E Fesoasoani Faapefea le Faatuatua i Ē Mamaʻi

O FAAMATALAGA e uiga i faamalōlōga faavavega i le Tusi Paia, ua faamautinoa mai ai ia i tatou faapea, o loo manatu mamafa mai le Atua mo lo tatou lelei, ma ua faaalia ai i na mea lona mana e faamalōlō ai. Talu ai ona o nei faamalōlōga faavavega e viia ai le Atua ma aumaia ai le olioli tele, ua alagātatau ai la ona fesili, Po o tumau pea ona galue le meaalofa o faamalōlōga e ala i le agaga paia?

O le tali i lena fesili o le leai—ma o le mafuaaga atonu o le a ofo ai nisi. O na faamalōlōga faavavega i le uluai senituri ua uma ona faataunuuina ai le fuafuaga na faia ai. Ua taʻua ma le saʻo e le The Illustrated Bible Dictionary faapea: “O le fuafuaga o faamalōlōga faavavega sa faaleatua, ae e lē faafomaʻi.” O ā nisi o fuafuaga faaleatua na faataunuuina e na vavega?

Mo le tasi o mea, o faamalōlōga faavavega a Iesu, sa faia mo le fuafuaga e faailoaina ai o ia o le Mesia. Ma ina ua mavae lona maliu, sa fesoasoani na faamalōlōga faavavega e faamautinoa ai o le faamanuiaga a le Atua sa i luga o le faapotopotoga Kerisiano fou. (Mataio 11:2-6; Eperu 2:3, 4) E lē gata i lea, sa faaalia ai foi faapea, o le folafolaga a le Atua e faamalōlōina le fanau a tagata i le lalolagi fou o le a faataunuuina. Ua faamautinoa mai e na mea i lo tatou faatuatua faapea o le a oo moni mai lava le taimi “e le fai mai foi se tasi ua mau ai, Ou te maʻi; e faamagaloina agasala a le nuu e nonofo ai.” (Isaia 33:24) Ina ua faataunuuina nei fuafuaga i le uluai senituri, sa lē toe manaomia ai loa la vavega.

E aogā foi ona matau faapea, o soʻo o Iesu i le uluai senituri sa mafatia foi i latou i maʻi tiga na sa lē faamalōlōina faavavega. O le isi lenei faamaoniga atili faapea o le galuega o le faamalōlōga faavavega a Iesu faapea ma le au aposetolo, sa fuafua ina ia aʻoaʻoina ai upu moni tāua, ae e lē o le saunia ai o se auaunaga faafomaʻi. Ina ua fautuaina se togafitiga mo le maʻi e tupu soo o Timoteo, sa lagolagoina e Paulo le faaaogāina faavailaau o le uaina, ae e lē o le faamalōlōga i la le faatuatua. O Paulo, o lē sa faia faamalōlōga faavavega, sa na lē maua se mapu mai le “mea matuitui i le tino” na “tuʻi” atu pea ia te ia.—2 Korinito 12:7; 1 Timoteo 5:23.

Ina ua maliliu le au aposetolo, na mavae atu ai foi ma le meaalofa o le faamalōlōga. Na faailoa mai e Paulo lava ia faapea o le mea lenei o le a tupu. I le faatusaina o le faapotopotoga Kerisiano i se tamameamea, na faapea mai Paulo: “O ona po na ou itiiti ai, na ou tautala ai faatamaitiiti, na ou manatunatu faatamaitiiti, na ou filifili faatamaitiiti; a ua oo ina ou tagata matua, ona ou tiai lea o mea a tamaiti.” O le manatu o lana tala faatusa sa faapea, o meaalofa faavavega e ala i le agaga paia, sa o se vaega o le taimi a o pepe le faapotopotoga Kerisiano. O na mea sa o se vaega o ‘amioga faatamaiti.’ I lea, na ia taʻua faapea: “O [meaalofa faavavega] o le a faaleaogaina.”—1 Korinito 13:8-11.

Pe Mafai ona Fesoasoani le Faatuatua pe a Tatou Mamaʻi

Ae peitai, e tusa lava pe tatou te lē faalagolago i le faamalōlōga i la le faatuatua, e mautinoa lava e tatau ona tatalo i le Atua mo le fesoasoani pe a tatou mamaʻi. Ma e mautinoa lava e leai se mea e sese ai le tatalo o isi e fai ma o tatou sui. Ae o tatalo e tatau ona moni ma ia ōgatasi ma le finagalo o le Atua. (1 Ioane 5:14, 15) E leai lava se mea i le Tusi Paia o poloaiina ai i tatou ina ia tatalo mo faamalōlōga i la le faatuatua.a Na i lo o lea, ia tatou tatalo mo le lagolagosua alofa a Ieova i le taimi o puapuaga ona o maʻi.

Ua faaalia i le Tusi Paia po o ā mea e tatalo i ai le au faatuatua pe a oo ina mamaʻi i le faapea mai: “E lagolago ane Ieova ia te ia i le taotoga o lona maʻi; e te liua lona moega uma lava i [le taimi o] lona maʻi.” (Salamo 41:3) O le manatunatu loloto i le Afioga a le Atua, o le a fesoasoani ia i latou o loo mafatia i maʻi tau i faalogona ootia. Na tusi le faisalamo faapea: “O lou alofa Ieova e, ua faaolaina ai pea aʻu. Pe a tele manatunatu o loʻu loto i totonu ia te aʻu, ona ou fiafia ai lea ona o faamafanafanaga mai ia te oe.”—Salamo 94:18, 19, NW; tagai foi i le Salamo 63:6-8.

I le faaopoopo atu i ai, e manaomia ona tatou faaalia le magafagafa lelei pe a oo i mataupu tau le soifua malōlōina, ma ua fautuaina i tatou e le Tusi Paia e uiga i lenei mea. E sili atu ona lelei le ola e tusa ma mataupu silisili a le Tusi Paia na i lo o le auai i le faaaogāseseina o vailaau faasāina, le ulaula, le inu tele, po o le ʻai tele, ma i lea, pe a oo mai maʻi mulimuli ane, ona liliu atu lea i faamalōlōga i la le faatuatua ona o le lē iloa po o le ā le mea o le a fai. O le tatalo mo se vavega pe a maʻi se tasi, e lē mafai ona suia ai le atamai o le taumafai e sola ese mai le maua i maʻi e lē maalofia, e ala lea i le taumafaina o meaʻai paleni mo le tino pe a maua, po o le sailia o se fesoasoani agavaa faafomaʻi pe a tatau ai.

Ua faalaeiauina foi i tatou e le Afioga a le Atua ina ia atiina aʻe mafaufauga mamā e aogā mo lo tatou soifua malōlōina faaletino. Ua fautua mai le tusi o Faataoto: “O le loto lelei, o le ola lea o le tino; a o le mataua, o le mea e pala ai ivi lea.” “O le loto fiafia, e fai ma vailaau aoga lea; a o le loto faanoanoa e mamago ai ivi.” (Faataoto 14:30; 17:22) O le tatalo mo le agaga paia ina ia faatupuina le toafilemu ma le olioli i o tatou loto, ua na o lea e mafai ai ona maua iʻuga aogā mo lo tatou soifua malōlōina faaletino.—Filipi 4:6, 7.

Ae Faapefea le Faamalōlōga i la le Faatuatua?

E moni, e tusa lava pe ola malōlōina se tagata i lona olaga, e mafai lava ona oo i ai maʻi. Ona ā lea? Pe āfaina le alu atu i se tagata fai faamalōlōga ma le faamoemoe o le a faamalōlōina ai? Ioe, e telē le āfaina. O tagata fai faamalōlōga i aso nei e seāseā ona faia fua a latou faamalōlōga. Ma o le faaaluina o tupe i sē fai faamalōlōga i la le faatuatua atonu e sili atu ona taugata mo i tatou na i lo o se tupe e faaaluina mo se fesoasoani faafomaʻi. E lē gata i lea, aiseā e avatu ai tupe i tagata o ē faaaogāsese le loto naunau o tagata e foai e ui ina lē o vaaia ni iʻuga lelei?

Atonu o le a finau mai nisi: ‘Ae e mautinoa lava atonu e iai se aogā o faamalōlōga i la le faatuatua tusa lava pe toaitiiti i latou o ē ō atu i “tagata faifaamalōlōga” ua faamalōlōina.’ Ae e mafai ona finau atu faapea, pe faamata o mafai moni e le au faifaamalōlōga i la le faatuatua ona faamalōlōina se tasi i se auala tumau. Ua faailoa lelei mai e le Encyclopædia Britannica faapea: “E matuā itiiti lava se suesuega na mafai ona faia i le tele o vala e lē mailoa i faamalōlōga i la le faatuatua.”

E tusa lava pe itiiti se fuainumera o tagata e foliga mai na faamalōlōina, e lē o se faailoga lena o se galuega a le agaga paia. I le Lauga i luga o le Mauga, na fetalai ai Iesu: “E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou taʻutino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.” (Mataio 7:22, 23) Na fetalai foi Iesu faapea e iai tagata, e ui lava ua lē faamaonia e le Atua, ae o le a latou faia ni faailoga ina ia iloa ai i latou: “Auā e tutū mai Keriso pepelo, ma perofeta pepelo, latou te faia foi faailoga tetele ma vavega, ina ia faasese ai i e ua filifilia lava, pe afai e mafai ai.” (Mataio 24:24) E mautinoa lava, o tagata faifaamalōlōga i la le faatuatua e mafai ona aofia ai i le faatatauina o na upu, e ala i a latou faaaliga mataʻina, le manao mai pea i tupe ma faapea mai o loo latou faia faamalōlōga faavavega.

O na tagata latou te lē o mulimuli i tulagāaao o Iesu. O ai la o loo latou mulimuli i ai? Ua aumaia e le aposetolo o Paulo ia i tatou se faailoaga ina ua ia faapea mai: “E le o se mea foi lea e ofo ai, auā o Satani lava, ua liua o ia e ia ma agelu o le malamalama. O lenei, e le se mea tele pe a liua ana auauna peiseai o auauna a le amiotonu i latou; o lo latou iuga e tusa ma a latou galuega.” (2 Korinito 11:14, 15) Afai e lē mafai e tagata faifaamalōlōga i la le faatuatua ona fai vavega na latou folafola mai, o i latou la o ni ē taufaasese, o loo mulimuli i le ala o Satani, “o lē faasese i le lalolagi uma.” (Faaaliga 12:9) Ae faapefea pe afai, latou te faia ai faamalōlōga i ni nai mea iti? Pe lē tatau ai ea i a latou “galuega mamana” ona aafia ai le mana o Satani ma ana temoni? Ioe, o le tulaga lena!

Le Taimi o le Faamalōlōga Moni

O faamalōlōga faavavega a Iesu sa faia e ala i le fesoasoani a le agaga paia o le Atua. Sa faataʻitaʻi ai i na vavega lana fuafuaga ina ia foia faafitauli uma lava tau i le soifua malōlōina o le tagata i lana taimi atofaina. Ua folafola mai e Ieova ‘le faamalōlōina o nuu.’ (Faaaliga 22:2) Ma o le a lē gata ina ia faamalōlōina maʻi, ae aveesea foi ma le oti. Ua taʻua e Ioane faapea o Iesu na afio mai “ina ia le fano [i latou uma] o e faatuatua ia te ia, a ia maua le ola e faavavau.” (Ioane 3:16) Maeu se faamalōlōga lelei o le a faia! O le a toe faia ai e Iesu faamalōlōga e pei o na o loo tusia i le Tusi Paia, ae i se fua e matuā sili atu ona telē. O le a oo lava foi ina ia faatutūina ē ua maliliu! (Ioane 5:28, 29) O afea e tupu ai lenei mea?

I le lalolagi fou a le Atua lea ua matuā lata tele mai e tusa ai ma faamaoniga uma lava ua vaaia. O lena lalolagi fou, o le a aumaia pe a uma ona aveesea e faavavau mea leaga uma o lenei faiga o mea, ma o le a avea o se faamanuiaga moni mo le fanau a tagata e saʻo o latou loto. O le a avea o se lalolagi e aunoa ma ni puapuaga. O le a “soloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Faaaliga 21:4) Maeu se eseesega ma le mea o tatou vaaia i lo tatou siomaga i aso nei!

O le mea lea, pe a oo mai maʻi, ia tatalo i le Atua mo le lagolagosua. Ma e tusa lava pe maʻi pe malosi, ia iloa o le a iai moni le ola e faavavau e aunoa ma maʻi. Ia atiina aʻe lou faatuatua i lenei folafolaga maufaatuatuaina a le Atua e ala i le suesueina o le tele o faasinoga ua aumaia i le Tusi Paia e faatatau i ai. Ia iloa po o le a faapefea i le fuafuaga a le Atua e tusa ai ma lenei mea ona latalata i lona faataunuuga e tusa ai ma lana lava taimi atofaina. Aua le masalosalo, auā ua faamautinoa mai e le Afioga a le Atua ia i tatou: “E faaumatia e ia le oti e faavavau; e soloiesea foi e le Alii o Ieova loimata i mata uma lava.”—Isaia 25:8.

[Faaopoopoga i lalo]

[Ata i le itulau 7]

Ua faataunuuina le fuafuaga o faamalōlōga faavavega a Iesu

[Ata i le itulau 8]

O le a toe faia e Iesu ma faateleina foi faamalōlōga faavavega