Se Nuu Saoloto ae Tali Fuaitau Atu
“E iloa foi e outou le mea moni, e tuu saʻoloto foi outou e le upu moni.”—IOANE 8:32.
1, 2. (a) Ua faapefea ona faailoa mai le saolotoga i talafaasolopito o tagata? (e) E na o ai lava o loo saoloto moni? Faamatala.
SAOLOTOGA. Maeu le malosi o lena upu! Ona o le faanaunau o tagata ina ia saoloto, ua onosaia ai e le fanau a tagata, le lē mafaitaulia o taua ma fouvalega, atoa ma atugaluga e lē mailoa o le lautele. O le mea moni e pei ona faapea mai le The Encyclopedia Americana: ‘I le gasologa mai o augātupulaga, e leai se isi mea sa sili atu ona tāua lana matafaioi na faia ai, na i lo o le saolotoga.’
2 Ae e ui i lea, e toafia ni tagata o saoloto moni lava? E toafia ua latou iloa le uiga moni o le saolotoga? Ua faapea mai le The World Book Encyclopedia: “Ina ia maua e tagata le saolotoga atoatoa, e lē tatau ona iai ni taofiofiga i le auala o latou manatunatu ai, tautatala ai, pe gaoioi ai. E tatau ona latou iloa po o ā a latou filifiliga, ma e tatau ona ia i latou le tomai e fai ai na filifiliga.” E tusa ai ma lenei, po o e iloa ea se tasi o saoloto moni lava? O ai e mafai ona faapea mai e lē o iai ni “taofiofiga i le auala o latou manatunatu ai, tautatala ai, pe gaoioi ai”? O le upu moni, e na o le toatasi lava le peresona i le vateatea e talafeagai i ai lena faamatalaga—o Ieova le Atua lea. E na o ia lava o loo iai le saolotoga atoatoa. Na o ia lava foi e mafai ona faia so o se filifiliga ua ia finagalo i ai, ma faatinoina e tusa lava po o ā teteega uma e tulai mai. O ia o Lē “e ona le malosi uma lava.”—Faaaliga 1:8; Isaia 55:11.
3. O le ā le tulaga ua masani ona olioli ai tagata i le saolotoga?
3 I tagata faatauvaa, e na o sina saolotoga itiiti lava e mafai ona maua mai ai. E masani lava ona aumaia pe faamautinoaina mai e se pule, ma ua mafua lea ona o lo tatou gauai atu i lena pule. O le mea moni, e toetoe lava o tulaga uma, faatoʻā mafai lava ona saoloto se tagata, pe afai na te amanaia le pule a lē o loo faamautinoaina lona saolotoga. Mo se faaaʻoaʻoga, ua olioli tagata o loo ola i se “lalolagi saoloto,” i le tele o aogā e pei o le saolotoga e gaoioi ai, saolotoga e tautala ai, ma le saolotoga mai lotu. O le ā ua fai ma faamautinoaga o nei saolotoga? O le tulafono lea a le atunuu. E faatoʻā mafai lava ona olioli ai se tagata pe afai e usiusitai o ia i le tulafono. Ae afai na te melea lona saolotoga ma solia le tulafono, o le a ia tali fuaitau atu ai la i ē o loo iai le pule, ma e mafai ona matuā faaitiitia ai lona saolotoga e ala i se faasalaga i le falepuipui.—Roma 13:1-4.
Saolotoga Faale-Atua—Ma le Tali Fuaitau Atu
4, 5. O le ā le saolotoga ua olioli ai ē tapuai ia Ieova, ma mo le ā o le a latou tali fuaitau atu ai ia te ia?
4 I le uluai senituri, sa fetalai ai Iesu e uiga i le saolotoga. Na ia fetalai atu i tagata Iutaia e faapea: “Afai tou te tumau pea i laʻu mataupu, o oʻu soo moni outou. E iloa foi e outou le mea moni, e tuu saʻoloto foi outou e le upu moni.” (Ioane 8:31, 32) Sa leʻi fetalai atu o ia e uiga i le saolotoga e tautala ai po o le saolotoga mai lotu. E mautinoa foi sa ia leʻi fetalai atu e uiga i le saolotoga mai le nofo pologa ia Roma, lea sa moomoo i ai le toatele o tagata Iutaia. E leai, o se mea lenei e sili atu ona tautele, o se saolotoga e foaiina mai i le pule Silisiliese o le vateatea aoao, o Ieova, ae e lē mai i tulafono faaletagata po o se fuafuaga a se pule faaletagata. O se saolotoga lea mai uputuu, se saolotoga mai le pogisa o lotu, ma le tele anoanoai o isi mea. O le saolotoga ua foaiina mai e Ieova, o le saolotoga moni lava, ma o le a tumau pea e oo i le faavavau.
5 Na faapea mai le aposetolo o Paulo: “O [Ieova] foi o le Agaga ia; o le mea o i ai le Agaga o [Ieova], o i ai le saʻolotoga.” (2 Korinito 3:17) I le gasologa mai o senituri, sa feutagai ai pea Ieova ma le fanau a tagata, ina ia mafai ai ona olioli ē faamaoni i se taimi mulimuli, i le saolotoga faaletagata e sili atu ona lelei ma matuā telē, ‘le saolotoga mamalu lea o le fanau a le Atua.’ (Roma 8:21) Ae i le taimi nei, ua foaiina mai ai e Ieova sina saolotoga ia i tatou e ala i le upu moni o le Tusi Paia, ma tatou te tali fuaitau atu ia te ia pe afai tatou te melea lena saolotoga. Na tusia e le aposetolo o Paulo e faapea: “E le lilo foi se tasi mea na faia i ona luma, a ua taatia fua ma ua aliali mai o mea uma lava i lana silafaga, tatou te taʻu atu ia te ia a tatou amio.”—Eperu 4:13.
6-8. (a) O ā saolotoga sa olioli ai Atamu ma Eva, ma o le ā le tulaga sa ono mafai ai pea ona la maua na saolotoga? (e) O le ā na leiloa ia Atamu ma Eva mo i laʻua lava ma a la fanau?
6 Na faamatilatila mai le tali fuaitau atu ia Ieova, i le taimi na soifua ai o tatou uluai mātua, o Atamu ma Eva. Sa foafoaina i laʻua e Ieova faatasi ma le meaalofa tautele o le filifiliga saoloto. A talafeagai ona la faaaogāina lena filifiliga saoloto, ona mafai lea ona la olioli i isi faamanuiaga, e pei o le saolotoga mai le mataʻu, saolotoga mai faamaʻi, saolotoga mai le oti, ma le saolotoga e faalatalata atu ai i lo la Tamā faalelagi, i se loto fuatiaifo mamā. Peitai, sa suia na mea uma, ina ua la melea la la filifiliga saoloto.
7 Sa tuu e Ieova Atamu ma Eva i le faatoaga o Etena, ma mo lo la fiafiaga, na ia foaiina atu ai ia te i laʻua, fua o laau uma lava o le faatoaga—seʻi vaganā le laau e tasi. O lena laau e tasi, sa ia tausia lea mo ia lava; o “le laau e iloa ai le lelei ma le leaga.” (Kenese 2:16, 17) E ala i le taumamao mai le ʻaina o le fua o lena laau, o le a amanaia ai e Atamu ma Eva, e na o Ieova lava sa saoloto e faataatiaina le tapulaa o le mea e lelei ma le mea e leaga. Afai la te gaoioi ma le faamaoni ma taumamao mai le ʻaina o le fua o le laau faasāina, o le a faaauau pea ona faamautinoa e Ieova isi o la saolotoga.
8 Ae e faanoanoa, ona sa faalogo atu Eva i le fautuaga tau faaʻoleʻole a le Gata e faapea, e ao ona ia ‘iloaina le mea e lelei ma le mea e leaga’ mo ia lava. (Kenese 3:1-5) Sa ʻai muamua o ia i le fua o le laau faasāina, ona sosoo ai lea ma Atamu. O le iʻuga, ina ua fetalai atu Ieova le Atua ia te i laʻua i le faatoaga o Etena, sa lalafi i laʻua ona ua la mamā. (Kenese 3:8, 9) Na avea ai loa i laʻua ma ē agasala, o ē na leiloa lo la saolotoga e faalatalata atu ai i le Atua, e ala i se loto fuatiaifo mamā. Ona o lena mea, na leiloa ai foi lo la saolotoga mai faamaʻi ma le oti, e lē gata mo i laʻua lava ae o a la fanau. Ua faapea mai Paulo: “Faapei ona oo mai o le agasala i le lalolagi i le tagata e toatasi [o Atamu]; o le oti foi ona o le agasala, ona oo mai ai lea o le oti i tagata uma lava, auā ua agasala uma lava.”—Roma 5:12; Kenese 3:16, 19.
9. O ai o loo iai i tala faamaumau, sa latou faaaogā tatau sina saolotoga na latou olioli ai?
9 Ae e ui i lea, sa iai pea i le fanau a tagata le filifiliga saoloto, ma i le gasologa mai o taimi, sa avea lea o se auala maufaatuatuaina na faaaogā e nisi tagata lē lelei atoatoa, e auauna atu ai ia Ieova. Sa tausia mo i tatou igoa o nisi o i latou na, mai aso anamua. O tagata ia e pei o Apelu, Enoka, Noa, Aperaamo, Isaako, Iakopo (na taʻua foi o Isaraelu), o ni faaaʻoaʻoga o ē sa latou faaaogāina sina saolotoga na latou olioli ai, ina ia faia ai le finagalo o le Atua. Ma o le iʻuga, sa lelei mo i latou.—Eperu 11:4-21.
Le Saolotoga o le Nuu Filifilia o le Atua
10. O ā aiaiga o le feagaiga na osia e Ieova ma lona nuu faapitoa?
10 I ona po o Mose, sa faasaolotoina ai e Ieova le fanauga a Isaraelu—e faitau miliona lona aofaiga i lena taimi—mai le nofo pologa i Aikupito, ma osia ai se feagaiga ma i latou, lea na avea ai i latou ma ona nuu faapitoa. I lalo o lena feagaiga, sa iai i tagata Isaraelu se faiva faaositaulaga ma na osia ai taulaga i manu ina ia faamamāina ai a latou agasala i se auala faafaatusa. O lea la, sa iai lo latou saolotoga e faalatalata atu ai i le Atua i le tapuaiga. Sa ia i latou foi tulafono ma poloaiga e tuu saoloto ai i latou mai faiga faanuupō ma lotu sese. Mulimuli ane, o le a maua e i latou le Nuu Folafolaina e fai mo latou tofi, atoa ma le faamautinoaga o le fesoasoani mai le Atua, pe a tau ma o latou fili. O la latou vaega i le feagaiga, sa manaomia ai ona tausia e tagata Isaraelu le Tulafono a le Atua. Na talia ma le loto naunau e tagata Isaraelu lenei tulaga, e faapea: “Matou te faia lava mea uma ua fetalai mai ai Ieova.”—Esoto 19:3-8; Teuteronome 11:22-25.
11. O le ā na iʻu i ai ina ua lē taulau ona tausia e Isaraelu mea sa tatau ona latou faia i le feagaiga ma Ieova?
11 E sili atu i le 1,500 tausaga o iai tagata Isaraelu i lena faiā faapitoa ma Ieova. Peitai, mai lea taimi i lea taimi, sa lē taulau ona latou tausia le feagaiga. Sa lolo soo atu i latou i tapuaiga sese ma nofo pologa ai i le ifo i tupua ma faiga faanuupō, o lea na tuuina atu ai i latou e le Atua ina ia faapologaina faaletino e o latou fili. (Faamasino 2:11-19) Na i lo o le olioli i faamanuiaga saoloto na maua mai i le tausia o le feagaiga, sa faasalaina i latou ona o lo latou solia. (Teuteronome 28:1, 2, 15) Mulimuli ane i le 607 T.L.M., sa tuuina atu e Ieova lena nuu ina ia nofo pologa ia Papelonia.—2 Nofoaiga a Tupu 36:15-21.
12. O le ā sa aliali mulimuli mai e uiga i le feagaiga o le Tulafono faa-Mose?
12 Na avea lea o se lesona faigata. Sa ao ona aʻoaʻoina ai i latou i le tāua o le tausia o le Tulafono. Ae e ui i lea, ina ua mavae tausaga e 70, talu ona toe foi atu tagata Isaraelu i lo latou nuu moni, sa lē taulau pea ona latou tausia lelei le feagaiga o le Tulafono. Sa fetalai atu Ieova i faitaulaga o Isaraelu, ina ua toetoe lava atoa le selau tausaga talu ona latou toe foi atu: “A o outou, ua outou o ese i le ala, ma outou faatausuai i e toatele i le tulafono; ua leaga ia te outou le feagaiga a Levi.” (Malaki 2:8) O le mea moni, e oo lava i ē sa sili ona faamaoni i tagata Isaraelu, sa lē mafai ona latou tausisi i le Tulafono lelei atoatoa. Na i lo o le avea o se faamanuiaga, sa avea lea e pei o upu a le aposetolo o Paulo, o “le faafanoga.” (Kalatia 3:13) Ua manino mai ai, e iai se mea e sili atu na i lo o le feagaiga o le Tulafono faa-Mose, sa manaomia ina ia aumaia ai tagata faamaoni o ē e lē lelei atoatoa, i le saolotoga mamalu o le fanau a le Atua.
Le Uiga o le Saolotoga Faa-Kerisiano
13. O le ā le faavae e sili ona lelei mo le saolotoga sa saunia mulimuli ane?
13 O lena mea e sili atu, o le taulaga togiola lea a Iesu Keriso. E tusa o le tausaga e 50 T.A., na tusi atu ai Paulo i le faapotopotoga o Kerisiano faauuina i Kalatia. Sa ia faamatalaina atu le auala na faasaolotoina ai i latou e Ieova mai le nofo pologa i le feagaiga o le Tulafono, ona ia faapea atu lea: “O lenei, ia outou tumau i le saʻolotoga ua faasaʻoloto mai ai Keriso ia te i tatou; a e aua neʻi toe taofia outou i le amo o le pologa.” (Kalatia 5:1) O ā auala sa faasaolotoina ai tagata e Iesu?
14, 15. O ā auala ofoofogia na faasaolotoina ai e Iesu ē talitonu ma ē lē talitonu o Iutaia?
14 Ina ua mavae le maliu o Iesu, ona aumaia ai lea o tagata Iutaia o ē na taliaina o ia e fai ma Mesia ma avea ma ona soʻo, i se feagaiga fou, na suia ai le feagaiga tuai o le Tulafono. (Ieremia 31:31-34; Eperu 8:7-13) I lalo o lenei feagaiga fou, sa avea ai i latou—faatasi ma tagata talitonu e lē o ni Iutaia o ē na mulimuli ane auai atu ia i latou—ma vaega o se nuu fou faaleagaga, sa suia ai Isaraelu faaletino o se nuu faapitoa o le Atua. (Roma 9:25, 26; Kalatia 6:16) Ona o lena, sa latou olioli ai i le saolotoga na folafola atu e Iesu ina ua ia fetalai atu e faapea: “E tuu saʻoloto foi outou e le upu moni.” E ese ai i le tuu saolotoina o i latou mai le fanoga i le Tulafono faa-Mose, sa faasaolotoina foi Kerisiano Iutaia mai uputuu mamafa uma, na faaee atu e taʻitaʻi lotu i o latou luga. Ma sa tuusaunoa ai foi Kerisiano e lē o ni Iutaia mai le ifo i tupua ma faiga faanuupō a tapuaiga sa latou iai muamua. (Mataio 15:3, 6; 23:4; Galuega 14:11-13; 17:16) Ma e tele nisi mea na aofia ai.
15 Ina ua fetalai atu Iesu e uiga i le upu moni e faasaolotoina ai, na ia faapea atu: “E moni, ou te fai atu ia te outou, o sē faia le agasala, o le pologa lea o le agasala.” (Ioane 8:34) Talu mai le taimi na agasala ai Atamu ma Eva, ua avea ai tagata uma lava o ē ua fananau mai o ni ē agasala, ma ua fai ma pologa a le agasala. Na pau lava lē sa ese ai, o Iesu, ma e ala i le taulaga a Iesu, na tuusaunoaina ai ē talitonu mai lena nofo pologa. E moni, sa lē lelei atoatoa pea i latou ma iai i le tulaga agasala. Ae o lea ua mafai nei ona latou salamō i a latou agasala ma ole atu mo le faamagaloga e faavae i le taulaga a Iesu, i le mautinoa e faapea o le a faafofogaina a latou olega. (1 Ioane 2:1, 2) E faavae i le taulaga togiola a Iesu, ua taʻuamiotonuina ai i latou e le Atua, ma ua mafai ai ona latou faalatalata atu ia te ia i se loto fuatiaifo mamā. (Roma 8:33) E lē gata i lena, ona ua faaavanoaina mai e le togiola le faamoemoe mo se toetū i se olaga e lē gata mai, ua faasaolotoina ai foi i latou e le upu moni mai le mataʻu i le oti.—Mataio 10:28; Eperu 2:15.
16. Ua faapefea ona sili atu le telē o le saolotoga faa-Kerisiano na i lo o so o se saolotoga ua ofoina mai e le lalolagi?
16 I se auala ofoofogia, na faaavanoa mai ai le saolotoga faa-Kerisiano i tane ma fafine e tusa lava po o le ā lo latou tulaga faaletagata. E mafai ona saoloto ai tagata matitiva, o pagota, e oo foi i pologa. I le isi itu, o tagata maualuluga o nuu ese o ē na teena le feau e uiga i le Keriso, o loo nofo pologa pea i latou i faiga faanuupō, le agasala, atoa ma le mataʻu i le oti. E lē tatau lava ona uma lo tatou faafetai atu ia Ieova mo lenei saolotoga ua tatou olioli ai. E leai ma se mea e ofo mai e le lalolagi e tau soso atu i ai la te tutusa.
Saoloto ae Tali Fuaitau Atu
17. (a) Sa faapefea ona ō ese nisi o le uluai senituri mai le saolotoga faa-Kerisiano? (e) Aiseā e lē tatau ai ona faaseseina i tatou i le saolotoga o loo faafoliga mai i le lalolagi a Satani?
17 I le uluai senituri, e aliali mai o le toatele o Kerisiano faauuina, sa olioli i lo latou saolotoga, ma sa faatumauina lo latou faamaoni i lalo o so o se tulaga. E ui i lea, e faanoanoa ona sa tofo nisi i le saolotoga faa-Kerisiano ma ona faamanuiaga uma, ae mulimuli ane sa inoino i ai, ma toe foi atu ai e nofo pologa i le lalolagi. O le ā le pogai? E lē taumatea sa vaivai le faatuatua o le toatele, ma ua latou ‘tafetafea ese ai.’ (Eperu 2:1) O isi ua latou ‘lafoaiina le faatuatua ma le loto fuatiaifo lelei ma oo ai ina faavaatuʻia lo latou faatuatua.’ (1 Timoteo 1:19) Atonu ua latou pupū tele i mea faitino po o se auala lē mamā o le olaga. Maeu le tāua o lo tatou leoleoina ma ia atiina aʻe lo tatou faatuatua, i le toʻaga e faia suesuega totino, i mafutaga ma uso, i tatalo, ma galuega faa-Kerisiano! (2 Peteru 1:5-8) Talosia ia aua lava neʻi muta lo tatou talisapaia o le saolotoga faa-Kerisiano! E moni, atonu e tofotofoina nisi ona o le olaga tuufau ua latou vāai i ai i fafo atu o le faapotopotoga, i le manatu faapea e sili atu ona saoloto i latou o loo i le lalolagi na i lo o i tatou. E ui i lea, o le mea moni, o le mea o loo foliga mai o se saolotoga i le lalolagi, o le aloese lea mai avega tauave. Afai e lē o i tatou o ni auauna a le Atua, o i tatou la o ni pologa a le agasala, ma e matuiā le taui o lena nofo pologa.—Roma 6:23; Kalatia 6:7, 8.
18-20. (a) Na faapefea ona avea nisi ma “fili [o] le satauro o Keriso”? (e) Sa faapefea i nisi ona ‘avea lo latou saolotoga ma ufiufi o le amio leaga’?
18 E lē gata i lena, i lana tusi i tagata Filipi, na tusia ai e Paulo faapea: “E toatele, na ou fai atu soo ai ia te outou, ou te toe fai atu nei foi ma le tagi, ua latou fai mo latou fili le satauro o Keriso.” (Filipi 3:18) Ioe, sa iai se taimi na avea ai nisi o Kerisiano ma fili o le faatuatua, atonu i le avea ma aposetate. Maeu le tāua mo i tatou, ona aua lava neʻi mulimuli atu i lo latou ala! E faaopoopo atu i ai, na tusia e Peteru: Ia “pei o e saʻoloto, a e aua neʻi fai le saʻolotoga ma ufiufi o le [amio] leaga, a ia faapei o auauna a le Atua.” (1 Peteru 2:16) Atonu e mafai faapefea e se tagata ona fai lona saolotoga ma ufiufi o le amio leaga? E ala lea i le faia o agasala matuiā—atonu e faalilolilo—a o loo auaufaatasi pea ma le faapotopotoga.
19 Manatua foi Tioterifi. Na faapea mai Ioane e uiga ia te ia: “A o Tioterifi, o lē fia sili [i le faapotopotoga], e le talia i matou e ia . . . e le gata foi i ia mea, a e le talia lava e ia le au uso, e vavao atu foi i e loto i ai, na te faateaina foi i latou i le ekalesia.” (3 Ioane 9, 10) Sa faaaogā e Tioterifi lona saolotoga e fai ma ufiufi o lona lava tuʻinanauga manatu faapito.
20 Na tusia e le soʻo o Iuta e faapea: “Ua o ane faaleiloga o isi tagata, ua leva foi ona muai tusia o i latou ia oo i lenei lava faasala, e faalematau i latou, ua liua e i latou le alofa tunoa o lo tatou Atua i le faamatāitu, ma ua latou faafiti i le Alii tasi, o le Atua, ma lo tatou Alii o Iesu Keriso.” (Iuta 4) Sa avea na tagata o se taaʻiga leaga, a o auaufaatasi ma le faapotopotoga. (Iuta 8-10, 16) Ua tatou faitau i le Faaaliga e faapea, sa iai i faapotopotoga i Perekamo ma Tuatira, ē sa tautū pea i a latou mataupu, o le ifo i tupua, ma amioga lē mamā. (Faaaliga 2:14, 15, 20-23) Pagā se faaaogāseseina o le saolotoga faa-Kerisiano!
21. O le ā ua faatalitalia mo i latou o ē o loo melea lo latou saolotoga faa-Kerisiano?
21 O le ā la o loo faatalitalia mo i latou o ē o loo melea lo latou saolotoga faa-Kerisiano i lenei auala? Manatua le mea na tupu ia Isaraelu. Sa avea Isaraelu ma nuu filifilia o le Atua, ae mulimuli ane sa teena e Ieova. Aiseā? Auā na faaaogāina e tagata Isaraelu la latou faiā ma le Atua, e fai ma ufiufi o le amio leaga. Sa latou mitaʻi mai faapea o i latou o fanau a Aperaamo, ae teena Iesu, le Fanau a Aperaamo ma o le Mesia filifilia a Ieova. (Mataio 23:37-39; Ioane 8:39-47; Galuega 2:36; Kalatia 3:16) O le a lē faapena le lē faamaoni o le “Isaraelu [a] le Atua,” o se vaega atoa. (Kalatia 6:16) Peitai, o Kerisiano taitoatasi uma o ē faapogaia le faaleagaina i le itu faaleagaga po o amioga mamā, o le a mulimuli ane fesagaʻi ma se aʻoaʻiga, po o se faasalaga ogoogo. O i tatou uma lava tatou te tali fuaitau atu, ona o le auala o loo tatou faaaogāina ai lo tatou saolotoga faa-Kerisiano.
22. O le ā le olioli e maua e i latou o ē faaaogāina lo latou saolotoga faa-Kerisiano e auauna ai mo le Atua?
22 Maeu la le sili atu ona lelei o le auauna i le Atua ma ia saoloto moni ai. Na o Ieova lava e maua mai ai le saolotoga e aogā moni. Ua faapea mai le Faataoto: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” (Faataoto 27:11) O lea, seʻi o tatou faaaogā ai lo tatou saolotoga faa-Kerisiano mo le faasilisilia o Ieova. Afai tatou te faia faapea, o le a uigā ai la o tatou olaga, o le a tatou faafiafiaina ai lo tatou Tamā faalelagi, ma mulimuli ane ai, o le a tatou auaufaatasi ma i latou o ē o loo olioli i le saolotoga mamalu o le fanau a le Atua.
Pe Mafai ona E Faamatalaina?
◻ E na o ai lava o loo saoloto moni?
◻ O ā saolotoga na olioli ai Atamu ma Eva, ma aiseā na leiloa ai ia i laʻua?
◻ O ā saolotoga na olioli ai tagata Isaraelu ina ua latou tausia la latou feagaiga ma Ieova?
◻ O ā saolotoga na maua e i latou o ē na talia Iesu?
◻ Sa faapefea ona leiloa pe melea e nisi o le uluai senituri lo latou saolotoga faa-Kerisiano?
[Ata i le itulau 13]
Sa sili ona lelei le saolotoga na foai mai e Iesu na i lo so o se saolotoga e mafai ona aumai e tagata