O Ai o le a Taʻitaʻiina le Fanau a Tagata i le Filemu?

PE ONA o le mea moni faapea e lē mafai e tagata ona aumaia le filemu ua uiga ai faapea o le a tatou lē vaaia lava le filemu? E leai. E pei lava ona avea Satani, o lē e sili ona malosi atu i lo o i tatou, ma toʻatugā sili i le filemu i le lalolagi, o lea e iai foi Lē e sili atu ona malosi na i lo Satani o lē o le a mulimuli ane ona taʻitaʻia le fanau a tagata i le filemu. O le Tusi Paia, lea o loo taʻu mai ai e uiga ia Satani, o loo taʻu mai ai foi e uiga ia te Ia lenei. Ua faapea mai: “O le a i lona ua le pulega faaperenise. Ma o lona igoa o le a taʻua o le Fautua Sili, le Atua Malosi, le Tamā o le Faavavau, le Pereni se o le Filemu.” (Isaia 9:6, 7, NW) O ai lenei Pereni se o le Filemu? E leai lava se isi na i lo o Iesu Keriso, ma e mafai ona ia aumaia le filemu auā ua sili mamao atu ona agavaa na i lo i tatou. I ā auala?

E Sili Atu na i lo o Agavaa Faaletagata

Mo le mea e tasi, ona o Iesu e lē mafai ona oti, e lē nofo toilalo i le oti. E moni, sa soifua o ia o se tagata ma maliu i se maliu faataulagaina. Ae na toe faatuina mai o ia i le soifua faalelagi e lē mafai ona toe oti, ma ona o lenei tulaga ua avea ai o ia ma Pereni se o le Filemu. O le ala lena o le faapea mai o le valoaga: “O lona malo foi e leai sona gataaga.” (Luka 1:32, 33) E lē pei o le emeperoa o Atunuu i Sasae o Aśoka, o le a soifua e lē gata mai Iesu, ina ia faamautinoa o lana galuega lelei ua lē faaleagaina e ala i āuga o pule tulaga maulalo.

E lē gata i lea, ua lē pisia Iesu i le agasala. Ua faavaeina lana pulega i le atamai faaleatua ma mataupu silisili tonu. Na uluai vavalo mai le perofeta o Isaia: “E afio mau ia te ia le Agaga o Ieova; o le Agaga o le poto ma le mafaufau; o le agaga o le faatonuga ma le malosi; o le Agaga o le malamalama ma le mataʻu ia Ieova . . . e le aoai foi o ia e tusa ma le faafofoga o ona taliga. A e faamasino o ia ma le tonu i e matitiva.” (Isaia 11:2-4) E lē pei o tagata Europa o aso anamua, o le a lē faasaoina e Iesu le filemu i le aiga, ae sii taua atu i atunuu ese. I lalo o lana pulega, o le a iai le filemu i le vateatea aoao.

E lē gata i lea, ua ia Iesu le mana e aumaia ai le filemu. Ua faapea mai le valoaga: O “le Agaga o Ieova . . . , le agaga o le faatonuga ma le malosi,” ua i ona luga. O lenei agaga sa i tua o le foafoaga o le vateatea faapea foi i galuega mamana uma o le amiotonu ua lipotia mai i le Tusi Paia. E oo lava i le tetee sili, o Satani, e leai ni ana auupega o le a fetaiaia ai ma le manuia le malosi o le agaga o le Atua.

Laasaga i le Filemu

O le a taʻitaʻia faapefea e Iesu tagata i le filemu? Atonu o le a e ofo ina ua iloa faapea ua uma ona ia amataina. I le tusi faavaloaga o Faaaliga, ua vaaia ai Iesu o ia mauaina le tulaga tautupu mai le Atua i le Malo faalelagi. (Faaaliga 11:15) Afai tatou te iloiloina ma le faaeteete valoaga a le Tusi Paia ma faatusatusa atu i mea tutupu i lo tatou senituri, ua tatou iloa ai faapea o le faanofoina o Iesu o se Tupu na faia i le lagi i tuā i le 1914. (Mataio 24:3-42) O se laasaga sili lena i le aumaia o le filemu i le lalolagi.

Peitai afai o le tulaga lena, aiseā la na pa ai le Taua Muamua a le Lalolagi i le 1914? Ma aiseā ua vaaia ai e lo tatou senituri taua e sili atu ona leaga na i lo se isi lava senituri i le talafaasolopito? Talu ai o le gaoioiga muamua lava a le Tupu faalelagi o le tuliesea mai lea o Satani mai le lagi e faavavau ma lafoina o ia i lalo i tuaoi o le lalolagi. O le ā le iʻuga? Ua faapea mai le valoaga: “O i talofa ia te outou o e nonofo i le fanua ma le sami, auā ua alu ifo ia te outou le tiapolo ua lotoa tele, auā ua na iloa ua saasaa ona po.” (Faaaliga 12:7-12) Ua fesootai atu taua sili a lo tatou senituri ma le lotoa o Satani. Ae matau: O le lotoa o Satani e mo ‘se taimi puupuu.’ O le a lē pine ae faaiʻuina taimi mataʻutia!

Peitai, a o leʻi oo mai, ua faia ai e le Pereni se o le Filemu ni sauniuniga atili matuā tāua mo le filemu. Ina ia amata ai, e tatau ona iloa e tagata le fuafuaga a le Atua ia aumaia le filemu e ala ia Keriso. I le ōgatusa ma lena, na valoia e Iesu faapea i o tatou aso “e talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) I le faataunuuga o lenei mea, ua talaʻia ai le tala lelei i aso nei e Molimau a Ieova i tulimanu uma o le kelope.

Ona tatau ai lea i ē uma o saʻo o latou loto ona aʻoaʻoina i ala o le filemu. Ua folafola mai e le Tusi Paia: “E aʻoaʻoina lau fanau uma lava e Ieova; e tele foi le manuia o lau fanau.” (Isaia 54:13) E oo lava i le taimi nei, e faitau miliona i latou e saʻo o latou loto ua mauaina lenei aʻoaʻoga.

Le Laasaga e Sosoo Ai

Ua toeitiiti nei oo i le taimi mo le isi laasaga faaiʻu i le faagasologa o taualumaga mo le filemu. O le ā lea? O le laasaga lea ua iloa e le toatele i le na o le taʻu ae toaitiiti lava latou te iloa lona fuafuaga moni. Ua taʻua e le Tusi Paia o “le taua i le aso tele o le Atua e ona le malosi uma lava,” po o Amaketo. (Faaaliga 16:14, 16) E toatele ua manatu ia Amaketo o se taua faaniukelea lea o le a faaumatiaina ai tupulaga o le malamalama. Ae peitai, o se gaoioiga tuusaʻo mai ia Iesu, le Pereni se o le Filemu, ina ia faataunuuina mea matuā tāua mo le filemu.

Muamua, o le a aveesea e Amaketo toʻatugā faaletagata i le filemu. Ua faapea mai le valoaga i le Salamo 37:10: “E toe itiiti, ona leai lea o le tagata amio leaga; e te mafaufau foi i le mea sa i ai o ia, a e leai lava.” Ioe, o le a tafiesea e Iesu “tagata amio leaga”—mai le vaaiga faalelalolagi—o ē o loo faatupuina taua, ē amio leaga, le au faatupu faalavelave, faapea ma ē uma o loo mumusu e talia le Pereni se sili o le Filemu. O le a leai sa latou toe aiā e faaauau ai ona nonofo i luga o lenei paneta.—Faaaliga 19:19-21.

O lona lua, o le a faataunuuina lenei valoaga ia Amaketo: “O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.” (Tanielu 2:44) O fevaevaeaiga faamalo ia e masani ona taʻitaʻiina atu ai i taua o le a soloia. I le faaiʻuga, o le a iai se pulega faalemalo i lalo o se pule o lē e mafai ona tatou faatuatuaina!

O afea o le a oo mai ai Amaketo? E lē o taʻua mai i le Tusi Paia. Ae o mea tutupu i le lalolagi i le faataunuuga o valoaga ua faaalia ai faapea o le a vave lava ona oo mai. Na valoia mai ma le manino lava e le Tusi Paia se mea e tupu lena o le a avea o se mea e muai oo vave mai. Ua faapea mai le aposetolo o Paulo: “Auā pe a latou fai ane: ‘Ua filemu ma saogalemu!’ ona oo mai lea ia te i latou o le fano faafuasei.” (1 Tesalonia 5:3, NW) O lea, pe a uma loa le faaumatiaga faafuasei lena o le a taualuga ia Amaketo, ona aveesea ai lea o le toʻatugā sili i le filemu. O le “saasaa ona po” o Satani, o le a faaiʻuina ai, ma o le a tuuina ai o ia i se tulaga e lē toe mafai ai ona ia faatupu se faalavelave i inei i le lalolagi. (Faaaliga 20:1-3) Maeu se mapusaga!

Se Lalolagi i le Filemu

Seʻi vaai faaata i le tulaga o le a iai i lena taimi. Na valoia e le faisalamo: “O e agamalu, e fai mo latou le nuu; e faafiafia foi i latou ia te i latou ona o le manuia e tele.” (Salamo 37:11) O nei tagata agamalu o le a faaauau ona latou faataunuuina le valoaga matagofie a Isaia: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.”—Isaia 2:4.

I le faaiʻuga, o le a olioli uma ai le fanau a tagata mo le uluai taimi talu mai Etena i faamanuiaga a Ieova le Atua, ma o le a ia faataunuuina lana folafolaga: “Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4.

Se Faamoemoe Mautu

O ai la o le a na taʻitaʻia le fanau a tagata i le filemu? O Iesu Keriso, le Pereni se o le Filemu ua tofia. Pe o se faamoemoe aogā lea mo i tatou i aso nei? Ia, afai e lē o faatuatuaina valoaga o le Tusi Paia, o le a leai la se faamoemoe moni mo le filemu. O le a faaauau pea ona tau tagata ma fasioti e le tasi le isi e aunoa ma se iʻuga o vaaia. Ae o le tusi Paia e mau faatuatuaina, ma o le a aumaia e le Malo o le Atua e ala ia Keriso le filemu. Ua matou faalaeiauina oe ina ia e faalogo i le tala lelei o le Malo o loo avatu e Molimau a Ieova i o outou aiga ma e iloa ai lenei mea e oe lava. Pe a oo mai la le taimi, tau ina ia e iai faatasi ma ē agamalu o ē o le a mau i le lalolagi ma faafiafiaina ai i latou lava i le tele o le filemu.

O le faamoemoe mo le filemu o loo talanoaina i lenei mataupu e mai i le Tusi Paia. I aso nei, ona e toatele ua lē toe talitonu i le Tusi Paia, atonu o le a e fesiligia ai pe mafai lenei faamoemoe. E talitonu ma le mausalī Molimau a Ieova e mafai. Latou te talia le Tusi Paia o le Afioga faagaeeina a le Atua, ma i lea, e matuā mau faatuatuaina. I le 1989, na latou lomia ma faasalalauina ai le tusi (faa-Peretania) o lona matua The Bible—God’s Word or Man’s? (Le Tusi Paia—Le Afioga a le Atua po o le Upu a Tagata?) o loo aumaia ai le tele o faamaoniga o lenei mea moni. O nisi o faamatalaga o i lena tusi o loo talanoaina i mataupu e lua o loo amata i le itulau 23, lea ua matou valaauina oe ia e faitau i ai.

O nisi faamatalaga atili e uiga i le folafolaga a le Tusi Paia i le filemu o le a maua i le mataupu “Filemu i le Lalolagi—O le ā Moni o le a Uiga i Ai?” o lena mataupu o le a lomia i le lomiga o Aokuso 15, 1990, o Le Olomatamata.

[Faamatalaga faaopoopo i le itulau 8]

E na o Iesu e iai agavaa e taʻitaʻia ai le fanau a tagata i le filemu

[Faamatalaga faaopoopo i le itulau 9]

I aso nei, ua talaʻiina ai le tala lelei o le Malo i tulimanu uma o le kelope