Ua Latalata le Faamaloloina Faavavega o le Fanau a Tagata

“UA TATOU le iloa mai anamua se mea faapena.” O upu ia na fai ane e tagata na vaaitino i le faamaloloina faavavega e Iesu i le taimi lava lena o se tagata na pē uma lona tino. (Mareko 2:12) Na faamālōlō foi e Iesu ē tauaso, o gūgū, ma ē pipili, ma sa faapena foi ona faia e ona soo. O le ā le mana na faia ai e Iesu nei vavega? E faapefea ona fesootai atu ma le faatuatua? O le ā le malamalamaga ua faasusulu mai e nei mea na tutupu i le uluai senituri i faamalologa faavavega i aso nei?—Mataio 15:30, 31.

“O Lou Faatuatua ua E Malolo Ai”

E fiafia tele le au fai faamalologa i la le faatuatua i aso nei e sii mai le faamatalaga a Iesu i se fafine na mafatia i le puna toto mo le 12 tausaga lea na alu ane ia te ia ina ia faamaloloina: “O lou faatuatua ua e malolo ai.” (Luka 8:43-48) Pe na faaalia i le faamatalaga a Iesu e faapea na faalagolago le faamaloloina o le fafine i lona faatuatua? Po o se faaaoaoga lena o le “faamalologa i le faatuatua” e pei ona faia ai i aso nei?

Pe a tatou faitau ma le faaeteete i faamatalaga a le Tusi Paia, tatou te iloa ai o le tele lava o tulaga, sa lei manaomia e Iesu ma ona soo ina ia faailoa atu e tagata mamaʻi lo latou faatuatua a o lei faamaloloina. O le fafine lea e taʻua i luga, na alu ane e aunoa lava ma se upu na fai atu ia Iesu, na ui ane i tua ma paʻi lemu atu i le ofu o Iesu, “ona utu loa lea o lona puna toto.” I se tasi taimi, na faamālōlō ai e Iesu se tagata na iai faatasi ma i latou o ē na ō mai e puʻe ia te ia. Na oo lava foi ina ia faamālōlō se tagata o lē na matuā lē iloa lava po o ai Iesu.—Luka 22:50, 51; Ioane 5:5-9, 13; 9:24-34.

O lea, na faapefea ona fesootai atu i ai le faatuatua? A o iai Iesu ma ona soo i le itumalo o Turo ma Saitonu, na alu ane ai se fafine Foinie ma alaga atu: “Le Alii e, le alo o Tavita, ia e alofa mai ia te au; ua leaga lava laʻu tama teine i le temoni ua i ai.” Seʻi manatu i lona lē mautonu a o ia aioi atu: “Le Alii e, ia e fesoasoani mai ia te au!” I le tumu i le alofa mutimutivale, na tali atu ai Iesu: “Funa e, ua tele lou faatuatua; e pei o lou manao, ia faapea lava ona faia ia te oe.” Ma na mālōlō ai lana tama teine “i lea lava itu aso.” (Mataio 15:21-28) E manino lava, na aafia ai le faatuatua, ae o le faatuatua o ai? Ia mātau, o le faatuatua o le tinā lea na viiviia e Iesu, ae lē o le faatuatua o le teineitiiti maʻi. Ma e faatuatua i le ā? E ala i le faalagi atu o Iesu e faapea o “Le Alii e, le alo o Tavita,” na faailoa faalauaitele atu ai e le fafine e faapea, o Iesu o le Mesia folafolaina. Sa lē na o se faamatalaga faigofie e faailoa ai le faatuatua i le Atua po o le faatuatua i le mana o lē faia le faamalologa. Ina ua fetalai atu Iesu, “Ua e ola i lou faatuatua,” o lona uiga ana aunoa ma le faatuatua ia te ia o le Mesia, semanu e lē ō mai ia te ia ē ua tigaina ina ia faamaloloina.

Mai nei faaaoaoga faale-Tusi Paia, ua mafai ai ona tatou iloa le eseese mamao lava o faamalologa na faia e Iesu, mai faamalologa ia e masani ona faia i aso nei. E lei iai ni faiga o faalogona ootia faalialiavale—feei, tautū i upu, tagiauē, feoi, ma isi lava uiga faapena—mai le aofia, ma sa lei faaalia e Iesu ni uiga pei e faavalemalosi. E lē gata i lea, e lei iai lava se taimi na lē taulau ai ona faamaloloina e Iesu se tagata maʻi ona o le leai o se faatuatua po ona o le lē lava o a latou meaalofa tau tupe.

Faamalolo e Ala i le Mana o le Atua

Na faapefea ona faia faamalologa a Iesu ma ona soo? Ua tali mai le Tusi Paia e faapea, na “ia te ia foi le mana o le Alii [o Ieova] e faamalolo i e mamaʻi.” (Luka 5:17) Ina ua uma se tasi o faamalologa, fai mai le Luka 9:43, “ua latou matuā ofo uma i le mana mamalu o le Atua.” Ma le talafeagai lava, sa lei tatai atu e Iesu manatu o tagata ia te ia e faapea o ia na faia faamalologa. I se tasi taimi na ia taʻu atu ai i se tagata na ia faasaolotoina mai le faasoesa i ai o temoni: “Alu atu ia oe i lou fale, i lou aiga, ma ia e taʻu atu ia te i latou mea tetele ua faia e le Alii [o Ieova] ia te oe, ma lona alofa ia te oe.”—Mareko 5:19.

Talu ai sa faia e Iesu ma ona aposetolo faamalologa e ala i le mana o le Atua, ua faigofie ai ona tatou malamalama i le pogai e lē manaomia ai i taimi uma le faatuatua o se tagata ina ia faamaloloina ai. Ae peitai, sa manaomia ona malosi le faatuatua o lē e faia faamalologa. I lea, ina ua lē mafai e soo o Iesu ona tuliese se temoni faapitoa e matuā malosi lava, na taʻu atu e Iesu ia te i latou le mafuaaga: “Ona o lo outou faatuatua itiiti.”—Mataio 17:20.

Le Fuafuaga o Faamalologa Faavavega

E ui lava e tele ni faamalologa na faia e Iesu i le taimi o lana faiva i le lalolagi, ae na te lei faamuamuaina se ‘faiva o faamalologa.’ I ana faamalologa faavavega—lea sa ia lei fai atu ai i tagata e totogi mai ni tupe, pe talosaga atu mo ni meaalofa—sa faatulaga lua atu i lana feau autū o le ‘talaʻiina atu o le tala lelei o le malo.’ (Mataio 9:35) Ua faapea mai le faamaumauga, i se tasi taimi, na “talia [fiafia] lea o i latou e ia, ua fetalai foi ia te i latou i le malo o le Atua, ma faamalolo i e na fia faamaloloina.” (Luka 9:11) I faamatalaga a Evagelia, sa masani ona taʻua Iesu o le “Aʻoaʻo” ae lei taʻua lava o “Sē e fai Faamalologa.”

Aisea la na faia ai e Iesu faamalologa faavavega? Muamua lava, ina ia faamausali ai o ia o le Mesia folafolaina. Ina ua faafalepuipuiina i se auala lē tonu Ioane le Papatiso, sa ia manao i se faamautinoaga e faapea ua ia faataunuuina le mea na auina mai ai o ia e le Atua e fai. Sa ia aauina atu ona soo ia Iesu ma fesili atu: “O oe ea lē maliu mai, pe matou te faatali i se tasi?” Mātau le tali atu a Iesu i soo o Ioane: “Ina o atu ia oulua, ma faailoa atu ia Ioane o mea na oulua faalogo i ai, ma vaai i ai; ua pupula tauaso ma ua savavali pipili, ua faamamāina lepela ma ua logo tutuli, ua faatutūina o e na oti ma ua folafolaina foi le tala lelei i e matitiva.”—Mataio 11:2-5.

Ioe, o le mea moni, e lē na o faamalologa na faia e Iesu, ae na faia foi isi galuega ofoofogia o loo faamauina i Evagelia, ua faamausaliina ai le faailoaga o ia o ‘Lē Maliu Mai,’ o le Mesia folafolaina. Sa lē manaomia e so o se isi ona “faatali i se tasi.”

Ae Faapefea Faamalologa Faavavega i Aso Nei?

Pe tatau la ona tatou faatalitalia le Atua e faamaonia mai lona mana i aso nei e ala i faamalologa? E leai. I galuega mamana na ia faia e ala i le mana o le Atua, na faamaonia ai e Iesu e aunoa ma se masalosalo e faapea, o ia o le Mesia lea na folafolaina mai e le Atua o le a afio mai. Ua faamaumauina i le Tusi Paia galuega mamana a Iesu mo tagata uma e faitau i ai. E lē tau manaomia ona faamaonia mai e le Atua lona mana e ala i le toe faia o na galuega mamana i tupulaga uma o tagata.

Mo le silafia, o faamalologa ma isi galuega mamana sa aogā mo na o se vaega. E oo lava i nisi tagata na vaaitino i vavega a Iesu, sa lei talitonu na lagolagoina o ia e lona Tamā faalelagi. ‘E ui lava sa ia faia faailoga e tele i o latou luma, ae latou te lei faatuatua ai ia te ia.’ (Ioane 12:37) O le pogai lena ina ua uma ona talanoaina meaalofa eseese faavavega—o perofetaga, tautala i gagana ese, faia o faamalologa, ma isi mea e tele—na tuuina atu e le Atua i sui eseese o le faapotopotoga Kerisiano o le uluai senituri, na faagaeeina ai le aposetolo o Paulo e faapea mai: “A e pe ni perofetaga, o le a faaleaogaina ia; pe ni gagana, o le a mavae ia; po o le iloa, o le a faaleaogaina lea. Auā ua tatou iloa faaleatoa, ma tatou perofeta faaleatoa; a e peitai pe a oo mai le atoatoa, ona faaleaogaina lea o le mea faaleatoa.”—1 Korinito 12:28-31; 13:8-10.

O le mea moni, o le faatuatua i le Atua e matuā tāua mo lo tatou lava lelei. Ae peitai, o le faavaeina o le faatuatua o se tasi i folafolaga sese o faamalologa, o le a na ona iu ai i le lē fiafia. E lē gata i lea, na lapatai mai Iesu e faatatau i le taimi o le iuga e faapea: “E tutū mai Keriso pepelo, ma perofeta pepelo, latou te faia foi faailoga tetele ma vavega, ina ia faasese ai i e ua filifilia lava, pe afai e mafai ai.” (Mataio 24:24) E lē gata i le faia o togafiti pepelo ma faiga taufaasese, ae o le a iai foi faaaliga o le mana o temoni. O le iuga, e lē tatau ona tatou maofa i tala o mea ofoofogia e tutupu, auā e mautinoa o nei mea, e lē o faaalia ai le faatuatua moni i le Atua.

Talu ai e leai se tasi i aso nei o mafai ona faia faamalologa e pei ona sa faia e Iesu, po ua faatauvaa ai ea la i tatou? E matuā leai lava. O le mea moni, o i latou na faamaloloina e Iesu, atonu pe na oo ina toe mamaʻi mulimuli ane. Sa oo ina matutua uma lava i latou ma maliliu. O aogā o faamalologa na faia ia i latou sa mo sina taimi puupuu. Peitai, o faamalologa faavavega a Iesu e iai se uiga tumau, auā o na faamalologa na faaatagia ai faamanuiaga i le lumanai.

O lea, ina ua uma ona suesueina le Afioga a le Atua, le Tusi Paia, na lē toe faatuatua ai loa ia Alexandre ma Benedita, e pei ona taʻua i le amataga, i faamalologa i la le faatuatua i aso nei ma togafitiga faataulaitu. Ae peitai, ua talitonu i laua e faapea, o faamalologa faavavega e lē mo na o le taimi ua tuanai. Aisea? E pei lava o le isi faitau miliona i le lalolagi aoao, ua la vaavaai atu i faamanuiaga o faamalologa i le lumanai i le pulega a le Malo o le Atua.—Mataio 6:10.

Lē Toe Iai le Maʻi ma le Oti

E pei ona tatou iloa i le amataga, o le sini autū o le faiva a Iesu, sa lē o le faamaloloina o maʻi ma faia isi vavega. Nai lo lea, sa avea le talaʻiga o le tala lelei o le Malo o le Atua ma ana galuega autū. (Mataio 9:35; Luka 4:43; 8:1) O lena Malo, o le auala lea o le a faaaogaina e le Atua e faataunuuina ai le faamaloloina faavavega o le fanau a tagata ma aveesea ai mea leaga uma ua aumaia e le agasala ma le lē lelei atoatoa i le aiga faaletagata. E faapefea ma o afea o le a ia faataunuuina ai lenei mea?

I le valoiaina o le lumanai, na faailoa atu ai e Keriso Iesu i lana aposetolo o Ioane se faaaliga faavaloaga: “O ona po nei ua oo mai ai le faaolataga, ma le mana, ma le malo o lo tatou Atua, ma le pule a lona Keriso.” (Faaaliga 12:10) Ua faaalia i faamaoniga uma e faapea, talu mai le 1914, ua lafo ifo ai i le lalolagi Satani, lē e sili ona tetee i le Atua, ma ua faagaoioia nei le Malo o se pulega moni! Ua faanofoina Iesu e avea ma Tupu o le Malo faa-Mesia ma ua nofo sauni nei e faia suiga tetele i le lalolagi.

I le lumanai matuā lata mai lava, o le a pule ai le malo faalelagi o Iesu i luga o se sosaiete fou o tagata amiotonu, ua avea o “le lalolagi fou.” (2 Peteru 3:13) O le a faapeī tulaga o le a iai i lea taimi? O se vaaiga matagofie faaata lenei: “Ona aʻu iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi . . . E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:1, 4.

Pe e mafai ona e vaai faalemafaufau i le ituaiga o olaga o le a iai pe a faataunuuina moni lava le faamaloloina faavavega o le fanau a tagata? “E le fai mai foi se tasi ua mau ai, Ou te maʻi; e faamagaloina agasala a le nuu e nonofo ai.” Ioe o le a faataunuuina e le Atua mea e matuā lē mafai e le au fai faamalologa i la le faatuatua ona faia. “E faaumatia e ia le oti e faavavau.” O le mea moni, “e soloiesea foi e le Alii o Ieova o loimata i mata uma lava.”—Isaia 25:8, 33:24.

[Ata i le itulau 7]

I le pulega a le Malo o le Atua, o le a faamaloloina ai faavavega le fanau a tagata