Pe o le a Faia e le Atua se Mea e Uiga i le Faamasinoga Lē Tonu?

“E MATUĀ lē tonu lava.” Na faaalia ai le lē malie o se tagata aʻoga talavou, o lē na faatumuina i le ita ina ua ia iloa mulimuli ane le matuā faaseseina o le faamasinoga. “Afai e iai moni se Atua,” sa ia faaauau ai, “pe mafai faapefea ona ia faatagaina sea faamasinoga lē tonu?” Pe mafai ona e tiga alofa faatasi ma lenei tamaitai talavou? Atonu e faapena. Ae e mafai foi la ona e taliina lana tetee mai?

A o e tamaitiiti, atonu sa oo ia te oe se lagona i nisi taimi faapea ua faatagaina oe e ou mātua ina ia tausia i se auala lē tonu. Peitai o lena faamasinoga lē tonu e manino mai e leʻi faamaonia faapea e lē o iai i laua, a ea? E faapena foi, o le faatagaina e le Atua o le faamasinoga lē tonu o le a leai lava se auala e faamaonia ai lona lē iai.

Ae peitai, na tali mai le tagata aʻoga talavou, ae o se mataupu e ese lenei. Na ia faasino mai faapea o se tamā faaletagata lē lelei atoatoa e mafai foi ona faamasino lē tonu o ia. Pe ona o lona lē iloa o mea moni uma, atonu ua lē mafai ai ona ia iloa le faamasinoga lē tonu pe a vaai i ai. A e lē gata i lea, ona e gata mai le iloa o le tagata, atonu e leai ai sona malosi e faia ai se mea e uiga i le faamasinoga lē tonu na ia vaai i ai. E leai se mea o nei mea, na finau mai ai o ia, o le a faatatauina i se Atua faamasinotonu o lē e sili ona maualuga ma malualii.

Atonu e mafai foi ona e lagona faapea o le faatagaina o le faamasinoga lē tonu ua na o se mea lē fetaui lea ma uiga tauatua. Peitai, pe mafai ona faapea ona o lona atamai lē mafuafuaina, ua iai i le Atua se mafuaaga lelei mo le faatagaina o le faamasinoga lē tonu mo se taimi umi?

Ua manatu tagata tusitala o le Tusi Paia i le Atua faapea “e alofa o ia i le amiotonu ma le faamasinoga tonu.” “E tonu ona ala uma lava; o le Atua faamaoni, e le o ia te ia se amioletonu,” na tusi ai Mose.—Salamo 33:5, NW; Teuteronome 32:4; Iopu 37:23.

E lē gata i le manatu ia Ieova o le Atua faamasinotonu o lē e lē fiafia i le faamasinoga lē tonu, ae ua ioe tusitala o le Tusi Paia faapea e iai se aso ona ia aveesea atoatoa lea o le faamasinoga lē tonu. Mo se faaaʻoaʻoga, na valoia e Isaia lenei tulaga: “Faauta! o le a pule se Tupu mo le amiotonu lava ia; ma o alii foi, o le a pule o ni alii mo le faamasinogatonu lava ia. Ma i le vao lafulafuā o le a mau ai le faamasinoga tonu, ma i le fanua lafulemu o le a nofo foi le amiotonu.” (Isaia 32:1, 16, NW) Ae o afea? Ma afai ua finagalo le Atua e aveesea le faamasinoga lē tonu mai le lalolagi, aiseā na ia muamua ona faataga ai?

Faamasinoga Lē Tonu—Aiseā na Faatagaina ai?

Sa iai se taimi na lē iai le faamasinoga lē tonu i le vateatea. Na faatoʻā lauiloa lava le iai o le faamasinoga lē tonu i le fanau a tagata talu mai le fouvalega a Atamu ma Eva i lalo o uunaiga a Satani le Tiapolo. Sa leʻi vave faaumatia loa Satani i le taimi o le fouvalega. Mo lana lava fuafuaga lelei, na faatagaina ai e le Atua se vaitaimi umi e faia ai e le tagata faamasinoga lē tonu, ma o lenei le fuafuaga ina ia tofotofoina ai i latou o ē tuutoina ia te Ia, pe o le a faamaonia lo latou faamaoni ia te ia pe leai. O lo latou filifili e avea o ni ē tausi le faamaoni, o le faafitia lea o le tomai o Satani e faaliliuina ai le foafoaga uma faaletagata faasaga i le Atua. Ona o le faasilisiliina o le pule silisili a le Atua, o le a faaumatia ai lea galuega a Satani, ma o le a aveesea faamasinoga lē tonu uma.

Ae i le vaitaimi lea, ana faapea e puipuia malosi e Ieova tagata mai le feagai ai ma le faamasinoga lē tonu, o lona uiga la ua ia faoa mai ia i latou le saolotoga e filifili ai. I le ma lea foi, i le faatagaina o tagata e lagona iʻuga lē tonu o gaoioiga sese a isi, ua faataʻitaʻia ai e le Atua maeu le mataʻutia sa iai ona sa fouvale ma le lē tonu Atamu ma Eva faasaga i pulega tauatua, ae ua suia ai nei mea i a laua lava tapulaa sese. E ala i le faatagaina o le fanau a tagata e selesele le mea ua luluina, ua fesoasoani atu ai le Atua i tagata faamaoni ia iloa le silisili o le faia o mea i lana auala.—Ieremia 10:23; Kalatia 6:7.

I le faaopoopo atu i ai, o gaoioiga o le faamasinoga tonu po o le faamasinoga lē tonu ua faia e tagata ua saunia ai ni iʻuga faaalia. O nei gaoioiga ua saunia ai e le Atua se faavae saʻo o le a faia ai lana faamasinoga po o ai ua aogā ona ola i le lalolagi fou pe a toe faafoisia le faamasinoga tonu atoatoa. I le fautuaina mai o lena mea, ua tatou faitau ai: “A e afai e liliu ese le ua amio leaga ai ana agasala uma ua na faia, ma tausi i aʻu tulafono uma, ma faia e ia le amio tatau ma le amiotonu, e ola lava ia, e le oti.”—Esekielu 18:21.

O Afea o le a Iʻu ai le Faamasinoga Lē Tonu?

O feutagaiga a Ieova le Atua ma le fanau a tagata sa tonu pea ma sa faailogaina lea i lona alofa agalelei. I le faataʻitaʻia o lena mea, ina ua lē malamalama le auauna faamaoni a le Atua o Aperaamo i le pogai na tupu ai se mea, na ia faapea mai e uiga i le Atua: “Ia mamao lava ia te oe ona e faia faapea e fasioti i e amiotonu faatasi ma e amio leaga; ma ona faagatusa o e amiotonu ma e amio leaga, ia mamao lava lea ia te oe. O le na te faamasinoina le lalolagi uma, e le faia ea e ia le faamasinoga tonu?” (Kenese 18:25) Faatasi ai ma le afio mai o Keriso, na maʻoti lava ona faaalia ai uiga faamasino tonu ma le alofa agalelei o le Atua. O le fuafuaga i le taulaga togiola e ala ia Keriso Iesu na tatalaina ai le auala mo tagata uma lava, tagata Iutaia faapena foi ma ē e lē ni Iutaia, ina ia maua le ola e faavavau. O lenei mea na taʻitaʻiina atu ai le aposetolo o Peteru e faapea mai: “E moni, ua ou iloa e le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu ua talia i latou e ia.”—Galuega 10:34, 35.

O loo tiotio Molimau a Ieova e faalauiloa atu faapea ua uma ona amata le pulega faa-Mesia a le Tupu a le Atua ma ua lata mai le taimi o le a toe faafoisia ai le faamasinoga tonu i lo tatou lalolagi i se fua lelei atoatoa.a O le a faataunuuina lenei mea pe a faaumatia e lea Tupu lenei lalolagi lē faamasino tonu ma gausia le malosi o lona atua lē vaaia, o Satani le Tiapolo. Ua faaalia e le Tusi Paia faapea ua lē o toe umi ae oo mai lenei mea i le “taua i le aso tele o le Atua e ona le malosi uma lava,” lea e masani lava ona taʻua o Amaketo.—Faaaliga 16:14, 16.

ʻUa lē amioletonu le Atua i lona tuuina mai o lona toasa,’ o lea o Amaketo o le a o se taua amiotonu. (Roma 3:5) Mulimuli ane, ona pule ai lea o Keriso Iesu ma ana pule lagolago, e pei o aposetolo, mai le lagi mo le afe o tausaga. (Faaaliga 20:4) E faitau miliona tagata o ē na puapuagatia i faamasinoga lē tonu i aso ua mavae o le a toe faatutuina mai i se faiga fou amiotonu i luga o le lalolagi, le uluai aiga o le tagata, ina ia tofo i le faamasinoga tonu lelei atoatoa mo le uluai taimi i o latou olaga.

“Pe ua Amioletonu ai ea le Atua?”

Na fesili faapena le aposetolo o Paulo e faatatau i se tasi o feutagaiga a le Atua. O le ā le tali? “O le mea moni e leai,” na tusi ai Paulo. I le faatusaina o le tagata i se ele ua uma ona gaosia e le tagata fai ipu o mea e foliga i ni ipu ua aogā i ai le toasa po o le alofa tunoa, na faamatala Paulo: “E ui lava ua nofo sauni le Atua e faaalia lona toasa ma faaalia lona mana, peitai sa onosai pea o ia i tagata o ē na faaita ia te ia, ae peitai maeu le tele ua tatau ai ona faaumatia i latou. Sa ia faapalepale ia i latou ona o isi tagata, o ē na finagalo o ia e faaalia i ai le alofa tunoa, o ē na finagalo o ia e faaalia i ai faulaiga o lona viiga.”—Roma 9:14, 20-24, The Jerusalem Bible.

E pei ona iai i le talavou aʻoga na uluai taʻua, atonu i nisi taimi e faigata ai ona e malamalama pe aiseā ua faatagaina ai e le Atua le faamasinoga lē tonu i sona tulaga lautele po o ni sese patino. Ae o ai i tatou—o le galuega a ona aao—e fesiligia lona onosai ma lona atamai i le faia faapea? Na fetalai Ieova le Atua ia Iopu: “E te faaleaogaina ea laʻu lava faatonuga? E te faasala ea ia te au, ina ia taʻuamiotonuina oe?”—Iopu 40:8.

Ia aua lava neʻi o tatou mananao e nofosala i tatou i le faia o lena mea. Na i lo o lea, o le a tatou mananao e olioli i le iloaina faapea e ui lava o loo iai pea le faamasinoga lē tonu ma i tatou, ae ua lē o toe umi ae aveesea e le Atua o le faamasinoga tonu lea mea mai le lalolagi atoa.

[Faaopoopoga i lalo]

[Ata i le itulau 23]

O le faatagaina o le faamasinoga lē tonu e leai lava se auala e mafai ai ona faamaonia faapea e lē o soifua le Atua

Pe ua sese le Atua i le musu o se avetaavale onā e faaaogā uiga tomai faalemafaufau, o le pulea o ia lava, ma le magafagafa?

Ua lata mai le taimi o le a toe faafoisia ai le faamasinoga tonu atoatoa i lo tatou lalolagi