Fesoasoani mai ia te Aʻu i le Mea Ou te Manaomia ai le Faatuatua!”
“Ona faapea mai lea o le tamā o le tamaitiiti: ‘Ua ou faatuatua! Fesoasoani mai ia te aʻu i le mea ou te manaomia ai le faatuatua!’”—MAREKO 9:24, NW.
1. O le ā na faapogaia se tasi tamā e aioi atu, “Fesoasoani mai ia te aʻu i le mea ou te manaomia ai le faatuatua”?
NA OO atu i luma o Iesu Keriso le tamā o se tamaitiiti sa ulufia e le temoni. Pagā le umi ona talotalo lena tamaloa ina ia faamalōlōina lona atalii itiiti! Sa lē lava le faatuatua o soʻo o Iesu e tuliesea ai le temoni, ae na aioi atu le tamā: “Ua ou faatuatua! Fesoasoani mai ia te aʻu i le mea ou te manaomia ai le faatuatua!” E ala i le mana mai le Atua, na tuliesea ai loa e Iesu le temoni, ma e lē masalomia na faamalosia ai le faatuatua o le tamā o le tamaitiiti.—Mareko 9:14-29, NW.
2. E uiga i le faatuatua, o ā auala e lua ua lē maasiasi ai Kerisiano?
2 E pei o le tamā faatuatua o lena tamaitiiti, ua lē masiasi ai se auauna faamaoni a Ieova e faapea atu: “Ua ou faatuatua!” Atonu e faafitia e tagata faatauemu le mana o le Atua, le moni aʻiaʻi o lana Afioga, ma e oo lava foi i lona soifua mai. Ae ua nofo sauni Kerisiano moni e taʻutino atu faapea, latou te faatuatua ia Ieova le Atua. E ui i lea, a talanoa na o i latou i lo latou Tamā faalelagi e ala i le tatalo, e mafai ona talosaga atu ia lava tagata taitoatasi e faapea: “Ia fesoasoani mai ia te aʻu i le mea ou te manaomia ai le faatuatua!” Ua latou faia foi lenei mea e aunoa ma le masiasi, i le iloaina, e oo foi i aposetolo o Iesu Keriso sa ole atu: “Ia e faatuputeleina lo matou faatuatua.”—Luka 17:5.
3. O le ā ua mataulia e uiga i le auala na faaaogā ai e Ioane le upu “faatuatua” i lana Evagelia, ma aiseā na talafeagai ai lenei?
3 E faapitoa lava ona tele mea ua fai mai ai Tusitusiga Kerisiano Eleni e uiga i le faatuatua. O le mea moni, e silia i le 40 pasene ua faaaogā soo ai e le Evagelia a Ioane upu Eleni eseese e fesootai ma le “faatuatua” na i lo isi Evagelia e tolu pe a tuu faatasi. Sa faamamafa e Ioane faapea e lē lava le iai o le faatuatua; ae e matuā tāua lona faaalia. I ana tusitusiga pe tusa o le 98 T.A., na ia matauina ai faiga ogoogo a le faaaposetasi sa taumafai e maileia Kerisiano o ē vaivai i le faatuatua. (Galuega 20:28-30; 2 Peteru 2:1-3; 1 Ioane 2:18, 19) O lea, na matuā tāua ai le faaalia o le faatuatua, ia faamaonia atu e ala i galuega o le tuutoina faaleatua. O loo fotuai mai taimi faigata.
4. Aiseā e leai ai se mea e lē mafaia e i latou e faatuatua?
4 O le faatuatua ua mafai ai e Kerisiano ona lavatia so o se faigata. Na fetalai Iesu i ona soʻo faapea afai e tusa lo latou “faatuatua ma le fua o le sinapi,” o le a leai la se mea e faigata ia i latou. (Mataio 17:20) I lena auala, na ia faamatala atili ai le malosi o le faatuatua, o se fua o le agaga paia. Sa faapea ona faamamafa ai e Iesu, le mea e mafai ona faia e le agaga, po o le malosi galue o le Atua, ae lē o tagata. O i latou e taʻitaʻia e le agaga latou te lē faapogaia ni nai masei ma faafitauli e pei ni mapuʻepuʻe laiti e avea ma mauga. O le faatatauina o le atamai ua aumaia e le agaga o le Atua, ua fesoasoani lea ia i latou e faatulaga ai mea i o latou tulaga tatau. E oo lava i faafitauli matuiā o le a faaitiitia foi pe a gauai atu i le malosi e faatumauina ai o le faatuatua.—Mataio 21:21, 22; Mareko 11:22-24; Luka 17:5, 6.
Tatalo mo le Faatuatua ia Aua neʻi Faavaivai
5-7. (a) O ā upu lapatai e uiga i le faatuatua na taʻua e Iesu ina ua ia faavaeina le Faamanatuga? (e) Sa mafai faapefea i le faatuatua o Peteru ona faamalosia ai ona uso?
5 I le 33 T.A., na faamanatuina ai e Iesu ma ona soʻo le Paseka mo le taimi mulimuli. Ma, ina ua mavae ona faatulaʻiese o Iuta le Sekara, sa ia faavaeina loa le faamanatuina o le Faamanatuga, e faapea: “Ou te osia se feagaiga ma outou [tane], e faapei ona osia e loʻu Tamā o se feagaiga ma aʻu, mo se malo . . . Simona e, Simona e, faauta! Ua manao tele Satani ia te outou e lūlū ia te outou e pei o le saito. A ua ou faatoga atu mo oe ina neʻi mavae lou faatuatua; a o oe, pe a e toe foi mai, ia faamalosi i ou uso.”—Luka 22:28-32, NW.
6 Sa tatalo Iesu ina ia aua neʻi mavae le faatuatua o Simona Peteru. E ui ina sa soona mautinoa Peteru ma faapea atu e lē taitai ona ia faafitia Iesu, ae e leʻi mamao mulimuli ane ai na ia faafitia faatolu o ia. (Luka 22:33, 34, 54-62) O le mea moni, i le taiaina i lalo o le Leoleo Mamoe i le oti e pei ona valoia, na faataapeapeina ai mamoe. (Sakaria 13:7; Mareko 14:27) Peitai, ina ua toe malosi mai Peteru nai lona paʻū atu i le mailei o le mataʻu, sa ia faamalosia loa ona uso faaleagaga. Na ia lagā le mataupu e uiga i se tasi e suitulaga ia Iuta le Sekara lē faamaoni. I le galue o se fofoga fetalai a aposetolo i le Penetekoso 33 T.A., na faaaogā ai e Peteru le uluai o “ki” sa tuuina atu e Iesu ia te ia, e tatala ai le ala mo tagata Iutaia ina ia avea ma sui o le Malo. (Mataio 16:19; Galuega 1:15–2:41) Na manao tele Satani i le au aposetolo e lūlūina i latou e pei o le saito, peitai sa faamautinoa e le Atua ua lē o vaivai lo latou faatuatua.
7 Seʻi vaai faalemafaufau i le lagona o Peteru ina ua ia faalogo atu o fetalai mai Iesu: “Ua ou faatoga atu mo oe ina neʻi mavae lou faatuatua.” Tau ina mafaufau! Sa tatalo lona Alii ma lona Matai ina ia aua neʻi faavaivai le faatuatua o Peteru. Ma sa lē faavaivai, pe mavae lona faatuatua. O le mea moni, i le aso o le Penetekoso, na avea ai Peteru ma isi o ni tagata muamua sa faauuina i le agaga paia e fai ma fanau faaleagaga a le Atua, o ni suli faamoemoeina faatasi ma Keriso i le mamalu faalelagi. Ona o le gaoioiga a le agaga paia ia i latou i inā, i se fua e leʻi muai iloa, na mafai ai ona latou faaalia ona fua, e aofia ai le faatuatua, i se tulaga e leʻi faapea ona iai muamua. Maeu se tali ofoofogia i la latou olega: “Ia e faatuputeleina lo matou faatuatua”!—Luka 17:5; Kalatia 3:2, 22-26; 5:22, 23.
Fesagaʻi ma Tofotofoga o i Luma e Ala i le Faatuatua
8. O le ā le lapataiga e fetaui ma le taimi ua aumaia ia i tatou e le faalapotopotoga e uiga i le faataunuuga o le 1 Tesalonia 5:3?
8 I le faataunuuga o valoaga a le Tusi Paia, ua toeitiiti ona tatou faalogoina loa lea o le alaga ua ‘Filemu ma saogalemu!’ (1 Tesalonia 5:3) Pe ono tofotofoina ai ea i lea lo tatou faatuatua? Ioe, auā ua lamatia i tatou i le puʻea faamanu i ofaga e ala i le manuia ua aliali mai e faapea e mafai e atunuu ona aumaia le filemu. Peitai o le a tatou lē auai i le agaga o na tagata e folafolaina le filemu pe afai e teu i o tatou manatu faapea e lē o faaaogāina e Ieova le Atua so o se faapotopotoga o lenei lalolagi e aumaia ai le filemu. Ua iai lana lava auala e aumaia ai le filemu moni, ma o lena auala e tasi, o lona Malo lea i aao o Iesu Keriso. O lea, po o le ā lava le manuia ua mafai ona maua e atunuu i le faavaeina o le filemu, o le a lē umi ma e na o se ufiufi. Ina ia fesoasoani ia i tatou e puipuia mai lenei tulaga, o le a faaauau pea ona lomia e “le auauna faamaoni ma le mafaufau” lapataiga e talafeagai ma le taimi ina ia lē puʻea faamanu i ofaga ai auauna a Ieova i le folafolaga pepelo o loo sau o le ‘Filemu ma saogalemu’ a atunuu o lenei faiga tuai o mea.—Mataio 24:45-47.
9. Aiseā e manaomia ai le lototele ma le faatuatua i la tatou vaega pe a faaumatia Papelonia Tele?
9 O le alaga ua ‘Filemu ma saogalemu!’ o le faailoga lea mo le ‘faaumatiaga faafuaseʻi’ e oo mai ia Papelonia Tele, le emepaea o lotu sese i le lalolagi. (Faaaliga 17:1-6; 18:4, 5) O le a tofotofoina ai foi i lenei mea le faatuatua o Kerisiano. Ona o le nutililii o lotu sese ina ua faafanoina, pe o le a tumau mausalī ai ea Molimau a Ieova i le faatuatua? O le mea moni o le a latou tumau. O lenei mea—e leʻi faatalitalia ma e leʻi mafaufauina e le toatele o tagata—o le a lē faamaʻitea e tagata. E tatau ona iloa e tagata le mea moni faapea o le faamasinoga lea a Ieova, mo le faapaiaina o le suafa ua loa ona faalumaina e lotu sese. Ae mafai faapefea ona iloa e tagata seʻi vaganā ua taʻu atu e se tasi ia i latou? Ma o ai e ese mai ai i Molimau a Ieova e mafai ona faatalitalia e taʻuina atu lena mea ia i latou?—Faatusatusa Esekielu 35:14, 15; Roma 10:13-15.
10. E faapefea ona avea foi o se tofotofoga o le faatuatua le osofaiga a Koku i tagata o Ieova?
10 Ua iai i Molimau faauuina a Ieova ma a latou aumea o loo faamoemoe e ola i le lalolagi, le lototele manaomia ina ia taʻu atu ai i isi e uiga i le fotuai mai o le faasalaga faafaamasinoga a Ieova faasaga ia Papelonia Tele ma le isi vaega uma o le faiga o mea a Satani. (2 Korinito 4:4) I le avea o ia ma Koku o Makoku, lea ua faailogaina ai lona tulaga paʻū maulalo i lenei taimi, o le a faapotopotoina e Satani ana ʻau faalelalolagi mo se osofaiga tuufaatasi i tagata o le Atua. O le a tofotofoina ai le faatuatua o Molimau a Ieova i le mana o le puipuiga tauatua. Peitai e mafai ona tatou faatuatua e pei ona valoia mai i le Afioga a le Atua, o le a faasaoina e Ieova ona tagata.—Esekielu 38:16; 39:18-23.
11, 12. (a) O le ā na faamautinoaina le faaolataga o Noa ma lona aiga i le taimi o le Lolo? (e) O le ā e lē manaomia ona tatou popole i ai i le taimi o le puapuaga tele?
11 I aso nei, tatou te lē o iloa tonu po o le ā le auala o le a faaaogā e Ieova e puipuia ai ona tagata i le “puapuaga tele,” peitai e lē o se mafuaaga lenei e masalosalo ai faapea o le a ia lē faia faapea. (Mataio 24:21, 22) O le a pei le tulaga o auauna a le Atua i aso nei, o le mea na tupu ia Noa ma lona aiga i le taimi o le Lolo. Sa punitia i latou i totonu o le vaa, a o fesousouai vai o le faaumatiaga o loo siomia ai i latou, sa matuā faateʻia i latou i lenei faailoaga o le mana tauatua ma sa tatau ai ona tatalo ma le naunautai. E lē o faaalia mai i le Tusi Paia faapea sa latou popole ma fesili ane ia i latou lava: ‘Pe ua lava ea le malosi o le vaa e faasaoina ai mai ʻau o le faaumatiaga? Faamata e lava a tatou meaʻai seia oo ina uma le Lolo? E mafai ea ona tatou fesagaʻi ma suiga o tulaga o le lalolagi pe a uma le lolo? Ua faamaonia i mea tutupu mulimuli ane ai faapea sa leʻi iai ni na popolega.
12 Ina ia mautinoa lo latou faaolataga, sa manaomia ona faaalia e Noa ma lona aiga le faatuatua. O le uiga o lenei mea, o le mulimuli lea i faatonuga ma taʻitaʻiga a le agaga paia o le Atua. I le taimi o le puapuaga tele, o le a faapena foi le tāua o lo tatou mulimuli i taʻitaʻiga a le agaga paia ma usiusitai i faatonuga a Ieova e ala mai i lana faalapotopotoga. Ona leai lea o se mafuaaga tatou te popole ai ma fesili ane: ‘Pe o le a faapefea ona faamalieina o tatou manaoga faaleagaga ma le faaletino? O ā sauniuniga o le a faia mo tagata matutua pe mo i latou o manaomia se vaavaaiga po o se tausiga faapitoa faafomaʻi? Pe o le a faapefea ona faataunuuina e Ieova mo i tatou le faasaoina atu i le lalolagi fou?’ Ona o le faatuatua malosi, o le a lafo atu ai e auauna faamaoni uma lava a Ieova mea uma i ona aao agavaa.—Faatusatusa Mataio 6:25-33.
13. A amata loa le puapuaga tele, aiseā tatou te manaomia ai se faatuatua e pei o le faatuatua o Aperaamo?
13 A amata loa le puapuaga tele, e lē taumatea o le a matuā faamalosia lo tatou faatuatua i le Atua. I lea, o le a tatou vaaia ai le faataunuuina e Ieova o le mea na ia fetalai i ai o le a ia faia. O le a tatou vaaia i o tatou lava mata lona faaooina mai o le faamasinoga! Peitai, faamata o le a lava totino ea lo tatou faatuatua e talitonu ai faapea a o faaumatiaina ē amioleaga, o le a faasaoina e le Atua ona tagata? Pe o le a pei ea i tatou o Aperaamo, o lē na faatuatua faapea ‘o le a faia e le Faamasino o le lalolagi aoao le mea saʻo,’ e ala i le lē faaumatiaina o ē amiotonu faatasi ma ē amioleaga?—Kenese 18:23, 25.
14. O ā fesili e ao ona faapogaia ai i tatou e iloiloina lo tatou faatuatua ma galulue mamafa ina ia faamalosia?
14 Maeu la le tāua o lo tatou atiina aʻe nei o lo tatou faatuatua! Ona ua lalata tele mai le faaiʻuga o lenei faiga amioleaga o mea, seʻi o tatou faatagaina la le agaga o le Atua e uunaia ai i tatou i ‘galuega paia tau amio ma gaoioiga o le tuutoina i le Atua.’ (2 Peteru 3:11-14) Ona lē mafai ai lea ona faapopoleina i tatou i le puapuaga tele i manatu e lē manofo ai e pei o ia: ‘Pe ua ou faamaonia ea le mauaina o le puipuiga a Ieova? Pe sa ono mafai ea ona ou faia ni mea e sili atu i lana auaunaga? Sa lava ea loʻu galue mamafa ina ia faaofuina i “le tagata fou”? O aʻu ea o le ituaiga o tagata e finagalo i ai Ieova i lana lalolagi fou?’ O na fesili faatupu manatu e ao ona faapogaia ai i tatou e iloiloina lo tatou faatuatua ma ia galulue mamafa e faamalosia i le taimi nei lava!—Kolose 3:8-10.
Faatuatua e Faamalolo ai i Tatou
15. O le ā sa taʻu atu e Iesu ia i latou o ē na ia faamaloloina i nisi taimi, ae aiseā ua lē lagolagoina ai e lenei mea faamalologa i le faatuatua i aso nei?
15 Sa leʻi faagata mai e Iesu ana galuega o le faamaloloina faaletino i tagata e faatuatua. (Ioane 5:5-9, 13) O lea, o ana gaoioiga ua lē lagolagoina ai faale-Tusi Paia le aʻoaʻoga o le faamalologa i le faatuatua. E moni, o nisi taimi na fetalai atu ai Iesu ia i latou na ia faamaloloina: “Ua e ola i lou faatuatua.” (Mataio 9:22; Mareko 5:34; 10:52; Luka 8:48; 17:19; 18:42) Ae i le taʻua o lena mea, sa na ona ia faasino atu ai i se upu moni manino e faapea: Ana fai e leʻi faatuatua i latou na sa mamaʻi i le tomai e faamaloloina ai e Iesu, semanū la latou te lē muai ō mai ia te ia ina ia faamaloloina.
16. O le ā le polokalama tau faamalologa o loo faatonutonuina e Iesu i aso nei?
16 I aso nei, o loo faatonutonu ai e Iesu Keriso se polokalama o le faamaloloina faaleagaga, ma e sili atu i le 4,000,000 tagata ua gasolo atu i ai ina ia latou maua mai ai ni aogā. Ona o ni Molimau a Ieova, ua latou olioli ai i le soifua maloloina faaleagaga e ui i ni tulaga lē atoatoa o loo ia i latou. Ua iai i Kerisiano faauuina i lo latou lotolotoi se faamoemoe faalelagi, ma o loo ‘tausisi atu la latou vaai i mea e faavavau e lē o vaaia.’ (2 Korinito 4:16-18; 5:6, 7) Ma ua tepa taulai atu Kerisiano o loo iai se faamoemoe faalelalolagi i galuega ofoofogia o le faamalologa faaletino o le a faataunuuina i le lalolagi fou a le Atua.
17, 18. O le ā le sauniuniga a Ieova ua faamatalaina i le Faaaliga 22:1, 2, ma ua faapefea ona tatou manaomia le faatuatua ina ia maua mai ai aogā?
17 Ua faasino mai e le aposetolo o Ioane sauniuniga a le Atua mo le ola e faavavau i upu ia i le Faaaliga 22:1, 2, NW: “Ona faaali mai lea e ia ia te aʻu le vaitafe manino o le vai o le ola, e manino e pei o le maa tioata, ua tafe ifo mai le nofoālii o le Atua ma le Tamai Mamoe i le moa o lona ala tele. Ma i itu taitasi o le vaitafe ua iai laau o le ola o loo fua mai i fuata e sefulu ma le lua, e taitasi le masina ma fua mai ai ona fuata. O lau foi o laau e faamalolo ai nuu.” O “vai o le ola” e aofia ai upu moni o le Afioga a le Atua ma isi sauniuniga uma lava a Ieova mo le laveaia o tagata usiusitai mai le agasala ma le oti ma foaiina atu ia te i latou le ola e faavavau e faavae i le taulaga togiola a Iesu. (Efeso 5:26; 1 Ioane 2:1, 2) A o iai i le lalolagi, ua feinu ai soʻo faauuina e 144,000 o Iesu i le sauniuniga a le Atua mo le ola e ala ia Keriso ma ua faaigoaina o “laau [tetele] o le amiotonu.” (Isaia 61:1-3; Faaaliga 14:1-5) Ua latou fuaina mai le anoanoai o fua faaleagaga i le lalolagi. I le avea ma ē e toe tutū i le lagi, i le taimi o le Afe Tausaga o le Pulega a Keriso, o le a latou auai ai i le faasalafaina atu o sauniuniga o le togiola na o le a faaaogā e “faamalolo ai nuu” mai le agasala ma le oti.
18 O le tele o le malosi o lo tatou faatuatua i ia sauniuniga a le Atua, o le tele foi lea o lo tatou loto malilie e mulimuli atu i taʻitaʻiga a lona agaga ina ia auai i na mea. E mautinoa o le a oo mai le lelei atoatoa faaletino a o faaalia e se tagata le faatuatua ia Keriso ma agaʻigaʻi i luma faaleagaga. E ui ina o le a faamalolo faavavega se tagata mai toʻatugā ogoogo, ae o le a aumaia atili o ia i le lelei atoatoa a o ia faatinoina le mea saʻo. O le a ia auai e lē aunoa i le sauniuniga a le Atua mo le faamaloloina e ala i le taulaga a Keriso. O lea, o le faatuatua o le a na taaʻina lo tatou faamaloloina ma le faaatoatoaina i se auala faaletino.
‘Faaolaina e Ala i le Faatuatua’
19. Aiseā e matuā tāua ai le tumau mausalī i le faatuatua?
19 Seia oo ina ufitia e faavavau e le mālama o le lalolagi fou a le Atua le pouliuli o lenei lalolagi amioleaga, maeu le matuā tāua mo auauna a Ieova ona tumau mausalī i le faatuatua! O le a lafoina tagata o ē ‘lē faatuatua’ i le “lepa e mu i le afi ma le teio,” o le oti faalua lea. O le a tupu lenei mea pe a mavae le tofotofoga faaiʻu i le faaiʻuga o le Afe Tausaga o le Pulega a Keriso. (Faaaliga 20:6-10; 21:8) Maeu se faamanuiaga o le a iʻu i ai i latou o ē faaauau pea ona faaalia le faatuatua ma faasaoina ina ia olioli i se lumanai e lē gata mai!
20. O le a faapefea ona iai se taunuuga faapitoa o le 1 Korinito 13:13 i le faaiʻuga o le Afe Tausaga o le Pulega a Keriso?
20 Ona taunuu ai lea o upu a Paulo i le 1 Korinito 13:13 i se uiga faapitoa: “O lenei, o tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa lea.” O le a lē toe manaomia ona tatou faaalia le faatuatua auā o le a taunuu moni lava le folafolaga faavaloaga i le Kenese 3:15 pe faamoemoe o le a faataunuuina. O le mea lena ua uma ona tupu. I le avea o ni ē tausia le faamaoni, o le a faaauau pea ona tatou faamoemoe ia Ieova, faatuatua ia te ia ma lona Alo, ma alolofa atu ia i laua ona o i laua ia na aumaia le faataunuuga o lenei valoaga. E lē gata i lena, o le alofa loloto ma le agaga faafetai mo lo tatou faaolataga o le a fusia ai i tatou i le Atua i se tuutoina e lē motusia mo mea uma e faavavau.—1 Peteru 1:8, 9.
21. O le ā e ao ona tatou faia i aso nei ina ia ‘faaolaina e ala i le faatuatua’?
21 E ala i lana faalapotopotoga vaaia, ua faia ai e Ieova sauniuniga matagofie e faamalosia ai le faatuatua. Ia faaaogā atoatoa ia mea uma. Auai e lē aunoa ma faia se sao i sauniga a tagata o le Atua. (Eperu 10:24, 25) Suesue ma le tinoū lana Afioga ma lomiga faa-Kerisiano. Talosaga ia Ieova mo lona agaga paia. (Luka 11:13) Faaaʻoaʻo i le faatuatua o i latou o loo taʻimua ma le loto maulalo i le faapotopotoga. (Eperu 13:7) Tetee atu i faaosoosoga faalelalolagi. (Mataio 6:9, 13) Ioe, ma ia faalolotoina lau faiā totino ma Ieova i auala uma e mafai ai. E sili atu i na mea uma, ia faaauau ona faaalia le faatuatua. Ona mafai ai lea ona e auai ia i latou o ē o loo faafiafiaina Ieova ma maua ai le faaolataga, auā na taʻua e Paulo: “O le alofa tunoa ua faaolaina ai outou i le faatuatua; e le mai ia te outou foi lea, a o le mea ua foaiina mai e le Atua.”—Efeso 2:8.
O ā Au Tali?
◻ O ā tofotofoga o le faatuatua o loo taatitia tonu mai i o tatou luma?
◻ O ā auala e lua e mafai ai e lo tatou faatuatua ona faamalolo i tatou?
◻ E tusa ai ma le 1 Peteru 1:9, o le ā le umi e tatau ona tausisia ai lo tatou faatuatua?
◻ O ā sauniuniga ua tatou maua e faamalosia ai lo tatou faatuatua?
[Ata i le itulau 15]
I le pei o le tamā na faamalolo e Iesu lona atalii, pe o e lagona ea se manaoga totino mo se faatuatua e sili atu?
[Ata i le itulau 17]
E manaomia se faatuatua e pei o le faatuatua o Noa ma lona aiga ina ia sao atu ai i le “puapuaga tele”