Tapuai i le Atua i le Upu Moni

Ina ia talileleia e le Atua se tapuaiga, e tatau ona faavae i le upu moni. (Ioane 4:23) Ua faailoaina mai e le Tusi Paia tagata tapuai moni faapea e iai i latou i “le ekalesia lea a le Atua soifua, o le poutu foi lea ma le lagolago o le upu moni.” (1 Timoteo 3:15) O i latou o loo faia aʻe ai le faapotopotoga a le Atua e lē gata ina talitonu i le upu moni o le Afioga a le Atua ae o loo ola foi e ogatusa ma lea upu moni ma latou puipui i ai, ma faailoaina atu i le lalolagi atoa.—Mataio 24:14; Roma 10:9-15.

UA LAUILOA Molimau a Ieova i la latou galuega o le aʻoaʻo atu o le Tusi Paia, lea o loo faia nei i le silia ma le 200 atunuu. E latou te suesue i le Tusi Paia ma aʻoaʻo atu o le upu moni lea, e aunoa ma le faafilogiaina i ni filosofia lē aogā faaletagata. Po ua e masani ma a latou aʻoaʻoga e faavae i le Tusi Paia? O le toatele ua faatalatu e faalogo atu i Molimau a Ieova ona o faamatalaga lē saʻo o loo faia faasaga ia i latou. Peitai ua valaauliaina tagata loto faamaoni ina ia filifili mo i latou lava pe faamata o mea o talaʻia e Molimau o se upu moni pe leai. O lea filifiliga tāua e lē tatau ona faavae i tala e faalogo ai. O le toatele o ē ua latou suesueina totino aʻoaʻoga a Molimau a Ieova ua matuā tele ni aogā ua maua ai.

Le Poto o le Upu Moni ua Aveesea ai le Fefe

Seʻi manatu foi mo se faataitaiga, i le tulaga o Eugenia. Sa tausia aʻe o ia i se aiga e malosi tele i le Katoliko. Sa avea lona tamā ma se tasi o ē na faamaopoopoina asiasiga a le pope i Mekisikō i le 1979. A o asiasi atu la i ana uo, na feiloai ai Eugenia ma Molimau a Ieova. Faatasi ai ma la latou fesoasoani na amata ai ona ia iloiloina ma le faaeteete mea ua fai mai ai le Tusi Paia. Ua ia manatua faapea: “I le amataga, na amata ona oso aʻe le fefe. O lea ua ou maua le upu moni! Ae o le uiga o lenei mea o le tele lava o oʻu talitonuga muamua e sese. E sese uma lava—loʻu aiga, o aʻu uo, o tagata ou te alofa i ai. Sa faapopoleina aʻu. Sa ou tuufesili pea ia te au lava po o ā ni uiga faaalia o lo matou aiga i le mea fou lea ua ou mauaina. A o mavae atu taimi ma faatasi ai ma le fesoasoani a Ieova, na amata ai ona ou faia se suiga e tusa ma lenei tulaga tele ua tupu ia te au. O se tasi la aso na ou filifili ai e talanoa totino atu i se tasi e mafana i ai lo matou aiga, o se polofesa o mea tau lotu. Na ou taʻu atu ia te ia loʻu faanaunauga atoa ina ia saili i le upu moni. Ona ia fai mai lea, ‘Afai e te fia maua le upu moni, vaai Molimau a Ieova.’”

E pei lava ona sa fefe i ai Eugenia, na tuli ese o ia e lo latou aiga. Ae peitai, na faaauau ona avatu ia te ia e Molimau le fesoasoani faaleagaga. Ua ia faapea mai: “Na faamalosia aʻu ina ia ou tu mo le upu moni. Sa ou iloa o se mea lea e aogā loʻu tau faasaga i ai. Na tāua tele le tulaga talileleia na ou mauaina mai i Molimau a Ieova. Na ou lagona le alofagia o aʻu i totonu o le faapotopotoga Kerisiano. O le pipii vavalalata atu i le faalapotopotoga a le Atua na fesoasoani ia te au ina ia foia ai le fefe e tauivi toatasi.”

Mātau le isi faaaoaoga. Na ola aʻe Sabrina i se aiga e masani ona talanoaina e lē aunoa le Tusi Paia. O le mea moni, na latou faatuina se ‘lotu a le aiga.’ Na fai ma masani a Sabrina le faatasitasi atu i sui o lotu eseese ina ia faaalialia a latou mea sese. Ina ua ofo atu e se tasi o Molimau a Ieova ia te ia se suesuega faale-Tusi Paia, na ia vave taliaina ma lona manatu ia faaalia ai le sese o a latou talitonuga. Fai mai a ia: “Ina ua mavae ona fai laʻu suesuega mo le sili atu i le tausaga, sa ou fefe i leiloa atu ‘laʻu upu moni.’ Na ou iloa le faigofie ona faaalialia o le taufaasese o le tele o lotu ia na ou auai ai, ae ua lē faigofie i Molimau a Ieova.”

O le fefe o Sabrina na lē faaauauina ai lana suesuega o le Tusi Paia ma Molimau a Ieova. Ae na mulimuli ane ia lagonaina le molemanava faaleagaga. Na ia filifili e toe amata lana suesuega ma oo ai loa ina ia taliaina lenei upu moni fou ua maua. Na agaʻi atu ina manao Sabrina e fetufaai ma isi i mea ua ia aʻoaʻoina. Na oo lava ina ia talosagaina le fia auai atu i Molimau i la latou faiva mai lea fale i lea fale. Ua faamatala mai faapea e Sabrina: “A o lei maua se faamaoniga ou te talaʻi faatasi ma Molimau a Ieova, na fesiligia aʻu: ‘Pe e te manao moni lava ia avea o se tasi o Molimau a Ieova?’ ‘Leai!’ na ou tali atu ai. Na toe oso aʻe loʻu fefe.” Mulimuli ane, a o faaauau pea ona auai i sauniga uma ma matauina tagata o le Atua ma le auala o latou faatatauina ai mataupu silisili o le Tusi Paia, na fai ai le faaiuga a Sabrina e faapea o le upu moni lava lea. Na papatisoina o ia ma o loo avea i le taimi nei ma faievagelia faataimi atoa.

Aisea ua Matuā Ese Ai?

Atonu e fesili se tasi, ‘Aisea ua matuā ese ai aʻoaʻoga a Molimau a Ieova mai isi lotu?’ O se vaaiga puupuu i mea o talitonu i ai Molimau o le a fesoasoani ia te oe ia iloa ai o i latou o ni Kerisiano faamaoni, o tagata aʻoga maelega o le Tusi Paia. Matou te faalaeiauina oe ina ia e sueina i lau lava Tusi Paia mau o loo aumaia i le aotelega o a latou talitonuga faavae o loo faaalia mai i luga.

E ala i le tagai totoʻa i mea o loo talitonu i ai Molimau a Ieova ma le auala o loo latou pipii atu ai i mea o loo aʻoaʻo mai e le Tusi Paia, e mafai ona faamanuiaina ai oe i le saolotoga ua aumaia e le upu moni. (Ioane 17:17) E leai lava se mafuaaga e fefe ai fua i le upu moni. Manatua le folafolaga a Iesu: “E iloa foi e outou le mea moni, e tuu saʻoloto foi outou e le upu moni.”—Ioane 8:32.

[Pusa i le itulau 6]

NISI O TALITONUGA FAAVAE O MOLIMAU A IEOVA

◯ O Ieova o le Atua e ona le malosi uma lava. O loo aliali mai lona suafa totino i le sili atu i le 7,000 taimi i uluai manusikulipi o le Tusi Paia.—Salamo 83:18.

◯ O Iesu Keriso o le Alo o le Atua, lea na afio mai i le lalolagi ia foaiina mai lona ola mo tagata. (Ioane 3:16, 17) O loo mulimuli Molimau a Ieova i aʻoaʻoga a Iesu Keriso ia o loo maua i Evagelia.

◯ O le igoa Molimau a Ieova o loo faavae mai i le Isaia 43:10, lea e fai mai: “Ua fetalai mai Ieova, O outou o aʻu molimau.”

◯ O le Malo lea o loo tatalo i ai tagata i le tatalo “Lo matou Tamā e,” o se malo faalelagi lea e lē o toe mamao ona aveesea lea o puapuaga uma ma tiga i le lalolagi ae faaavanoa ai le ala mo le Parataiso lea ua folafola mai e le Tusi Paia.—Isaia 9:6, 7; Tanielu 2:44; Mataio 6:9, 10; Faaaliga 21:3, 4.

◯ O i latou uma e faia le finagalo o le Atua ua iai le avanoa e olioli ai e faavavau i faamanuiaga o le Malo.—Ioane 17:3; 1 Ioane 2:17.

◯ E tatau ona sui e Kerisiano a latou amio i mea ua fai mai ai le Tusi Paia. E ao ona latou taumafai ia faamaoni, ia ola i se olaga e paia ma mamā tau amio, ma ia faaalia le alofa i o latou tuaoi.—Mataio 22:39; Ioane 13:35; 1 Korinito 6:9, 10.

[Ata i le itulau 5]

Ua faalauiloa atu e Molimau a Ieova le upu moni o le Tusi Paia i tagata i atunuu e silia ma le 200