka e pei ona manaomia ai e le Tulafono, ona faatuina lea e Keriso le Talisuaga Afiafi a le Alii. O lenei faamanatuga faaletausaga o le a aofia ai le tagofia o le ipu o le uaina, lea na fetalai i ai Iesu: “O lenei ipu o le feagaiga fou lea i loʻu toto, ua faamaligiina mo outou.”—Luka 22:14-20.
14. Ai se ā ua tāua ai le feagaiga fou i le saunia o le vaega lona lua o le fanau?
14 O lea, o le feagaiga fou o le a amata ona faagaoioia ona o le toto o Iesu. Ona e faavae i lena taulaga lelei atoatoa, ua mafai ai e le Atua ona ‘faamagalo amio leaga ma agasala’ mo taimi uma lava. Seʻi manatu i le uiga o lena mea! Talu ai e mafai ona faamagalo atoatoa agasala a tagata tuutoina atu o le aiga o Atamu, ua mafai ai ona silasila le Atua ia i latou o ni tagata e leai ni agasala, fanauina i latou e avea o ni atalii faaleagaga o le Aperaamo Sili, ma faauuina ai i latou i le agaga paia. (Roma 8:14-17) O lea la, o le feagaiga fou lea ua faamautinoaina e ala i le taulaga a Iesu, ua mafai ai e ona soʻo ona avea o le vaega lona lua o le fanau a Aperaamo. Na tusia e Paulo: “Ina ia faaumatia e ia i lona maliu [o Iesu] o le ua i ai le malo e oti ai, o le tiapolo lea, ma tuusaunoaina ai [e ia] i latou uma o e na faapologaina i o latou olaga uma ona o le mataʻu i le oti. Auā e moni, e le fesoasoani o ia i agelu, peitai ane o le fanau a Aperaamo o loo fesoasoani o ia i ai.”—Eperu 2:14-16; 9:14.
15. O ai itu i lenei feagaiga fou?
15 A o avea Iesu ma Puluvaga ma le taulaga e faamautinoaina ai le feagaiga fou, o ai itu e lua o le feagaiga? Na valoia e Ieremia faapea o le a faia e le Atua lenei feagaiga ma le “aiga o Isaraelu.” O lē fea Isaraelu? E lē o Isaraelu faaletino na peritomeina i lalo o le Tulafono, auā o le feagaiga fou na soloia ai lena uluai feagaiga. (Eperu 8:7, 13; tagai i le itulau e 31, o Le Olomatamata faa-Peretania o Fepuari 1, 1989.) O le a feutagai nei le Atua ma tagata Iutaia ma tagata o Nuu Ese o ē e ala i le faatuatua, na ‘peritomeina ai i le loto e le agaga’ i se uiga faafaatusa. Ua ōgatasi lenei mea ma lana fetalaiga faapea o i latou i le feagaiga fou o le a ‘tusia ana tulafono i o latou mafaufau ma i o latou loto.’ (Roma 2:28, 29; Eperu 8:10) Na taʻua e Paulo na tagata Iutaia faaleagaga o “le Isaraelu o le Atua.”—Kalatia 6:16; Iakopo 1:1.
16. Ua faapefea ona fesoasoani le feagaiga fou i le faataunuuina o le mea o loo faasino mai i le Esoto 19:6?
16 Talu ai ona o lea ua feutagai le Atua ma Isaraelu faaleagaga, na tatalaina ai loa le faitotoa mo se avanoa. Ina ua faavaeina e le Atua le Tulafono, sa ia fetalai e uiga i le fanauga a Isaraelu o ē ua avea o se “malo o ositaulaga, ma nuu paia” mo ia. (Esoto 19:6) O le mea moni, sa leʻi taitai mafai ona avea le Isaraelu faaletino pe o le a avea foi ma nuu o ē o le a avea uma ai i latou ma tupu ma ositaulaga. Peitai o Iutaia ma tagata o Nuu Ese o ē na talia e avea o le vaega lona lua o le fanau a Aperaamo e mafai ona avea ma tupu ma ositaulaga.b Na faamautinoa mai e le aposetolo o Peteru lenei mea, i lona taʻu mai e uiga ia i latou na: “O le tupulaga ua filifilia outou, o tupu ma ositaulaga, o le nuu paia, ma le nuu na faatauina mai ina ia outou taʻutaʻu atu ona lelei na ia valaau ia te outou nai le pouliuli.” Na ia tusi foi faapea ‘o le tofi e lē mamae lava o loo teuina mo i latou i le lagi.’—1 Peteru 1:4; 2:9, 10.
17. Ai se ā ua “sili ona lelei” ai le feagaiga fou na i lo o le feagaiga o le Tulafono?
17 O le mea lea, o loo galulue le feagaiga fou faatasi ma le feagaiga faa-Aperaamo muamua ina ia aumaia ai le vaega lona lua o le fanau. O lenei feagaiga fou i le va o Ieova ma Kerisiano fanauagagaina ua faatagaina ai le fausiaina aʻe o le nuu faalelagi o tupu ma ositaulaga i le aiga tautupu o le Aperaamo Sili. O lea ua mafai ai nei ona tatou iloa le pogai na fai mai ai Paulo faapea “o le feagaiga e sili ona lelei, o le ua faamauina i mea na folafolaina e sili ona lelei.” (Eperu 8:6) O na folafolaga e aofia ai le faamanuiaga o le tusia o tulafono a le Atua i loto o i latou ua tuutoina o ē e lē o toe manatua a latou agasala, ma faatasi ai ma i latou uma o ē ‘iloa Ieova, o tagatanuu atoa ma alii.’—Eperu 8:11.
Le Feagaiga a Iesu mo se Malo
18. I le ā le uiga na lē faataunuuina atoatoa ai e feagaiga ua tatou talanoaina e oo i lenei taimi, le fuafuaga a le Atua?
18 Pe a toe manatunatu i feagaiga e ono ia ua uma ona tatou talanoaina, atonu e foliga mai faapea ua uma ona fuafuaina lelei e Ieova mea uma e manaomia mo le faataunuuina o lana fuafuaga. Peitai, ua aumaia e le Tusi Paia se isi feagaiga lena e fesootai atu ma le mea ua uma ona tatou talanoaina, o se feagaiga ua na tuu faatasia uma vala faaopoopo o lenei mataupu e matuā tāua tele. Ua faatalitalia ma le tonu e Kerisiano fanauagagaina faapea ‘o le a laveai mai le Alii ia te i latou mai galuega leaga uma ma o le a faasaoina i latou mo lona malo faalelagi.’ (2 Timoteo 4:18) I le lagi, o le a avea ai i latou ma nuu o tupu ma ositaulaga, peitai o fea o le a latou pule ai? Pe a faatutuina aʻe i latou i le lagi, o loo ua i ai Keriso i inā e avea o se faitaulaga sili lelei atoatoa. O le a ia tu atu foi ma le malosi tautupu e pulea ai le vateatea. (Salamo 2:6-9; Faaaliga 11:15) O le ā o i ai i inā mo isi tupu ma ositaulaga e faia?
19. O anafea ma na faapefea ona faia le feagaiga tāua lona fitu?
19 Ia Nisani 14, 33 T.A., o le po lea na faatuina ai e Iesu le Talisuaga Afiafi a le Alii ma ia taʻua ai le “feagaiga fou lea i [lona] toto,” na ia fetalai ai foi e uiga i se tasi feagaiga, o lona fitu lea mo le talanoaina. Na ia taʻu atu i ona aposetolo faamaoni: “O outou foi, ua outou tumau ia te au i oʻu tofotofoga. E faapei ona tofia mai e loʻu Tamā o le malo ia te au, e faapea foi ona ou tofia outou, ina ia outou aai ma inu i laʻu laoai i loʻu malo, ma ia nonofo i nofoālii, ma faamasino atu i itu aiga o Isaraelu e sefulu ma le lua.” (Luka 22:20, 28-30) E pei lava ona osia e le Tamā le feagaiga ma Iesu ina ia avea o se ositaulaga e uiga faatasi ma Mekisateko, o lea ua osia ai foi e Keriso se feagaiga totino ma ona soʻo faamaoni.
20. Faatasi ai ma ai na faia ai le feagaiga mo se Malo, ma ai se ā? (Tanielu 7:18; 2 Timoteo 2:11-13)
20 E mautinoa lava sa pipii atu aposetolo e toʻa 11 ia Iesu i le taimi o ona tofotofoga, ma ua faaalia i le feagaiga faapea o le a latou nonofo i nofoalii. E lē gata i lea, i le Faaaliga 3:21 ua faamaonia ai faapea o Kerisiano fanauagagaina uma o ē ua faamaonia lo latou faamaoni o le a nonofo i nofoalii faalelagi. I lea, ua faia ai lenei feagaiga ma le 144,000 uma, o ē ua faatauina i le toto o Iesu ina ia aveina aʻe i le lagi e avea ma ositaulaga ma pule e avea o ni “tupu i le lalolagi.” (Faaaliga 1:4-6; 5:9, 10; 20:6) O le feagaiga ua faia e Iesu ma i latou ua soofaatasia ai i latou ia te ia ina ia auai i lona malo. I se uiga, ua pei ai o se faatoʻānofotane mai se aiga tautupu o le a faatasi atu i se faaipoipoga i se tupu o loo pule. I lea, ua i ai foi o ia i se tulaga e aufaatasi atu ai i le pulega a lona malo.—Ioane 3:29; 2 Korinito 11:2; Faaaliga 19:7, 8.
21, 22. O le ā le faamanuiaga e mafai ona faatalitalia ona o mea ua faataunuuina e nei feagaiga?
21 O ā aogā o le a tatalaina e lenei mea mo le fanau usiusitai a tagata? O le a lē pei Iesu po o le 144,000 o na pule sauā, faafiaagalelei, o ē “sa lē mafai lava ona latou saunia ai ni vaifofo moni.” Na i lo o lea, ua faamautinoaina i tatou faapea o Iesu o se faitaulaga sili “ua faaosoosoina o ia i mea uma pei o i tatou, a ua leai se agasala ia te ia.” O le mea lea ua mafai ai ona tatou malamalama i le pogai ua ‘mafai ai ona ia tiga alofa’ i vaivaiga o le fanau a tagata ma le pogai ua mafai ai e “isi mamoe,” e pei o Kerisiano faauuina, ua mafai ai foi ona faalatalata atu i le nofoalii o le Atua e ala ia Keriso, ma le “saoloto e tautala ai.” (NW) O lea, ua mafai ona “alofaina ai o i [latou], ia maua ai foi le alofa tunoa e fesoasoani mai i ona aso e tatau ai.”—Eperu 4:14-16; Ioane 10:16.
22 O i latou na ua faafeagaigaina ina ia auai ma Iesu e avea o tupu ma ositaulaga ua auai foi i le faamanuiaina o le fanau a tagata. E pei o faitaulaga sa Levī anamua ona avatu ai aogā i le nuu atoa o Isaraelu, o lea o i latou o loo auauna i nofoalii faalelagi ma Iesu o le a faamasinoina i le amiotonu i latou uma o ē nonofo i le lalolagi. (Luka 22:30) O na tupu ma ositaulaga sa avea muamua o tagata, o lea o le a latou tiga alofa ai foi i manaoga o le fanau a tagata. O lenei vaega lona lua o le fanau o le a lagolagosua ia Iesu i le faamautinoaina faapea o le a “manuia nuu uma lava.”—Kalatia 3:8.
23. E tatau faapefea ona gaoioi tagata taitoatasi i le felagolagomai ma nei feagaiga?
23 O i latou uma o faanaunau ina ia auai i lena faamanuiaga o le fanau a tagata, ma i lea ua maua aogā mai feagaiga a le Atua, ua valaauina nei i latou ina ia faia faapea. (Faaaliga 22:17) O le tasi laasaga lelei o le auai lea i le faamanatuina o le Talisuaga Afiafi a le Alii, lea o le a faia i le Aso Lua, Mati 10, 1990 pe a mavae le goto o le la. Faamolemole ia fai nei ni fuafuaga ina ia auai atu i se tasi o faapotopotoga o Molimau a Ieova. O i inā o le a e aʻoaʻoina ai nisi mea e sili atu e uiga i feagaiga tauatua ma o le a e iloa atili ai foi pe o le a faapefea ona e maua mai ai aogā.
[Faaopoopoga i lalo]
a “E oo lava i fuafuaga fou maoaʻe e lē masani ai, mo le toe fuataiina, sa tuua tagata faigaluega i faatoaga i se tulaga matuā mativa, o tagata maualuluga ma mauoa i le tulaga o ē ua maua faaeaga faapitoa ma o le vasega o tagata i le va o ia vasega e lua, e faalēlava ni a latou mea e ofi atu i totonu o faiga malo ma mataupu fai i sosaiete. . . . E tatau ona faapea mai, a o amata ona fesagaʻi pule sauā faafiaagalelei ma faamalamalamaina ma fesili na sa lē toe mafai ona faaleamanaia, a e sa lē mafai lava ona latou saunia ai ni vaifofo moni i faiga faapolotiki ma faiga tautamaoaiga o lena vaitaimi.”—Western Civilization—Its Genesis and Destiny: The Modern Heritage.
b O Iesu e lē o se itu o le feagaiga fou. O ia o lona Puluvaga ma e leai sana agasala e manaomia ona faamagaloina. E lē gata i lea, e lē tatau mo ia ona avea o se tupu ma ositaulaga ona o lea feagaiga, auā o ia o le tupu e tusa o le feagaiga faa-Tavita ma o le ositaulaga foi e uiga faatasi ma Mekisateko.
E te Manatua?
◻ Ai se ā na faia ai le feagaiga o loo taʻua i le Salamo 110:4, ma o le ā na ia faataunuuina?
◻ O ai e i ai i le feagaiga fou, ma na faapefea ona ia fesoasoani e saunia se nuu o tupu ma ositaulaga?
◻ Ai se ā na faia ai e Iesu se feagaiga totino ma ona soʻo?
◻ O ā feagaiga e fitu ia ua uma ona tatou talanoaina?
[Siata i le itulau 14]
(Tagaʻi i le lomiga mo le ata atoa)
Le feagaiga faa-Etena Kenese 3:15
Le feagaiga faa-Aperaamo
Le feagaiga o le Tulafono
Le feagaiga o le Malo faa-Tavita
Le feagaiga e avea ai ma ositaulaga e uiga faatasi ma Mekisateko
Le fanau muamua
Le fanau lona lua
Faamanuiaga e faavavau
[Siata i le itulau 16]
(Tagaʻi i le lomiga mo le ata atoa)
Le feagaiga faa-Etena Kenese 3:15
Le feagaiga faa-Aperaamo
Le feagaiga o le Tulafono
Le feagaiga fou
Le feagaiga o le Malo faa-Tavita
Le feagaiga e avea ai ma ositaulaga e uiga faatasi ma Mekisateko
Le fanau lona lua
Le feagaiga mo se Malo faalelagi
Le fanau muamua
Faamanuiaga e faavavau