Faatuatua ia Ieova e Faataunuuina Ana Fuafuaga

“E fai lava le nuu mo tagata amiotonu, e nonofo ai pea i latou.”—SALAMO 37:29.

1. O le ā le fuafuaga a Ieova mo tagata, ma mo lenei lalolagi?

INA ua foafoaina e Ieova o tatou uluai mātua, o Atamu ma Eva, na ia faia i laua e lelei atoatoa. Ma na ia foafoaina i laua ina ia mafai ona la ola e faavavau i lenei lalolagi—pe afai la te usitaia ana tulafono. (Kenese 1:26, 27; 2:17) E lē gata i lea, na tuuina i laua e le Atua i se siomaga faaleparataiso. (Kenese 2:8, 9) Na fetalai atu Ieova ia i laua: “Ia fanafanau ia, ma ia uluola, ma ia tumu ai le lalolagi, ia faatoilalo i ai.” (Kenese 1:28) I lea, o le a oo ina faalautele atu e ē tupuga mai ia i laua le lalolagi, ma o le a avea ai lenei paneta ma parataiso e faatumulia i ituaiga o tagata fiafia ma lelei atoatoa. Maeu se amataga e sili ona lelei sa iai le aiga o tagata! “Ua silasila atu le Atua i mea uma ua na faia, faauta foi, ua matuā lelei lava.”—Kenese 1:31.

2. O ā fesili ua tulai mai ona o le tulaga o mataupufai a tagata?

² Peitai, o le tulaga o mataupufai a tagata ua iai mo le faitauafe o tausaga, ua faaalia mai ai le eseese ma le uluai fuafuaga a le Atua. Ua matuā mamao ese le tagata mai le lelei atoatoa, ma ua matuā leai se fiafia. Ua faanoanoa tulaga o le lalolagi, ma e pei ona valoia mai, ua sili atu ona leaga i o tatou taimi. (2 Timoteo 3:1-5, 13) O lea, e mafai faapefea ona tatou mautinoa e faapea, o le fuafuaga a le Atua mo tagata o le a taunuu moni i le lumanai lata mai? Pe o le a umi ea se taimi o le a faaauau ai pea tulaga pagatia?

O le ā ua Sese?

3. Aisea na lē faamutaina ai loa e Ieova le fouvale a tagata i le taimi lava lea?

³ O i latou o ē ua iai le poto saʻo o le Afioga faagaeeina a le Atua, ua latou iloaina le mafuaaga ua faatagaina ai e Ieova nei tulaga leaga i le lalolagi. Ua latou iloaina foi le mea o le a ia faia e uiga i ia mea. Mai le faamatalaga a le Tusi Paia, ua latou aʻoaʻoina ai e faapea, na faaaogaseseina e o tatou uluai mātua le meaalofa matagofie o le saolotoga e filifili ai, lea na tuuina e le Atua i tagata. (Faatusatusa i le 1 Peteru 2:16.) Ua la filifili sese le auala o le tutoatasi mai le Atua. (Kenese mataupu e 2 ma le 3) O le la fouvale na lāgā ai fesili e sili ona tāua, e pei o nei: Pe o iai ea i le Pule Silisili Ese i le Vateatea le aiā na te pulea ai tagata? Pe ua sili ea ona lelei lana pule mo i latou? Pe e mafai ona manuia pulega a tagata e aunoa ma le faatonutonuina mai e le Atua? O le auala mautinoa e maua ai tali i nei fesili, o le faatagaina lea o pulega a tagata ina ia iai mo le tele o senituri. O le a faailoa mai e iuga e aunoa ma se masalosalo pe faamata e mafai ona manuia tagata pe a vavae ese mai Lē na Faia i latou.

4, 5. (a) O le ā le iuga o le teena e tagata o le pule a le Atua? (e) O le ā ua faaalia mai ma le mautinoa ina ua mavae atu taimi?

⁴ Ina ua lafoaia e Atamu ma Eva le Atua, na ia lē toe faatumauina i laua i le lelei atoatoa. Ina ua aunoa ma lana lagolagosua, na la malaia ai. O iuga o le lē lelei atoatoa, tino matua, ma iu i le oti. E ala i tulafono tuufaasolo, na faasolo mai ai e o tatou uluai mātua na uiga leaga i ē uma e tupuga mai ia i laua, e aofia ai ma i tatou. (Roma 5:12) Ma ae ā iuga o le faitauafe o tausaga o le pule a tagata? Ua matuā leaga, e pei ona taʻua moni e le Failauga 8:9 e faapea: “E pule ai le tasi tagata i le tasi, e leaga ai o ia lava.”

⁵ Ua faaalia i le mavae atu o le taimi e aunoa ma se masalosalo le leai o se tomai i tagata e taitaia ai a latou mataupufai ma le manuia e ese mai i Lē na Foafoaina i latou. Na folafola mai e le tusitala faagaeeina o le Tusi Paia o Ieremia e faapea: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.”—Ieremia 10:23; Teuteronome 32:4, 5; Failauga 7:29.

E Lē Masuia le Fuafuaga a le Atua

6, 7. (a) Pe ua suia ea le fuafuaga a Ieova ona o le faitauafe o tausaga o talafaasolopito? (e) O le ā o aofia ai i le fuafuaga a Ieova?

⁶ Pe ua avea ea le mavae atu o le faitauafe o tausaga o le talafaasolopito o le tagata—ua matuā faatumulia i le leaga ma puapuaga—ua suia ai le fuafuaga a le Atua? Ua faapea mai lana Afioga: “Auā o loo faapea ona fetalai mai o Ieova, o le na faia le lagi; o ia lava o le Atua; o le tufuga o le na faia le lalolagi; o ia na faatumauina; na ia le faia fua, na ia faia ina ia āina.” (Isaia 45:18) O lea, na faia e le Atua le lalolagi ina ia ʻainā e tagata, ma o loo tumau pea lana fuafuaga.

⁷ Sa lē na ona foafoaina e Ieova le lalolagi ina ia ʻainā, ae na ia fuafuaina foi ina ia avea o se parataiso e olioli ma fiafia ai tagata lelei atoatoa. O le mafuaaga lena na valoia ai e le Tusi Paia e faapea, o le a iai le “lalolagi fou,” se sosaiete fou o tagata, o le a “mau ai e amiotonu.” (2 Peteru 3:13) Ma i le Faaaliga 21:4, ua taʻu mai e le Afioga a le Atua ia i tatou e faapea, i lana lalolagi fou, “o le a ia soloiesea loimata uma i o latou mata [o tagata], e leai foi se toe oti, po o se faanoanoa po o se aue, e leai foi se toe puapuaga.” Ona o ia mafuaaga, na mafai ai ona fetalai Iesu i le lalolagi fou o loo sau e avea o se “Parataiso.”—Luka 23:43.

8. Aisea e mafai ai ona tatou mautinoa o le a faataunuuina e Ieova lana folafolaga?

⁸ Talu ai o Ieova o lē e ona le malosi uma ma o Lē na Foafoaina le vateatea e tumu i le atamai, e leai se tasi e mafai ona faaletaulauina lana fuafuaga. “Ua tauto Ieova o ʻau, o loo faapea mai, ‘E moni, e pei ona ou manatu e faapea lava ona taunuu, e pei ona aʻu pule e faapea lava ona faatumauina.’” (Isaia 14:24) O lea, ina ua fetalai mai le Atua o le a ia faia lenei lalolagi ma parataiso e ʻaināina e tagata lelei atoatoa, o le mea moni lena o le a tupu. Na fetalai Iesu e faapea: “Amuia ē agamalu; auā e fai mo latou tofi le nuu.” (Mataio 5:5; faatusatusa i le Salamo 37:29.) E mafai ona tatou mautinoa ma gaoioi e talafeagai ma le faataunuuga o lena folafolaga. O le mea moni, e mafai ona tuuina atoatoa atu o tatou ola mo lena fuafuaga, e ui i lamatiaga.

Na Latou Faatuatuaina Ieova

9. O le ā na faia e Aperaamo e faaalia ai lona faatuatua ia Ieova?

⁹ O le toatele o tagata matatau i le Atua mai talafaasolopito na latou tuuina atoatoa atu o latou ola i le fuafuaga a le Atua mo le lalolagi, talu ai ona ua latou mautinoa o le a ia faataunuuina. E ui lava atonu na tapulaa lo latou iloa, ae na latou faatuatua i le Atua ma ola aʻe o latou olaga i le faia o lona finagalo. Mo se faataitaiga, o Aperaamo, o lē na soifua pe a ma le 2,000 tausaga a o leʻi savalia e Iesu le lalolagi—e mamao lava a o leʻi amata ona tusiaina le Tusi Paia. Na faatuatua o ia ia Ieova e faataunuuina Ana folafolaga. E foliga mai, na aʻoaʻoina Aperaamo e uiga i Lē na Foafoaina Mea mai lona augatama faamaoni o Semu, o lē na aʻoaʻoina e Noa. O lea, ina ua fetalai atu le Atua ia Aperaamo ina ia alu ese mai le nuu tamaoaiga o Uro i Kaletaia ma alu atu i le mea e lē masani ai, ma o se laufanua e matautia o Kanana, na iloa lelei e lena augatama e mafai ona ia faatuatua ia Ieova, ma o lea na alu ai o ia. (Eperu 11:8) I lea taimi, na fetalai atu ai Ieova ia te ia: “Ou te faia oe ma nuu tele.”—Kenese 12:2.

10, 11. Aisea na loto malie ai Aperaamo e ofoina atu lona atalii pele e toatasi o Isaako?

¹⁰ O le ā na tupu ina ua fanau mai Isaako ia Aperaamo? Na taʻu atu e Ieova ia Aperaamo e faapea, o ē tupuga mai ia te ia, o le a faia aʻe ai se nuu tele e ala mai ia Isaako. (Kenese 21:12) I lea, sa avea o se feteenaiga tele ina ua taʻu atu e Ieova ia Aperaamo, ma avea o se tofotofoga mo lona faatuatua, ina ia faataulagaina lona atalii o Isaako. (Kenese 22:2) Peitai, faatasi ma le faatuatua atoatoa ia Ieova, na gaoioi ai Aperaamo e gauai atu, i le tago atu i le agaese e faaumatia ai Isaako. I le toe sekone lava, na auina mai ai e le Atua se agelu ina ia taofia Aperaamo.—Kenese 22:9-14.

¹¹ Aisea na matuā usiusitai ai Aperaamo? Ua faaalia mai i le Eperu 11:17-19 e faapea: “O le faatuatua na fai taulaga ai Aperaamo ia Isaako, ina o tofotofoina o ia, o le na talia foi upu na folafolaina ua ia avatu ma taulaga o lona atalii e toatasi, sa fetalai mai le Atua ia te ia, E valaauina lau fanau ia Isaako. Ua manatu o ia e mafaia e le Atua ona toe faatu mai ia te ia nai e ua oti, na ia maua mai ai foi o ia i le faatusa.” E tali tutusa ma le manatu o loo taʻua i le Roma 4:20, 21 e faapea: “E lei masalo vale ia [Aperaamo] ma le le faatuatua i le mea na folafolaina e le Atua, . . . ua na mautinoa foi, e mafai ia te ia [le Atua] ona faia o le mea na folafolaina e ia.”

12. Na faapefea ona tauia Aperaamo mo lona faatuatua?

¹² Sa tauia Aperaamo mo lona faatuatua, e lē gata i le faasaoina o Isaako ma le avea o se “nuu tele” e auala mai ia te ia, ae faapena foi i se isi auala. Na fetalai atu le Atua ia Aperaamo: “O lau fanau foi e manuia ai atu nuu uma lava o le lalolagi; auā ua e usiusitai i laʻu upu.” (Kenese 22:18; O upu faasisipa o a matou) E faapefea? O le a auala mai le Tupu o le Malo faalelagi o le Atua i le gafa o Aperaamo. O le a aveesea atoatoa e lena Malo lenei lalolagi leaga o loo pulea e Satani. (Tanielu 2:44; Roma 16:20; Faaaliga 19:11-21) Ma, i se lalolagi mamā i lalo o le pule a le Malo, o le a atiina aʻe ai le Parataiso i le lalolagi aoao, ma o tagata mai “atunuu uma” o ē o loo faia le finagalo o le Atua, o le a olioli i le soifua maloloina lelei atoatoa ma ola e faavavau. (1 Ioane 2:15-17) Ma e ui lava ina sa tapulaa le iloa o Aperaamo i le Malo, ae na ia faatuatua i le Atua ma āloālo atu i luma mo lona faavaeina.—Eperu 11:10.

13, 14. Aisea na faatuatua ai Iopu i le Atua?

¹³ I ni nai selau o tausaga mulimuli ane, sa iai Iopu, o lē na soifua i le va o le 17 ma le 16 senituri T.L.M., i le laueleele lea ua taʻua nei o Arapi. Na soifua mai foi o ia a o lumanai ona tusia le Tusi Paia. O Iopu sa sao le amio “ma le amiotonu, sa mataʻu foi i le Atua, ma ʻaloʻalo ese i mea leaga.” (Iopu 1:1) Ina ua faapogaia e Satani se maʻi leaga, ma le tiga ia Iopu, “sa lē tautala i sina upu e agasala ai” lena tagata faamaoni i ona puapuaga uma. (Iopu 2:10, The New English Bible) Sa faatuatua Iopu i le Atua. Ma, e ui lava na te leʻi iloaina ni auiliiliga i le mafuaaga o lona puapuaga tele, ae sa tuuina atu atoatoa lona ola i le Atua ma Ana folafolaga e ui i lamatiaga.

¹⁴ Sa iloa e Iopu e faapea, e tusa lava pe oti o ia, o le a toe faafoisia mai o ia e le Atua i se aso i le ola e ala i le toetu. Sa ia taʻua lenei faamoemoe ina ua ia faapea atu ia Ieova le Atua: “E! fia natia aʻu e oe i le tuugamau ma ia e faaliloina aʻu, . . . ia e atofaina mai se aso mo aʻu, ma ia e manatua mai ai aʻu. Afai e oti le tagata, e toe ola mai ea o ia? . . . Ia e valaau mai, ona ou tali atu ai lea ia te oe.” (Iopu 14:13-15) E ui lava ina tigaina Iopu, ae na ia faataitaia le faatuatua i le silisiliesee o Ieova, i le faapea mai: “Seia oo lava i loʻu oti ou te le faateaina lava laʻu amio sao.”—Iopu 27:5.

15. Na faapefea ona faailoa mai e Tavita lona mautinoa i le folafolaga a Ieova?

¹⁵ E tusa pe ono senituri ina ua mavae atu Iopu, ma pe tusa ma le afe tausaga a o lumanai le afio mai o Iesu i le lalolagi, na faaleo mai ai e Tavita lona mautinoa i se lalolagi fou. Na ia faapea mai i salamo: “A o e faatalitali ia Ieova, o i latou lava ia e fai mo latou le nuu. E toe itiiti, ona leai lea o le tagata amio leaga; . . . A o e agamalu, e fai mo latou le nuu; e faafiafia foi i latou ia te i latou ona o le manuia e tele. E fai lava le nuu mo tagata amiotonu, e nonofo ai pea i latou.” Ona o le lē maluelue o lona faamoemoe, na faamalosi mai ai Tavita e faapea: “Ia e faatuatua ia Ieova . . . Ia e fiafia lava oe ia Ieova, ona foaiina lea e ia ia te oe o mea e manao i ai lou loto.”—Salamo 37:3, 4, 9-11, 29.

16. O le ā le faamoemoe sa iai i se ‘ʻau o molimau e toatele’?

¹⁶ I le faagasologa mai o senituri, sa iai i tane ma fafine faatuatua anamua lenei lava faamoemoe e tasi o le ola e faavavau i le lalolagi. O le mea moni, ua faia aʻe i latou i ‘se ʻau o molimau e toatele’ o ē na iai moni lava o latou olaga i ni tulaga lamatia ona o folafolaga a Ieova. O le toatele o na molimau anamua a Ieova sa faataugaina ma fasiotia ona o lo latou faatuatua, “ina ia maua e i latou le toe tu mai e sili ona lelei.” E faapefea? I le lalolagi fou, o le a tauia i latou e le Atua i se toetu e sili atu, ma le faamoemoe o le ola e faavavau.—Ioane 5:28, 29; Eperu 11:35; 12:1.

Faatuatua Molimau Kerisiano i le Atua

17. O le ā le mausali o le faatuatua o Kerisiano i le uluai senituri ia Ieova?

¹⁷ I le uluai senituri T.A., na faailoa ai e Ieova i le faapotopotoga Kerisiano fou faavaeina ni auiliiliga atili e uiga i le Malo ma lana pule i le lalolagi. Mo se faaaoaoga, na faagaeeina e lona agaga le aposetolo o Ioane e tusia le aofai o ē e auaufaatasi ma Iesu Keriso i le Malo i le lagi, e 144,000. O i latou ia o ni auauna faamaoni a le Atua o ē na “faatauina mai tagata.” (Faaaliga 7:4; 14:1-4) O le a latou pule mai i luga o le lalolagi “o ni tupu” faatasi ma Keriso i le lagi. (Faaaliga 20:4-6) Sa matuā mausali na Kerisiano i le uluai senituri e faatuatua ia Ieova i le faataunuuina o lana fuafuaga mo le Malo faalelagi ma ana aumea faalelalolagi o ē ua loto malilie e feoti mo lo latou faatuatua. O le toatele o i latou sa faia faapena.

18. E faapefea i Molimau a Ieova i aso nei ona faataitai i a latou aumea o aso ua mavae?

¹⁸ I aso nei, toetoe lava lima miliona Molimau a Ieova o loo iai lea lava faatuatuaga e tasi i le Atua e pei ona sa faia e o latou uso moni o ē na soifua i senituri a o lumanai i latou. O loo tuuina atu atoatoa foi e nei Molimau i aso nei, o latou ola i folafolaga a le Atua e ui i lamatiaga. Ua latou tuuina atu o latou ola ia te ia, ma avea le Tusi Paia atoa e faamalosia ai lo latou faatuatua. (2 Timoteo 3:14-17) O nei Molimau a Ieova i aso nei ua latou faataitai i soʻo o Iesu i le uluai senituri o ē na folafola atu o le a latou ‘anaana i le Atua na i lo o lo latou anaana i tagata.’ (Galuega 5:29) I lenei senituri, o le toatele o nei Molimau Kerisiano o loo sauaina leaga. O nisi ua oo lava ina fasiotia ona o lo latou faatuatua. O isi ua maliliu ona o maʻi, faalavelave faafuasei, po o le tino matua. Ae peitai, e pei o molimau faamaoni o taimi ua mavae, sa latou faatuatua i le Atua ona ua latou iloaina e faapea, o le a ia toe faafoisia mai i latou i le ola i lana lalolagi fou e ala i le toetu.—Ioane 5:28, 29; Galuega 24:15; Faaaliga 20:12, 13.

19, 20. O le ā ua tatou iloa e uiga i le valoaga a le Tusi Paia mo o tatou aso?

¹⁹ E talisapaia e Molimau a Ieova e faapea, o le aumaia o i latou mai atunuu uma i totonu o se auuso i le lalolagi aoao, ua leva ona valoia mai i le Tusi Paia. (Isaia 2:2-4; Faaaliga 7:4, 9-17) Ma o loo tuuina atu e Ieova ia te i latou e faia le galuega talaʻi i le lalolagi aoao, ina ia aoaoina mai i totonu tagata loto naunau i lana puipuiga ma lana taitaiga. (Faataoto 18:10; Mataio 24:14; Roma 10:13) O i latou uma nei ua tuu atu lo latou faatuatua atoatoa ia Ieova, i le iloa e faapea, o le a lē pine ona ia taitaiina atu lea o i latou i lana lalolagi fou ofoofogia.—Faatusatusa i le 1 Korinito 15:58; Eperu 6:10.

²⁰ Ua faailoa mai e valoaga o le Tusi Paia e faapea, ua iai nei le lalolagi a Satani i ona aso e gata ai, mo le toetoe lava 80 nei tausaga, talu mai le tausaga faailogaina o le 1914. Ua latalata atu lenei lalolagi i lona iuga. (Roma 16:20; 2 Korinito 4:4; 2 Timoteo 3:1-5) O le mea lea, e loto tetele ma maumauai ai Molimau a Ieova ona ua latou iloatino, ua toeitiiti ona tauaveina lea e le Malo o le Atua le puleaina atoatoa o mataupufai a le lalolagi uma. I le faamutaina o lenei faiga leaga ma faaulufale atu lana lalolagi fou amiotonu, o le a tafiesea atoatoa ai e le Atua tulaga leaga uma o loo iai i le lalolagi mo le tele o senituri.—Faataoto 2:21, 22.

21. Aisea e mafai ai ona tatou fiafia e ui lava i faafitauli o iai nei?

²¹ Ma, seia oo i le faavavau, o le a faaalia e le Atua lona manatu mamafa mai mo i tatou i le sasaa mai lea o faamanuiaga e matuā silisili atu ona tauia i lo so o se tiga sa tatou feagai ai i le taimi ua mavae. Ona o le tele naua o mea lelei o le a oo ia i tatou i le lalolagi fou, o le a tatou lē toe manatuaina ai faalavelave sa tatou feagai i le taimi ua mavae. Maeu se faamafanafanaga o le iloa e faapea, o le a ‘faamafola le aao o Ieova ma faamaoona le manao o mea ola uma lava.’—Salamo 145:16; Isaia 65:17, 18.

22. Aisea e ao ai ona tuu atu lo tatou faatuatua ia Ieova?

²² I le lalolagi fou, o le a tagai ai tagata faamaoni i le faataunuuga o le Roma 8:21: “Ia tuusaunoa ia lava mea na faia ia le faapologaina e le iu vale, a e oo i le saolotoga o le fanau a le Atua e manuia ai.” O le a latou tagai i le faataunuuina o lenei tatalo na aʻoaʻo ai e Iesu ona soʻo e faapea: “Ia oo mai lou Malo. Ia faia lou finagalo i le lalolagi, e pei ona faia i le lagi.” (Mataio 6:10) O lea, ia tuu atu atoatoa lou faatuatua ia Ieova ona o lana folafolaga lē masese e faapea: “E fai lava le nuu mo tagata amiotonu, e nonofo ai pea i latou.”—Salamo 37:29.

O le a Faapefea ona E Tali?

◻ O le ā le fuafuaga a Ieova mo tagata, ma mo lenei lalolagi?

◻ Aisea ua faataga ai e le Atua tulaga leaga i le lalolagi?

◻ Na faapefea ona faaalia e tagata faamaoni anamua lo latou faatuatua ia Ieova?

◻ Aisea e faatuatua ai auauna a le Atua i aso nei ia Ieova?

[Ata i le itulau 16]

Na foafoaina e le Atua tagata ina ia ola e faavavau i le fiafiaga i se lalolagi parataiso

[Ata i le itulau 18]

Na faatuatua Aperaamo i le mana o Ieova e toe faatutuina ai ē ua maliliu