Faaiʻuina e Faavavau le Finauga i le Vateatea Aoao
“O [Ieova] o loo i lou itu taumatau, e fasi e ia o tupu i le aso o lona toasa.”—SALAMO 110:5.
1, 2. I le tausaga e 70 T.A., o le ā le mea na tupu ua lafo atu ai masalosaloga i le lē faalevateatea o le pule silisili ese a Ieova le Atua, ae i le taimi lea, ia te ai na liliu atu i ai lona finagalo malie?
O LE pule silisili ese i le vateatea a Lē na Foafoaina le lagi ma le lalolagi o se finauga aupito sili lea ona tāua o loo i luga o tagata ma agelu. Ua lē pine, ae faaiʻua e faavavau le finauga, ae mo le tele o senituri ua luʻia ai e fili o Ieova lana pule silisili ese. E moni, o le faaumatiaga o le aai o Ierusalema i le 70 T.A. faatasi ai ma lona malumalu na tuuina atu ia Ieova, atonu na lafo ai se masalosaloga i le pule silisili ese i le vateatea a Lē na Foafoaina Mea. Ae peitai, sa iai se mafuaaga tāua na ala ai ona lē filifili Ieova i lea taimi e avea o ia o se Atua fitafita e fai ma sui o Isaraelu faaletino.
2 O le ā le mafuaaga? I lena taimi sa liliu atu ai le finagalo malie o Ieova le Atua i se nuu fou, se Isaraelu faaleagaga, “le Isaraelu o le Atua,” e pei ona taʻua ai e le aposetolo o Paulo le faapotopotoga a Iesu Keriso. (Kalatia 6:16) E ui lava i lea, i lenei vaitaimi umi ua taʻua o le Tausaga o le Faa-Kerisiano [T.A.], ua leʻi tau Ieova mo Isaraelu faaleagaga i le avea o se Atua fitafita i le auala lea na ia tau ai mo Isaraelu faaletino i lalo o le feagaiga o le Tulafono faa-Mose. Sa oo lava ina ia faatagaina fitafita Roma, i le faapogaia e tagata Iutaia, ina ia fasiotia Iesu Keriso i se laau faaoosala i Kalevario. E tusa lena ma le 37 tausaga a o leʻi oo i le faaumatiaga lona lua o Ierusalema e Roma, i le 70 T.A.
3, 4. Mai i aso o Mose e oo mai i le Tupu o Esekia, na faapefea ona faaalia e le Atua ia lava e avea o se fitafita, ae i le tulaga o Isaraelu faaleagaga, o le ā ua moni e tusa ai ma ana taua ma a latou taua?
3 Mai aso o le perofeta o Mose e oo mai i le taimi o le nofoaiga a le Tupu o Esekia o Ierusalema, na tau faavavega ai Ieova le Atua mo le nuu o Isaraelu, ma sa tau ai Isaraelu i lalo o lana taʻitaʻiga i auupega mataʻutia e oo ai le oti. (Teuteronome 1:30; 3:22; 20:3, 4; Iosua 10:42) Ae lē o faapena i le tulaga o Isaraelu faaleagaga! Mai le maliu o Iesu Keriso i fafo atu o Ierusalema e agaʻi mai ai i o tatou Aso Taatele [T.A.], ua lē filifili ai lenei Atua fitafita e tau i se taua faaletino mo le Isaraelu a le Atua. Ma le tusa ai, ua ia lē tuuina atu le pule ia Isaraelu faaleagaga o ē o faia aʻe ai le faapotopotoga Kerisiano ina ia tau i ni auupega faaletino o le taua. E iai se isi ituaiga o taua a Kerisiano latou te tau ai.
4 I le ioe faatasi i lenei mea, na tusi ai se tasi o tagata sa taʻimua i le taua mo le faatuatuaga Kerisiano i ona uso Kerisiano i Korinito i Eleni: “O auupega a lo matou nei taua e le faaletino ia, a e faamalolosia e le Atua e lepetia ai ʻolo; o loo lepeti i lalo masalosaloga, ma mea maualuluga uma ua faasiasia i le mataupu a le Atua, o loo faatoilaloina manatu uma ia anaana ia Keriso; o loo nofo sauni foi i matou e taui atu i le le anaana uma, pe a faaatoatoaina lo outou anaana.” (2 Korinito 10:4-6) Muamua lava i le tusi lava lea, na tautala ai Paulo e uiga i “auupega o le amiotonu i le itu taumatau atoa ma le itu tauagavale.”—2 Korinito 6:7; tagai foi i le Efeso 6:11-18.
E Tau Ieova ia Amaketo
5. I le faatoaga i Ketesemane, o le ā le tulaga na faia e Iesu agaʻi i le faaaogāina o auupega faaletino e puipuia ai ia lava, ma o le ā le auala o gaoioiga ua faia e ona soʻo?
5 A o iai Iesu Keriso i le lalolagi, sa lē taitai lava ona ia manaomia auupega e fasiotia ai mo lona puipuiga. I le po na faalataina ai o ia i le faatoaga i Ketesemane, na seʻi ai e lona soʻo tuutoina o Simona Peteru se pelu ma taia ai le taliga o le auauna a le ositaulaga sili a tagata Iutaia. Ae na toe faafoisia faavavega e Iesu le taliga i lona nofoaga ma fetalai atu: “O i latou uma o e tago i le pelu, e oti i latou i le pelu. Fa te oe ea ou te le mafaia ona aioi atu nei i loʻu Tamā, ona aauina mai ai lea e ia ia te au o agelu e sili ona toatele i lekeona e sefulu ma le lua? Ona faapefea lea ona taunuu o Tusi, e tatau ona oo ia mea?” (Mataio 26:52-54) I le feagai ai ma nei mea uma lava, ua tumau ai i latou o ē faaaʻoaʻo moni i le Alo o le Atua o lē na faataulagaina o ia lava, lo latou solitu, i tulaga tuusaʻo po o le lē tuusaʻo, pe a oo mai i taua faalelalolagi.—Ioane 17:16; 18:36.
6. I le taimi o le taua i le aso tele o le Atua e Ona le Malosi Uma lava ia Amaketo, o le ā le tulaga o le a faia e Molimau a Ieova?
6 I inei la, seʻi faailoa atu i atunuu uma faapea i le taimi o le “taua i le aso tele o le Atua e ona le malosi uma lava” i “le mea ua igoa i le upu Eperu o Amaketo,” o le a lē auai Molimau a Ieova i le taua. O le a latou tuu lena mea i le Atua fitafita, o “Ieova o ʻau,” faatasi ai ma ana lekeona o agelu i lalo o gaoioiga faakapeteni a Iesu Keriso.—Faaaliga 16:14-16; 19:11-21; Salamo 84:12.
Toeitiiti Toe Amata e Ieova Ana Gaoioiga Faafitafita
7. I le avea o se Atua fitafita, o le ā le taʻu na iloa ai Ieova, ma pe o tumau pea ona iai o ia i lea tulaga?
7 Sa oo ina lauiloa ma taʻua le Atua o Isaraelu anamua o ia o Ieova tseva·ʼohthʹ, po o Ieova o ʻau. (1 Samuelu 1:3, 11) I le Roma 9:29 (King James Version) ua faasino atu ai e le aposetolo Kerisiano o Paulo i le Isaia 1:9 ma tusi ai faapea: “Ana le faatotoeina e le Alii o Sapaotā ni nai fanau toaitiiti lava ia i tatou, po ua avea i tatou e pei o Sotoma, po ua tusa i tatou ma Komoro.” Ua tusi foi le soʻo Kerisiano o Iakopo: “O alaga a i latou ua seleseleina ua ulu atu i fofoga [taliga] o le Alii o Sapaotā.” (Iakopo 5:4, KJ; American Standard Version) O lea na faatulaga ai e Paulo ma Iakopo le Atua e avea o Ieova o ʻau i le uluai senituri T.A. I senituri e 18 mulimuli ane, sa leʻi auai ai lava le Atua i ni taua faaletino e fai ma sui o Isaraelu faaleagaga, le Isaraelu a le Atua, e pei o le auala na ia faia ai mo Isaraelu anamua, peitai o loo tumau pea ona avea o ia o Ieova o ʻau.
8-10. (a) O ai na pulea le taua i le lagi, ma aiseā ua sili ai ona agavaa Mekaeli e faia le taua? (e) O le ā le iʻuga o le taua i le lagi, ma o le ā le tele o le taimi o loo totoe a o leʻi oo i le taua o le aso tele o Ieova?
8 I le fanau mai o le Malo faa-Mesia i le 1914 i le iʻuga o “taimi o Nuu Ese,” na pa ai le taua i le afioaga faalelagi o Ieova le Atua. (Luka 21:24, KJ) O ai na pulea lena taua? O Ieova le Atua lava ia. Na ia auina atu lona Alo faanofotupuina i le tafā o taua i lalo o le suafa Mekaeli auā o Ia lenei ua sili atu ona agavaa e tali i le fesili o loo iai i lena suafa, o lona uiga, “O Ai e Pei o le Atua?” Sa vave lava ona gaoioi Mekaeli e avea o se sui e tau mo Ieova o ʻau.
9 Ma le tusa ai, ua tatou faitau i le Faaaliga 12:7-10: “Ua tau foi le taua i le lagi; o Mekaeli ma ana agelu ua latou tau ma le tarako, ua ʻau foi le tarako ma ana agelu e tau ai le taua, a ua latou le manumalo, e le toe maua foi i le lagi se mea latou te nonofo ai. Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia. Na ou faalogo foi i le leo tele i le lagi, ua faapea, O ona po nei ua oo mai ai le olataga, ma le mana, ma le malo o lo tatou Atua, ma le pule a lona Keriso; auā ua lafo i lalo le na molia o tatou uso.”
10 E oo mai i le taimi nei, i le sili atu i le 70 tausaga talu ona uma lena taua i le lagi, ua na o sina ‘taimi puupuu’ ua totoe nei a o leʻi pa le taua o le aso tele o Ieova ma ua matuā faaalia ai ma le manino e le Atua ia lava e avea o Ieova o ʻau i lenei tupulaga o le fanau a tagata.—Faaaliga 12:12; Sakaria 14:3.
O Lē e Tau mo le Viiga o Ieova
11. O le ā le taimi atofaina o loo faatalitali i ai le vaega totoe o le lafu mamoe itiiti ma le motu o tagata e toatele, ma o le ā o le a latou alalaga atu ai loa ma le fiafia?
11 I lalo o le faagaeega, na tusi ai le Tupu poto o Solomona o Isaraelu anamua: “O le mea ma lona tausaga i mea uma, ma ona lava po i mea uma lava i lalo o le lagi; . . . o ona po o le taua, ma ona po o le nofo lelei [filemu].” (Failauga 3:1-8) I luga o le lalolagi, o loo faatalitali ai soʻo o le Tupu o loo pule o “lē sili ia Solomona” i le taimi ma le mea e tupu ai mo Ia ina ia taʻitaʻiina atu agelu faalelagi manumalo i le taua o le a faia ia Amaketo [po o Ha-Maketo]. (Mataio 12:42; Faaaliga 19:11-16) I inā o le a “pule foi o ia ia te i latou [o nuu] i le tootoo uamea,” e fasi gaugauina foi i latou “i le tootoo uamea.” (Faaaliga 19:15; Salamo 2:9) Maeu le alaga fiafia o le a alalaga atu ai ona soʻo ua puipuia o ē tausisi i le filemu i lona laveaiina ofoofogia e gatete ai o i latou! O le a aofia ai i lenei mea le vaega totoe o le “lafu mamoe itiiti” o ona suli lagolago o le Malo ma le “motu o tagata e toatele” o ana “isi mamoe” na o le a faafiafiaina i le faamoemoe o le ulu atu i le lalolagi Parataiso i lalo o lana pulega filemu i le afe o tausaga. (Luka 12:32; Faaaliga 7:9-17; Ioane 10:16) I le olioli manumalo, “i le paolo o Le e ona le malosi uma lava,” o le a latou alaga atu ai le leo tele o le manumalo o le Tupu Leoleo Mamoe o Iesu Keriso, i le faalauiloaina o le pule silisili ese i le vateatea a Ieova le Atua.—Salamo 91:1.
12. O fea o loo faatalitali mai ai le taua mo atunuu, ma faatasi ai ma le ā le iʻuga e tusa ai ma le Salamo 68:1, 2?
12 E aunoa ma le faia o ni talausui, ua mafai nei ona faapea atu o taua o loo mamao atu ma le nofoaga o le tagata, ma ua aafia ai le faaaogāina o auupega faatonutonu alu mamao ua uma ona faatonutonuina ua sili atu na i lo ana pomu faaniukelea o loo taatitia mai i luma o malo uma faalelalolagi, pe i totonu po o fafo atu o le faalapotopotoga o Malo Aufaatasi. Faalogo: “Ia tulai mai le Atua, ia faataapeapeina e ua ita ia te ia; ia sosola ese foi i ona luma o e ua ʻinoʻino ia te ia. E pei ona lelea o le asu, ia faapea ona e faaleleaina i latou; e pei ona liu suāvai o le pulu i le afi, ia faapea ona fano i luma o le Atua o e amio leaga.”—Salamo 68:1, 2.
13. A o faagasolo sauniuniga mo le taua, ia te ai na fai faatatau atu i ai upu i le Salamo 45:1-6 i se auala e sili ona talafeagai?
13 O sauniuniga uma mo le taua o taua uma lava ua faagaoioia nei. I upu o loo mulimuli mai na fatuina i lalo o le faagaeega e se tasi o le malo o Isaraelu, ua faapea atu ai i le Tagata Tau aupito Sili a le Atua, o Lē e Tau mo le viiga o Ieova: “Ua sili lava lou aulelei i atalii o tagata; ua masaa ifo i ou laufofoga upu alofa; o le mea lea e faamanuia ai oe e le Atua e faavavau. Ina fusi ia lau pelu i lou vae, o oe na le toa, o lou viiga ma lou mamalu. O lou mamalu foi ia e tietie ai i le manu ma le manuia, ona o le upu moni, ma le agamalu, ma le amiotonu; ia aʻoaʻoina foi oe e lou aao taumatau i mea e matautia ai. E maamaai au u fanafana; e pauu ai tagata ia te oe; e tuia ai loto o e faia le Tupu mo latou fili. Le Atua e, o lou nofoālii e faavavau faavavau lava lea; o le tootoo o lou malo, o le tootoo o le amiotonu lea.”—Salamo 45:1-6.
Ua Auau Faatasi Nuu e Faasagatau ia Ieova
14, 15. Ina ua uma ona tatalaina mai i le faafalepuipuiina, o ā upu na sii mai e le au aposetolo mai le Salamo 2 na faataunuuina, ma o le ā le talosaga i le Atua na latou faia?
14 E leʻi pine lava ina ua uma ona faavaeina le faapotopotoga Kerisiano i le aso Penetekoso 33 T.A., sa iloa lelei ai e Kerisiano faauuina le faatatauina o le Salamo 2:1, 2. Ua faitauina faapenei lenei mau: “ Se a le mea ua faanunununu ai nuu ese, ma mafaufau ai nuu i le mea e le aoga? Ua tutū mai tupu o le lalolagi, ua pulega faatasi foi alii, e tetee atu ia Ieova ma le na ia faauuina.” Ina ua uma ona puapuagatia aposetolo a Lē na Faauuina e Ieova i lo latou uluai faafalepuipuiina ma faiga leaga na faia i ai e fili Iutaia, sa latou toe aufaatasi atu i o latou uso Kerisiano ma i lea na sii mai ai upu nei o le Salamo 2 e pei ona fatuina e le Tupu o Tavita. I le Galuega 4:23-30 ua lipotia mai ai le mea na tupu i le faapea mai:
15 “Ua tuuina mai i laua e ō, ona la o atu lea i o latoū, ma la faamatala atu ia te i latou mea uma lava na fai mai ai ia te i laua e le au faitaulaga sili ma toeaina. Ua faalogo i ai i latou, ona latou valaau lea i le Atua ma le loto gatasi, ua faapea atu, Le Alii e, o le Atua oe, o le na faia le lagi, ma le lalolagi, ma le sami, ma mea uma lava o i ai; o le na fetalai mai i le fofoga o lau auauna o Tavita, Se a le mea ua lilivau ai nuu ese, ma mafaufau ai nuu i mea e le aoga? Ua tutū mai tupu o le lalolagi, ua faapotopoto faatasi foi alii e tetee atu i le Alii ma lona Keriso. Auā e moni lava, na faapotopotoina o Herota, ma Ponotio Pilato, atoa ma nuu ese, ma le nuu o Isaraelu, i lau Auauna paia o Iesu, ua e faauuina; latou te faia mea uma lava na tuu anamua i lou aao ma lau pule ia faia. O lenei, le Alii e [o Ieova], ia e silasila i lo latou faamatau mai; ma ia e foai mai i au auauna, ina ia latou matuā tautala i lau afioga ma le faamalosi, i le faaloaloa mai o lou aao e faamalolo ai, ina ia faia foi o faailoga ma vavega i le suafa o lau Auauna paia o Iesu.”
16, 17. (a) I le talafaasolopito uma o le tagata, pe sa iai se mea na tupu e faatusatusa atu ma lena na amata ona tupu i le 1914? Faamatala. (e) O le ā le auala o le gaoioiga o loo faaauau pea ona faia e atunuu, o le mea lea ua manaomia ai ona tusia e Ieova le Atua le ā, e tusa ai ma le ‘tusi o ana taua’?
16 Ae peitai, pe a oo mai i nuu faanunununu, o le a tutū faatasi tupu e avea o se tagata e tasi, ua pulega faatasi foi taʻitaʻi faapolotiki e faasagatau ia Ieova ma Lē na ia Faauuina o Iesu Keriso, o le ā e mafai i le talafaasolopito uma lava o le tagata ona faatusatusa i le mea na amata i le 76 tausaga ua mavae i le 1914? Ua lē gata o le tausaga lena na pasae aʻe ai le taua muamua a le lalolagi o le fanau uma lava a tagata o loo ola, ae maise foi o le tausaga lena na iʻu ai taimi o Nuu Ese, le vaitaimi o “tausaga o nuu ese”! (Luka 21:24) Ua manino lava la na amataina le faataunuuga sili o le Salamo 2 i lena tausaga.
17 I le iʻuga o taimi o Nuu Ese i le 1914, e leai se tasi o atunuu—e oo lava i atunuu ua taʻua o Kerisinetoma, lea o le toatele o ona tagatanuu ua manatu faalelotu e uiga ia i latou lava faapea o Isaraelu faaleagaga—na naunau atu e talia Lē na Faauuina e Ieova, o Iesu Keriso, i le nofoalii o le pulega tautupu i luga aʻe o le lalolagi. Ma i le taimi nei, ua 71 tausaga talu ona amata ona “talaʻiina atu foi . . . i le atu laulau uma, e fai ma molimau i nuu uma,” “lenei tala lelei o le malo”, na amata i le 1919 ma agaʻi mai ai, o malo i totonu ma fafo atu o Kerisinetoma o le a mautinoa lo latou lē faafeiloaia o le Tupu a Ieova ua leva ona faasilasila mai ma tauto atu o le a tautua ia te ia, a o latou faafitia la latou lava pulega i luga o le lalolagi. (Mataio 24:14) I le faaeseesega, ua leva lava ona latou oo mai i le taimi ma le tulaga ua manaomia ai ona tusia e Ieova e pei ona sa iai, le faaiʻuga sili o “le tusi o taua a Ieova.”—Numera 21:14.
Le Manumalo Faamamaluina o le Atua Fitafita
18. O le ā le gaoioiga i le vaega a Ieova tatou te fiafia i ai, ma o ai o le a iai i lana itu, e pei ona sa iai, mo le faataunuuina o le Salamo 110?
18 O lea, inā agaʻi atu ia i luma i le taua, Ieova o ʻau e, faatasi ma lou Alo mamalu, o Iesu Keriso, i lou itu! Ia te ia ua fai atu i ai nei upu faavaloaga: “Ia pule oe i totonu o e ita ia te oe. O le Alii [Ieova] o loo i lou itu taumatau, e fasi e ia o tupu i le aso o lona toasa. E faamasino e ia o nuu ese, e faatumuina e ia i tino o tagata ua oti, e foaina e ia ulu o nuu e tele.”—Salamo 110:2, 5, 6.
19. E tusa ai ma le taua o le aso tele o le Atua e Ona le Malosi Uma lava lea o loo taatia mai i luma, o le ā le tatalo tatou te ofoina atu ia te ia e fai ma sui o le motu o tagata e toatele o isi mamoe?
19 Ieova o ʻau e, ia avea au auauna faamaoni i luga o le lalolagi ma molimau e matuā olioli ona o lou manumalo e lē mafaatusaina e ala i lau Tupu fitafita, o Iesu Keriso, i le faia o le taua o le aso tele o le Atua e Ona le Malosi Uma lava i le nofoaga ua taʻua i le upu Eperu o Ha-Maketo! (Faaaliga 16:14) Faatasi ai ma le vaega totoe o le Isaraelu moni faaleagaga, ia tuu atu i le motu o tagata e toatele o ē pei ni mamoe o ē “ua ta foi o latou ofu, ma ua faasinasinaina o latou ofu i le toto o le Tamai mamoe” ua “o mai nai le puapuaga tele” ma le manumalo e avea o au molimau faalelalolagi e faavavau! (Faaaliga 7:14) I lalo o lau tausiga alofa, seʻi faasaoina i latou e aunoa ma le maliliu i se nofoaga e lē toe iai ni taua a lou Alo manumalo, o lē o le a pule i luga o le lalolagi ua faamamāina lea o le a faaliliuina i se parataiso matagofie, e ō gatasi ma lau uluai fuafuaga. Seʻi avea i latou o se molimau vaaia ia i latou uma ua maliliu o le a toe faatutuina, i le viia ai o le pule silisili ese lea ua tonu ona avea māu i luga o le vateatea aoao! Matou te faafetai atu ia te oe ona i le taimi lea o le a e faaiʻuina ai le finauga i le vateatea aoao mo taimi uma lava, ioe, e faavavau!
E te Manatua?
◻ O le ā le finauga aupito sili o loo i luma o tagata ma agelu?
◻ O le ā le faaeseesega o loo iai i le va o le taua a Ieova mo Isaraelu anamua ma mo Isaraelu faaleagaga?
◻ Ia Amaketo, o le ā le tulaga o le a faia e Molimau a Ieova, ma aiseā?
◻ O anafea na faia ai se faataunuuga sa leʻi taʻua muamua o le Salamo 2:1, 2?
◻ O le a faapefea ona faaiʻua mo taimi uma lava le finauga i le vateatea?
[Ata i le itulau 15, 16]
O le “motu o tagata e toatele” o le a alalaga fiafia i le Tupu Leoleo Mamoe manumalo a le Atua