Faamanuiaga Faaʻoaina i Tauaofiaga Itumalo “O Ē Faasusulu atu le Malamalama”

I LE 2,700 tausaga ua mavae, na tusia ai e le perofeta o Isaia e faapea: “Auā faauta mai, e ufitia le lalolagi i le pouliuli, e ufitia foi nuu i le pogisa.” (Isaia 60:2) Maeu le moni o nei upu! Peitai, o loo iai se faamoemoe, auā ua faasusulu mai e Ieova le malamalama. I le tausaga ua mavae, o i latou uma o ē naunau i le malamalama o le Atua, sa valaaulia ma le mafana ina ia auai i le Tauaofiaga Itumalo “O Ē Faasusulu atu le Malamalama.”

O le uluai polokalama o le tauaofiaga na tauaaoina lea i Amerika i Matū ia Iuni. I masina na sosoo atu ai, sa tauaaoina ai foi lea lava polokalama e tasi i Europa i Sasae ma Europa i Sisifo, Amerika Tutotonu ma Amerika i Saute, Aferika, Asia ma motu o le sami. E faitau miliona i latou na auai. Ma maeu se ʻoa o taumafa faaleagaga na latou olioli ai!

“Afifio mai, Outou Uma o Ē Faasusulu atu le Malamalama!”

O le tele o nofoaga, na amataina a latou tauaofiaga i le aso Faraile ae na faauma i le afiafi o le Aso Sa. A o alala le au usufono i o latou nofoa i le taeao o le Aso Faraile, sa latou olioli e faalogo i se aotelega puupuu o le auala ua matuā susulu malosi ai le malamalama o Ieova i nei aso e gata ai. Ona sosoo ai lea ma le tulai mai o le taʻitaʻifono o le tauaofiaga i luga o le pulelaa. Na ia faamamafaina faapea, e ao ona avea Kerisiano moni ma ē faasusulu atu le malamalama ma faapea mai ma le mafana: “Afifio mai, outou uma o ē faasusulu atu le malamalama!” O le a fesoasoani le polokalama o le tauaofiaga i sui usufono uma ina ia faaauau ai pea ona faasusulu atu le malamalama o Ieova.

O le lauga autū na matuā faagaeetia ai le lautele e talisapaia le tauaofiaga atoa seia oo lava i lona faaiʻuga. Sa faamanatu atu e le failauga ia i latou uma na auai i le tauaofiaga e faapea, na mou atu faamoemoega pupula mo tagata i tuā lava i le faatoaga i Etena. Talu mai lava lena taimi, ua faatauasoina ai e Satani tagata mai le malamalama o le upu moni. (2 Korinito 4:4) Ae peitai, na afio mai Iesu “o le malamalama o nuu ese.” (Isaia 42:1-6) Na ia faaalialia pepelo a lotu, na faailoaina mai galuega sese a le pouliuli, ae na faamaualugaina foi le pule silisiliese a Ieova, ma talaʻi atu le tala lelei o le Malo. Sa faia foi e soʻo o Iesu lea lava galuega e tasi—ma o loo faaauau pea ona latou faia! (Mataio 28:19, 20) Na faapea mai ma le faagaeetia le failauga: ‘E mafai foi ona avea i tatou ma ē faasusulu atu le malamalama e pei o Iesu. E leai lava se isi galuega e sili atu ona tāua i o tatou aso. Ma e leai se isi faaeaga e sili atu.’

Ina ua lamalama faaiʻu le vaega muamua o le tauaofiaga, sa iai se mea na faateʻia ai. Sa toe foi atu le taʻitaʻifono o le tauaofiaga i le pulelaa ma faasilasila mai ai le tatalaina o le uluai sāvali o se faasologa o sāvali fou e fa. Na talia ma le fiafia lena taualumaga i se pati tele, ma sa tuuina atu i sui usufono uma na auai se kopi e tasi o lea sāvali.

I le afiafi o le Aso Faraile, na faasolo ifo ai le polokalama o le tauaofiaga i fautuaga faavae mo Kerisiano o ē faasusuluina atu le malamalama. O uluai lauga e lua na saunia ai ni fautuaga lelei i le auala e alofia ai le faaleagaina i le pogisa o le lalolagi. Talu ai ona e mafai e Satani ona liua o ia e fai ma agelu o le malamalama, e tāua ai la ona tumau i le malosi faaleagaga ina ia lē mafai ai e tulaga lē mamā o lenei lalolagi ona faaseseina i tatou. (2 Korinito 11:14) Na fautua mai Paulo: “Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.” (Roma 12:2) Na faalogoina e sui usufono uma faapea o le liliuina o se Kerisiano o se gaoioiga e faifai pea. E matuā faamamāina ma saʻo o tatou mafaufau a o tatou suesueina le Afioga a le Atua, ma faatatauina mea ua tatou aʻoaʻoina. I lea, o le a oo ai ina matuā sili atu ona tatou pei o Iesu, o lē “ua tumu i le alofa tunoa ma le faamaoni.”—Ioane 1:14.

Talavou o Ē Faasusulu atu le Malamalama

O le ʻafa lona lua o le afiafi o le Aso Faraile sa faasino atu lea i talavou. I le lauga muamua (“Talavou e—O ā Mea o Tou Tuliloaina?”) na faamālō atu ai i talavou Kerisiano o ē o loo fai ma faaaʻoaʻoga lelei o le faamaoni. Ae sa faamanatu atu foi ia i latou e faapea o loo fai i latou ma taulaʻiga faapitoa a Satani. E oo lava i se tagata taalo lelei na te manaomia se faiaʻoga na te toleniina. I se auala faapena, e manaomia ai e talavou le fesoasoani mai o latou mātua ma le faapotopotoga ina ia faaauau ai pea ona latou savavali i le malamalama.

Na faamamafaina lenei mea e ala i se tala matagofie faale-Tusi Paia, Faia le Mea e Tonu i Fofoga o Ieova, lea na faaiʻu ai le polokalama o le Aso Faraile. Na faamatilatila ai le faaaʻoaʻoga a le Tupu o Iosia. E ui ina o ia o se tama talavou, ae sa ia maumauai e auauna ia Ieova. Sa iai ni taaʻiga leaga na siomia ai o ia, ae ona o le taʻitaʻiga a le faitaulaga sili o Hilikia, ma lona lava foi alofa mo le Tulafono a le Atua, na faia ai e Iosia le mea e tonu i fofoga o Ieova. Talosia ia gaoioi foi faapena talavou Kerisiano i aso nei.

Ia Faapupula atu le Malamalama

Ina ua mavae se malōlōga i le po, ona toe usuaʻi mai foi lea o le au usufono i le tauaofiaga i le taeao o le Aso Toonai ua nofo sauni mo isi fautuaga atili faale-Tusi Paia e atiina aʻe ai. Sa faafiafiaina i latou. Ina ua maeʻa le talanoaina o le mau o le aso, ona faaauau lea o le polokalama i se lauga faasolo na faaauivi mai ai ni auala eseese e mafai ai e se Kerisiano ona faapupula atu lona malamalama. (Mataio 5:14-16) O le talaʻiga, o se tasi lea vala tāua, ma ua faatinoina foi e le amio lelei se vaega tāua. E pei ona fai mai le failauga, “o le talaʻiga e taʻu atu ai i isi le mea o tatou talitonu i ai, ae o le faatinoina o le alofa e faailoaina atu ai.”

Ona tataʻi atu loa lea o le au usufono i se fesoasoani tāua mo le talaʻiga—o sāvali. Ona o loo manatua lelei pea le faasilasilaga i le aso na seʻi faatoʻā mavae atu, na faafofoga ai sui usufono i tala o mea na tutupu e faamaonia ai le malolosi tele o nei mea faigaluega laiti. Na faalaeiauina sui usufono uma ina ia ave ia tele ni a latou sāvali i taimi uma, e sauni ai mo so o se avanoa e maua e ofoina ai.

Na sosoo ai ma le uaʻi atu i paeonia, i latou na o ē faalauiloa atu faataimi atoa le Malo, ma o ē o loo galulue mamafa e faasusulu atu le malamalama. Maeu lo tatou talisapaia o a tatou paeonia galulue mamafa! Ma o loo faateleina lo latou aofai. E oo lava i atunuu faatoʻā faatagaina ai le saolotoga mo tapuaiga, o loo faateteleina ai foi le aofai o paeonia. Sa faalaeiauina paeonia ina ia faatāuaina lo latou faaeaga. Na uunaia i latou e leʻi tofo lava i le faapaeonia ina ia manatunatu i o latou tulaga. Atonu e mafai e i latou na ona fuafua mea e fai, ina ia faasusulu atu ai lo latou malamalama i le auaunaga faataimi atoa.

O le avea ma sē faasusulu atu le malamalama e masani lava ona aofia ai ni taulaga, ma na faamamafaina lea i le lauga na sosoo mai ai, “Auauna ia Ieova ma le Agaga Faataulagaina.” Na aioi mai Paulo: “Ia outou tuuina atu o outou tino i le Atua, o le taulaga ola, ma le paia, [“e taliaina e le Atua,” NW].” (Roma 12:1) O le agaga faataulagaina totino, ua faaalia lea e i latou o ē tumau i lalo o sauāga. E faia e paeonia ni faataulagaina i aso uma ina ia tumau ai i le auaunaga faataimi atoa. O le mea moni, o Kerisiano moni uma lava latou te faia ni faataulagaina, i le tuuina atu o i latou lava mo le auaunaga ia Ieova na i lo le manatu faapito, ma ua latou faamuamua le sailia o mea faitino o lenei lalolagi. O lena gaoioiga e iʻu i faamanuiaga faaʻoaina mai ia Ieova.

Na avea lena lauga o se faatomuaga talafeagai i le lauga na sosoo mai ai—le lauga lea o le papatisoga. E mautinoa o le a lē galo lenei lauga ia i latou uma lava na papatisoina ai i lea Tauaofiaga Itumalo “O Ē Faasusulu atu le Malamalama.” O lo latou papatisoga o le a avea o se mea e fai ma tumutumuga i o latou olaga. Sa faamanatu atu ai ia i latou faapea ua latou mulimuli i le faaaʻoaʻoga a Iesu Keriso, o lē na papatiso ina ua 30 tausaga lona matua. E sili atu i lena, sa faafiafiaina sui papatiso uma ina ua faamanatu atu faapea ua latou “faatea ese ai galuega o le pogisa” ae ua latou faia se filifiliga e ‘auauna ia Ieova.’ (Roma 12:11; 13:12) Ma le olioli tele, na latou tutū ai i luma o le motu o tagata na auai i le tauaofiaga ma latou faia se faalauiloaga leotele i le lautele ae latou te leʻi ō atu mo le papatisoga. (Roma 10:10) Tatou te tatalo mo faamanuiaga a Ieova i luga o i latou uma o ē na faatinoina lo latou tuuina atu ia te ia e ala i le faatofuina i le vai mo le papatisoga i Tauaofiaga Itumalo “O Ē Faasusulu atu le Malamalama.”

O le afiafi o le Aso Toonai o le taimi lea na tuuina mai ai nisi o lapataiga taʻutino. Na auala mai lea i lauga na faaulutalaina e faapea “Alofia Mailei o le Matapeapea,” “Po o Faaleagaina ea e se Tasi Au Amioga Lelei?” ma le “Leoleo Faasaga i Ituaiga Uma o Ifoga i Tupua.” Na faaalia manino mai i nei lauga e tolu nisi o mailei o loo faaaogā e Satani e faavaivaia ai Kerisiano. E pei o Iuta le Sekara na avea ma aposetolo, peitai na ia faalataina Iesu i tupe. Sa tuputupu aʻe le talavou o Samuelu i le autū o le tapuaiga ia Ieova, ae sa ono lamatia o ia i nisi o aumea e sili ona leaga. (1 Samuelu 2:12, 18-20) O le ifo i tupua, e mafai ona aofia ai mea e pei o feusuaiga lē mamā ma le mānumanu. (Efeso 5:5; Kolose 3:5) Ioe, o le matapeapea, aumea leaga, ma le ifo i tupua e mataʻutia tele ma e tatau ona alofia.

Ona suia loa lea o le auala ma mataupu na aumaia i le polokalama o le tauaofiaga. O le lauga na sosoo ai na lagā ai ni fesili faale-Tusi Paia ma lo latou taliina. Mo se faaaʻoaʻoga, pe mafai ona e faamatalaina atu pe faamata e toe faatutūina mai tagata ua maliliu o ē latou te leʻi taliaina le upu moni a o leʻi oo mai le puapuaga tele? O le ā e mafai ona fai e se Kerisiano pe afai e lē mafai ona ia maua se paaga faaipoipo e talafeagai? Ina ia faalolotoina lo latou poto i le Tusi Paia, na faalaeiauina ai le au usufono ina ia faaaogāina le Watch Tower Publications Index (Faasino Tusi o Le Olomatamata) ae maise lava i lalo o le ulutala “Fesili Mai le Au Faitau.”

Le Faatasi mai o Keriso ma Lona Faaalia Mai

O le vaega faaiʻu o le polokalama o le Aso Toonai na taulai atu i le valoaga i se lauga faasolo ua faaulutalaina “Faamalamalamaina le Faatasi mai ma le Faaalia mai o Keriso.” Sa toe iloilo ai vala o le “faailoga” e faamaonia ai le faatasi mai o Iesu Keriso. (Mataio 24:3) I le vaega lona lua, sa talanoaina ai galuega a le “auauna faamaoni ma le mafaufau” o loo faia i le taimi nei. (Mataio 24:45-47) Na faasino mai ai e faapea, talu mai le 1919 na taʻimua ai ma le faamaoni lenei vasega o le auauna i le galuega o le talaʻiina o le tala lelei o le Malo. Ona aoaoina ai lea o se motu o tagata e toatele mai atunuu uma ina ia auai faatasi ma le vasega o Kerisiano faauuina i le faasusuluina atu o le malamalama o Ieova. Na faaiʻu e le failauga i lona faapea atu: “Seʻi o tatou faaauau ia ma le maelega ona lagolagoina le auauna faamaoni ma le mafaufau. Ua na o le faia lava o lea mea e mafai ai ona faalogoina i se aso e ē pei ni mamoe upu fiafia: ‘O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou a o lei faavaeina le lalolagi.’”—Mataio 25:34.

Na talanoaina e le failauga mulimuli le uiga ma aafiaga o le faaalia mai o Iesu Keriso. (1 Korinito 1:7) Maeu se mea o le a tupu pe a faataunuuina lena faaaliga! O le a faaumatia Papelonia Tele. O le a faaiʻuina le taua tele i le va o le lalolagi a Satani ma Iesu ma ana agelu i le faaumatiaina o lenei faiga o mea. Mulimuli ane, o le a saisaia Satani i le to e lē gata ina ia lē toe gaoioi. Ae o le a iai se mapusaga mo tagata o le Atua, faatasi ai ma le faaipoipoga a le Tamai Mamoe i le lagi ma le aumaia loa o se lalolagi fou. Na faafiafiaina e le failauga lana aofia i le tatalaina mai o le polosiua fou Po o Silasila Alofa Mai ea le Atua ia i Tatou? Maeu se fesoasoani matagofie o le a iai mo tagata lotomaulalo taitoatasi o ē mananao ia iloa e uiga i Lē na Foafoaina i tatou i lona manatu mai faatasi ma ana fuafuaga mo i tatou!

Auaiga Kerisiano

Na oo mai foi le aso mulimuli o le tauaofiaga, le Aso Sa. Ae peitai, sa tele pea mea e ao ona faailoaina mai. Ina ua maeʻa le talanoaina o le mau o le aso, sa tataʻi atu loa manatu i le aiga Kerisiano e ala i le lauga faasolo e faapea “Ia Fetausiai i Totonu o se Auaiga Kerisiano.” O le vaega muamua sa fesoasoani lea i ē uma na auai i le tauaofiaga ia iloa le auala autū i le mauaina o se aiga manuia faa-Kerisiano: o le faamuamua lea o mea faaleagaga. O le vaega lona lua sa faalaeiauina ai aiga ina ia faifai mea faatasi, e aofia ai le auai i sauniga, le auaunaga i le fanua, suesuega faaleaiga, po o evaevaga. Ma o le vaega lona tolu o le lauga faasolo na faamanatu mai ai i le au usufono lo latou faaeaga ma le avega tauave ina ia tausia ē ua matutua. Na faapea mai le failauga, “O o tatou uso matutua ma tuafāfine matutua o ni ē e tāua i le faapotopotoga.” Talosia ia tatou faatāuaina lo latou atamai ma faaaʻoaʻo i lo latou faamaoni.

Na sosoo ai ma le talanoaina o le uiga o le faaupuga ia ‘saʻo le mafaufau.’ (1 Peteru 4:7) O le tagata e saʻo lona mafaufau, e paleni, e mafaufau lelei, e finafinau, e lotomaulalo, ma e magafagafa. Na te iloaina le eseesega o le saʻo ma le sese, le moni ma le pepelo. Ae e sili atu i lena, na te taumafai ina ia tumau i le soifua malōlōina lelei faaleagaga.

O le lauga mulimuli i le polokalama o le taeao o le Aso Sa, na talanoaina ai lo tatou gauai atu i le Atua ma Keriso. Na faapea mai le failauga, “O le tāua o le gauai atu ma le faamaoni ia Ieova le Atua ma lona Alo, o Iesu Keriso, e ao ona matuā faamamafaina.” Sa faaauau ona ia faaalia mai auala ua aafia ai vala uma o o tatou olaga i lena mea. O le ā o le a fesoasoani ia i tatou ina ia tumau ai i le gauai atu? E fa uiga: o le alofa, le mataʻu faaleatua, le faatuatua, ma le loto maulalo.

Afiafi o le Aso Sa

Sa vave ona oo i le afiafi o le Aso Sa ma o le taimi lea mo le vaega mulimuli o le tauaofiaga. I le toatele sa foliga mai ua faatoʻā amata le tauaofiaga, ae o lea foi ua latalata i lona faaiʻuga.

Na faaulutalaina le lauga lautele faapea “Ia Mulimuli i le Malamalama o le Lalolagi.” O i latou uma lava na auai sa matuā maofa i le faamalamalamaina o le vaega a le malamalama faitino ina ia faatumauina ai le ola. Ona faailoa mai lea e le failauga o le tāua e sili atu o le malamalama faaleagaga. O le malamalama faitino e faatumauina ai lo tatou ola mo le faitau sefulu o tausaga, ae o le malamalama faaleagaga e faatumauina ai ona tatou ola pea e oo i le faavavau. O se vaega tāua o le lauga, o le talanoaina lea o fuaiupu taitasi o le Ioane 1:1-16, lena o loo faaalia mai ai o Iesu o le malamalama o le lalolagi. I aso nei, i nei tausaga faaiʻu o lenei faiga amioleaga o mea, ua matuā sili ai ona faanatinati i lo so o se isi taimi le ao ona mulimuli ia Iesu i lenei auala.

Ina ua uma le otootoga o le Suesuega o Le Olomatamata lea na faatulagaina mo lena vaiaso, ona faia loa lea o le lauga faaiʻu. Ma le fiafia lava, na faaalia e le failauga faapea o loo tele ni mea e ao ona tatou tepa taulai atu i ai mo aso o i luma. Mo se faaaʻoaʻoga, na ia faasilasilaina se kaseti fou o le tala faale-Tusi Paia, Doing God’s Will With Zeal. Ae e lē na pau ai lena. E iai foi se faasologa fou o kaseti vitiō ua faaulutalaina faapea The Bible—A Book of Fact and Prophecy, ua iai i le uluai kaseti le mataupu The Bible—Accurate History, Reliable Prophecy.

I le faaiʻuga, na faasilasila mai ai e le failauga e faapea i le 1993 o le a iai ni tauaofiaga itumalo e fa aso, e aofia ai ma mafutaga faapitoa faavaomalo i Aferika, Asia, Europa, ma Amerika i Saute. E ui lava ina ua faaiʻuina le Tauaofiaga Itumalo “O Ē Faasusulu atu le Malamalama,” ae e mafai ona faia nei e usufono ni sauniuniga mo le tausaga o sosoo mai.

Ona oo loa lea i le taimi ua tatau ai ona toe foi atu usufono i o latou aiga. Ma le mautinoa, sa sili atu ona latou maumauai na i lo le taimi muamua ina ia faaauau ona faasusulu atu le malamalama i lenei lalolagi ua faapogisaina. Ina ua uma aso e tolu ua faatumuina i mea lelei faaleagaga, sa matuā manino ai le uiga moni ma le tāua o upu na siiina mai i le mau mulimuli o le lauga faaiʻu e faapea: “O le Atua o Ieova lea, ua na faamalamalama mai ia te i tatou. . . . Vivii atu ia outou ia Ieova, auā e lelei o ia; auā e faavavau lava lona alofa.”—Salamo 118:27, 29.

[Ata i le itulau 15]

Le polokalama o le tauaofiaga i le faa-Rusia

[Ata i le itulau 16, 17]

Na lauga atu sui o le Vaega Pule i le tele o tauaofiaga

Sa faatasi ai sui usufono mai Iapani ia i latou sa iai i St. Petersburg, i Rusia

Sa faaalia i le tala faale-Tusi Paia faagaee loto le manaomia ona faia o le mea e tonu i fofoga o Ieova

Na faatinoina e sui fou o ē faasusulu atu le malamalama lo latou tuuina atu ia Ieova e ala i le papatisoga

Sa matuā naunau le au usufono i le polokalama i St. Petersburg

[Ata i le itulau 18]

Na olioli ē usufono e mauaina le polosiua fou “Po o Silasila Alofa Mai ea le Atua ia i Tatou?”