“Alo Ese i Tala Sese”

UA TUMU le Tusi Paia i tala ma mea tutupu e uiga i tagata. E lē gata ua tatou fiafia e faitau i ai, ae tatou te maua mai ai foi aogā. Na tusi le aposetolo o Pauro i le faapotopotoga Kerisiano i Roma e faapea: “O mea uma foi na tusia anamua, na tusia ia e aʻoaʻo mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi.”—Roma 15:4.

Na auai Pauro lava ia i le faamatalaina mai o mea na tutupu. O loo tautala le Tusi Paia e uiga ia Pauro ma Panapa i le faaiuga o la laua uluai malaga faamisionare e faapea: “Ua oo foi i laua [i Suria i Anetioka], ona la faapotopotoina lea o le ekalesia, ma faamatalaina atu mea uma na faia e le Atua e i laua.” (Galuega 14:27) E mautinoa sa matuā faamalosia ai uso i nei mea na tutupu.

Ae peitai, e lē o mea uma na tutupu e faalaeiauina ai. I lalo o faagaeega, na lapatai atu ai Pauro ia Timoteo e faapea: “A o tala leaga o le vavau a fafine valevalematua, ia e ʻalo ese ai.” (1 Timoteo 4:7) Ma na ia tusi atu ia Tito e faapea, e ao i Kerisiano faamaoni ona “aua neʻi taofi i tala o le vavau faa-Iutaia, ma poloaiga a tagata o e liliu ese i le upu moni.”—Tito 1:14.

O ā nei tala sese, po o tala fatu? O nei faaupuga uma e lua ua mafua mai i le upu Eleni o le myʹthos (“tala faafagogo”). Ua taʻua e le International Standard Bible Encyclopaedia e faapea o le upu lenei ua faamatalaina ai “se tala (faalelotu) e leai sona fesootaiga ma mea moni.”

Sa faatumulia le lalolagi i aso o Pauro i na ituaiga o tala. O se faaaoaoga, o le tusi o le apokerifa a Topita, atonu na tusiaina e sili atu ma le lua selau tausaga a o lumanai Pauro. Ua taʻu mai i lenei tala e uiga ia Topita, o se tagata paia Iutaia, o lē na tauaso ina ua paʻū le otaota o se manu i ona mata. Mulimuli ane, ona ia auina atu lea o lona atalii o Tovia, e aoina mai se aitalafu. I le ala, i le faatonutonuga a se agelu, na maua ai e Tovia le fatu, le ate, ma le auona o se iʻa. Ona sosoo ai lea ma lona fetaiai atu i se fafine ua oti lana tane o lē, e ui lava ina faaipoipo faafitu, ae na tumau pea o se taupou, ona sa fasiotia ana tane taitasi e se agaga leaga i po o le faaipoipoga. Ona o uunaiga a le agelu, na faaipoipo ai Tovia ia te ia ma tuliesea ai le temoni e ala i le susunuina o le fatu ma le ate o le iʻa. O le auona o le iʻa, na toe faapupulaina ai mulimuli ane e Tovia mata o lona tamā.

E manino, o lenei tala e lē moni. E ese ai mai lona matagofie ma le fiafia i ai o faataulaitu, o loo iai mea sese. Mo se faaaoaoga, ua faapea mai le tala na molimauina e Topita le fouvalega a le ituaiga i mātū ma le toe faafoi atu o tagata Isaraelu i Nineva, o mea sese e lua na tutupu i le talafaasolopito o Isaraelu i le va e 257 tausaga. Peitai, ua faapea mai le tala e 112 tausaga le matua o Topita i le taimi o lona maliu.—Topita 1:4, 11; 14:1, Lomiga Fou Katoliko.

O na tala fatu, e ese mai le mea moni “o matua o upu e ola ai” na folafolaina e auauna faamaoni a le Atua. (2 Timoteo 1:13) O āuga na o mafaufauga, e ese mai i mea moni o talafaasolopito, o ituaiga o mea e faamatala mai e fafine matutua e lē amioatua. O tala nei e ao ona alofia e Kerisiano.

Tofo i Upu o le Upu Moni

E faapena foi tala o loo tele i aso nei. Na tusia faapea e Pauro: “Auā e oo i ona po latou te le mafafai ai ona talia o le mataupu e ola ai, a e . . . latou te liliu ese foi o latou taliga i le upu moni, a e liliu atu i tala o le vavau.” (2 Timoteo 4:3, 4) I ni vaega patino o le lalolagi, ua salalau atu ai ma tautaua ai tala faafagogo o mea mamana. O lea la, Kerisiano e, ia “faamasino i upu” ma le poto i tala faalelotu ina ia iloa pe ogatasi ma le Tusi Paia.—Iopu 12:11.

E manino lava, o le tele o tala e lē ogatasi ma le Tusi Paia. Mo se faaaoaoga, i le tele o vaega o le lalolagi, ua masani ona faalogo i tala e lagolagoina ai le talitonuga e faapea, e ola pea le solu faaletagata. Ua faamatalaina e nei tala pe faapefea ona oti le tagata, ona toe aliaʻe mai lea a lē i le tino o se pepe fou, o se agaga, o se manu, po o se tagata i se nofoaga ese.

Ae peitai, ua faaalia i le Afioga a le Atua e faapea, e lē ola pea le solu faaletagata, e oti le solu. (Esekielu 18:4) E sili atu i lena, ua faapea mai le Tusi Paia o ē oti ua leai se ola i le tuugamau, e lē mafai ona toe mafaufau, tautala, pe faia so o se mea. (Failauga 9:5, 10; Roma 6:23) I lea, o i latou ua faaseeina e tala pepelo na e lagolagoina ai talitonuga e faapea e ola pea le solu, e pei ona fai mai Pauro, ua “liliu ese” mai i “mataupu e ola ai” mai le Tusi Paia.

Tala Faafagogo o Mea Mamana

E taulai atu isi tala i galuega a tagata faataulaitu ma valovaloga. Mo se faaaoaoga, i isi vaega o Aferika, o nei faataulaitu ua faapea mai ua faaauupegaina e malosi matautia, e mafai ona suia i latou lava po o isi i ni manu fetolofi, manuki, ma manulele; e mafai ona felelei i le vanimonimo ina ia faataunuu la latou feau; e mafai ona faaali mai ma toe mou ese; e mafai ona ati atu i pa; ma e mafai foi ona vaai atu i mea ua tanumia i lalo o le palapala.

O le anoanoai o na ituaiga o tala, faatasi ma le salalau atu o le talitonu i ai, atonu e ono taaina ai nisi i le faapotopotoga Kerisiano, ma talitonu ai foi faapea e moni. Atonu latou te manatu e faapea, ona e lē mafai e tagata moni lava ona faia na mea, o i latou la o ē e mamana e maua le malosi mai i meafaiola agaga, o temoni, e mafai ona faia mea faapena. E foliga mai o se faavae mo lenei faaiuga o le 2 Tesalonia 2:9, 10, o loo faapea mai: “O lona sau foi e pei o le galuega a Satani, i le mana uma, ma faailoga, ma vavega pepelo, ma mea faasese uma o le amio leaga i e a fano; auā ua latou le talia le upu moni ma le fiafia i ai, ina ia faaolaina ai i latou.”

E ui e moni o loo faaalia i lenei mau e faapea, e mafai e Satani ona faia galuega mamana, ae o loo taʻua ai e faapea, o Satani foi o le pule o “faailoga ma vavega pepelo,” faapea foi ma “mea faasese uma o le amio leaga.” I le ogatusa ma lea, ua faaalia i le Tusi Paia o Satani o le taufaaʻoleʻole sili o lē “faasese i le lalolagi uma.” (Faaaliga 12:9) O ia o le matai i le faatalitonuina o tagata i mea e lē moni.

Ona o lenei mea, e oo lava i molimau ma tautinoga a i latou o ē na aafia i faiga faaagaga ma vai faataulaitu, e matuā lē maufaatuatuaina lava. O na tagata atonu e talitonu moni e faapea, ua latou vāai, faalogo, po o le tofo i ni mea patino; peitai, o le mea moni, latou te leʻi faia faapea. Mo se faaaoaoga, o loo iai i latou o ē e manatu ua latou talanoa ma agaga o ē ua oti. Ae ua faaseseina i latou, faaʻoleʻoleina, i le lavevea fua i faiga faasatani. Ua faapea mai le Tusi Paia o ē ua oti o loo “ō ifo i le mea taaligoligoa.”—Salamo 115:17.

I le tagai atu i le tala faamaumauina o le taufaaʻoleʻole o le Tiapolo, ua matuā masalomia ai le moni o tala faafagogo mamana. O le tele lava o faamatalaga ua mauaina e fafau aʻe i mafaufauga faataulaitu, faafaulai i ai pepelo a o faamatala ma toe faamatala i taimi uma.

O le toe taʻua o na tala fatu o le vavau ua lagolagoina ai le itu a le tamā o le pepelo, o Satani le Tiapolo. (Ioane 8:44) Ua latou faaosofia le fiafia i faiga faataulaitu e matuā inosia e Ieova. (Teuteronome 18:10-12) Latou te maileiina tagata i se faamoega o le mataʻu ma uputuu. E lelētioa la fautuaina e Pauro Kerisiano ina ia “aua . . . neʻi manatu i latou i tala o le vavau [“tala sese,” NW].”—1 Timoteo 1:3, 4.

Teena le Molimau a Temoni

O lea la, ae faapefea pe afai e foliga mai e moni tala? O nisi taimi, ua faamatala mai ai e ni mea na tutupu le talitonu o agaga po o faiga faaagaga, i le silisiliesee o Ieova ma le moni o ana Molimau. Pe e ao ea i Kerisiano ona toe taʻua na tala?

E leai, e lē tatau ona latou faia faapea. Ua faapea mai le Tusi Paia, ina ua alalaga mai agaga lē mamā e faapea o Iesu o le Alo o le Atua, sa “matuā vavao atu o ia ia te i latou, aua neʻi latou faaalia o ia.” (Mareko 3:12) E faapena foi ina ua uunaia e le temoni o valovaloga se teine e faailoa mai Pauro ma Panapa o “auauna nei tagata a le Atua silisili ese” ma o ē e talaʻia “le ala o le ola,” ona tuliesea ai lea e Pauro le temoni mai ia te ia. (Galuega 16:16-18) Sa leʻi faatagaina e Iesu ma Pauro, po o so o se tusitala o le Tusi Paia temoni e molimau mai e uiga i le fuafuaga a le Atua po o ana auauna tofiaina.

E mataina tele foi le soifuaga o Iesu Keriso i le olaga agaga a o leʻi afio mai i le lalolagi. Na ia iloa totino lelei Satani. Peitai, sa leʻi faafiafiaina e Iesu lona ʻau soʻo i ni tala e uiga i gaoioiga a Satani, pe na ia saunia foi ni auiliiliga e uiga i mea e mafai ma mea e lē mafai ona faia e le Tiapolo. O Satani ma ana temoni e lē o ni uo a Iesu. O i latou o ē ua tutuliesea, e fouvale, e inoino i le mea e paia, ma o fili o le Atua.

Ua taʻu mai e le Tusi Paia ia i tatou mea e manaomia ona tatou iloa. Ua faamatala mai ai po o ai temoni, e faapefea ona latou faaseseina tagata, ma pe mafai faapefea ona tatou alofia i latou. Ua faaalia ai e faapea, e sili atu ona mamana Ieova ma Iesu na i lo o temoni. Ma ua faatonuina i tatou e faapea, afai tatou te auauna ma le faamaoni ia Ieova, e lē mafai la e agaga leaga ona faia se mea e tumau ai le faaleagaina o i tatou.—Iakopo 4:7.

O lea la, mo ni mafuaaga tatau, ia teena e Kerisiano tala leaga o le vavau, tala e sili ona lē aogā na e lagolagoina ai sini o ē e tetee i le Atua. E pei lava o Iesu i lona ‘molimau atu i le upu moni,’ e faapena foi i ona soʻo i aso nei. (Ioane 18:37) Ua latou faalogo ma le poto i timaiga a le Tusi Paia e faapea: “O mea uma ua moni . . . ia outou manatunatu i ia lava mea.”—Filipi 4:8.

[Ata i le itulau 31]

O faailoaga uma o faiga faataulaitu e ao ona matuā alofia e Kerisiano moni