Ieova—O le Atua o Fuafuaga
“E moni, e pei ona ou manatu e faapea lava ona taunuu, e pei ona aʻu pule e faapea lava ona faatumauina.”—ISAIA 14:24.
1, 2. O le ā ua fai mai ai le toatele e uiga i le fuafuaga o le olaga?
UA FESILI tagata i so o se mea e faapea: “O le ā le fuafuaga o le olaga?” Na faapea mai se taʻitaʻi faapolotiki i le itu i Sisifo: “Ua sili atu tagata i le taimi nei na i lo o le taimi muamua ua tuufesili, ‘O ai i tatou? O le ā la tatou fuafuaga?’” Ina ua fesiligia e se nusipepa tagata talavou i le fesili po o le ā le fuafuaga o le olaga, o tali lava e pei ona masani ai na tuuina mai e faapea: “Ia faia so o se mea e manao i ai lou loto.” “Ia matuā faaaogā avanoa uma.” “Ia matuā ola saoloto ma pule oe i au mea e fai.” “Ia fai ni fanau, ma fiafia ona oti lea.” E toatele ua manatu faapea, e na o le pau lava lenei o le olaga. E leai lava se isi na talanoa i se fuafuaga umi e ola ai i le lalolagi.
2 Na faapea mai se tagata aʻoga Saina (Confucian): “O le uiga moni o le olaga o loo maua i mea e masani ai lo tatou olaga faaletagata.” E tusa ai ma lenei mea, ua faaauau ai ona fananau mai tagata, tauivi mo le 70 po o le 80 tausaga, ona feoti lea ma mou atu e faavavau. Na faapea mai se saienitisi o le faaevolusione: “Atonu tatou te faananau atu mo se tali e ‘sili ona maualuga’—peitai e lē maua.” Mo nei tagata faaevolusione, o le olaga o se tauiviga mo le faaolaina, faatasi ai ma le oti e faaiua mea uma. Ua tuuina mai e na manatu faafilosofia se vaaiga e aunoa ma se faamoemoe mo le olaga.
3, 4. Ua faapefea i tulaga o le lalolagi ona aafia ai le auala o loo manatu ai le toatele i le olaga?
3 E masalosalo le toatele i le iai o se fuafuaga o le olaga, pe a latou vaai atu i le amataga mai o le tagata ua faatumulia i le tele o puapuaga. I o tatou taimi, ina ua tatau ona ausia e tagata se faatumutumuga o fale gaosimea ma faataulauina ni faiga faasaienitisi, pe tusa ma le piliona tagata i le lalolagi aoao ua matuā mamai po o le matelaina foi. E faitau miliona tamaiti e feoti i tausaga taitasi ona o ia mafuaaga. E lē gata i lea, e faafa taimi e sili atu ai ona toatele le aofai o ē ua feoti mai taua o lenei 20 senituri, na i lo o le aofai o ē na feoti pe a tuufaatasi tausaga e faselau na faatoʻā mavae atu. O soligatulafono, sauaga, faaaogā sese o fualaau faasaina, o aiga malepelepe, AIDS, ma isi lava faamaʻi e feaveai e feusuaiga lē mamā—e faateleina pea le lisi o mea faalemanuia. E lē o maua e taʻitaʻi o le lalolagi ni vaifofo mo nei faafitauli.
4 I le vaai atu i ia tulaga, na faaleo mai ai e se tasi tagata le mea ua talitonu i ai le toatele e faapea: “E leai se fuafuaga o le olaga. Afai o loo tutupu uma nei mea leaga, o lona uiga la ua faatauvaa tele le olaga.” Ma sa faapea mai se tamaloa matua: “Sa ou tuufesili pea i le mafuaaga ua ou iai i inei i loʻu olaga atoa. Afai e iai se fuafuaga, ia ou te lē popole lava i ai.” O lea, ona e toatele latou te lē o iloa pe aisea ua faataga ai e le Atua puapuaga, ua avea la tulaga faanoanoa o le lalolagi ma pogai ua leai ai so latou faamoemoe mo le lumanai.
5. Aisea ua faaopoopo atu ai lotu a lenei lalolagi i le fenuminumiai e uiga i le fuafuaga o le olaga?
5 E oo lava i taʻitaʻi lotu o loo fevaevaeai, ma lē mautonu e uiga i le fuafuaga o le olaga. Na faapea mai se taʻitaʻi o le St. Paul’s Cathedral i Lonetona: “Sa ou tauivi i loʻu olaga atoa e saili le fuafuaga o le olaga. . . . Ua ou lē taulau.” E moni, e toatele taʻitaʻi lotu ua latou aʻoaʻo e faapea, pe a feoti, e ō atu tagata lelei i le lagi, a o tagata leaga e ō atu i le afi i seoli e faavavau. Ae o lenei vaaiga ua faatumauina ai pea tagata i le lalolagi ina ia faaauau i ona ala o faapuapuagatiaina ai. Ma pe ana fai o le fuafuaga a le Atua ina ia ola tagata i le lagi, aisea la na ia lē faia ai i latou i le amataga o ni foafoaga faalelagi, e pei ona sa ia faia agelu, ma faasaoina ai tagata mai le tele naua o puapuaga? O lea, o le fenuminumiai e uiga i le fuafuaga o le olaga i le lalolagi, po o le teena o le talitonuga e faapea, e iai se fuafuaga, ua taatele.
Le Atua o Fuafuaga
6, 7. O le ā ua taʻu mai e le Tusi Paia ia i tatou e uiga i le Pule Silisili Ese i le Vateatea?
6 Ae peitai, o le tusi ua sili ona faasalalauina i le talafaasolopito, o le Tusi Paia, ua taʻu mai ai ia i tatou e faapea, o Ieova, le Silisili Ese i le vateatea aoao, o le Atua o fuafuaga. O le mea moni, ua faaalia mai ai e faapea, ua leva lava ona iai sana fuafuaga e faavavau mo tagata i le lalolagi. Ma pe a fuafuaina e Ieova se mea, o le a faataunuuina e aunoa ma le lē taulau. E pei lava ona faapogaia e le timu fatu ina ia tutupu aʻe, ua fetalai mai le Atua, “e faapea foi laʻu upu e alu atu ai loʻu gutu, e le foi mai fua ia te au; a e peitai e faia le mea ou te loto i ai, e manuia foi i le mea ou te auina atu ai.” (Isaia 55:10, 11) Po o le ā lava e fetalai mai ai Ieova, o le a ia faataunuuina “e faapea lava ona faatumauina.”—Isaia 14:24.
7 E mafai e i tatou o tagata ona tatou mautinoa atoatoa e faapea, e tausisi Lē e Ona le Malosi Uma Lava i ana folafolaga, auā o le Atua “e le mafai ona tala pepelo.” (Tito 1:2; Eperu 6:18) Pe a fetalai mai o ia ia i tatou o le a ia faia se mea, o lana afioga o le faamautinoaga lena i le faataunuuina. Ua pei lava ua faataunuuina. Ua ia folafola mai e faapea: “O aʻu o le Atua, e leai lava se tasi; o le Atua, e leai se ma te tutusa; o loo faaali talu mai le amataga o mea e mulimuli; mai anamua foi o mea ua le faia; o loo fai ane, ‘E tu laʻu pule, ou te faia foi mea uma ou te loto i ai’ . . . Na ou fai atu ai, ou te faaooina ai lava; na ou fuafuatia, ou te faia lava.”—Isaia 46:9-11.
8. Po o mafai ona maua le Atua e i latou o ē o loo mananao moni e iloa o ia?
8 E lē gata i lea, o Ieova “e le finagalo ia fano se tasi, a ia oo uma lava i le salamo.” (2 Peteru 3:9) Ona o lenei mafuaaga, e lē finagalo ai o ia i se tasi ina ia faagaloina o ia. Na faapea mai le perofeta e igoa ia Asaraia: “Afai foi tou te sailiili ia te ia, [le Atua] tou te maua o ia; a e afai e tuua o ia e outou, e tuua outou e ia.” (2 Nofoaiga a Tupu 15:1, 2) O lea, o i latou o ē e mananao moni e iloa le Atua ma ana fuafuaga, e mafai ona mautinoa le faia faapea, pe afai latou te faia se taumafaiga e sailia o ia.
9, 10. (a) O le ā ua saunia mo i latou o ē e mananao e iloa le Atua? (e) O le ā ua mafai ona tatou faia ona o le sailiili i le Afioga a le Atua?
9 Saili i fea? Mo i latou o ē e saili moni mo le Atua, ua ia saunia lana Afioga, le Tusi Paia. E ala i lona agaga paia, le malosi galue lava lea e tasi na ia faaaogā e foafoaina ai le vateatea, na faatonutonu ai e le Atua tane faatuatua e tusia i lalo mea tatou te manaomia ona iloa e uiga i ana fuafuaga. Mo se faaaoaoga, e tusa ai ma le valoaga a le Tusi Paia, na faapea mai le aposetolo o Peteru: “Auā e le o le loto o tagata na tuu mai ai le valoaga anamua, a o tagata paia o le Atua na talatalaina mai ina ua osofia mai e le Agaga Paia.” (2 Peteru 1:21) E tutusa lelei ma le manatu na folafola mai e le aposetolo o Pauro e faapea: “O Tusi Paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.”—2 Timoteo 3:16, 17; 1 Tesalonia 2:13.
10 Mātau, ua mafai e le Afioga a le Atua ona faia i tatou ina ia “atoatoa ona lelei ai, ia saunia ai,” ae lē tau o sina vaega po o le lē atoatoa lelei. E mafai ai ona mautinoa e se tasi po o ai le Atua, o ā ana fuafuaga, ma o le ā o loo ia manaomia mai i ana auauna. Ua faatalitalia lenei mea mai se tusi na tusia e le Atua. Ma e na o le pau lea o le puna e mafai ona tatou saili atu i ai e maua ai le poto saʻo o le Atua. (Faataoto 2:1-5; Ioane 17:3) I le faia faapea, o le a “le toe tama ninii i tatou o loo felafoaiina e pei o peau, ma feaveaiina i matagi uma lava o matāupu, i le pepelo o tagata, i togafiti leaga ua saunia e faasese ai.” (Efeso 4:13, 14) Na faaleo mai e le faisalamo le vaaiga tatau e faapea: “O lau afioga [a le Atua] o le sulu lea i oʻu vae, ma le malamalama i loʻu ala.”—Salamo 119:105.
Agaigai i Luma le Faailoaina Mai
11. Ua faapefea ona faailoa mai e Ieova ana fuafuaga i tagata?
11 I le amataga lava o le aiga o le tagata, na faailoa mai ai e Ieova ana fuafuaga agaʻi i lenei lalolagi ma tagata o loo iai. (Kenese 1:26-30) Ae ina ua teena e o tatou uluai mātua le pule a le Atua, ona paʻū atu ai lea o le tagata i le pogisa faaleagaga ma le oti. (Roma 5:12) E ui i lea, na silafia e Ieova o le a iai nisi o i latou o ē e mananao e auauna ia te ia. O le mea lea, i le faagasolo mai o senituri, ua agaigai ai i luma ona ia faailoaina mai ana fuafuaga i ana auauna faamaoni. O nisi o i latou o ē na ia fesootai atu i ai o Enoka (Kenese 5:24; Iuta 14, 15), Noa (Kenese 6:9, 13), Aperaamo (Kenese 12:1-3), ma Mose (Esoto 31:18; 34:27, 28). Na tusi le perofeta a le Atua o Amosa e faapea: “E le faia lava se mea e le Alii o Ieova, a e faaalia lona finagalo i ana auauna o perofeta.”—Amosa 3:7; Tanielu 2:27, 28.
12. Sa faapefea ona faasusuluina atili mai e Iesu le malamalama i fuafuaga a le Atua?
12 A o iai le Alo o le Atua, o Iesu Keriso, i le lalolagi pe ā ma le 4,000 tausaga talu ona mavae le fouvalega i Etena, na faailoaina mai ai le tele o nisi o faamatalaga auiliili o fuafuaga a Ieova. Ae maise lava e faatatau i le fuafuaga a le Atua e faavaeina se Malo faalelagi e pulea maia le lalolagi. (Tanielu 2:44) Na avea lena Malo ma matua autū o le aʻoaʻoga a Iesu. (Mataio 4:17; 6:10) Na aʻoaʻo o ia ma ona soʻo e faapea, i lalo o lena Malo, o le a faataunuuina ai le uluai fuafuaga a le Atua mo le lalolagi ma mo tagata. O le a toe faafoisia le lalolagi e avea o se parataiso, e nofoia e tagata lelei atoatoa, o ē o le a ola e faavavau. (Salamo 37:29; Mataio 5:5; Luka 23:43; 2 Peteru 3:13; Faaaliga 21:4) E sili atu i lena, na faataitaia e Iesu ma ona soʻo le mea o le a faia i lena lalolagi fou, e ala i vavega sa latou faia e ala i le mana o le Atua.—Mataio 10:1, 8; 15:30, 31; Ioane 11:25-44.
13. E tusa ai ma feutagaiga a le Atua ma tagata, o le ā le suiga na tupu i le Penetekoso 33 T.A.?
13 I le Penetekoso 33 T.A., i le 50 aso talu ona mavae le maliu o Iesu, na liligiina ifo ai le agaga o le Atua i le faapotopotoga o soʻo o Keriso. Na suitulaga i tagata Isaraelu lē faamaoni, i le avea ma tagata o le feagaiga a Ieova. (Mataio 21:43; 27:51; Galuega 2:1-4) O le liligiina ifo o le agaga paia i lena taimi, sa avea o se faamaoniga e faapea, mai i lena taimi ma faasolo mai ai, o le a faailoaina mai ai e le Atua upu moni e uiga i ana fuafuaga e ala mai i lenei faiga fou. (Efeso 3:10) I le uluai senituri T.A., na faavaeina ai le fausaga tau faalapotopotoga mo le faapotopotoga Kerisiano.—1 Korinito 12:27-31; Efeso 4:11, 12.
14. E mafai faapefea ona iloa e i latou o ē o saili i le upu moni le faapotopotoga o Kerisiano moni?
14 I aso nei, ua mafai e ē saili mo le upu moni ona iloa le faapotopotoga o Kerisiano moni e ala i lona faaalia pea o le uiga silisili o le Atua, o le alofa. (1 Ioane 4:8, 16) Ioe, o le alofa faaleuso o le faailoga lea e iloa ai le Faa-Kerisiano moni. Na fetalai Iesu: “O le mea lea e iloa ai e tagata uma lava o oʻu soo outou, pe afai ua outou fealofani.” “O laʻu poloaiga lenei, ia outou fealofani, pei ona ou alofa atu ia te outou.” (Ioane 13:35; 15:12) Ma na faamanatu atu e Iesu i lana au faalogologo e faapea: “O aʻu uo outou, pe afai tou te faia mea uma lava ou te fai atu ai ia te outou.” (Ioane 15:14) O lea, o auauna moni a le Atua, o i latou ia o ē o loo ola i le tulafono o le alofa. E lē na ona latou talanoa i ai, auā ‘e mate le faatuatua pe a leai ni galuega.’—Iakopo 2:26.
Agaʻi i Luma le Malamalama
15. O le ā e mafai ona mautinoa e auauna a le Atua?
15 Na valoia mai e Iesu e faapea, i le mavae atu o le taimi, o le a saga faamalamalamaina ai pea lava pea le faapotopotoga Kerisiano moni e tusa ai i fuafuaga a le Atua. Na ia folafola atu i ona soʻo e faapea: “A o le Fesoasoani, o le Agaga Paia lea, e auina mai e le Tamā i loʻu igoa, o ia lava na te aʻoaʻo ia te outou i mea uma lava.” (Ioane 14:26) Na fetalai foi Iesu e faapea: “Faauta foi, ou te ia te outou i aso uma lava, e oo lava i le gataaga o le lalolagi.” (Mataio 28:20) O lea, o le agaʻi i luma o le malamalama e faatatau i le upu moni e uiga i le Atua ma ana fuafuaga, ua faateleina i auauna a le Atua. Ioe, “o le ala o e amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.”—Faataoto 4:18.
16. O le ā ua taʻu mai e lo tatou malamalamaga faaleagaga ua pupula e uiga i le taimi o loo tatou iai e tusa ai ma fuafuaga a le Atua?
16 I aso nei, ua sili atu ona pupula lena malamalama faaleagaga na i lo o muamua, auā ua tatou iai i le taimi ua faataunuuina ai le tele o valoaga o le Tusi Paia, po o le latalata foi i lona faataunuuga. Ua faaalia mai ai ia i tatou e nei mea e faapea, ua tatou ola i “aso e gata ai” o lenei faiga leaga o mea. O le taimi lenei e taʻua o le ‘faaiuga o le faiga o mea;’ ona sosoo mai ai lea o le lalolagi fou a le Atua. (2 Timoteo 3:1-5, 13; Mataio 24:3-13) E pei ona valoia e Tanielu, ua lē pine ona sagai atu lea o le Malo faalelagi o le Atua e “tuʻimomomoina ma faaumatia ia malo uma lava [o loo iai nei], a o ia e tumau lava e faavavau.”—Tanielu 2:44.
17, 18. O ā valoaga sili ua faataunuuina nei?
17 Mai i valoaga ia ua faataunuuina nei, o le valoaga lea o loo faamauina i le fuaiupu e 14 o le Mataio mataupu e 24. I inā o loo fetalai ai Iesu e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” I le lalolagi aoao, ua faataunuuina ai lena galuega o le talaʻiina o le Malo e le faitau miliona o Molimau a Ieova. Ma o loo aufaatasi atu ia i latou le faitau selauafe o tagata i tausaga uma. Ua ogatasi lenei ma le valoaga i le Isaia 2:2, 3, lea o loo faapea mai, “o aso e gata ai” o lenei lalolagi leaga, o le a gasolo mai tagata mai atunuu uma i le tapuaiga moni a Ieova, ma ‘o le a ia aʻoaʻo foi ia te i latou i ona ala, ma latou savavali ai i ona ala.’
18 O nei tagata fou ua potopoto faatasi i le lafu mo le tapuaiga ia Ieova “e pei se ao,” e pei ona valoia i le Isaia mataupu e 60, fuaiupu e 8. Ua faaopoopo mai le fuaiupu e 22 e faapea: “O le toaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.” O lena taimi, ua faaalia i faamaoniga, o le taimi nei. Ma e mafai ona mautinoa e tagata fou e faapea, i le auaufaatasi ma Molimau a Ieova, ua latou fesootai ai ma le faapotopotoga Kerisiano moni.
19. Aisea tatou te faapea atu ai o ē fou o loo auaufaatasi ma Molimau a Ieova ua gasolo mai i le faapotopotoga o Kerisiano moni?
19 Aisea tatou te fai atu ai faapea ma le mautinoa? Auā o nei tagata fou, faatasi ma le faitau miliona o ē ua iai i totonu o le faalapotopotoga a Ieova, ua tuuina atu o latou ola i le Atua ma o loo faia lona finagalo. E aofia ai i lenei mea le ola e talafeagai ma le tulafono a le Atua o le alofa. O se tasi o faamaoniga o lenei mea, o nei Kerisiano ua latou tuʻi ‘i a latou pelu e fai ma uamea o suotosina, o latou tao foi e fai ma polo e teu aʻi vine ma e lē toe aʻoaʻo foi i taua.’ (Isaia 2:4) Ua faia e Molimau a Ieova uma i le lalolagi aoao lenei mea ona o loo latou faatinoina le alofa. O lona uiga, e lē mafai ona latou toe sii aʻe ni auupega faasaga i isi o latou uso, po o isi foi. I lenei tulaga ua tutasi ai i latou—e lē pei o lotu a le lalolagi. (Ioane 13:34, 35; 1 Ioane 3:10-12, 15) E lē avea i latou ma ni ē e aafia i ni fevaevaeaiga faalotonuu, ona ua latou faia aʻe se auuso i le lalolagi aoao ua faamausaliina i le alofa, “o le fusi lea e atoatoa ona lelei ai.”—Kolose 3:14; Mataio 23:8; 1 Ioane 4:20, 21.
Toatele e Mumusu e Iloa
20, 21. Aisea ua pouliuli faaleagaga ai le anoanoai o tagata o le lalolagi? (2 Korinito 4:4; 1 Ioane 5:19)
20 A o tupu pea le malamalama faaleagaga i totonu o auauna a le Atua, ae o loo magoto ifo le anoanoai o le lalolagi i le loloto o le pouliuli faaleagaga. Latou te lē o iloaina Ieova ma ana fuafuaga. Na faamatala mai e le perofeta a le Atua lenei taimi i lona faapea mai: “Auā faauta mai, e ufitia le lalolagi i le pouliuli, e ufitia foi nuu i le pogisa.” (Isaia 60:2) Ua tupu lenei mea ona ua lē faatinoina e tagata se naunau moni e aʻoaʻo e uiga i le Atua, po o lo latou faaalia foi o se faanaunauga e taumafai ai e faafiafia o ia. Na fetalai Iesu: “O le faasala foi lenei, ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama; auā e leaga a latou amio. Auā o i latou uma o e fai mea leaga e ʻinoʻino i latou i le malamalama, e le o mai foi i le malamalama, neʻi faailoa a latou amio.”—Ioane 3:19, 20.
21 O na tagata taitoatasi latou te lē o naunau moni e saili atu i le finagalo o le Atua. Na i lo o lea, o loo faaautu o latou olaga i le faia o o latou lava manao. E ala i le lē amanaiaina o le finagalo o le Atua, ua latou tuua ai i latou lava i se tulaga matautia, auā ua folafola mai i lana Afioga e faapea: “O le ua liliu ese ona taliga a e le faalogologo i le tulafono, e inosia lava lana tatalo.” (Faataoto 28:9) O le a latou molimauina le iuga o a latou lava filifiliga. Na tusi le aposetolo o Pauro e faapea: “Aua neʻi faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia.”—Kalatia 6:7.
22. O le lē mafaitaulia o ē e mananao e iloa le Atua ua latou faia nei le ā?
22 Peitai ane, e lē mafaitaulia i latou o ē ua latou mananao e fia iloa le finagalo o le Atua, o ē o loo saili ma le faamaoni mo ia, ma o ē o loo faalatalata atu ia te ia. Fai mai le Iakopo 4:8: “Ia outou faalatalata atu i le Atua, ona faalatalata mai lea o ia ia te outou.” O i latou ia na fetalai mai ai Iesu e faapea: “A o lē ua faamaoni ana mea e fai, e sau lava o ia i le malamalama, ia faaalia ana amio ina ua tatau i le Atua.” (Ioane 3:21) Ma maeu se lumanai ofoofogia ua fuafuaina e le Atua mo i latou uma o ē e ō mai i le malamalama! O le a talanoaina i le isi a tatou mataupu ni faamoemoega faamanititino.
O le a Faapefea ona E Tali?
◻ O le ā ua fai mai ai le toatele e tusa ai ma le fuafuaga o le olaga?
◻ Ua faapefea ona faailoa mai e Ieova ia lava o se Atua o fuafuaga?
◻ O le ā le faamalamalamaga sili na tupu i le uluai senituri T.A.?
◻ E mafai faapefea ona mataulia le faapotopotoga o Kerisiano moni i aso nei?