O le ā le Umi o le a Iai le Onosai o le Atua?

I NI tausaga e 3,000 ua mavae, na tusia ai faapea e se tagata poto: “E pule ai le tasi tagata i le tasi, e leaga ai o ia lava.” (Failauga 8:9) Talu lava ona ia faailoa mai lena mea, e leʻi faaleleia ai lava le tulaga o mea. I le faagasologa o le talafaasolopito, ua fāoa ai e tagata taitoatasi po o ni vaega foi o tagata le malosi e faia ai lea pulega ma lea pulega, i le puleaina ma i le faaaogāina o isi tagata e maua ai o latou lava lelei totino. Sa tumau pea ona onosai Ieova le Atua i lenei mea.

Sa onosai pea Ieova a o aauina atu e pulega malo le faitau miliona o tagata i le fasiotia o i latou i taua, ma faatagaina faiga matuā lē faamasinotonu tau tamaoaiga. I aso nei, o loo tumau pea ona ia faaalia le onosai a o faaumatia e tagata le ufiufi o le osone ma faaoonaina le ʻea ma le sami. Pagā le tatau ona tiga ai o lona finagalo i le silasila atu i le faaleagaina o le laueleele lelei lāfulemu, ma le lē mataofiofia o le faaumatiaina o vaomatua ma mea uma o ola ai!

Aiseā ua Sāga Onosai ai le Atua?

O se tala faatusa faigofie atonu o le a fesoasoani ia i tatou e tali ai lenei fesili. Seʻi manatu i le iʻuga e oo i se pisinisi pe afai e tuai atu pea lava se tagata faigaluega. O le ā e ao i lē ona le pisinisi ona fai? E faigofie, i lana faamasinoga tonu atonu o le a manaomia ai ona faateʻa loa le tagata faigaluega. Ae atonu o ia manatua le faataoto i le Tusi Paia: “O lē ua faagesegese lona ita ua tele lona faautauta, a o lē e le onosai ua faaeaina e ia i luga le valea.” (Faataoto 14:29, NW) O le faautauta atonu e faapogaia ai o ia e faatali a o leʻi faia sana gaoioiga. Atonu o le a ia filifili e faataga se taimi mo le tagata faigaluega e aʻoaʻo ai o ia ina ia lē oo ai le pisinisi i se tulaga e sili atu ai ona gau.

O le alofa i uso a tagata atonu o le a faapogaia ai foi o ia e faatali. Ae ā pe avatu se lapataiga i le tagata faigaluega lē manatu mamafa ina ia iloa ai po o le a ia taumafai e suia lana amio? Aiseā e lē talanoa atu ai ia te ia, ma iloa ai po o lana masani lea o le tuai ua pogai, ona o se faafitauli e mafai lava ona foia, pe ona o se uiga masani e lē mafoia? A o filifili lē ona le pisinisi e faaalia le onosai, ae peitai, e ao foi i lona onosai ona iai se tapulaa. E ao ai la i le tagata faigaluega ona faaleleia lona tulaga po o le iʻu ina faateʻa ma le galuega. O lena mea o le a lelei e lē mo na o le pisinisi lava ia, ae faapea foi ma tagata faigaluega o ē mulimuli i tulafono.

I se auala la faapena, ua faaalia ai e Ieova le Atua le onosai i le feagai ai ma mea sese ua faia e tagata ina ia faatagaina ai se taimi e galueaiina ai se vaifofo amiotonu i nisi o faafitauli. Ae lē gata i lea, o lona onosai, ua avatu ai i tagata fai mea sese se avanoa e suia ai o latou ala ma maua ai aogā e faavavau. Ona o lea, ua faalaeiauina ai i tatou e le Tusi Paia ina ia aua neʻi o tatou faanoanoa ona o le onosai o le Atua. Na i lo lea, ua ia faapea mai: “Ia outou manatu i le onosai o lo tatou Alii i le avea o le olataga lea.”​—2 Peteru 3:15.

Se Faaaʻoaʻoga o le Onosai o le Atua

Sa onosai le Atua a o leʻi oo i le Lolo tele i aso o Noa. O le lalolagi i lena taimi sa faatumuina i le sauā ma sa matuā leaga lava. Ua faapea ona tatou faitau ai: “Ua silafia e Ieova ua leaga tele lava tagata i le lalolagi, . . . Ona fetalai ane lea o Ieova, Ou te soloieseina i le fogāeleele tagata na ou faia.” (Kenese 6:5, 7) Ioe, sa iai i le finagalo o Ieova se vaifofo faaiʻu mo le faafitauli o le amioleaga i tua i inā: o le aveesea o tagata amioleaga. Ae na te leʻi faia loa se gaoioiga. Aiseā ua leai ai?

Auā e lē o tagata uma na amioleaga. Sa amiotonu Noa ma lona aiga i le silafaga a le Atua. O lea, mo lo latou lelei, sa faatalitali pea ma le onosai Ieova ina ia faatagaina nai tagata amiotonu toaitiiti e faia sauniuniga mo le faaolataga. Ma le isi, o lena faatali umi na tuu atu ai ia Noa le avanoa e avea ai o “lē talaʻi le amiotonu,” ma tuu atu i na tagata amioleaga le avanoa e suia ai o latou ala. Ua faapea mai le Tusi Paia: “Ina o faatalitali mai le onosai o le Atua anamua i ona po o Noa, a o sauni ai le vaa, na faasaoina ai tagata e toaitiiti, e toavalu lava ia, i le vai.”—2 Peteru 2:5; 1 Peteru 3:20.

Le Pogai ua Onosai ai Nei le Atua

E faapena foi le tulaga i aso nei. Ua toe faatumuina foi le lalolagi i le sauā. E pei lava o aso o Noa, ua uma ona faamasinoina e le Atua lenei lalolagi, lea ua fai mai ai le Tusi Paia, e “mo le afi i le aso e faamasino ai ma fano ai tagata faalematau.” (2 Peteru 3:7) Pe a tupu lena mea, o le a lē toe iai se faaleagaina o le siosiomaga, agaleagaina o tagata vaivai, po o le faaaogāseseina ma le matapeapea o le malosi o le pule.

Aiseā la ua umi ai se taimi ae leʻi faaumatia e le Atua na tagata faalemataʻu? Ona e iai ni finauga e ao ona faaleleia ma ni mataupu tāua e faatulagaina. Ioe, o loo agaʻi atu Ieova i le saunia o se vaifofo tumau i le faafitauli o le amioleaga lena e aafia ai le tele o mea, e aofia ai ma le faasaoina o le fanau a tagata e saʻo o latou loto mai noataga o le maʻi ma le oti.

I le manatuaina o le iʻuga o loo taʻua i le palakalafa mulimuli, na fuafuaina ai e Ieova e saunia se Faaola o lē o le a ofoina atu se togiola mo a tatou agasala. Ua faapea mai le Tusi Paia e faatatau ia te ia: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) E faitau afe tausaga o sauniuni le ala mo Iesu ina ia afio mai ma faataulagaina lona soifua e fai ma sui o le fanau a tagata. Talu mai na tausaga uma lava, sa onosai ai ma le alofa le Atua. Ae pe sa leʻi aogā ea le faatalitali atu mo lea sauniuniga?

E toetoe lava lua afe tausaga ua mavae na sauniunia ai e Iesu le togiola. Ae aiseā la ua faaalia ai pea e le Atua le onosai? Mo le tasi o mafuaaga, o le maliu o Iesu na faailogaina ai le amataga o se tauiviga faaleaʻoaʻoga. E tatau i le fanau a tagata ona iloa e uiga i lenei sauniuniga alofa ma tuuina atu i ai le avanoa e talia ai pe teena ai lea sauniuniga. O le a tele se taimi e faaalu ai i lena mea, ae o le a avea o se taimi aogā. Ua faapea mai le Tusi Paia: “E le faatuai mai [Ieova] i le mea na folafolaina mai, faapei o le manatu a isi tagata i le faatuai, a e peitai ua onosai mai lava o ia ia i tatou, ona ua le finagalo ia fano se tasi, a ia oo uma lava i le salamo.”​—2 Peteru 3:9.

Le Finauga i Pulega

O le tasi lea o mataupu tāua e tele foi se taimi e faaalu ai. Sa iai se manaoga ina ia foia le faafitauli o pulega a le fanau a tagata. I le amataga, sa iai le tagata i lalo o le pulega tauatua. Ae i le faatoaga o Etena, na fulitua ai o tatou uluai mātua i lena pulega. Sa la filifili e tutoatasi mai le Atua, i le mananao e pulea e i laua i laua lava. (Kenese 3:1-5) E ui i lea, o le mea moni, sa leʻi foafoaina le tagata e pule ia te ia lava. Na tusi le perofeta o Ieremia: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.”​—Ieremia 10:23; Faataoto 20:24.

Ae peitai, talu lava ona lagā le finauga e uiga i pulega, ua faataga ai ma le onosai e Ieova le taimi e foia ai. E moni, ua ia faataga ma le agalelei le faitau afe o tausaga mo le tagata e taumafai ai i ituaiga uma o pulega ua ia fuafuaina. O le ā na iʻu i ai? Ua oo ina iloatino faapea e leai se pulega faaletagata e mafai ona ia aveesea mafatiaga, le faailoga tagata, po o isi mafuaaga o le lē fiafia.

E moni lava, i le vaai atu i le talafaasolopito o le tagata, pe mafai e se tasi ona faapea moni mai o le Atua e faamasinoletonu ina ua ia faalauiloa mai lona faanaunauga e aveesea pulega uma lava faaletagata ma suia i se tasi o ana lava pulega? E mautinoa lava e leai! Tatou te talia ma le mautinoa le faataunuuga o le valoaga a le Tusi Paia: “O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.”​—Tanielu 2:44.

O le Tupu faalelagi o lena Malo, o le Iesu toe faatuina. I le sauniunia o ia mo lena tulaga—faapea foi ma le filifilia o tagata e avea ma pule lagolago faatasi ma ia—ua umi se taimi na faia ai. Talu mai lena taimi atoa, na faaalia ai lava e le Atua le onosai.

Maua Nei Aogā mai le Onosai o le Atua

I aso nei, e faitau miliona tagata i atunuu e lē itiiti mai i le 212 ua maua aogā mai le onosai o le Atua. Ua oo ina latou autasi i lo latou faanaunau e usiusitai i le Atua ma auauna i lana pulega faalelagi. Pe a latou feiloai faatasi i o latou Maota o le Malo, latou te aʻoaʻoina ai le maeu le sili ona lelei o le faatatauina o mataupu silisili o le Tusi Paia i o latou olaga. E lē o faia so latou sao i faiga faapolotiki fevaevaeai o lenei lalolagi, e ui lava latou te gauai atu i pulega faaletagata a o faatagaina ma le onosai e le Atua le faia o nei mea.​—Mataio 22:21; Roma 13:1-5.

O sea felagolagomai i totonu o le toatele naua o tagata ua viia ai Ieova e avea o Lē e mafai ona aumaia le sologa lelei i tagata lotolelei o ē ua loto malilie e aʻoaʻoina ina ia alolofa ma auauna ia te ia. E lē taumatea ua e feiloai atu ia i latou nei a o faaauau ona latou faia pea le galuega lava lea na amataina e Iesu, o le faalauiloa o le tala lelei o le Malo o le Atua. Na valoia e Iesu le taualuga o lenei galuega ina ua ia fetalai mai: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”​—Mataio 24:14.

E Lē o Toe Umi Tele le Taimi!

O faamaoniga vaaia, ua faamaonia ai faapea, o fuafuaga ua faia mo le pulega amiotonu a le Atua e pulea tulafono o aso taitasi i le lalolagi, ua toeitiiti nei ona faaiʻuina lea. Ina ua uma le faamatalaina o iʻuga mataʻutia o le lē taulau o pulega faaletagata lea ua tatou vaaia i lenei senituri, ona fetalai mai lea o Iesu: “Pe a iloa e outou ia mea ua faia, ia outou iloa ua latalata le malo o le Atua.”​—Luka 21:10, 11, 31.

Ua toeitiiti ona aveesea loa lea e le Atua le amioleaga mai i le vaaiga a le lalolagi. O le a iai se faatatauga faaletino o upu a le faisalamo: “Auā e faaumatia o e fai amio leaga . . . E toe itiiti, ona leai lea o le tagata amio leaga; e te mafaufau foi i le mea sa i ai o ia, a e leai lava.” (Salamo 37:9, 10) E mafai ona e vaai faalemafaufau i se lalolagi e aunoa ma le amioleaga? O ai la o le a na pulea mea uma mo le fanau a tagata? Fai mai le Tusi Paia: “E pule le tupu [o Keriso Iesu ua faanofotupuina i le lagi] ma le amiotonu; e pule foi alii [perenise o ē faamaoni ua tofia e ia i le lalolagi], ma le tonu. O le mea e tupu i le amiotonu o le manuia lea; e tupu mai foi i le amiotonu le filemu ma le saogalemu e faavavau. E nonofo foi loʻu nuu i le mea e manuia ai, ma fale e saogalemu ai, ma mapusaga e filemu ai.​—Isaia 32:1, 17, 18.

I lea, o le a tatalaina ai e le pulega faalelagi a le Atua auga leaga o mea sese ua faia e le tagata ma faamaopoopoina i latou o ē faamoemoe ia te Ia i se sosaiete faaletagata e ōgatasi lelei. I le faamatalaina o lenei ōgatasi, ua faapea mai le Tusi Paia: “O le a nonofo faatasi mo sina taimi le luko ma le tamai mamoe poʻa, e taooto faatasi foi le nameri ma le tamaitiiti, e faatasi foi le tamai povi ma le tamai leona taufulufulua faatasi ma le manu peti; e taʻitaʻiina foi i latou e le tamaitiiti . . . Latou te lē faia se mea leaga pe faaumatia se mea i loʻu mauga paia uma; auā o le a faatumuina le lalolagi i le malamalama o Ieova, e pei ona ufitia o le ili tai i le suāsami.”​—Isaia 11:6-9, NW.

Maeu se iʻuga ofoofogia ona o le faaalia o le onosai o le Atua! Ona o lea, na i lo o le faitio faapea ua umi tele ona faatali le Atua, aiseā e lē faaaogā ai le avanoa o lona onosai e gauai atu ai oe lava i lona Malo? Ia aʻoaʻo mai le Tusi Paia po o ā ana tapulaa ma ia faafetaui atu i ai oe lava i na tapulaa. Ia auaufaatasi ma isi o ē o gauai atu ma le tusa ia te ia. Ona iʻu ai lea o le onosai o le Atua i faamanuiaga e faavavau mo oe.