Molimau mo Ieova ma Aua le Faavaivai
“Ia matuā mafaufau i lē na onosai i upu faatui ese faapena ia te ia a ē agasala, ina neʻi faavaivai o outou solu ma outou lē lavatia.”—EPERU 12:3, “NW”.
1, 2. O le ā le faamaoniga mautinoa na tuuina atu e Iesu i ona soʻo faapea na toe faatuina o ia?
“UA OU vaai i le Alii!” O upu na e faateʻia ai, na muai faamatala atu ai e Maria le Makatala le tala e uiga i le toetu mai o Iesu. (Ioane 20:18, NW) O lenei mea na faailogaina ai le amataina o le 40 aso e tumu i mea e fiafia ai mo soʻo o Iesu, ina ua mavae lo latou faanoanoa i lona maliu.
2 Sa leʻi manao Iesu e tuu se masalosalo i mafaufau o ona soʻo faapea sa soifua moni lava o ia. O lea, e pei ona faamatala mai e Luka: “Na faailoa atu foi o ia e ia ia te i latou ua soifua ia, ina ua mavae o lona tiga, ua faamaonia i faailoga faamaoni e tele; e fagafulu po ua iloa ai o ia e i latou.” (Galuega 1:3) O le mea moni, i se tasi o mea, na “toe iloa lea o ia e le au uso e lima selau ma ona tupu ina ua faatasi.” (1 Korinito 15:6) E mautinoa lava, sa leai nei se isi toe avanoa e masalosalo ai. O loo soifua mai Iesu!
3. O le ā le fesili e faatatau i le Malo na fesili atu ai soʻo o Iesu ia te ia, ma aiseā na latou ofo ai i lana tali?
3 I lena taimi sa na o se “malo o le Atua,” faalelalolagi o le a toe fuatai ia Isaraelu sa mafaufau i ai soʻo o Iesu. (Luka 19:11; 24:21) O lea na latou fesili ai ia Iesu: “Le Alii e, o ona po nei ea e te toe fuatai mai ai le malo ia Isaraelu?” E lē taumatea na faateia i latou i lana tali, auā na ia fetalai atu: “E le tusa ona outou iloa o ona po ma ona tausaga ua tuu e le Tamā i lana lava pule. A e maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au i Ierusalema ma Iutaia uma lava ma Samaria, e oo lava i le tuluʻiga o le lalolagi.” (Galuega 1:6-8) Maeu se luʻi ua taatia nei i luma o le au soʻo! Ma maeu se tiute tauave! O le a mafai faapefea ona latou faataunuuina lea galuega? Sa leʻi pine ae oo mai le tali i se auala e faateia ai.
Taliaina o le Luʻi
4. Faamatala le mea na tupu i le aso Penetekoso.
4 Ua taʻua e Luka: “Ua oo atu foi i le aso Penetekoso, sa i ai i latou uma lava i le mea e tasi ma le loto gatasi. Ona faafuasei mai lea o le taalili mai le lagi, peiseai o le matagi ua agi tele mai, ua tumu uma ai le fale sa latou nonofo ai. Ua iloa foi e i latou o laulaufaiva peiseai o le afi ua vaevaeina, ua nofo i o latou luga taitoatasi. Ua faatutumuina foi i latou uma i le Agaga Paia, ua afua ai ona tautala i gagana eseese, pei ona foaiina mai e le agaga o le gagana ia te i latou.” Sa matuā taalili le leo, o lea na uaʻi atu i ai manatu o le vao o tagata Iutaia o loo nonofo i Ierusalema mo le tausamiga. Sa maofa i latou e faalogo ia ‘latou lava gagana e uiga i mea ofoofogia a le Atua.’—Galuega 2:1-11.
5. O le ā le tele sa leʻi pine ae faataunuuina ai le valoaga a Iesu i le Galuega 1:8?
5 Sa leʻi faamaumauina e Peteru se taimi i le avatua o se lauga malosi, sa faamaonia ai e aunoa ma se masalosalo faapea “o Iesu o le Nasareta,” o lē na latou faasatauroina, sa o le “Alii” na valoia e Tavita i upu nei: “Ua fetalai mai [Ieova] i loʻu Alii, Ia e nofo i loʻu itu taumatau, seia ou fai o e ita ia te oe ma mea e tu ai ou vae.” Sa matuā tuia o latou loto, o lea na fesili atu ai le au faalogologo a Peteru: “Sema e, le au uso e, se a se mea matou te faia?” I lana tali atu na uunaia ai i latou e Peteru: “Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala.” O le ā le iʻuga? E toluafe na papatisoina! (Galuega 2:14-41) O le taimi lena ua uma ona tuuina atu le molimau i Ierusalema. Mulimuli ane, na faalauteleina atu i Iutaia uma lava, sosoo ai ma Samaria, ma mulimuli ane, i tuluʻiga aupito mamao o le lalolagi.” Sa matuā televave lava ona faasalalauina atu le galuega talaʻi o le Malo, o lea pe a ma le 60 T.A. na mafai ai ona faapea mai le aposetolo o Paulo o le tala lelei, “sa talaʻiina atu foi i tagata uma lava na i le lalolagi.”—Kolose 1:23.
Faalauteleina o le Malo ma Sauaga
6, 7. (a) Na faapefea ona ō faatasi le faatelega o le Malo ma sauaga o Kerisiano i le uluai senituri? (e) O le ā le manaoga faanatinati na mapuna aʻe i totonu o Kerisiano i Ierusalema, ma na faapefea ona faatumuina lenei manaoga?
6 E leʻi leva lava talu ona mavae le Penetekoso 33 T.A., na iai se mafuaaga mo soʻo o Iesu e manatua ai ana fetalaiga: “E le sili le auauna i lona alii. Afai ua latou faasaua mai ia te au, e faasaua foi ia te outou.” (Ioane 15:20) Sa matuā feita taʻitaʻi Iutaia ina “ua tupu foi le afioga a le Atua; ua matuā faatoateleina le au soo i Ierusalema.” Ona o tuuaʻiga sese, na fetogia ai le soʻo o Setefano i maa ma oti ai. O lena mea na foliga mai o ni faailoga ia sa faatalitali i ai le toatele, auā “o lea lava aso ua tupu ai le saua tele i le ekalesia i Ierusalema; na faasalalauina foi i latou uma i nuu o Iutaia ma Samaria, ua toe na o le au aposetolo.”—Galuega 6:7; 7:58-60; 8:1.
7 Sa faaitiitia sauaga mo sina taimi. Peitai e leʻi pine lava mulimuli ane, ae fasiotia loa e Herota Akeripa I le aposetolo o Iakopo. Sa faafalepuipuiina Peteru peitai na tatalaina e se agelu. Mulimuli ane sa matitiva le au uso i Ierusalema i mea faitino, ma na auina atu ia i latou fesoasoani e uso talitonu mai isi nuu. (Galuega 9:31; 12:1-11; 1 Korinito 16:1-3) I le taimi o le asiasiga a le aposetolo o Paulo i Ierusalema, na faaalia ai le maelega valea faalotu e pei ona sa alalaga ai le vao tagata: “Ave ese ia lena tamaloa i le lalolagi; auā e le tatau ona ola o ia.” (Galuega 22:22) E mautinoa lava, o na Kerisiano o ē na nonofo i Ierusalema ma Iutaia sa tele le manaomia o faalaeiauga ina ia tausia ai pea lo latou molimau atu ma le faatuatua e uiga i le Malo. Na folafola e Iesu i ona soʻo faapea “o le Agaga Paia lea, e auina mai e le Tamā i loʻu igoa,” o le a galue e avea o le “Fesoasoani.” (Ioane 14:26) Peitai o le a faapefea nei ona saunia e le Tamā sea fesoasoani manaomia po o le faamafanafanaga? I se vaega o le tali, sa aumaia e ala i le aposetolo o Paulo.
O le Tusi a Paulo i Tagata Eperu
8. (a) O le ā na uunaia ai Paulo e tusi lana tusi i tagata Eperu? (e) O le ā le vala o lana tusi o le a taulaʻi atu i ai o tatou manatu, ma aiseā?
8 Pe a ma le 61 T.A., na faafalepuipuiina ai Paulo i Roma, peitai sa ia iloa lelei le mea na tupu i ona uso i Ierusalema. O le mea lea, i lalo o le taʻitaʻiga a le agaga o Ieova, na ia tusi ai lana tusi augamālie i uso Eperu. O loo faatumuina lea tusi i manatunatuga mamafa o le alofa mo ona uso ma tuafafine Eperu. Sa iloa e Paulo mea na latou manaomia ina ia atiina aʻe ai lo latou faatuatua ma le mautinoa ia Ieova e avea o lo latou Fesoasoani. Ona mafai ai lea ona latou ‘taufetuli ma le onosai i le tausinioga ua tuu i o latou luma’ ma faapea atu ai ma le mautinoa: “O Ieova o loʻu fesoasoani, ou te lē fefe lava. Se ā se mea e mafai ona faia e tagata ia te aʻu?” (Eperu 12:1; 13:6, NW) I luga o lenei vala o le tusi a Paulo i tagata Eperu (mataupu e 11-13) ua tatou mananao ai nei e uaʻi atu i ai o tatou manatu. Aiseā? Auā o le tulaga sa fesagaʻi ma na uluai Kerisiano ua faapena foi ona fesagaʻi ma Molimau a Ieova i aso nei.
9. O le ā le finauga na fesagaʻi ma Kerisiano i le uluai senituri ua faapena foi ona fesagaʻi ma Kerisiano i aso nei, ma ua na ona faapefea ona faafetaiaia?
9 I o tatou tupulaga, ua tali mai ai ma le mautinoa le vao tagata i le feau o le Malo e ala i le tuuina atu o i latou lava ia Ieova ma papatisoina e avea o ana Molimau. Ae peitai, faatasi ai ma lenei faatelega o le tapuaiga moni ua oo mai ai foi ma sauaga mataʻutia, ua toatele ai Kerisiano ua oo ina faaumatia o latou ola e pei o Setefano, Iakopo, ma isi molimau faatuatua o le uluai senituri. I lea, o loo tumau ai pea i le taimi nei le finauga e pei ona sa iai i lena taimi: O ai o le a mafai ona tu atu i le tofotofoga o lo latou faatuatua i le feagai ai ma le faateleina o teteega i le feau o le Malo? Ae lē gata i lea, o ai o le a mafai ona fesagaʻi ma mea tutupu mataʻutia a o agaʻi mai le “puapuaga tele” lē mafaatusalia i luga o lenei tupulaga? (Mataio 24:21) O le tali, o i latou ua nofo sauni e “tau le taua lelei i la le faatuatua,” o i latou na ua “mausali . . . i le faatuatua.” O i latou nei o ē o le a mafai ona faapea mai mulimuli ane: “O lenei foi le manumalo e manumalo ai i le lalolagi, o lo tatou faatuatua lava.”—1 Timoteo 6:12; 1 Peteru 5:9; 1 Ioane 5:4.
Maua Aogā mai Faaaʻoaʻoga Faamaoni
10. (a) O le ā le faatuatua? (e) O le ā le faalogona o le Atua e uiga i tane ma fafine faatuatua o aso ua mavae?
10 O le ā le faatuatua? Ua tali Paulo: “O le faatuatua, o le faatalitali ma le mautinoa i mea ua faamoemoe i ai, o le mautinoa i mea e ui e lē o vaaia. Auā ona o lea na taʻuleleia ai o ē anamua.” (Eperu 11:1, 2, NW) O lea, na lagolago ai e Paulo lana faamalamalamaga o le faatuatua e ala i le faaalia o le faatuatua i galuega. Na ia puea mea tāua i olaga o nisi o “ē anamua,” faapea foi ma fafine e pei o Sara ma Raava. Maeu le faalaeiauina ai i le iloa faapea “e le mā ai le Atua ia te i latou, ina ia taʻua o ia o lo latou Atua”! (Eperu 11:16) Pe mafai ona fetalai mai foi faapena le Atua ia i tatou ona o lo tatou faatuatua? Tau ina ia aua neʻi o tatou avatua ia te ia se pogai e faalumaina ai o ia ia i tatou a o faaiʻuina aso taitasi.
11. E mafai faapefea e i tatou i aso nei ona maua aogā mai le “faapotopotoga o molimau e toatele o loo vagavagaia ai i tatou”?
11 I le mulimuli ai i faamatalaga a nei tane ma fafine faamaoni, ua faapea mai Paulo: “O le mea lea, ona ua ia i tatou se faapotopotoga o molimau e toatele o loo vagavagaia ai i tatou, seʻi o tatou tuuese ia foi o avega mamafa uma ma le agasala o loo faalavelave gofie ai i tatou, ma ia tatou taufetuli ma le onosai i le tausinioga ua tuu i o tatou luma.” (Eperu 12:1, NW) E ui lava ua tofafā mai nei i tia, ae pe o soifua pea i o tatou mafaufau nei molimau faamaoni ua fai ma faaaʻoaʻo? Pe o lava lou iloa lelei o i latou ma mea na oo i ai e te tali mai ai ioe? O se tasi lenei o le tele o taui o le suesueina e lē aunoa o le Tusi Paia, e faaaogā ai o tatou mafaufau uma e toe faaolaola ai mea fiafia na tutupu i nei “faapotopotoga o molimau.” E moni, o le aveina i fale o a latou faaaʻoaʻoga faamaoni o le a sili ona fesoasoani ia i tatou e foia ai so o se tau lē lava o le faatuatua. O le a faapea ai ona fesoasoani lenei mea ia i tatou e avatu ai se molimau malosi ma le lē fefe i le upu moni i lalo o tulaga uma.—Roma 15:4.
Aua le Faavaivai
12. (a) E mafai faapefea e le faaaʻoaʻoga a Iesu ona fesoasoani ia i tatou ina ia ‘lē faavaivai ma lē lavatia o tatou solu’? (e) O ā nisi o faaaʻoaʻoga i aso nei a i latou e lē o faavaivai?
12 O lo tatou faaaʻoaʻo silisili o le faatuatua o Iesu. Ua uunai mai Paulo: “Ia tatou taufetuli ma le onosai i le tausinioga ua tuu i o tatou luma, a o tatou vaavaai atu ma le naunautai ia Iesu o Lē Taʻitaʻi Sili ma Lē na te Faaatoatoaina lo latou faatuatua. . . . Ia outou matuā mafaufau loloto i le na onosai i upu faatuiese faapena ia te ia a ē agasala faasaga i o latou lava faanaunauga, ina ia outou lē faavaivai ma lē lavatia e ō outou solu.” (Eperu 12:1-3, NW) O le ā le “loloto” ua e manatunatu ai i le faaaʻoaʻoga a Iesu? O le ā le “naunautai” ua e vaavaai atu ai ia te ia? (1 Peteru 2:21) E manao Satani ia i tatou ‘ina ia o tatou faavaivai ma lē lavatia o tatou solu.’ E manao o ia ina ia tatou taofia le toe faia o le galuega o le molimau atu. Ua faapefea ona ia faia lenei mea? I nisi taimi e ala i teteega tuusaʻo mai pule faalotu ma faalelalolagi, e pei ona sa iai i le uluai senituri. I le tausaga ua mavae, na faasaina ai le galuega o le talaʻiga o le Malo i nisi o atunuu e 40. Peitai pe sa avea lena ma pogai e faavaivai ai o tatou uso? E leai! O a latou galuega o le faatuatua na iʻu i le 17,000 ma le sili atu o ē na papatisoina i na atunuu i le 1988. Maeu se faagaeega ua tatau ona faia e lenei mea ia i latou uma o loo nonofo i atunuu e saoloto faatatau! Seʻi aua neʻi o tatou faavaivai i le talaʻiina atu o le tala lelei o le Malo!
13. (a) O ā nisi o mea togafiti poto ua mafai ona faapogaia ai i tatou e faavaivai i la tatou galuega talaʻi? (e) O le ā le ‘olioli sa tuu i luma o Iesu,’ ma e mafai faapefea ona tatou maua se uiga olioli faapena?
13 Ae peitai, e iai isi mea e sili ona togafiti poto e mafai ona faapogaia ai i tatou e faavaivai. E aofia ai i nei mea teteega i totonu o se aiga fevaevaeai, puapuaga o le mafaufau, faafitauli o le soifua maloloina, omiga mai au tupulaga, loto vaivai ona o le tau leai o ni iʻuga mautinoa mai la tatou galuega talaʻi, pe atonu o se lagona o le lē onosai ona o le leʻi oo mai lava o le iʻuga o lenei faiga o mea. Ia, o le ā na fesoasoani ia Iesu e onosai ai i mafatiaga o le mafaufau ma le tino? Sa o le “olioli sa tuu i ona luma.” (Eperu 12:2) Sa faaolaolaina Iesu ona o le olioli i le faafiafiaina o le finagalo o lona Tamā, e ala i le faasilisiliina o Ia ma e ala foi i le āloālo atu i le fiafiaga o le a ia tofo i ai mulimuli ane i le puleaina o faamanuiaga ofoofogia o le Malo faa-Mesia. (Salamo 2:6-8; 40:9, 10; Faataoto 27:11) Pe mafai ona tatou mulimuli atili atu ma le naunautai i lenei uiga olioli o Iesu? Ma ia manatua le faamautinoaga a Peteru i le 1 Peteru 5:9: “O loo taufaaatoaina ia lava mea tiga i lo outou au uso o i le lalolagi.” I le iloa faapea o loo malamalama Ieova, ma lagona le mafana o le au uso i le lalolagi aoao, ma taulaʻi atu pea o tatou mata i le olioli o loo i o tatou luma i lalo o le pulega a le Malo—o nei mea uma o le a fesoasoani ia i tatou ina ia tatou lē faavaivai ai i le auauna atu ia Ieova i le faatuatua ma i le talaʻiga a o lata tele mai le iʻuga.
Le Pogai e Aʻoaʻi ai e Ieova
14. O ā aogā atonu o le a iʻu i ai mai tofotofoga ma puapuaga ia e tatau ona tatou tumau ai?
14 Ua faasusulu atu nei e Paulo le malamalama i le pogai o le pe aiseā e mafai ai ona tatou tumau i tofotofoga ma mea tiga. Ua ia fautua mai ina ia tatou vaavaai i na mea e avea o se ituaiga o aʻoaʻiga. Ua faamanatu mai e Paulo: “Loʻu atalii e, aua le faatauvaa i lou manatu le aʻoaʻiga mai ia Ieova; aua foi e te musu pe a aʻoaʻiina oe e ia; auā o lē ua alofagia e Ieova ua aʻoaʻi e ia.” (Eperu 12:5, 6, NW) E oo lava ia Iesu ‘sa ia aʻoaʻoina le usiusitai mai mea na tiga ai o ia.’ (Eperu 5:8) E mautinoa lava, e manaomia foi ona tatou aʻoaʻoina le usiusitai. Matau āuga aogā o le faatagaina o le aʻoaʻiga e faatulaga ai o tatou olaga. Na faapea mai Paulo: “O ē ua toleni ai e fua mai fua o le filemu, ua taʻua, o le amiotonu.” Maeu se faalaeiauina ai i lena mea!—Eperu 12:11, NW.
15. E mafai faapefea ona tatou faatatauina le fautuaga a Paulo ina ia ‘faia ni ala saʻo mo o tatou vae’?
15 Afai tatou te talia “aʻoaʻiga mai ia Ieova” e tusa ai ma lenei manatu, o le a tatou teulotoina ai le fautuaga mautinoa a Paulo: “O le mea lea ina faamalosi ai ia i lima ua gagase ma tulivae ua vaivai; i le ma lea, Ina fai ia o ala laulelei mo o outou vae.” (Eperu 12:12, 13) I nisi taimi, e matuā faigofie ai lava ona sipa ese mai le ‘ala vaapiapi e tau atu i le ola.’ (Mataio 7:14) Sa taʻusalaina ai le aposetolo o Peteru ma isi i Anetioka i se tasi taimi ona o le faia o lenei mea. Aiseā? Auā foi “latou te lei savavali tonu e tusa ma le upu moni a le tala lelei.” (Kalatia 2:14) I aso nei, e tatau lava ona tatou faalogo atu pea i lo tatou Faatonu Sili o Ieova le Atua. E manaomia ona tatou faaaogā atoatoa fesoasoani ua saunia e ala i le “auauna faamaoni ma le mafaufau.” O le a faamautinoa ai e lenei mea le ‘ala saʻo’ mo o tatou vae.—Mataio 24:45-47; Isaia 30:20, 21.
16. (a) Atonu e mafai faapefea ona mauaa se “aa oona” i totonu o le faapotopotoga? (e) Aiseā ua faafesootai atu ai e Paulo amioga lē mamā ma le tau leai o se talisapaia mo mea paia, ma e mafai faapefea ona tatou leoleomaluina i tatou lava faasaga i na mea mataʻutia?
16 Ua sosoo ai ma le lapatai mai o Paulo faapea e tatau ona tatou “faaeteete ia te [i tatou], neʻi i ai se tasi e le maua atu le alofa tunoa o le Atua; neʻi i ai se aa oona e tupu ae e faasoesa ia te outou, ma leaga ai nisi e toatele.” (Eperu 12:15) O le ita, le lē faamalieina, ma le vaavaai masei i le auala o faia ai mea i le faapotopotoga e mafai ona pei o se “aa oona” e mafai ona vave sosolo atu ma faaoonaina manatu e atoatoa ona mamā o isi i le faapotopotoga. E mafai ona tatou faafetauiina le tuputupu aʻe o na manatu sese e ala i le manatu mamafa atu i faamanuiaga lē mafaitaulia ua aumaia e le upu moni i o tatou olaga. (Salamo 40:5) O le isi tulaga matautia o le iai o faanaunauga i amioga lē mamā po o le ‘tau leai o se talisapaia mo mea paia e pei o Esau.’ (Eperu 12:16) Ua faafesootai faatasi e Paulo nei mea mataʻutia e lua, talu ai o le faia o le mea e tasi e faigofie lava ona taʻitaʻiina atu ai i le faia o le isi mea. E leai se Kerisiano e manao e lolo atu i na faanaunauga manatu faapito pe afai na te faatatauina upu a Peteru: “Ia outou tetee atu [i le Tiapolo], ma ia mausali outou i le faatuatua.”—1 Peteru 5:9.
“Mautinoa o Mea e ui e Lē o Vaaia”
17. Faatusatusa mea mataʻutia na tutupu i le Mauga o Sinai ma na o loo fesagaʻi ma Kerisiano i aso nei.
17 O lo tatou faatuatua e matuā faalagolago i le “mautinoa o mea e ui e lē o vaaia.” (Eperu 11:1) Ua faaauau ona tautala Paulo i nisi o nei mea e lē vaaia i le Eperu 12:18-27. Ua ia faamatala nisi o mea mataʻutia na tutupu i le Mauga o Sinai, ina ua fetalai tuusaʻo mai le Atua ia Isaraelu ma ina ua fai mai Mose: “Ou te fefe lava ma ou gatete.” Ona faaopoopo mai lea o le aposetolo: “A ua oo outou i le mauga o Siona, ma le aai o le Atua soifua, o Ierusalema faalelagi, ma agelu e manomanō, o le faapotopotoga atoatoa.” E tusa ai ma le mea na oo ia Isaraelu anamua i le Mauga o Sinai, na faapea mai Paulo, na luluina le laueleele i le siufofoga o le Atua, ae ua Ia folafola mai nei i lona fetalai mai: “E toe tasi ona ou luluina, e le na o le lalolagi, a e atoa foi ma le lagi.” E ui lava o nei upu ua muamua ona faatomua atu i Kerisiano faauuina, ae mafai foi ona aveina i fale i loto o le “motu o tagata e toatele” o isi e pei ni mamoe. (Faaaliga 7:9) Pe e te talisapaia atoatoa le mea o fai mai ai Paulo? O loo tatou tutū i luma o se faapotopotoga o agelu e faitau sefuluafe. O le mea moni, o loo tatou tutū foi i luma o Ieova. I lona itu taumatau o loo iai Iesu Keriso. O le mea moni, o loo tatou iai i se tulaga e sili ona faaeaina ma i lalo ifo o se tiute tauave e sili atu na i lo tiute tauave o na tagata Eperu anamua i le Mauga o Sinai! Ma ia manatua, o le luluina i le taua o Amaketo o loo sau o le a faapogaia ai le mouese atu o le lagi ma le lalolagi amio leaga o loo iai nei. I aso nei e mautinoa lava e lē o se taimi e “liliu ese” ai mai le faalogo atu i le Afioga a le Atua ma usiusitai i ai!
18. Ua na o le ā e mafai ai ona tatou faaauau ona molimau atu mo Ieova, ma le lē faavaivai?
18 O lea la, e moni lava ua tatou ola i taimi e aupito sili ona mataʻutia i le talafaasolopito o le fanau a tagata. I le avea o ni Molimau a Ieova, ua aauina atu ai i tatou i tuluʻiga aupito mamao o le lalolagi e talaʻi le tala lelei o le Malo o le Atua ua faavaeina. Ina ia faia faapea, e tatau ona iai ia i tatou se faatuatua e lē mafai ona luluina, se faatuatua e lē faavaivai, se faatuatua e mafai ai ona tatou talia aʻoaʻiga a Ieova. Pe a ia i tatou sea faatuatua, o le a maua ai i tatou i totonu o i latou o ē o le a ‘faaauau ona iai le alofa tunoa, lea e mafai ai ona tatou tuuina atu ma le migao le auaunaga paia i le Atua ma le mataʻu faaleatua ma le gatete.’ (Eperu 12:28) Ioe, ma o le a faaauau ai pea ona tatou molimau mo Ieova ma le lē faavaivai.
O le a Faapefea ona E Tali?
◻ Aiseā ua aogā ai ia i tatou le tusi a Paulo i tagata Eperu?
◻ O le ā le finauga e tatau i Kerisiano ona faafesagaʻia i aso nei?
◻ E mafai faapefea ona tatou maua aogā mai molimau faatuatua o aso ua mavae?
◻ Aiseā e aʻoaʻi ai e Ieova i latou ua ia alofa i ai?
◻ O le ā le ki i le molimau atu e aunoa ma le faavaivai?