Afifio mai i Tauaofiaga Itumalo a “Ē Alolofa i le Saʻolotoga”!

SAʻOLOTOGA! Maeu se leo fiafia ua iai i lena upu! E leai se tasi e olioli i le saisaitia pe faapagotaina. I tausaga talu ai nei, na vaaia ai le tele o taumafaiga agaʻi i le faamoemoe mo se saʻolotoga faapolotiki na i lo o se isi lava saʻolotoga o manatua i le mafaufau.

Ae peitai, e pei lava ona faanaunau i se saʻolotoga faapolotiki, e iai foi se saʻolotoga e sili mamao atu ona tāua ma faanaunau i ai. O le saʻolotoga lea na fetalai i ai Iesu Keriso, le Alo o le Atua, ina o ia fetalai atu i ona soʻo: “Afai tou te tumau pea i laʻu mataupu, o oʻu soo moni outou. E iloa foi e outou le mea moni, e tuu saʻoloto foi outou e le upu moni.” (Ioane 8:31, 32) O le saʻolotoga lenei mai talitonuga sese faalotu, saʻolotoga mai le fefe i tagata, saʻolotoga mai le faapologaina i amioga agasala ua oti ai, ma isi lava mau mea.

O le saʻolotoga lenei ua fai ma matua o Tauaofiaga Itumalo o “Ē Alolofa i le Saʻolotoga” o le a faia e Molimau a Ieova i le lalolagi aoao e amata i le tau mafanafana o le 1991. Talu mai le tausaga e 1919, lea sa faailogaina i le tatalaina o faasasaga faalemalo sa tuuina atu ia i latou na taʻimua i Molimau a Ieova, sa olioli ai tagata o le Atua i se saʻolotoga faateleina e tusa ai ma la latou tapuaiga mamā.

O se mea ua sili ona fetaui faapea o le mataupu e uiga i le saʻolotoga sa faatāuaina i le gasologa o tausaga i tauaofiaga faatiokarate, e ala i matua faapena e pei o le “Fonotaga Faatiokarate a ‘Le Atunuu Saʻoloto’” ma “Fonotaga Itumalo o ‘Atalii Saʻoloto o le Atua.’” Ua talanoaina ai foi i se tulaga lautele le saʻolotoga i tusi e pei o “The Truth Shall Make You Free” ma O le Ola E Faavavau—I le Saʻolotoga o Atalii o le Atua.

O lenei saʻolotoga foaiina mai e le Atua lea ua maua e auauna a Ieova e lē mo na o lo latou lava lelei ma le olioli. E pei ona tatou faitau ai i le Kalatia 5:13: “Auā le au uso e, ua valaauina outou i le saʻolotoga; tau lava ina neʻi avea lenei saʻolotoga ma togafiti a le tino; a ia outou auauna le tasi i le tasi i le alofa.” O le Tauaofiaga Itumalo o “Ē Alolofa i le Saʻolotoga” o le a fesoasoani ia i tatou e talisapaia le fuafuaga o lo tatou saʻolotoga, ia mafai ai e i tatou ona taofi mau i lo tatou saʻolotoga tautele, ma faailoa ai ia i tatou pe faapefea ona faaaogā i se auala aupito sili ona lelei lo tatou saʻolotoga.

O le tauaofiaga o le a amata i le taeao o le Aso Faraile i le 10:20 i se polokalama o musika e faasagatonu ai o tatou mafaufau mo meaʻai faaleagaga o le a mulimuli mai. O le matua o le uluai aso o le “Iloaina o le Upu Moni e Tuu Saʻoloto ai i Tatou,” e faavae mai le Ioane 8:32. I le taeao o le a faatomua i saunoaga faafeiloai a le taʻitaʻifono ma le lauga autū, “Le Fuafuaga ma le Faaaogāina o lo Tatou Saʻolotoga Foaiina mai e le Atua.” O le a faatāuaina ai i lenei lauga le eseesega i le va o le saʻolotoga aʻiaʻi a Ieova ma le saʻolotoga faatatau ua tuuina mai e le Atua ia i tatou. O le a faalaeiauina ai foi i tatou ina ia faaaogā i se auala aupito sili ona lelei tatou te mafaia le saʻolotoga lea ua tatou maua. O le polokalama i le afiafi, o le a feagai ma vala eseese o lo tatou saʻolotoga ma la tatou faiva, ma o le a faaiʻu i se tala, Tuu Saʻoloto ina ia Siitiaina le Tapuaiga Moni.

O le matua o le aso lona lua o le “Tu Mausalī i lo Tatou Saʻolotoga Foaiina mai e le Atua,” e faavae i le Kalatia 5:1. O le polokalama i le taeao o le a faatomua i se lauga faasolo e faaalia ai pe faapefea i tagata taitoatasi o se aiga ona mafai ona olioli i le saʻolotoga mai le Atua i totonu o le liʻo o le aiga. O i latou ua nofo sauni e papatiosina o le a latou talisapaia faapitoa faamatalaga faatatau i le pe faapefea ona maua le saʻolotoga e ala i le tuuina atu ma papatisoina. O le a aofia ai i le polokalama i le afiafi se talanoaga e faagaee ai pe o le faaipoipoga o le ki lea i le fiafia pe leai. O le a iai foi ni lauga faasolo i vala eseese o le saʻolotoga ma se lauga faaiʻu o le a taulaʻi atu i le Sui Sili a le Atua mo le saunia o le saʻolotoga ma le ola e faavavau.

O le matua o le Aso Sa “Faaaogāina lo Tatou Saʻolotoga ia Ōgatasi ma le Agaga o le Atua,” e faavae i le 2 Korinito 3:17. O le a faatomua ai i le polokalama se lauga faasolo sili ona faafiafiaina ai i le faataoto a Iesu o loo faamauina i le Mataio 13:47-50, e faaalia ai pe ua faapefea ona auauna Molimau a Ieova e avea ma faifaiva i tagata. O le lauga mo le lautele i le afiafi e faapea “Faafeiloaia le Lalolagi Fou o le Saʻolotoga a le Atua!” O le a mulimuli mai ai i le taualumaga fou mo se tauaofiaga itumalo: o le otootoga o le lesona o Le Olomatamata mo lena vaiaso. Ona faaiʻu ai lea o le polokalama i apoapoaiga faale-Tusi Paia mo i tatou uma lava ina ia agaʻi pea i luma i le faaaogāina i se auala lelei o lo tatou saʻolotoga foaiina mai e le Atua e ala i a tatou amio ma i la tatou molimau atu.

Ia i latou uma o ē alolofa i le saʻolotoga, tatou te fai atu upu a le faisalamo o Tavita: “Ina tofotofo ia outou, ma ia outou iloa e lelei Ieova.” (Salamo 34:8) Ia faia so o se taumafaiga e te mafaia ina ia e talaaao mai i lenei tauaofiaga. Ia fai o sau tiute fai ina ia e auai, mai lava i le polokalama amata i le taeao o le Aso Faraile seʻi oo i le lauga faaiʻu i le afiafi o le Aso Sa. Afai e te oo mai ma sou fia taumafa lelei i meaʻai faaleagaga, i le iloa atoatoa o ou manaoga faaleagaga, o le mea moni o le a e fiafia! (Mataio 5:3) Ma aua neʻi o tatou faagaloina le mataupu silisili, “O le ua tele ana e lulu, e tele foi ana e selesele mai.” E faatatauina foi lenei mea i le pe faapefea ona tatou sauniuni auiluma ma le filiga moni ina ia auai, le faapea ona tatou faalogo ma le naunau i le polokalama a o fofogaina mai, ma faapea ona tatou faia ma le aasa po o ā lava ni faaeaga o le auaunaga tuaofo ua tatalaina mai mo i tatou i le fesootai atu ma la tatou Tauaofiaga Itumalo o “Ē Alolofa i le Saʻolotoga.”—2 Korinito 9:6.