Tagata Talavou o Ē e ‘Faalagolago ia Ieova’

O TALAVOU, ua lē na o i latou e iai le aulelei, e oo foi i ē matutua, e lē na o i latou e iai le poto. (Faatusatusa i le Faataoto 11:22; Failauga 10:1.) Na i lo o lena, o i latou o ē e iai le aulelei tumau ma le poto moni, o i latou na e faalagolago ia Ieova ma faapea atu ma le loto atoa ia te ia: “O oe lava loʻu Atua.”—Salamo 31:14; Faataoto 9:10; 16:31.

I so o se vaipanoa o le lalolagi, ua faatuputupulaia ai se aofaiga tele o tagata aulelei, o ē talavou ma ē matutua, o loo faaalia lo latou poto e ala i le auauna i le Atua ma talaʻiina le tala lelei o le Malo o le Atua. Mo se faaaoaoga, manatunatu ia Sabrina, e valu tausaga le matua.

E nofo Sabrina i Siamani, ma o loo iai o ia i le vasega lua i le aʻoga. O ia lava le Molimau a Ieova muamua ua auai i lana aʻoga. Ae e faanoanoa lava, sa fai o ia ma taulaiga o upu faifai a tamaiti o le vasega seia oo lava i le aso na faatonuina ai tamaiti aʻoga e le faiaoga e aumai a latou tusi e fiafia i ai i le vasega. Sa filifili Sabrina e ave le tusi o Laʻu Tusi o Tala o Le Tusi Paia. I le po a o lumanai lea aso, sa sauniuni lelei ai o ia mo le vasega, e ui ina sa lē toʻa. Sa ia iloa e faapea, ailoga a tele sona avanoa ona o le latou vasega e toʻa 26 tamaiti. Peitai, sa maumauai o ia ina ia aua neʻi faalavelave ane se tasi i lana taulimaga o le a fai, ma sa ia mautinoa o le a fesoasoani Ieova ia te ia. Ina ua oo i le aso tuupoina, sa fesili mai le faiaoga po o ai ua aumai sana tusi ma manao e amata ona faaali atu. Sa faateia i latou uma ona e na o Sabrina lava sa aumai lana tusi. Sa tu o ia i luma o le vasega ma amata ona tautala, faitau, ma faaali atu ata mai le tusi ma faamatala i ai e faapea, o ia mea uma e faavae mai le Tusi Paia. I le faaiuga, sa fesili atu o ia i le vasega e faapea: “O ai e manao i sana tusi faapea?” Sa ia tuuina atu se tusi i le faiaoga, ma i isi aso na sosoo ai, sa ia tuuina atu ai isi tusi e sefulu i isi ana uo i le vasega. Na pau lava le faamatalaga a le faiaoga na fai i lana taulimaga e faapea: “Ou te leʻi vaai lava i se mea faapea.” Sa ia tuuina atu ia Sabrina le togi pito maualuga mo lana galuega.

O le mea moni, o le toatele o Molimau talavou, o ni tagata talaʻi fiafia o le tala lelei i le aʻoga. O le isi faaaoaoga o Erika, o se talavou talaʻi e 11 tausaga le matua, i Mekisikō. Sa aʻoaʻoina o ia mai lava i lona tamameamea ina ia alofa ia Ieova. E tulaga ese ana galuega i le aʻoga. O se tasi o ana meaaoga sa fai, o le saunia lea o ni faamatalaga e uiga i le AIDS (FFP), ma le puleaina e le tapaa ma le ʻava malosi. Sa sauniuni lelei o ia, i le faaaogāina o le mekasini o le Awake!, ma sa ia mauaina ai togi e sili ona maualuluga i le vasega. Sa fesiligia o ia e le faiaoga po o fea na ia aumaia ai faamatalaga, sa ia tuuina atu i ai mekasini o loo iai mataupu e faatatau i mataupu ia na talanoaina. Mulimuli ane, sa faaaogāina e le faiaoga nei mekasini e talanoa faatasi ai le vasega atoa i nei mataupu. Ona o le amio lelei a Erika, o lona faaaloalo i ona faiaoga, ma le maualuluga o ona togi, na agavaa ai o ia mo le mauaina o faailoga, tusi pasi, ma ni sikolasipi ua uma ona totogi ni ona vaega. E ui i lea, sa manatu o ia o le mea silisili o ia mea uma ua ia faataulauina, o le faailoaina atu lea o ia o se tasi o Molimau a Ieova, ua mafai ona ia tuuina atu ni lomiga faale-Tusi Paia, ma ua faasilisiliina ai foi le suafa o le Atua.

Ona sosoo ai lea ma Shannon, o se tama talavou e nofo i Niu Sila e sefulu tausaga. E na o le tasi lona mata e lelei, o le isi mata ua tipi ese ona o le kanesa na maua ai a o pepe o ia. Ina ua fitu tausaga o Shannon, na amata ai ona suesue lona tinā ma Molimau a Ieova. Peitai ane, e leʻi leva ona faia le suesuega a lona tinā, ae nonofo loa ma le isi tamaloa e aunoa ma le faaipoipoina, ma filifili ai e taofia lana suesuega. Sa augani atu Shannon ina ia faaauau pea lana suesuega o le Tusi Paia. Sa talia lana talosaga. Sa faaauau pea ona asiasi atu Molimau, ma mulimuli ane, sa auai uma lenei aiga e toatolu i le suesuega faale-Tusi Paia, ma sa agaigai foi i luma faaleagaga. Ina ua uma ona faaipoipo faaletulafono le tinā o Shannon ma lona tamāfai, ona papatisoina uma loa lea o i laua.

I se tasi aso na galulue faatasi ai Shannon ma le faletua o le ovasia o le matagaluega i le galuega i le fanua. Sa fesili se tagata o le aiga ia Shannon e faapea: “O le ā le mea na tupu i lou mata?” Na tali atu o ia: “Na maua i le kanesa, ma na tatau ai ona aveesea. Ae ua toeitiiti ona aumaia lea e Ieova ia te aʻu se mata fou i le Parataiso, ma o le mea lena ua ma ō mai ai i inei e taʻu atu ia te oe e uiga i lena fuafuaga.”