Filemu i le Lalolagi Uma—O le ā Moni o le a Uiga i Ai?

O LE filemu i le lalolagi uma o loo i le finagalo o le Atua o le a aafia ai e sili mamao atu na i lo o le faaumatia o feteenaiga po o le soloia atoatoa o meatau faaniukelea. Ua iloa manino lenei i le auala ua faaaogāina ai e le Tusi Paia le upu “filemu.”

Mo se faaaʻoaʻoga, i Tusitusiga Eperu (le “Feagaiga Tuai”) o le upu mo le filemu o le sha·lohmʹ. O se ituaiga o lenei upu o loo faaaogāina i le Kenese 37:14, lea o loo taʻu atu ai e le tamā matua o Iakopo i lona atalii o Iosefa: “Alu ia, ina asiasi po ua saogalemu ou uso, ma saogalemu o mamoe, ona e foi mai lea ma se tala.”a O le upu Sha·lohmʹ o loo toe faaaogāina foi i le Kenese 41:16, i inā o loo faaliliuina ai le “tala lelei.”

O le mea lea, i se uiga faale-Tusi Paia, o le filemu moni e aafia ai e lē na o le taofia o le fetauai ae faapea foi le soifua maloloina, saogalemu, ma le tulaga lelei. I la tatou lomiga talu ai na faaalia ai faapea e lē mafai e le fanau a tagata ona foia le fenuminumiai i le pe faapefea ona aumaia le filemu. E na o Iesu Keriso, le “Perenise o le Filemu,” o le a mafai ona tuufaatasia i se tulaga fetaui vaega eseese ma aumaia ai le filemu moni i le lalolagi. (Isaia 9:6, 7, NW) Seʻi manatu, mo se faaaʻoaʻoga, i le mea ua valoia e le Tusi Paia i le Salamo 72:7, 8 e uiga i le pulega a ia lena: “O lana nofoaiga e tupu olaola mai ai le ua amiotonu; e manuia tele ai, seia leai se masina. E pule foi o ia e pau mai i le tasi sami e oo atu i le tasi sami; e pau mai le vaitafe e oo atu i tuluʻiga o le lalolagi.” Seʻi manatu faalemafaufau—i le soifua maloloina, le saogalemu, ma le tulaga lelei i le lalolagi aoao! E leai se feagaiga faapolotiki e mafai ona faataunuuina lena mea. E na o le Malo o le Atua e mafaia, ma o le a sili atu foi mea na te faia. Ua aumaia e le Tusi Paia ia i tatou ni vaaiga faavaloaga e faafiafiaina ai e uiga i lenei filemu o le lalolagi i le lumanai. Seʻi tatou manatunatu i nisi o nei mea.

Lafoaia Faalekelope o Auupega—Le Auala a le Atua!

Ua faapea mai le Salamo 46:8, 9: “Ina o mai ia, ina vaavaai i galuega a Ieova, o le ua faia faatafunaga i le lalolagi. Ua faaiua e ia o taua e oo lava i tuluʻiga o le lalolagi; ua gagau e ia le aufana, ma vavae le tao; ua susunuina foi e ia kariota i le afi.” O upu “aufana,” “tao,” ma “kariota,” o ni faatusa o so o se ituaiga o auupega po o masini o taua. I lea, ua mamao ai le oo atu a Ieova i tala atu o tuaoi o meatau po o le lafoaia atoatoa o meatau. E matuā faaumatia atoatoa e ia meatau faaniukelea, fanafanua, tanetau, mea e fana ai meatau faatonutonu alu mamao, fana ʻia, pomu togi, o fana, fanagutuono—so o se mea e mafai ona faamataʻuina ai le filemu faalekelope!

Ae peitai, o auupega lava latou e lē faapogaia ai taua. E masani lava, o le aa o taua ua mafua mai lea i le feitagai, matapeapea, po o uiga sauā masani ona o le lē lelei atoatoa faaletagata. (Faatusatusa Iakopo 4:1-3.) O le mea lea, o le a osofaia e le Malo o le Atua lenei aa e faapogaia taua e ala i le matuā faaumatia o na uiga sauā faaletagata i totonu o tagata. Faapefea? E ala i se polokalama faaleaʻoaʻoga i le kelope. “E tumu le lalolagi i le malamalama o Ieova, e pei ona ufitia o le iliti tai i le suāsami.”—Isaia 11:9.

O lea, e ala i le ‘aʻoaʻoina e Ieova,’ o le a lē toe vaaia ai e le fanau a tagata se feeseeseaiga i le va o lanu e avea o se faavae mo fetauaiga, feitagai, po o le faaamuamu. (Ioane 6:45) “E le faailogaina tagata e le Atua,” ma o le a faaatagia e i latou o aināina le lalolagi lona lē faailoga tagata. (Galuega 10:34) O le a faaumatia foi e le Malo o le Atua so o se malosi mo fetauaiga faaleatunuu e ala i le matuā faaumatia o tuaoi faaleatunuu. ‘E amata mai i le tasi sami e oo atu i le tasi sami ma e oo lava i tuluʻiga o le lalolagi,’ o le a taʻutino mai ai e tagata uma lo latou loto malie ma le tautua ma le loto faafetai i le pulega a Keriso.—Salamo 72:8.

Ina ia tumau lena filemu, o le a faaumatia foi e le Malo le malosi aupito sili ua mafua ai fevaevaeaiga i le talafaasolopito o le tagata: o lotu sese. (Sefanaia 2:11) Ona autasi ai lea o le fanau a tagata i lana tapuaiga i le Atua moni e toatasi. (Isaia 2:2, 3) O le a salalau atu le uiga faaleuso i le lalolagi atoa!

Filemu i le Aiga

Ae peitai, o le ā le tāua o le a iai le filemu i le lalolagi pe afai e avea pea aiga taitasi ma tafā o taua na o loo fetogiai ai upu faitio, upu faatiga, ma faamataʻuga. O le tulaga lena o loo iai le tele o aiga i aso nei. O isi aiga ua latou natia le agaga tetee ua mauaa i totonu i tua o se ufiufi o le faatagā filemu.

O le mea lea, o le filemu moni e tatau ona aofia ai le filemu faaleaiga. I lalo o le polokalama faaleaʻoaʻoga a le Malo, o le a aʻoaʻoina ai tane ma avā ina ia feutagai o le tasi ma le isi i le alofa ma le faaaloalo. (Kolose 3:18, 19) O fanau o le a aʻoaʻoina ina ia ‘usiusitai i o latou matua i mea uma lava.’ (Kolose 3:20) O le a leai ni talavou fouvale e faaita ma faapopoleina ai o latou mātua. O le usiusitai o le a avea o se mea masani, e felagolagomai ma le pule. O fanau o le a avea o se matuā fiafiaga e vaavaai atu i ai ma o se mea e olioli ai i lo latou iai.

I aso nei, talu ai ua matuā faateleina popolega i totonu o le aiga ona o omiga tau tamaoaiga, e masani ai i mātua uma e toalua ona tauave avega mamafa i galuega masani. Ae i lalo o le pulega a Keriso, o le a mapu ai aiga uma mai avega mamafa tele tau tupe—le siitia o le tau mo fale totogi, le alualu aʻe pea o le totogiina o mokesi, le faasiliga o lafoga, ma le leai o ni galuega. O le a iai galuega lelei lava e faamalie ai loto mo tagata uma. Ma e lē tatau ona iai se tasi e aunoa ma lona lava fale po o lona aiga. Matau pe ua faapefea ona faamatilatila e le valoaga i le Isaia 65:21-23 nei mea moni: “Latou te faia fale, ma latou mau ai; . . . Latou te le fai fale ina mau ai nisi; latou te le totō ina ia ʻai ai nisi; auā e pei o aso o le laau aso o loʻu nuu; e uma lava i e ua filifilia e aʻu o mea na faia e o latou lima. Latou te le galulue fua, latou te fananau, a e le tupu ai le atuatuvale; auā o le fanau ua faamanuia e Ieova i latou, atoa ma i latou e tutupu mai ia te i latou.”

Seʻi manatu i le ola ai i se siosiomaga lelei e lē osofaia ai oe i mea e vaai i ai, ma leo leaga, ma i le sogisogi atu i manogi leaga i tulaga leaga i aai ma fale feomaʻi! Seʻi manatu i le ola ai i se laufanua lanu meamata—lou lava laufanua—lena ua uma ona atiina aʻe lelei atoatoa, se vaaiga matagofie, ua lafulemu. Seʻi manatu i le manavaina i totonu o le ʻea e mamā ma e lē filogia; i le faalogoina, e lē o leo faatiga o tupulaga i ona po nei, ae o ni leo mālu e masani ai. E moni, o nisi ua faamanuiaina, ua uma ona latou olioli i se fua o nisi o nei mea. Ae i lalo o le Malo o le Atua, o le a olioli ai tagata uma lava i ni tulaga filemu o le olaga. O le a leai se tagata mativa, leai se fia ʻai, leai se tulaga lē fiafia.—Salamo 72:13, 14, 16.

Ua folafola atili mai e le Tusi Paia faapea “a e vavaeeseina o e amio leaga.” (Faataoto 2:22) O le uiga o lena mea o le faaumatia o le solitulafono. Afai e alu i fafo lau tama pito i laitiiti e taalo, o le a lē toe manaomia ona e popole i ē faaleagaina tamaiti po o ē gaoi e lafilafi solo i le ataata o le pogisa, i taavale e onanā avetaavale ua lē mafai ona pulea, po o kegi feoai solo a talavou ua faavaleaina e vailaau faasaina. O le a taaalo lau fanau i se tulaga matuā saogalemu ma malu puipuia.

Le Filemu ma Lou Lava Lelei Totino

I le iʻuga, ua iai se vala e uiga i lou lava lelei totino. E oo lava i tulaga faa-Parataiso na te lē aveesea le tiga o le kanesa po o tiga o le gugu. O le mea lea o le filemu moni e tatau ona aofia ai le soloiesea o faamaʻi, o maʻi, ma le oti. Pe mafai ona faia lea mea? A o iai i le lalolagi, sa faataʻitaʻia ai pea e Iesu lona tomai i luga o le fanau aumaʻia a tagata. (Mataio 8:14-17) Mai lona tulaga maualuga faalelagi, o le a mafai ai e Keriso ona faia vavega i le lalolagi aoao! “I lena taimi,” ua folafola mai ai e le Tusi Paia, “ona faapupulaina ai lea o mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū ona o le fiafia.”—Isaia 33:24; 35:5, 6, NW.

Ae peitai, o le tauiviga uma a Keriso e faasagatau i le tulaga faanoanoa o le fanau a tagata o le a lē taofia ai i inā. Ua faamatalaina e le aposetolo o Paulo faatatau i le pulega tautupu a Keriso: “Auā e tatau ona pule o ia [o se Tupu], seia tuuina e ia [le Atua] ona fili uma lava i lalo o ona vae. O le toe fili e faaumatia, o le oti lea.” (1 Korinito 15:25, 26) O le uiga o lenei mea o le tatalaina o tulaga uma e faaumatia ai na tuuina atu e le oti i luga o le fanau a tagata mai lava i le amataga. E pei ona sa faamatalaina e Iesu lava ia: “E oo mai le aso e faalogo ai i lona leo [o Keriso] o i latou uma ua i tuugamau, ma latou o mai ai.” (Ioane 5:28, 29) O le faitau miliona e lē mafaitaulia o ē na ola ma maliliu i tulaga faanoanoa, o le a latou maua le avanoa e auai i le filemu o le lalolagi o loo sau.

Pe o le a e auai i lea filemu? Ua uunaia oe e Molimau a Ieova ina ia e aʻoaʻo ni mea e tele e uiga i le mea ua aʻoaʻoina e le Tusi Paia e faatatau i lenei.b O le faamoemoe o le filemu i le lalolagi uma e matuā faafiafiaina ai, e matuā moni, e lē tatau ona tuulafoaia. Ia faamautinoa faapea afai e te faamalosi oe lava e aʻoaʻoina ma faatatauina le Afioga a le Atua, “ona ia te [oe] lea o le Atua e ona le [filemu]”—e faavavau!—Filipi 4:9.

[Faaopoopoga i lalo]

[Ata i le itulau 5]

O le a taofia e Ieova taua uma lava “e oo lava i tuluʻiga o le lalolagi”

[Ē Ana le Ata]

USAF Official Photo

[Ata i le itulau 6]

O le a aʻoaʻoina tane ma avā ina ia feutagai ma le filemu le tasi ma le isi