Ia Saili le Filemu Moni ma Tausisi i Ai!
“O lē fia manao i le ola, ma ia iloa aso lelei. . . . Ia ʻalo ese i le leaga, a ia fai mea lelei; ia saili i le filemu ma tausisi i ai.”—1 PETERU 3:10, 11.
1. O ā upu taʻutaʻua a Isaia e mautinoa e taulau manuia?
“ONA latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.” (Isaia 2:4) E ui lava ina faaalia lenei mau taʻutaʻua i tala ane o le ofisaulu o Malo Aufaatasi i le aai o Niu Ioka, ae ua matuā lē mafai lava ona faapea atu ua faataunuuina e lenei faalapotopotoga a le lalolagi na upu. Ae peitai, ona o se vaega o fetalaiga mautinoa a Ieova le Atua, o le a faataunuuina moni ai lena faalauiloaga.—Isaia 55:10, 11.
2. O le ā e tatau ona ‘tupu i aso e gata ai,’ e tusa ai o le faamatalaga a le Isaia 2:2, 3?
2 O upu o loo iai i le Isaia 2:4 o se vaega moni lava o se valoaga ofoofogia, le valoaga e faatatau i le filemu moni—ma ua faagasolo nei i o tatou lava taimi lona faataunuuga. A o lei folafolaina mai faamoemoega ofoofogia o le lē toe iai o ni taua ma auupega o taua, ua faapea mai le valoaga: “O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foi e sili i mauga, ona gasolo ane ai lea o nuu uma i ai. E o mai lava nuu e tele, ma latou faapea ane, O mai ia, tatou o ae ia i le mauga o Ieova, o le fale o le Atua o Iakopo; e aʻoaʻo mai foi o ia ia te i tatou i ona ala, ona tatou savavali ai lea i ona ala; auā e alu atu le tulafono ai Siona, o le afioga foi a Ieova ai Ierusalema.”—Isaia 2:2, 3.
E Mafai Ona Fifilemu Tagata
3. E mafai faapefea e se tagata ona suia mai le avea o sē sa iai uiga fia tau, ae avea o sē ua iai uiga fifilemu?
3 Seʻi mātau, a o lei mafai e tagata ona sailia le ala o le filemu, e ao ona aʻoaʻoina i latou i ala o Ieova. O le usiusitai atu i aʻoaʻoga a Ieova e mafai ona suia ai ala o mafaufauga ma gaoioiga a se tagata, ina ia mafai ai e lē sa iai uiga fia tau ona iai uiga fifilemu. Ua faapefea ona faataunuuina lenei liliuina? Ua faapea mai le Roma 12:2: “Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.” Ua tatou liliuina o tatou mafaufau, pe uunai atu i se isi itulagi, e ala i le faatumuina i mataupu silisili ma tulafono mai le Afioga a le Atua. O le suesueina e lē aunoa o le Tusi Paia e fesoasoani lea ia i tatou ina ia faia lenei suiga ma mafai ai ona tatou faamaonia ia i tatou lava le finagalo o Ieova mo i tatou, ina ia mafai ona manino i la tatou vaai le ala e ao ona tatou ui ai.—Salamo 119:105.
4. E faapefea ona ofu se tasi i le tagata fou ua filemu?
4 O upu moni o le Tusi Paia e lē gata ina liliuina ai o tatou mafaufauga ae o a tatou gaoioiga ma uiga totino. E fesoasoani ia i tatou ia faia mea na augani mai ai le aposetolo o Paulo: “Ia outou to ese le tagata tuai o loo ua leaga, e tusa ma le amioga faaanamua, e tusa ma tuʻinanau e faasese ai. A e peitai, ia toe fuataiina manao o o outou loto, ma ia oofu outou i le tagata fou ua faia e foliga i le Atua, i le amiotonu ma le amio lelei e faamaoni.” (Efeso 4:22-24) O le malosi lea e toe fuataiina ai le mafaufau o se mea e i totonu. Ua faafouina ma oo ina malosi a o tuputupu aʻe lo tatou alofa mo Ieova ma ana tulafono, ma avea ai i tatou o ni tagata faaleagaga ma fifilemu.
5. Ua faapefea i le “poloaiga fou” na avatu e Iesu i ona soo ona latou maua ai le filemu ia i latou lava?
5 Ua matauina le manaoga mo lenei faafouina mai le faatonuga lea na avatu e Iesu i ona soo i ona toe taimi faatasi ma i latou: “O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou. O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:34, 35) O lenei alofa e pei o le alofa o Keriso, ma e lē alofa faapito, ua fusia faatasi ai le ausoo i se autasi e atoatoa ona lelei. (Kolose 3:14) E na o i latou o ē naunau e talia ma ola aʻe i lenei “poloaiga fou” o le a olioli i le filemu ua folafola mai e le Atua. Po o iai ea ni tagata o loo faia lena mea i aso nei?
6. Aisea ua olioli ai Molimau a Ieova i le filemu, ua ese ai mai tagata o le lalolagi?
6 E taumafai Molimau a Ieova e faaalia le alofa i lo latou auuso i le lalolagi aoao. E ui ina latou vavae ese mai malo uma o le lalolagi, ae latou te lē o auai i fefinauaiga a le lalolagi, e ui lava ina aafia i latou i omiga matuitui mai faiga faapolotiki ma faiga faalotu. Ona o ni tagata autasi, ua aʻoaʻoina ai i latou e Ieova, ma ua latou olioli ai i le filemu. (Isaia 54:13) Latou te solitu pea mai feteenaiga faapolotiki, ma e lē faia sa latou vaega i taua. O nisi sa faia faiga sauā i le taimi muamua ua latou lafoaia nei lena ituaiga o olaga. Ua avea i latou o ni Kerisiano e naunau i le filemu, i le faataitai atu i le faaaoaoga a Keriso Iesu. Ma ua latou mulimuli atu ma le loto atoa i le fautuaga a Peteru e faapea: “O lē fia manao i le ola, ma ia iloa aso lelei, soia le tautala lona laulaufaiva i upu leaga, ma ona laugutu aua le tautalatala faaʻoleʻole. Ia ʻalo ese i le leaga, a ia fai mea lelei; ia saili i le filemu ma tausisi i ai.”—1 Peteru 3:10, 11; Efeso 4:3.
I Latou o Loo Sailia Pea le Filemu
7, 8. Aumai ni faaaoaoga o ni tagata o ē ua latou lafoaia faiga taua ae avea ma ē saili i le filemu moni. (Faamatala mai nisi atonu e te iloa.)
7 O se faaaoaoga, o Rami Oved, o lē sa iai sona tulaga maualuga i se vaega faapitoa e faafetauiina faiga faamataʻu. Sa aʻoaʻoina o ia e fasiotia ona fili. Sa ia talitonu maumauai i lona lotonuu mo Isaraelu seia oo i le aso na ia iloa ai sa lē mananao rapi, po o latou taʻitaʻi lotu, e faaipoipo atu o ia i le tamaitai sa ia alofa i ai, ona o se tamaitai mai Asia, o se tagata o Nuu Ese. Sa amata loa ona ia saili mo le upu moni i le Tusi Paia. Ona ia feiloai ai lea i Molimau a Ieova. O lona suesueina o le Tusi Paia ma Molimau sa faamautinoa atu ai ia te ia e faapea, e lē toe mafai ona avea o ia ma sē e lotonuu faavalevalea. O le alofa faa-Kerisiano o lona uiga o le lafoaia lea o taua ma auupega ae aʻoaʻo ina ia alofa atu i tagata o ituaiga uma. Maeu lona faateia ina ua ia maua se tusi aualofa o loo amata mai i upu nei, “Loʻu Tuagane e, Rami”! Aisea sa fou tele ai lena faaupuga? O lē na tusia o se tuafafine Molimau mai Palesitina. Ua faapea mai Rami: “Sa ou faapea e matuā ofoofogia lena mea, auā o tagata Palesitina o oʻu fili na, ae o lenei ua faaigoa mai aʻu e se tasi o i latou i ‘Loʻu Tuagane.’” O lenei ua saili atu pea Rami ma lana avā i le filemu moni i ala o le Atua.
8 O le isi faaaoaoga o Georg Reuter, o lē sa tau i le vaegaʻau a Siamani lea na vagaia Rusia i le taimi o le Taua Lona Lua a le Lalolagi. E lei umi ae fiu o ia mai faufauga matautia a Hitila mo le puleaina o le lalolagi. Ina ua toe foi o ia i lona aiga mai le taua, sa amata loa ona ia suesueina le Tusi Paia ma Molimau a Ieova. Na ia tusi mai: “O lenei ua faatoʻā amata ona manino mai mea ia te au. Sa ou iloa ai e lē o le Atua e tuuaʻia mo le faamasaaina uma o le toto . . . Sa ou iloa ai o lana fuafuaga ina ia faavaeina se parataiso i le lalolagi aoao e iai ma ni faamanuiaga e faavavau mo tagata usiusitai. . . . Sa gugutu mai Hitila i lana ‘Pulega o le Afe Tausaga’ ae sa na o le 12 [tausaga] le umi—ma pagā se iuga mafatia! O Keriso ae lē o Hitila . . . o lē e mafai ma o le a ia faavaeina le pulega e afe tausaga i luga o le lalolagi.” Ua 50 nei tausaga talu ona auauna Georg e avea o se avefeau mo le filemu moni i le faiva faataimi atoa.
9. E faapefea i mea na tutupu i Molimau a Ieova i pulega faa-Nasi i Siamani, ona faamaonia ai lo latou loto tetele ae fifilemu?
9 O le faamaoni ma le solitu o Molimau a Ieova i Siamani i le taimi o pulega faa-Nasi ua avea pea o se faamaoniga o lo latou alofa mo le Atua ma le filemu e oo lava i aso nei, talu ona mavae le silia i le 50 tausaga. Ua faapea mai se tamai tusi na lomia e le United States Holocaust Memorial Museum i Washington, D.C.: “Sa onosaia e Molimau a Ieova sauaga ogaoga a le pulega faa-Nasi. . . . O le lototele na faaalia e se vaega tele o i latou e ala i le mumusu [e faafitia la latou lotu], a o fesagai ma le faataugāina, ma faiga leaga i totonu o nofoaga o faasalaga, ma i nisi taimi e fasiotia, na mafai ai ona faaaloalogia i latou e le toatele o ē na soifua i lena taimi.” Ona faaauau atili mai lea: “Ina ua toe faasaoloto mai nofoaga o faasalaga, sa faaauau pea e Molimau a Ieova la latou galuega, i le femiomiōai solo ma isi tagata o le nofoaga ua toe faasaolotoina, i le faaliliuina mai o nisi i le upu moni.”
Se Suiga ua Sili Atu Ona Telē
10. (a) O le ā le suiga tele e manaomia ina ia oo mai ai le filemu moni? (e) Sa faapefea ona valoia mai lenei mea i le tusi a Tanielu?
10 Pe o le uiga ea o lenei mea e talitonu Molimau a Ieova e mafai ona latou aumaia le filemu i le lalolagi aoao e ala i le faaliliuina o se vaega tele o tagata o le lalolagi ina ia tausisi atu i se solitu faa-Kerisiano? E leai! Auā ina ia aumaia le filemu i le lalolagi, e tele atu se isi suiga e manaomia. O le ā lena suiga? O pulega fevaevaeai, e omia ma sauaina ai tagata e tatau ona aveesea uma ina ia mafai ona pule le Malo o le Atua, lea na aʻoaʻo e Iesu ona soo ina ia tatalo i ai. (Mataio 6:9, 10) Ae o le a faapefea ona faataunuuina lena mea? I se faalepo na faagaeeina tauatua, na iloa ai e le perofeta o Tanielu e faapea, i aso e gata ai, ua pei le Malo o le Atua o se maa telē ‘e lei tofia i lima o se tagata,’ ma o le a nutililii ai se tupua tele o loo fai ma sui o pulega faapolotiki a tagata i luga o le lalolagi. Ona ia folafola mai lea: “O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.”—Tanielu 2:31-44.
11. O le ā le auala o le a aumaia ai e Ieova suiga manaomia mo le filemu?
11 Aisea o le a tupu ai lenei suiga tele i le tulaga o le lalolagi? Auā ua folafola mai e Ieova o le a ia faamamāeseina mai le lalolagi i latou uma o ē o loo faaleagaina ma faafanoina. (Faaaliga 11:18) O lenei faamamāina o le a faia e ala i le taua amiotonu a Ieova e tau faasaga ia Satani ma lana lalolagi amioleaga. E pei ona tatou faitau i ai i le Faaaliga 16:14, 16: “O agaga ia [lona uiga, o faamatalaga faagaeeina lē mamā] o temoni e fai faailoga, ua latou o atu i tupu [o pule faapolotiki] o le lalolagi ma le atu laulau uma, e faapotopoto ia te i latou i le taua i le aso tele o le Atua e ona le malosi uma lava. Na latou faapotopoto foi ia te i latou i le mea ua igoa i le gagana Eperu o Amaketo.”
12. O le a faapeī Amaketo?
12 O le a faapeī Amaketo? O le a lē avea o se taua faaniukilia po o se mala e faatupuina e tagata. E leai, o le taua lea a le Atua e faaiuina ai taua uma a tagata ma matuā faatamaʻia ai i latou uma o loo faatupuina na taua. O le taua lea a le Atua e aumaia ai le filemu moni ia i latou o ē mananao i le filemu. Ioe, e oo mai Amaketo e pei ona fuafuaina ai e Ieova. O le a lē faatuai mai. Sa faagaeeina lana perofeta o Sapakuka e tusi mai: “O le faaaliga ua tuuina mo ona aso ua tuupoina, a e tautala mai pe a oo i le iuga, e le pepelo lava; e ui lava ina tuai mai, a ia faatalitali pea i ai; auā e oo mai lava, e le faatuai mai.” (Sapakuka 2:3) Talu ai o tatou faalogona faaletagata, atonu ua foliga mai ai ua tuai mai Amaketo, ae o loo tausisi pea Ieova i lana faasologa. O le a gāpā mai Amaketo i le itula ua uma ona tuupoina e Ieova.
13. O le ā le gaoioiga a le Atua e fai i lē ua tuuaʻia moni i solitulafono uma, o Satani le Tiapolo?
13 O lenei gaoioiga maumauai o le a faaāva atu ai le ala mo le filemu moni! Ae ina ia mausalī ona faavae le filemu moni, e iai se isi mea e ao ona faia—le aveeseina o lē o loo faapogaia fevaevaeaiga, feitagaiga, ma femisaaiga. Ma o le mea tonu lava lena ua valoia e le Tusi Paia o le a sosoo ona tupu—le lafoina ifo o Satani i le to e lē gata, o lē o loo faapogaia faiga taua ma o le tamā o le pepelo. Sa vaaia e le aposetolo o Ioane lenei mea i se vaaiga faavaloaga, e pei ona faamauina i le Faaaliga 20:1-3: “Na aʻu iloa foi le agelu ua alu ifo i le lagi, ua ia te ia le ki o le to e le gata, ua i lona lima foi le maea uamea tele. Ua pue foi e ia le tarako, o le gata tuai, o le tiapolo lea ma Satani, ua ia fusifusi foi ia te ia i tausaga e afe. Ua ia lafo foi ia te ia i le to e le gata, ua pupuni foi ia te ia, ma tuuina atu le faamaufaailoga i ona luga, ina ia le toe faaseseina e ia o nuu, seia atoa ia tausaga e afe.”
14. E mafai faapefea ona faamatalaina le manumalo o Ieova ia Satani?
14 E lē o se miti lenei mea; o le folafolaga a le Atua—ma ua faapea mai le Tusi Paia: “E le mafai ona pepelo ai le Atua.” (Eperu 6:18) O lea ua mafai ai e Ieova ona fetalai e ala mai i lana perofeta o Ieremia: “O aʻu lava o Ieova, o lē faia le alofa, ma le faamasinoga, ma le amiotonu i le lalolagi; auā o mea ia ou te fiafia i ai, o loo fetalai mai ai Ieova.” (Ieremia 9:24) E gaoioi Ieova i le faamasinotonu ma le amiotonu, ma e fiafia lona finagalo i le filemu lea o le a ia aumaia i le lalolagi.
E Pulea e le Alii o le Filemu
15, 16. (a) O ai ua filifilia e Ieova e pule o se Tupu? (e) Ua faapefea ona faamatalaina lena pulega, ma o ai o le a fai sao i lena malo?
15 Ina ia faamautinoa o le a oo mai le filemu moni ia i latou uma e ola i lona Malo, ua avatu ai e Ieova le pulega i le Alii moni o le Filemu, o Iesu Keriso, e pei ona valoia ai i le Isaia 9:6, 7: “Ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili ese, o le Faipule, o le Atua malosi, o le Tamā o le faavavau, o le Alii o le filemu. E leai se mea e gata mai ai ona tele o lona malo ma le filemu o lona malo . . . e faia lea mea i le maelega o Ieova o ʻau.” Na tusi faavaloaga mai foi le faisalamo e faatatau i le pulega filemu a le Mesia: “O lana nofoaiga e tupu olaola mai ai le ua amiotonu; e manuia tele ai, seia leai se masina.”—Salamo 72:7.
16 E lē gata i lea, o le a pule faatasi ma Keriso i le lagi, ona uso ua faauuina i le agaga e 144,000. O suli nei o Keriso o ē na tusi faatatau i ai Paulo: “E le pine foi ona solia o Satani i lalo o outou vae e le Atua e ona le manuia. Ia ia te outou le alofa tunoa o lo tatou Alii o Iesu Keriso.” (Roma 16:20) Ioe, o le a faia se sao o i latou nei mai le lagi i le manumalo o Keriso i lē o loo faatuputupu taua, o Satani le Tiapolo!
17. O le ā e ao ona tatou faia ina ia maua ai le filemu moni?
17 O le fesili la lenei, O le ā e ao ona e faia ina ia maua ai le filemu moni? E na o le auala lava a le Atua e mafai ona oo mai ai le filemu moni, ma ina ia mauaina e ao ona e uia ni laasaga tatau. E ao ona e taliaina le Alii o le Filemu ma mulimuli atoatoa atu ia te ia. O le uiga o lenei mea, e tatau ona e taliaina Keriso i lana matafaioi o Lē Togisala ma o Lē Togiolaina tagata agasala. O Iesu lava ia na fetalai maia upu lauiloa nei: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.” (Ioane 3:16) Po o e loto malie ea e faaalia le faatuatua ia Keriso Iesu o ia o le Ala a le Atua mo le aumaia o le filemu moni ma le faaolataga? E leai lava se isi igoa i lalo o le lagi e mafai ona faavaeina se filemu ma faamautinoa mai. (Filipi 2:8-11) Aisea? Auā o Iesu o Lē na Filifilia e le Atua. O ia lava le avefeau silisili o le filemu ua fesavaliai i le lalolagi. Pe o le a e faalogo atu ea ia Iesu ma mulimuli atu i lana faaaoaoga?
18. O le ā e tatau ona tatou fai e tali atu ai i fetalaiga a Iesu o loo faamauina i le Ioane 17:3?
18 Na fetalai Iesu: “O le uiga lenei o le ola e faavavau, ia latou mauaina pea le poto e uiga ia te oe, le Atua moni e toatasi, ma lē ua e auina mai, o Iesu Keriso lea.” (Ioane 17:3, NW) O le taimi lenei e mauaina ai le poto saʻo e ala i le auai e lē aunoa i sauniga a Molimau a Ieova i le Maota o le Malo. O nei sauniga tau aʻoaʻoga o le a uunaia ai oe e tufa atu lou poto ma lou faamoemoe i isi. E mafai foi ona avea oe ma sāvali mo le filemu a le Atua. E mafai ona e olioli i le filemu i le taimi nei e ala i lou faatuatua atu ia Ieova le Atua, e pei ona taʻua i le Isaia 26:3: “E te leoleoina ia fifilemu lava le ua mausali lona loto; auā ua ia faatuatua ia te oe.” O ai e ao ona e faatuatua atu i ai? “Ina faatuatua ia outou ia Ieova e faavavau lava; auā o Ioa Ieova, o le papa e faavavau ia.”—Isaia 26:4.
19, 20. O le ā o loo faatalitalia mai mo i latou o loo sailia le filemu i aso nei ma tausisi atu pea i ai?
19 Ia faia nei loa lau filifiliga mo le ola e faavavau i totonu o le lalolagi fou filemu a le Atua. I le Faaaliga 21:3, 4, ua faamautinoa mai ai e le Afioga a le Atua ia i tatou e faapea: “Faauta, ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu, e ia te i latou le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” Pe lē o le lumanai filemu ea lena o loo e moomoo atu i ai?
20 Seʻi manatua la le mea ua folafola mai e le Atua. “O e agamalu, e fai mo latou le nuu; e faafiafia foi i latou ia te i latou ona o le manuia e tele. Ina mafaufau ia i le ua sao lana amio, ma vaavaai i le ua amiotonu; auā o le iuga o lea tagata o le manuia lava lea.” (Salamo 37:11, 37) Pe a oo mai lena aso fiafia, tau ina ia tatou faapea atu ma le loto faafetai, “Ua iu lava ina oo mai le filemu moni! Ia faafetaia Ieova le Atua, o ia o le puna o le filemu moni!”
E Mafai Ona E Faamatala?
◻ O le ā e mafai ona fesoasoani i se tasi e faia ai suiga i ona mafaufauga ma gaoioiga?
◻ Ua faapefea e Molimau a Ieova, i tagata taitoatasi, ma i vaega, ona faataitaia lo latou naunau i le filemu moni?
◻ O le ā le gaoioiga o le a fai e Ieova ia i latou uma o ē faatupuina feitagaiga ma taua?
◻ O le ā o le a faia e le pulega a le Alii o le Filemu i tagata?
[Ata i le itulau 14]
Ua faataunuuina upu a Isaia, e lē ala i Malo Aufaatasi, ae o i latou o ē ua tali atu i aʻoaʻoga a Ieova
[Ata i le itulau 15]
O tane nei e toalua na la faia ni suiga ina ia tausisia ai pea le filemu
Rami Oved
Georg Reuter
[Ata i le itulau 16]
O le a iai le filemu moni i lalo o le pulega a le Alii o le Filemu