Le Tusi Paia—O se Tusi e Tatau ona Faitauina

E FAIGOFIE lava ona tau lē maua ni upu e faamatala ai le silisili atu o le Tusi Paia pe a talanoa se tasi e uiga i ai. O le mea moni, o se tusi ua matuā tele lona faasalalauina atu i le talafaasolopito atoa. O le Tusi Paia, o se tusi e aupito leva, e sili ona tele ona faaliliuga, e sili foi ona sii soo e tagata, sili ana taaʻiga, ma o se tusi foi e aupito sili ona faaaloalogia. Atonu o se tusi foi e sili atu ona faia ai o finauga. Ma e mautinoa, o se tusi na faasaoina mai i le tele o faasasaāga, susunuina, ma teteega sauā. Ae peitai, o le mea e faanoanoa ai, ona e tasi lava le uiga silisili lea ua lē o toe mafai ona faatatauina i le Tusi Paia. E foliga mai, ailoga o toe avea o se tusi o aupito sili ona faitauina i le lalolagi.

Atonu o loo iai i tagata se Tusi Paia i se vaipanoa o le fale, ae toatele ua lagona faapea, ua tele nauā feau e fai, ua leai se taimi e faitau ai le Tusi Paia. O le faitau tusi, sa o se uiga lauiloa e faapasi ai le taimi. Ae peitai, i nei aso, ua filifilia e le toatele e faaalu o latou taimi avanoa e matamata ai i le televise po o le fai ai o se isi mea. A o i latou o fiafia pea e faitau tusi, ua sili ia i latou le faitau o se mea faigofie ma e malamalama i ai. O le faitauina o le Tusi Paia, e manaomia le mafaufau loloto i ai, ma o le toatele o tagata, e lē o toe mafaufau loloto i mea o latou faitauina.

Ae peitai, e leʻi faasaoina le Tusi Paia ina ia na ona taatia i a tatou fata tusi. E iai ni mafuaaga lelei e tatau ai ona faitauina. Manatunatu i nisi o mea moni e uiga i ai.

E Lē Tioa ona Faasaoina!

O le upu “Bible” e sau mai le upu Eleni bi·bliʹa, o lona uiga o “tamai tusi.” Ua faamanatu mai e lenei mea ia i tatou e faapea, o le Tusi Paia ua faia aʻe i aofaiga o ni tusi—o nisi e lē matuā laiti tele! Sa tusia na tusi i se vaitaimi e sili atu i le afe onoselau tausaga. Ona o tusitala, o ni tane, sa faagaeeina i latou e se Puna e sili atu ona maualuga. Na faapea mai se tasi tusitala o le Tusi Paia: “E le o loto o tagata na tuu mai ai le valoaga anamua, a o tagata paia o le Atua na talatalaina mai ina ua osofia mai e le Agaga Paia.” (2 Peteru 1:21) Afai e moni le valoaga o le Tusi Paia, e moni foi la le Tusi Paia atoa. O nei “tamai tusi” ua faagaeeina e le Atua, ua faatumuina i manatu e silisili ona maualuluga o Ieova le Atua. (Isaia 55:9) E lē lētioa ona faasaoina le Tusi Paia mo se taimi umi!

Mo auauna a le Atua, ua avea pea le Tusi Paia o se tusi e sili ona tāua ia i latou. Ua latou ioe faatasi ma le aposetolo o Pauro, o ia o se tasi o tusitala o le Tusi Paia. Na ia faapea mai: “O Tusi Paia uma lava e faagaeeina e le agaga o le Atua ma e aogā e aʻoaʻo ai.” (2 Timoteo 3:16, NW) Ua talafeagai ai la ona avea le Tusi Paia, ma faavae o le faatuatua o Molimau a Ieova i aso nei. Na te filifilia a latou mataupu silisili ma pulea a latou amio. Latou te fautuaina ma le loto atoa e faapea, ia faitau e tagata uma nisi o vaega o le Afioga a le Atua i aso taitasi ma mafaufau loloto i ai ma talisapaia ana faamatalaga.—Salamo 1:1-3.

Le Masani e Faitau le Tusi Paia

O le masani e faitau le Tusi Paia, sa aogā i aso ua mavae. Sa poloaiina tupu o Isaraelu ina ia faia ni a latou lava kopi tusia o le Tulafono—lea ua avea nei o se vaega tāua o le Tusi Paia—ma sa faitauina e lē aunoa e faamanatu atu ai pea ia i latou le finagalo o le Atua mo i latou. (Teuteronome 17:18-20) O le lē taulau ona faia o lenei mea, sa faapogaia ai le pauu o le toatele o tupu.

O le tāua o le suesueina o le Tusi Paia o loo faataitaia i le tulaga o le perofeta matua o Tanielu. Ona o ana lava suesuega totino na faia i vaega o le Tusi Paia na sa maua i ona aso, na mafai ai e Tanielu, a o faaaunuuaina i Papelonia ona ‘malamalama i tusi’ e faapea, ua toeitiiti ona faataunuuina lea o se valoaga tāua lea na faamauina e Ieremia.—Tanielu 9:2.

I le taimi o le fanau mai o Iesu, sa faatalitali ma le mautinoa se tagata “amiotonu ma le mataʻu i le Atua” o Simeona e vaai i lē o le a avea ma Keriso, po o le Mesia. Sa folafolaina atu ia Simeona, o le a lē oo ia te ia le oti seia vaai i le Keriso. O lona toe taʻua o le valoaga a Isaia ina ua ia sapaia le pepe o Iesu i ona lima, ua faailoa mai ai, o Simeona, sa o se tagata na maelega e faitau i tusi o le Tusi Paia na sa tusia i ona aso.—Luka 2:25-32; Isaia 42:6.

Ina o talaʻi atu Ioane le Papatiso, “sa faatalitali le nuu” i le Mesia. O le ā ua faaalia mai ai i lenei mea? Ua faaalia ai e faapea, e toatele tagata Iutaia sa masani lelei ma valoaga e uiga i le Mesia na sa faamauina i le Tusi Paia. (Luka 3:15) O se mea mataʻina lenei, auā i na aso sa leʻi faigofie ona maua ni tusi. O kopi o tusi o le Tusi Paia, sa tusilimaina ma le matuā faaeteete lava, ma ona o le tulaga na tusia ai, sa taugata ma sa faigata ona maua. Na faapefea ona masani tagata ma faamatalaga i le Tusi Paia?

I le tele lava o tulaga, e ala i le faitauina i le lautele. Mo se faaaoaoga, na poloai atu Mose e faapea, i taimi faapitoa ua faatulagaina, sa tatau ona faitauina atu i tagata Isaraelu ua aofaga potopoto, le tulafono atoa lea na tuuina mai e le Atua. (Teuteronome 31:10-13) I le uluai senituri T.A., sa o se mea masani ona faitauina le Tusi Paia e tagata lautele. Na faapea mai le soʻo o Iakopo: “Auā talu o tupulaga anamua, ua ia Mose e ua talaʻi ia te ia i lea aai ma lea aai, o faitauina i sunako i sapati uma lava.”—Galuega 15:21.

I aso nei, ua faigofie ona maua sau lava kopi o le Tusi Paia. O nisi o nei “tamai tusi” o loo maua i gagana a le 98 pasene o le faitau aofai o tagata o le lalolagi pe a itiiti mai. Ae ui lava i lea, o se mea e faanoanoa ai ona e toatele e lē fiafia e suesue po o le ā o fai mai ai le Tusi Paia ia i latou. Atonu o se vaitaimi lenei o faiga faasaienisi, ae o le Afioga a le Atua, le Tusi Paia, o loo tumau pea ona matuā “aoga foi ia e aʻoaʻo ai.” O loo aumaia ai fautuaga aogā e faatatau i amioga, i faiā faaletagata, ma le tele lava o isi mataupu. E lē gata i lea, ua ofoina mai e le Tusi Paia le na o le tasi le faamoemoe mautinoa mo se lumanai filemu.

Faitau i ai e Lē Aunoa

O le mea lea, ua fai ai e Molimau a Ieova e avea o se vaega tāua o la latou galuega le faalaeiauina o le faitauina e lē aunoa o le Tusi Paia. I le fale gaosimea i lo latou ofisa ulu i Brooklyn, i Niu Ioka, o loo faailoa mai ai lenei apoapoaiga i mataitusi matamata tetele e faapea: “FAITAU LE AFIOGA A LE ATUA, LE TUSI PAIA I ASO TAITASI.” E faitau miliona tagata e ui ane ua latou vaaia nei upu, ma e iai le faamoemoe e toatele ua latou utagiaina.

I faapotopotoga e sili atu i le 73,000 a Molimau a Ieova i le lalolagi aoao, e faia ai sauniga o le Aʻoga o le Faiva Faatiokarate i vaiaso taitasi. O se vaega o le aʻoga, o le faitauina lea e le lautele o se vaega ua filifilia o le Tusi Paia. O i latou uma e auai, e tuuina atu foi i ai ni tofiga e faitauina ni nai mataupu o le faitau Tusi Paia faalevaiaso i o latou lava aiga. O i latou e tausisia lenei faasologa, e mulimuli ane, ua faitauina le Tusi Paia atoa.

O lenei faatulagaga ua ogatasi ma se tasi o tusi aʻoga o loo faaaogāina i lenei aʻoga. Ua faapea mai le Theocratic Ministry School Guidebook: “E ao ona faaaofia i lau faasologa totino se taimi e faitau ai le Tusi Paia lava ia. E matuā tāua tele le faitauina o le Tusi Paia atoa mai le amataga e oo i le faaiuga. . . . Ae peitai, o lou sini i le faitauina, e lē tatau ia na ona ufitia o le mataupu, ae ia maua le manatu tāua o le mataupu ma le faanaunauga ia manatua. Ia faaalu sina taimi e mafaufau loloto ai i mea o fai mai ai.”

O isi lomiga ua saunia e Molimau a Ieova, ua faapena foi ona faalaeiauina ai le faitauina o le Tusi Paia. Mo se faaaoaoga, i le soa o lenei mekasini, le Awake!, o loo aliai mai ai le faalaeiauga o loo mulimuli mai mo tagata talavou: “Po ua e faitauina . . . ea le Tusi Paia atoa? Ioe, o le Tusi Paia o se tusi telē, ae aisea e lē vaevae ai i ni vaega laiti le faitauina? . . . O tagata Perea ‘popoto’ sa ‘suesue ma le faaeteete i le Tusi Paia i aso taitasi.’ (Galuega 17:11) Afai e te mulimuli i se faasologa e lē aunoa o le faitau tusi mo le na o le 15 minute i le aso . . . , ona mafai lea ona e faitauina le Tusi Paia atoa i le tausaga e tasi.” Ioe, ua manatu Molimau a Ieova e faapea, e ao i Kerisiano i aso nei ona masani lelei ma le Tusi Paia, e pei lava ona sa iai auauna a le Atua i aso anamua.

I le manatuaina o lenei mea, ua faia ai e Molimau se faiga i lenei 20 o senituri mo le faitauina o le Tusi Paia e le lautele. Ua latou faia ni kaseti e pueina ai le faitauina o le Tusi Paia atoa i nisi o gagana. Ua faamaonia le lelei o lenei fesoasoani mo le toatele e foia ai ni toatuga i le faitauina o le Tusi Paia. O nisi e faalogologo i nei lipine a o faia galuega i le fale, aveina o se taavale, pe faia foi nisi o mea. O le nofo i lalo ma faalogologo ma le lē gasē i le faitauina o se vaega o le Tusi Paia a o mulimuli ai i lau lava kopi totino, o se mea e faaoso fiafia.

Afai e te leʻi faitauina lava i aso taitasi le Tusi Paia, aisea e lē faia ai ma au masani le faia faapea? E lē manaomia ona umi ona faia faapea i aso taitasi, ae o le a tele aogā e maua ai, auā o le faatatauina o le Tusi Paia, o le a mafai ai ona e gaoioi ma le poto ma olioli ai i se olaga tauia faaleagaga. O le a e gaoioi ai foi e ogatasi ma lenei poloaiga ua leva ona tuuina atu i le taʻitaʻi o Isaraelu, o Iosua e faapea: “E le teʻa i lou gutu le tusi o lenei tulafono, a ia mafaufau i ai i le ao atoa ma le po, ina ia e anaana e fai e tusa ma mea uma ua tusia i ai; ona manuia ai lea ia te oe o lou ala, ona e manuia ai lea.”—Iosua 1:8.

Ua faaalia i itulau o le Tusi Paia le fuafuaga alofa a Ieova mo tagata usiusitai. O le poto saʻo o lana Afioga faagaeeina e iu ai i le fiafiaga moni ma le faamoemoe o le ola e faavavau i Parataiso i se lalolagi fou ofoofogia e lē uma faamanuiaga. (Luka 23:43; 2 Peteru 3:13) Tau ina ia e puea lou avanoa e faitau ma suesue ai le Tusi Paia, ma aapa atu ai i lenei olaga matagofie.