Faaalia le Faatuatua e Faavae i le Upu Moni

“A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.”—EPERU 11:6.

1, 2. Sa tofotofoina faapefea le faatuatua o Atamu, faatasi ma ā iʻuga?

E SILI atu mea e manaomia i le faatuatua na i lo le talitonu faapea o loo soifua le Atua. Sa leai se masalosalo o le uluai tagata, o Atamu e uiga i le iai o Ieova le Atua. E foliga mai na fesootai le Atua ma Atamu, e ala i Lona Alo, le Lokou. (Ioane 1:1-3; Kolose 1:15-17) E ui i lea, na misia e Atamu le faamoemoe o le ola e faavavau ona sa lē taulau ona ia usiusitai ia Ieova ma faaalia le faatuatua ia te ia.

² E aliali mai sa lamatia le fiafiaga i le lumanai o Atamu ina ua lē usiusitai lana avā o Eva, ia Ieova. Ioe, o le manatu tele ina neʻi ona lē toe mauaina lana avā na tuua ai le faatuatua o le uluai tagata i le tofotofoga! Pe sa ono mafai ea e le Atua ona foia lenei faafitauli i se auala e faamautinoa ai le faaauau pea ona maua e Atamu o le fiafiaga ma le sologa lelei? E ala i le auai atu ia Eva i le faia o le agasala, na faaalia ai e Atamu e peiseaī sa ia lē manatu faapena i ai. Sa ia taumafai e foia le faafitauli i lana auala, na i lo le saili ma le naunautai mo le taʻitaʻiga tauatua. O le lē taulau ona faaalia o le faatuatua ia Ieova, na aumaia ai e Atamu le oti ia te ia lava atoa ma ana fanau uma.—Roma 5:12.

O le ā le Faatuatua?

3. Ua faapefea ona ese le faauigaina e le Tusi Paia o le faatuatua mai le uiga o loo aumaia i se tasi o lomifefiloi?

³ Ua faauigaina e se tasi lomifefiloi le faatuatua o se “talitonuga mausalī i se mea e lē o iai se faamaoniga.” Peitai, e aunoa ma le lagolagoina o lena manatu, ua faamatalaina e le Tusi Paia lona matuā tuufaafeagai. O le faatuatua e faavae i mea moni, i upu moni. Ua faapea mai le Tusi Paia: “O le faatuatua, o le [faatalitali ma le mautinoa] lea i mea ua faamoemoe i ai, o le [faamaoniga faaalia] lea o mea e le o vaaia.” (Eperu 11:1) O se tagata e iai le faatuatua, ua iai se faamaoniga faapea e lelei mea uma ua folafolaina e le Atua e pei lava ua faataunuuina. O le malosi nauā o faamaoniga e faatalitonu ai i mea moni e lē o vaaia, ua mafua ai ona faapea o le faatuatua e tutusa pau ma lena faamaoniga.

4. Ua lagolagoina faapefea e se tasi o faamaumauga le faauigaina e le Tusi Paia o le faatuatua?

⁴ I le New World Translation, ua faaliliuina le itu tau afuafua o le veape Eperu ʻa·manʹ i nisi taimi o le “faaalia le faatuatua.” E tusa ai ma le Theological Wordbook of the Old Testament, “o le uiga autū o le upu o loo iai le manatu o le mautinoa . . . i le eseesega ma manatu faaonaponei faapea o le faatuatua o se mea e mafaia, ua faamoemoe e moni, ae lē mautinoa.” Ua faapea mai foi lea lava faamaumauga: “O le upu ʼāmēn po o le ‘moni aʻiaʻi’ o loo faaauau pea i le Feagaiga Fou i le upu amēn lea ua faa-Peretania i [le] upu ‘amen.’ Sa faaaogā soo e Iesu lena upu (Mata 5:18, 26, ma isi) e faamamafa ai le mautinoa aʻiaʻi o se mataupu.” O le upu ua faaliliuina i le “faatuatua” i Tusitusiga Kerisiano Eleni ua faauigaina foi o se talitonuga i se mea ua faavae mausalī i mea moni po o upu moni.

5. Sa faapefea ona faaaogā le upu Eleni ua faaliliuina o le “faatalitali ma le mautinoa” i le Eperu 11:1 i pepa faapisinisi anamua, ma o le ā lona uiga mo Kerisiano?

⁵ O le upu Eleni (hy·poʹsta·sis) lea ua faaliliuina o le “faatalitali ma le mautinoa” i le Eperu 11:1 sa masani ona faaaogā i pepa faapisinisi na gaosia i paʻu o laau anamua, e faailoa atu ai le manatu o se mea e fai ma faamaoniga o mea totino i le lumanai. Ua fautuaina e tagata sikolasipi o Moulton ma Milligan le faaliliuga: “O le faatuatua o se faiga e faamaonia ai mea ua faamoemoe i ai.” (Vocabulary of the Greek Testament) Ua manino mai la, afai e maua e se tagata se faiga e faamaonia ai se mea totino, e mafai ona ia “faatalitali ma le mautinoa” faapea i se aso o le a iloatino ai lona faamoemoe ia maua lea mea.

6. O le ā le uiga o le upu Eleni ua faaliliuina o le “faamaoniga faaalia” i le Eperu 11:1?

⁶ I le Eperu 11:1, o le upu Eleni ua faaliliuina o le “faamaoniga faaalia” (eʹleg·khos) ua faailoa mai ai le manatu o le tauaaoina o faamaoniga e faaalia ai se mea, ae maise lava o se mea e feteenai ma le mea e aliali mai o le tulaga moni. O faamaoniga e mautinoa pe maumaututū ua faamanino ai se mea na solofua muamua e aunoa ma le iloaina, ma taʻuseseina ai le mea sa foliga mai o le tulaga moni. O lea, i Tusitusiga faa-Eperu ma le faa-Eleni, e mautinoa o le faatuatua sa lē o se “talitonuga mausalī i se mea e lē o iai se faamaoniga.” Ae i le tuufaafeagai, o le faatuatua e faavae i upu moni.

Faavae i Upu Moni Faigofie

7. Ua faamatalaina faapefea e Paulo ma Tavita i latou e faafitia le iai o le Atua?

⁷ Na taʻua e le aposetolo o Paulo se upu moni faigofie ina ua ia tusia faapea o Lē na Foafoaina Mea “o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana lava lea e faavavau ma lona Atua; o lea foi ua le mautali ai i latou [o ē tetee i le upu moni].” (Roma 1:20) Ioe, “ua tala mai e le lagi le mamalu o le Atua,” ma “ua tumu le lalolagi i [ana] oloa.” (Salamo 19:1; 104:24) Ae faapefea pe afai e lē manao se tagata e iloiloina faamaoniga? Na faapea mai le faisalamo o Tavita: “O le faasiasia o mata o le ua amio leaga [“lona lava faamaualuga,” The New English Bible] e le saili ai o ia; o ona mafaufau uma, E leai se Atua.” (Salamo 10:4; 14:1) I se isi itu, o le faatuatua, e faavae i le upu moni faigofie e faapea o loo soifua le Atua.

8. O le ā le faamautinoaga ma le iloa ua maua e i latou e faaalia le faatuatua?

⁸ Ua lē tau ina soifua o Ieova; e maufaatuatuaina foi o ia, ma e mafai ona tatou faalagolago i ana folafolaga. Ua ia fetalai mai: “E moni, e pei ona ou manatu e faapea lava ona taunuu, e pei ona aʻu pule e faapea lava ona [faataunuuina].” (Isaia 14:24; 46:9, 10) Ua lē o ni upu gaogao na upu. O loo iai faamaoniga manino o le faitau selau o valoaga ua faamauina i le Afioga a le Atua ua faataunuuina. Ona o lenei faamalamalamaga, ua mafai ai foi e i latou o loo faaalia le faatuatua ona iloa le faataunuuga faasolosolo o le tele o isi valoaga a le Tusi Paia. (Efeso 1:18) Mo se faaaʻoaʻoga, ua latou vaaia le faataunuuga o “le faailoga” o le faatasi mai o Iesu, e aofia ai le talaʻiga saosaoa o le Malo ua faavaeina, atoa ma le faatelega o le tapuaiga moni sa valoia. (Mataio 24:3-14; Isaia 2:2-4; 60:8, 22) Ua latou iloa e lē o toe mamao ona alaga mai lea o atunuu ua ‘Filemu ma saogalemu!’ ma toeitiiti mulimuli ane ai aumaia e le Atua le ‘faafanoina ia i latou o loo fano ai le lalolagi.’ (1 Tesalonia 5:3; Faaaliga 11:18) Maeu se faamanuiaga o le iai o se faatuatua e faavae i upu moni faavaloaga!

O se Fua o le Agaga Paia

9. O le ā le faiā a le faatuatua ma le agaga paia?

⁹ O le upu moni lea ua faavae ai le faatuatua o loo maua i le Tusi Paia, o se fua o le agaga paia o le Atua. (2 Samuelu 23:2; Sakaria 7:12; Mareko 12:36) O le mea moni lava la, e lē mafai ona iai o le faatuatua e aunoa ma le faatonutonuga a le agaga paia. O le pogai lena ua mafai ai ona tusi mai Paulo: “O le fua o le agaga [e aofia ai] . . . le faatuatua.” (Kalatia 5:22, NW) Ae toatele ua teena upu moni tauatua, faaleagaina o latou olaga i faanaunauga o le tino atoa ma manatu e faatigā ai i le agaga o le Atua. O lea, ‘o le faatuatua e lē o se mea totino a tagata uma,’ auā e leai sa latou faavae e atiina aʻe ai.—2 Tesalonia 3:2; Kalatia 5:16-21; Efeso 4:30.

10. Sa folasia faapefea e nisi o uluai auauna a Ieova faapea na latou faaalia le faatuatua?

¹⁰ Peitai, ua faaalia e nisi tagata o ē tupuga mai ia Atamu, le faatuatua. Ua taʻua i le Eperu mataupu e 11 Apelu, Enoka, Noa, Aperaamo, Sara, Isaako, Iakopo, Iosefa, Mose, Raava, Kitiona, Parako, Samasoni, Iefata, Tavita, ma Samuelu, faatasi ma le toatele o isi auauna a Ieova ua lē o taʻu maia, o ē “na taʻuleleia ona o le faatuatua.” Seʻi matau le mea na faia e “le faatuatua.” E ala i le faatuatua na “avatu ai e Apelu i le Atua le taulaga” ma na “fausia ai e Noa le vaa.” O le faatuatua na “anaana ai Aperaamo . . . e alu i le mea o le a maua e fai mona fanua.” Ma o le faatuatua, na ‘tuua ai e Mose Aikupito.’—Eperu 11:4, 7, 8, 27, 29, 39.

11. O le ā ua faaalia mai e le Galuega 5:32 e faatatau i tagata e usiusitai i le Atua?

¹¹ Ua manino mai, sa faia e na auauna uma lava a Ieova ni mea e sili atu na i lo le na ona talitonu o loo soifua le Atua. I le faaalia o le faatuatua, sa latou faalagolago ai ia te ia o Lē na te “tauia mai o e matuā saili ia te ia.” (Eperu 11:6) Na latou faia le mea na faatonuina ai i latou e le agaga o le Atua e fai, e ala i le gaoioi i le poto saʻo o le upu moni sa maua i lena taimi, e ui ina itiiti. Maeu se eseesega ma Atamu. Sa lē gaoioi o ia e tusa ma le faatuatua ua faavae i upu moni pe i le ōgatasi ma le taʻitaʻiga a le agaga paia. Na o i latou lava e usiusitai ia te ia e foaiina atu i ai e le Atua lona agaga.—Galuega 5:32.

12. (a) O le ā sa faatuatua i ai Apelu, ma sa faapefea ona ia faaalia lena? (e) E ui lava i lo latou faatuatua, o le ā sa lē maua e molimau a Ieova i tua atu o Kerisiano?

¹² I le ese ai mai lona tamā, o Atamu, sa iai le faatuatua o Apelu o lē mataʻu i le Atua. E foliga mai e ala i ona mātua, na ia aʻoaʻoina ai le uluai valoaga sa faapea ona fofogaina atu: “Ou te [Ieova le Atua] faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:15) Na faapea ona folafola ai e le Atua e faaumatia le amioleaga ae toe faafoisia mai le amiotonu. Sa leʻi iloa e Apelu, pe o le a faapefea ona faataunuu lenei folafolaga. Ae o lona faatuatua faapea o le Atua o Lē tauia mai i latou e saili ma le naunautai ia te Ia, sa lava ma totoe le malosi e uunaia ai o ia e ofo atu se taulaga. E foliga mai sa matuā manatunatu o ia i lenei valoaga ma talitonu ai faapea o le a manaomia le faamasaaina o le toto ina ia faataunuu ai le folafolaga ma siitia ai le fanau a tagata i le lelei atoatoa. O lea, sa talafeagai ai le taulaga a Apelu na osia i manu. Peitai, e ui i lo latou faatuatua, “na le maua e [Apelu ma isi molimau a Ieova i tua atu o Kerisiano] le mea na folafolaina.”—Eperu 11:39.

Faaatoatoaina le Faatuatua

13. (a) O le ā sa aʻoaʻoina e Aperaamo ma Tavita e uiga i le faataunuuga o le valoaga? (e) Aiseā e mafai ai ona faapea atu “na oo mai le upu moni e ala ia Iesu Keriso”?

¹³ I lea vaitaimi ma lea vaitaimi o le gasologa mai o senituri, sa faailoa mai ai e le Atua upu moni faaopoopo e uiga i le auala o le a faataunuuina ai le folafolaga e faatatau i ‘le fanau a le fafine.’ Na taʻu atu ia Aperaamo e faapea: “O lau fanau foi e manuia ai atu nuu uma lava o le lalolagi.” (Kenese 22:18) Mulimuli ane, sa taʻu atu i le Tupu o Tavita faapea o le a ala mai le Fanau folafolaina i lona gafa tautupu. I le 29 T.A., na iloatino ai lena Fanau i le tagata o Iesu Keriso. (Salamo 89:3, 4; Mataio 1:1; 3:16, 17) I le eseesega ma Atamu lē faatuatua, sa avea “le Atamu mulimuli,” o Iesu Keriso, o se faaaʻoaʻoga lelei i le faaalia o le faatuatua. (1 Korinito 15:45) Na ola o ia i se olaga o le auaunaga tuutoina atu ia Ieova ma faataunuuina le tele o folafolaga na muai valoia ai le Mesia. Sa faapea ona matuā faamanino mai ai e Iesu le upu moni e uiga i le Fanau folafolaina ma faatulagaina ai mea sa faaataina mai e le Tulafono faa-Mose i le tulaga o mea moni. (Kolose 2:16, 17) O le mea lea e mafai ai ona faapea atu “na oo mai le upu moni e ala ia Iesu Keriso.”—Ioane 1:17, NW.

14. Sa faapefea ona faaalia e Paulo i tagata Kalatia faapea ua faatinoina e le faatuatua ni fuafuaga fou?

¹⁴ Nei la ona ua oo mai le upu moni e ala ia Iesu Keriso, sa iai se faavae telē e fausia aʻe ai le faatuatua i “le folafolaga.” Sa faamausalīina ai le faatuatua, na faatinoina ai ni fuafuaga fou. Na taʻu atu e Paulo i ona uso Kerisiano faauuina e uiga i lenei itu: “Ua punitia e le Tusi [Paia mea] uma lava i le agasala, ina ia foaiina mai i e faatuatua le mea na folafolaina e maua i le faatuatua ia Iesu Keriso. A o lei oo mai le faatuatua, na taofia i tatou i le pule a le tulafono, sa punitia ina seia faaalia le faatuatua a oo mai. O lenei, ua fai mo tatou taʻitaʻitama le tulafono, na te taʻitaʻiina i tatou ia Keriso, ina ia taʻuamiotonuina i tatou i le faatuatua. A ua oo mai le faatuatua, o lenei ua le toe pule ia te i tatou le taʻitaʻitama; auā o atalii o le Atua outou uma lava i le faatuatua ia Keriso Iesu.”—Kalatia 3:22-26.

15. E na o le ā le auala e mafai ai ona faaatoatoaina le faatuatua?

¹⁵ Sa faaalia e tagata Isaraelu le faatuatua i feutagaʻiga a le Atua ma i latou e ala i le feagaiga o le Tulafono. Ae ua manaomia nei ona faateleina lenei faatuatua. E faapefea? I le faaalia lea o le faatuatua ia Iesu ua faauuina i le agaga o lē na fuafuaina le Tulafono e taʻitaʻi i ai i latou. Na pau lea o le auala e mafai ai ona faaatoatoaina le faatuatua o ē na ola i tua atu o Kerisiano. Maeu le matuā manaomia e na uluai Kerisiano ona ‘tagai totoʻa atu ia Iesu, le Sui Sili ma o Lē na te Faaatoatoaina lo latou faatuatua’! (Eperu 12:2) O le mea moni, o Kerisiano uma lava e manaomia ona faia faapea.

16. Sa faapefea ona oo mai le agaga paia i se auala e sili ona malosi, ma aiseā?

¹⁶ I le manatu atu i le poto ua faateleina o upu moni tauatua ma le faaatoatoaina o le faatuatua, pe sa tatau ai foi la ona oo mai le agaga paia i se auala e sili ona malosi? Ioe. I le Penetekoso 33 T.A., sa liligi ifo ai le agaga o le Atua, le fesoasoani folafolaina lea sa fetalai i ai Iesu, i luga o ona soʻo. (Ioane 14:26; Galuega 2:1-4) O i inā sa faagaoioia ai loa le agaga paia i o latou luga i se auala fou atoatoa o ni uso faauuina o Keriso. Sa faamalosia ai lo latou faatuatua, o se fua o le agaga paia. O lenei mea na faaauupegaina ai i latou mo le galuega tele o le faia o soʻo ua taatia mai i luma.—Mataio 28:19, 20.

17. (a) Ua faapefea ona oo mai le upu moni ma ua faaatoatoaina faapefea le faatuatua talu mai le 1914? (e) O ā faamaoniga ua ia i tatou o le gaoioiga a le agaga paia talu mai le 1919?

¹⁷ Na oo mai le faatuatua ina ua aaoina atu e Iesu ia lava o le Tupu Tofia i le silia ma le 1,900 tausaga ua mavae. Ae ona ua pule nei o ia o se Tupu faalelagi, ua uigaese ai le tuputupu aʻe—o lo tatou faavae mo le faatuatua—o upu moni faaalia, ua faapea ona faaatoatoa ai lo tatou faatuatua. Ua faapea foi, ona sili atu ai le malosi o le faagaoioiga o le agaga paia. Sa iai se faamaoniga manino o lenei tulaga i le 1919, ina ua toe faaolaina mai e le agaga paia auauna tuuina atu a le Atua mai se tulaga o le toetoe lava a lē gaoioi. (Esekielu 37:1-14; Faaaliga 11:7-12) Na faataatia ai i inā le faavae mo se parataiso faaleagaga, lea ua atili faamaninoina ma atili faamamaluina i lea tausaga ma lea tausaga mo le faitau sefulu o tausaga. Pe o iai ea nisi faamaoniga e sili atu o le faagaoioiga o le agaga paia o le Atua?

Aiseā e Auiliili ai lo Tatou Faatuatua?

18. Sa faapefea ona eseese le faatuatua o sipai Isaraelu mai le tasi i le isi?

¹⁸ E leʻi leva lava ona mavae le faasaoina mai o tagata Isaraelu nai le nofopologa i Aikupito, ae aauina atu loa ni tagata e 12 e sipai i le laueleele o Kanana. Peitai, sa lē faatuatua le toasefulu o i latou, ma masalosalo i le malosi o Ieova e faataunuuina ai lana folafolaga e foaiina atu le laueleele ia Isaraelu. Sa faagaeetia i latou i mea na latou vaaia, i mea faitino. Mai lena 12, na o Iosua lava ma Kalepo na faaalia sa la savavali i le faatuatua, ae lē o le tino mai o mea. (Faatusatusa 2 Korinito 5:7.) Ona o le faaalia o le faatuatua, sa na o i laua ai na faasaoina mai na tagata ina ia ulu atu i le Nuu Folafolaina.—Numera 13:1-33; 14:35-38.

19. Ua sili atu faapefea le loloto o le faavae o loo atiina aʻe ai le faatuatua i aso nei na i lo muamua, ma o le ā e ao ona tatou faia?

¹⁹ I aso nei, o loo tatou tutū i tuaoi o le lalolagi fou amiotonu a le Atua. Afai tatou te fia ulu atu i ai, e matuā manaomia la le faatuatua. Ae faafetai, ona o le faavae o upu moni o loo fausia aʻe ai lena faatuatua ua matuā loloto lava na i lo muamua. Ua ia i tatou le Afioga atoa a le Atua, le faaaʻoaʻoga a Iesu Keriso ma ona soʻo faauuina, le lagolagosua a le faitau miliona o uso ma tuafāfine faaleagaga, atoa ma le fesoasoani a le agaga paia o le Atua i se fua e lē mafaatusalia. E ui i lea, e lelei tele ona tatou auiliiliina lo tatou faatuatua ma ia uia ni laasaga e faamalosia ai a o tatou mafaia.

20. O ā fesili e talafeagai ona fesiligia ai i tatou lava?

²⁰ Atonu e te faapea mai, ‘Oi, ou te talitonu o le upu moni lenei.’ Ae o faapeī le malosi o lou faatuatua? Fesili ane ia te oe lava: ‘Pe o moni ea ia te aʻu le Malo faalelagi o Ieova e pei o se pulega faaletagata? O oʻu amanaia ea ma lagolagoina atoatoa le faalapotopotoga vaaia a Ieova ma lona Vaega Pule? I mata o le faatuatua, pe o mafai ea ona ou vaaia faapea ua taʻitaʻia atu nei atunuu i se tulaga faaiʻu mo Amaketo? Pe o tutusa lelei ea loʻu faatuatua ma le faatuatua o ‘molimau e toatele’ ua taʻua i le Eperu mataupu e 11?’—Eperu 12:1; Faaaliga 16:14-16.

21. Ua uunaia faapefea e le faatuatua i latou e mauaina, ma ua faapefea ona faamanuiaina i latou? (Faaaofia ai faamatalaga mai le pusa i le itulau 13.)

²¹ O i latou ua mauaina le faatuatua e faavae i upu moni ua uunaia ina ia gaoioi. E pei o le taulaga talileleia sa ofoina atu e Apelu, ua faapea foi ona fiafia le Atua i a latou taulaga o viiga. (Eperu 13:15, 16) E pei o Noa, lē talaʻi le amiotonu o lē sa usiusitai i le Atua, ua latou tausisia ai foi se ala amiotonu o ni tagata talaʻi o le Malo. (Eperu 11:7; 2 Peteru 2:5) E pei o Aperaamo, ua usiusitai foi ia Ieova i latou ua iai le faatuatua e faavae i upu moni, e ui i ni faigata ma e oo lava foi i tulaga e sili ona tofotofoina ai. (Eperu 11:17-19) E pei o auauna faamaoni a Ieova i aso anamua, o i latou e faatuatua i aso nei ua matuā faamanuiaina lava ma tausia e lo latou Tamā alofa faalelagi.—Mataio 6:25-34; 1 Timoteo 6:6-10.

22. E mafai faapefea ona faamalosia le faatuatua?

²² Afai o oe o se auauna a Ieova ae ua e iloa o loo vaivai lou faatuatua i nisi auala, o le ā e mafai ona e faia? Ia faamalosia lou faatuatua e ala i le suesueina ma le tinoū o le Afioga a le Atua ma ia faatagaina lou fofoga e faaleoina atu vai o le upu moni o loo tumu ai lou loto. (Faataoto 18:4) Afai e lē o faifai pea ona faamalosia lou faatuatua, atonu o le a oo ina vaivai, lē toe gaoioi, e oo lava ina mate. (1 Timoteo 1:19; Iakopo 2:20, 26) Ia maumauai faapea o le a lē taitai ona tupu lenei mea i lou faatuatua. Ole atu mo le fesoasoani a Ieova, i le tatalo: “Ia fesoasoani mai ia te aʻu i le mea ou te manaomia ai le faatuatua!”—Mareko 9:24, NW.

O ā Au Tali?

◻ O le ā le faatuatua?

◻ Aiseā e lē mafai ai ona maua le faatuatua e aunoa ma le upu moni ma le agaga paia?

◻ Sa faapefea ona avea Iesu o Lē na te Faaatoatoaina lo tatou faatuatua?

◻ Aiseā e ao ai ona tatou auiliilia pe faapeī le malosi o lo tatou faatuatua?

[Pusa i le itulau 13]

O I LATOU E MAUAINA LE FAATUATUA. . .

◻ E tautatala e uiga ia Ieova.—2 Korinito 4:13.

◻ E faia galuega e pei o galuega a Iesu.—Ioane 14:12.

◻ O ni puna o faalaeiauga mo isi.—Roma 1:8, 11, 12.

◻ E manumalo i le lalolagi.—1 Ioane 5:5.

◻ E leai se mafuaaga e matataʻu ai.—Isaia 28:16.

◻ Ua nofo sauni mo le ola e faavavau.—Ioane 3:16.