Aogā Mai le Faitauina o le Tusi Paia i Lea Aso ma Lea Aso

“Amuia le tagata . . . [o lē] e naunau i le tulafono a Ieova; e faitau lemu ma mafaufau foi o ia i lana tulafono i le ao atoa ma le po.”—SALAMO 1:1, 2, NW.

1. (a) O le ā le faaaliga lauiloa o loo tusia i se tasi o itu o le fale faigaluega o le ofisa ulu o le Sosaiete o le Olo Matamata? (e) E faapefea ona aogā ia i tatou pe afai tatou te teuina totino i o tatou loto na upu?

“FAITAU LE AFIOGA A LE ATUA LE TUSI PAIA I LEA ASO MA LEA ASO.” I mataitusi lapopoa, o loo tusia ai na upu i se tasi o itu o se fale i Brooklyn, i Niu Ioka, o lomia ai e le Watchtower Bible and Tract Society ia Tusi Paia ma lomiga faale-Tusi Paia. O lea faalaeiauga e i ai se uiga e sili atu na i lo le tau ina fuafuaina ia vaaia e tagata o le lalolagi lena faaaliga. Ua iloa e Molimau a Ieova e tatau foi ona latou teuina i o latou loto. O i latou e faitauina le Tusi Paia e le aunoa ma faatatauina totino, latou te maua aogā mai i ana aʻoaʻoga, o aʻoaʻiga, faatonuga ma faapoto ai foi i le ala o le amiotonu ua faapea ona ia saunia.—2 Timoteo 3:16, 17.

2. Na faapefea ona faamamafa mai e le uso o Russell le tāua o le faitauina o le Tusi Paia?

² E talisapaia tele e Molimau a Ieova a latou fesoasoani e suesueina ai le Tusi Paia, e aofia ai Le Olomatamata, ma latou te faaaogaina nei mea e le aunoa. A e ua latou iloa, e leai se mea o na mea e mafai ona tutusa ma le Tusi Paia lava ia. I tuā i le 1909, na tusi atu ai Charles Taze Russell, le uluai peresitene o le Watch Tower Bible and Tract Society, i le au faitau o le mekasini o Le Olomatamata e faapea: “Aua lava neʻi galo o le Tusi Paia lo tatou Taiala ma e tusa po o le a lava la tatou fesoasoani ua aumaia e le Atua, o na mea ua na o ni ‘fesoasoani’ a e lē suia ai le Tusi Paia.”

3. (a) O le ā le aafiaga o “le Afioga a le Atua” i ē latou te faaaogaina soo? (e) Na faafia ona faitauina ma suesueina e tagata Perea le Tusi Paia?

³ Ua i ai i le Tusi Paia faagaeeina le loloto ma se mana e lē taitai ona maua i se isi tusi. “Auā o loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, o loo vaevae foi e oo lava i le vavaeeseina o le loto ma le agaga, o gaugātino foi ma aano o ivi, o loo faamasino foi i manatu ma filifiliga o le loto.” (Eperu 4:12) Na faamālō atu ma le mafana le soo o Luka i tagata Perea, ma taʻua i latou e sili ona ‘faatamalii o latou mafaufau.’ Auā e le gata ina latou fiafia e talia le upu na talaʻia e le aposetolo o Paulo ma lana aumea o Sila, a e sa ‘saili foi ma le faaeteete i Tusi i lea aso ma lea aso’ ina ia iloiloina faavae faale-Tusi Paia o mea na aʻoaʻoina.—Galuega 17:11.

Faitauina i Lea Aso ma Lea Aso

4. O le ā ua faailoa mai e Tusitusiga Paia i le pe faafia ona tatau ona tatou faitau i le Tusi Paia?

⁴ E lē o taʻua patino mai e le Tusi Paia pe faafia ona tatou faitau i ai. A e peitai, o loo faamauina ai faatonuga a Ieova ia Iosua ia ‘faitau lemu ma mafaufau i le tusi o le tulafono i le ao atoa ma le po’ ina ia gaoioi ai o ia ma le poto ma manuia ai i le faataunuuina o lana tofiga mai le Atua. (Iosua 1:8) Ua taʻu mai ia i tatou e faapea, o ai lava e fai ma tupu ia Isaraelu anamua, sa tatau ona ia faitauina le Tusi Paia “i aso uma lava o lona olaga.” (Teuteronome 17:19) Ua faapea atili mai: “Amuia le tagata e le savali i le filifiliga a e amio leaga, . . . a e naunau o ia i le tulafono a Ieova; e faitau lemu ma mafaufau foi o ia i lana tulafono i le ao atoa ma le po.” (Salamo 1:1, 2, NW) E le gata i lea, ua taʻu mai ia i tatou e le Tala Lelei na faamauina e Mataio e faapea ina ua teena e Iesu Keriso taumafaiga a Satani e faaosooso ia te Ia, na Ia siiina atu vaega o le Tusi Paia Eperu i le fetalai atu: “Ua tusia, E le na o mea e ʻai e ola ai le tagata, a o afioga uma e tūlei mai i le fofoga o le Atua.” (Mataio 4:4) E faafia ona tatou manaomia mea e ʻai? I aso uma lava! O le taumafaina foi la o meaai faaleagaga i lea aso ma lea aso e sili atu ona tāua, ona e aafia ai lo tatou faamoemoe mo le ola e faavavau.—Teuteronome 8:3; Ioane 17:3.

5. E mafai faapefea i le faitauina i lea aso ma lea aso o le Tusi Paia ona fesoasoani ia i tatou ina ia “savavali e tusa ma le Alii [Ieova] ina ia fiafia mai o ia” pe a oo mai ni tofotofoga o le faatuatua ia i tatou?

⁵ O i tatou uma lava taitoatasi e manaomia ona faamalosia i lea aso ma lea aso e ala mai i le Afioga a le Atua. I aso uma lava—i le aiga, i le galuega, i aʻoga, i le auala, pe a faia faatauga, i la tatou faiva—ua lafo mai ai ni luitau ia i tatou i lo tatou faatuatua. O le a faapefea ona tatou feagai ai ma nei mea? Pe o le a vave ona manatua ni faatonuga ma mataupu silisili o le Tusi Paia i o tatou mafaufau? Nai lo le faalaeiauina o se lagona o le faalagolago o le tagata ia te ia lava, ua lapatai mai le Tusi Paia e faapea: “O lē manatu o loo tu ia ina faaeteete ia neʻi paū.” (1 Korinito 10:12) O le faitauina o le Tusi Paia i lea aso ma lea aso, o le a fesoasoani lea ia i tatou ina ia savavali e tusa ma le Alii [Ieova], ina ia fiafia mai o ia ia te outou i mea uma,” nai lo le faatagaina o le lalolagi e omia i tatou ia pei o ana faiga.—Kolose 1:9, 10; Roma 12:2.

E Manaomia le Toe Faitauina Atoa o le Tusi Paia

6. Aisea e aogā ai le faitau ma toe faitau i le Tusi Paia e tusa lava pe ua soo atoa?

⁶ O le faitauina o le Tusi Paia e matuā ese lava mai le faitauina o se tusi o tala fatu. O le tele o tala fatu lauiloa ua fuafuaina e na o le faatasi ona faitauina; o le taimi lava e iloa ai le tala ma lona iuga ona gata ai lava lea i inā. I se eseesega, e tusa lava pe faafia ona tatou faitauina le Tusi Paia, e tele ni aogā tatou te maua i le toe faitau atoa i ai. (Faataoto 9:9) O le tagata e sogasoga, o le a faaauau pea ona ia mauaina mai ai e le aunoa ni uiga fou. O valoaga e faatatau i aso e gata ai o le a ia faatāuaina atili e tusa ai ma mea o ia vaaia, faalogo, ma oo totino ia te ia i masina faatoʻā tuanai atu. (Tanielu 12:4) A o ia faalauteleina lona poto masani i le olaga ma onosaia faafitauli, o le a talisapaia atili ai e le tagata faitau Tusi Paia sogasoga fautuaga ia atonu sa na ona ia faitauina faasamasamanoa i le taimi muamua. (Faataoto 4:18) Pe afai e maua o ia i se gasegase tugā, o folafolaga a le Tusi Paia e faatatau i le aveesea o le tiga ma le toe faafoisia i le soifua maloloina lelei, ua sili atu ona tāua ia te ia i lea taimi nai lo muamua. Pe a maliliu uo ma aiga pele, o le a avea ai le folafolaga o le toe tutū ma mea ua sili atu nei ona faatāuaina.

7. O le ā o le a fesoasoani ia i tatou i le taimi tatou te tauaveina ai se tiute tauave fou i le olaga, ma aisea?

⁷ Atonu ua e faitauina le Tusi Paia ma faatatau ana fautuaga mo ni tausaga. A e atonu ua e tauavea nei se tiute tauave fou i le olaga. Pe o e fuafua nei e faaipoipo? Pe o le a fai ea oe ma matua? Pe ua tuu atu ea ia te oe se tiute tauave i le faapotopotoga o se toeaina po o se auauna o le faiva e faafoeina? Pe ua avea oe ma se fai evagelia faataimi atoa, faatasi ai ma avanoa ua faaopoopo atu e talaʻi ai ma aʻoaʻo atu? Maeu le aogā o le toe faitau atoa o le Tusi Paia ma toe faia faapea a o i ai na tiute tauave fou i le mafaufau!—Efeso 5:24, 25; 6:4; 2 Timoteo 4:1, 2.

8. E faapefea i le suia o tulaga ona aliaʻe ai le manaomia ona aʻoaʻoina atili i mea na tatou manatu i ai ua uma ona tatou iloaina?

⁸ I le taimi ua mavae, atonu na e lelei tele i le faaalia o fua o le agaga. (Kalatia 5:22, 23) Peitai o le suia o tulaga, e te fesagai ai ma le manaoga o le toe suesue atili e uiga i na uiga faaleatua. (Faatusatusa i le Eperu 5:8.) Na faapea mai sē na avea muamua ma ovasia faimalaga o lē na tatau ona tuua lana auaunaga faapitoa ina ia tausia ona mātua ua matutua: “Na masani ona ia te au le manatu ua ou lelei tele i le faaalia o fua o le agaga. A e peitai o le taimi lenei, ua ia te au se lagona o lea faatoʻā ou toe amata.” E faapena foi i tane ma avā o ē o afaina se tasi o le paaga faaipoipo i se gasegase tugā faaletino po o faalogona, ona o le omia, e mafai ona fua mai ai ni āuga o le lotovaivai ona o le saunia o le tausiga mo le paaga maʻi. O le faitauina e le aunoa o le Tusi Paia o se puna lea o le tele o timaiga ma le fesoasoani.

Le Taimi e Ono Faia ai le Faitauga Tusi Paia

9. (a) O le ā e mafai ona fesoasoani i se tagata ua matuā pisi tele ina ia faaavanoa se taimi mo le faitauina i lea aso ma lea aso o le Tusi Paia? (e) Aisea ua tāua faapitoa ai mo toeaina le faitauina e le aunoa o le Afioga a le Atua?

⁹ O le mea moni, o tagata o matuā pisi nei, o le faaavanoaina o se taimi e faia ai e le aunoa se isi mea faaopoopo e avea lea o se luʻi. Peitai ane, e mafai ona tatou maua aogā mai le faaaʻoaʻoga a Ieova. Ua faailoa mai e le Tusi Paia na te faia mea i ‘taimi ua atofaina’. (Kenese 21:2; Esoto 9:5; Luka 21:24; Kalatia 4:4) O le talisapaia o le tāua o le faitauina e le aunoa o le Afioga a le Atua e mafai ona fesoasoani ia i tatou ina ia atofaina se taimi mo le faia faapea i la tatou faasologa i aso taitasi. (Efeso 5:15-17) E faapitoa lava mo toeaina ona manaomia ona faatulaga se taimi mo le faitauina e le aunoa o le Tusi Paia ina ia iloa ai o fautuaga o latou tuuina atu e faavae atoatoa mai i mataupu silisili o le Tusi Paia, ma o le a faapea ai foi ona atagia atu i le agaga o latou faaali atu “le poto mai lugā.”—Iakopo 3:17; Tito 1:9.

10. O le ā le taimi e faia ai le faitauga Tusi Paia i lea aso ma lea aso a i latou o loo maua le avanoa e faia ai faapea?

¹⁰ O le toatele o ē ua manuia a latou polokalama o le faitauina totino o le Tusi Paia e faia a latou faitauga i le taeao po a o lei amataina galuega o le aso. O isi ua latou mauaina e sili atu pe a i ai se isi taimi patino e faia ai. O kaseti ua pueina o le Tusi Paia (pe a o maua), ua fesoasoani tele i ē femalagaai e faaaogā tatau ai le taimi o alu ai i le taavale, a o isi Molimau e faalogologo atu i ai a o faia feau masani i le fale. O polokalama ua aogā mo Molimau i Europa, Aferika, Amerika i Mātū, Amerika i Saute, ma atunuu i le itu i Sasaʻe, o loo faaalia i le itulau e 20, ma le 21, i lalo o le ulutala “Le Taimi Latou te Faitauina ai ma Aogā Latou te Maua Mai Ai.”

11. E mafai faapefea ona faataulauina le faitauina o le Tusi Paia i lea aso ma lea aso e tusa lava pe utiuti le taimi o faaavanoaina?

¹¹ O le mea e sili ona tāua e lē o le aofaiga o le taimi e faaaluina i lau faitauga Tusi Paia i taimi uma taitasi, a e o le faia e le aunoa. Atonu e te iloa lava le tauia o oe i lou faitau i ai mo se itula po o le sili atu foi i le taimi e faia ai, faia ni sailiiliga faaopoopo, ma ia matuā manino lelei i le mataupu. A e pe o i ai i lau faasologa se avanoa e faia ai faapea i se tulaga e faia ai e le aunoa? Na i lo le mavae atu o aso e tele e mou atu e aunoa ma le faia o se faitauga Tusi Paia, pe e le sili ai ea ona faitau mo le 15 po o le 5 minute i aso taitasi. Fai ma au faaiuga le faitauina o le Tusi Paia i lea aso ma lea aso. Ona faaopoopo atu lea i ai o suesuega atili loloto pe afai e mafai.

Fesuisuiai Auala i le Faitauga Tusi Paia

12. O le ā le polokalama o le faitauga Tusi Paia o loo i ai mo sui fou o le aiga i Peteli ma ē e i le Aʻoga o Kiliata?

¹² E tele auala e mafai ona faitauina ai le Tusi Paia. E aogā ona faitauina mai i le Kenese e oo i le Faaaliga. O sui uma o le aiga Peteli i le lalolagi atoa o ē o auauna i le ofisa ulu po o se tasi o lala o le Sosaiete ua faatulagaina e tatau ona uma le Tusi Paia ona latou faitauina atoa i le tausaga muamua o la latou auaunaga i Peteli. (E masani ona aofia i lena mea le faitauina o mataupu e tolu pe lima, e faalagolago lava i lo latou uumī, po o le fa i le tolu itulau i le aso.) O ē o i le Aʻoga o le Olomatamata ma le Tusi Paia o Kiliata e tatau foi ona faitauina atoa le Tusi Paia a o lei oo i le faauuga. O le faamoemoega ina ia avea le faitauina o le Tusi Paia o se vaega i o latou olaga.

13. O le ā le sini ua fautuaina mo Molimau faatoʻā papatisoina?

¹³ E aogā foi mo Molimau faatoʻā papatiso ona faatutū i o latou luma le sini o le faitauina o le Tusi Paia atoa. I le 1975, na fesili atu ai se toeaina i se tama talavou Falani a o sauni atu o ia e papatiso, pe e i ai sana polokalama mautu mo le faitauina o le Tusi Paia. Talu mai ai lena taimi, ua na faitauina ai le Tusi Paia atoa i tausaga taitasi, e masani lava ona ia faitauina i le taeao a o lei alu atu o ia e faigaluega. O iuga ia te ia, ua ia faamatala mai e faapea: “Ua atili ai ona ou masani lelei ia Ieova. Ua mafai ai ona ou iloaina le auala e fesootai atu ai mea uma o faia e Ieova i lana fuafuaga ma le auala e tali mai ai o ia pe a tulai mai ni toʻatugā. Ua ou iloa moni ai lava Ieova, ma i le taimi e tasi, e tonu ma lelei ana gaoioiga uma.”

14. (a) Ina ia amata se polokalama o le faitauina totino o le Tusi Paia ma tumau ai i le faia faapea, o le ā le mea e manaomia? (e) O le ā o le a fesoasoani ia i tatou ina ia tamau ai i le mafaufau le otootoga faalauaitele o tusi taitasi o le Tusi Paia a o tatou faitau i ai?

¹⁴ Pe ua e faitauina atoa ea le Tusi Paia? Afai e leai, o le taimi lelei la lenei e amata ai. Ia faataoto se polokalama mautinoa, ona pipii atu loa lea i ai. Ia fuafua pe fia ni itulau po o ni mataupu o le a e faitauina i aso taitasi, po o le faavasega foi po o le a le umi o le taimi o le a faaaluina ma o le a le taimi e faia ai. E le o tagata uma o le a maeʻa ona latou faitauina atoa le Tusi Paia i le tausaga, a e o le mea tāua o le faitau lea i le Afioga a le Atua e le aunoa, e ao ona faia i lea aso ma lea aso pe afai e mafai. A o e faitauina le Tusi Paia, atonu o le a e iloa aogā e te maua pe a e faaaogaina nisi o faasino tusi e tamau ai i lou mafaufau sina otootoga faalauaitele o le mataupu. Afai ua faaliliuina le Insight on the Scriptures i lau gagana, e lelei ona autalu le auivi puupuu o ona mea tāua o loo i totonu o le Insight a o lei e faitauina se tusi patino o le Tusi Paia.* A e maise lava le uai atu i ulutala o lomia i mataitusi papanu o i le auivi. Po o le faaaogā foi faapena o le aotelega o loo aumaia i le tusi “All Scripture Is Inspired of God and Beneficial.”a

15. (a) O ā fautuaga o ofoina mai i le itulau e 16 ma le 17, e mafai ona fesoasoani e faaleleia atili ai lau faitauga Tusi Paia? (e) Nai lo le fai ma tu le tau ina faitau i ni itulau o le Tusi Paia, o le ā le mataupu tāua e ao ona tatou matuā uai atu i ai?

¹⁵ O le faitauina faalausosoo o le Tusi Paia e maua mai ai aogā, a e aua neʻi avea oe ma sē e faitau ona e tau ina ia faataunuu. Aua le tau ina faitauina ni ona itulau i aso taitasi ina ia e fai atu ai ua soo le Tusi Paia i lau faitau i tausaga taitasi uma. E pei ona faaalia i le pusa o “Fautuaga e Faaleleia Atili ai Lau Faitauga Tusi Paia” (itulau e 16 ma le 17) e tele ni auala e mafai ona e faitauina ma maua ai le fiafia i le Tusi Paia. E tusa lava po o le a le auala e te faaaogaina, ia faamautinoa o loo e fafagaina lou mafaufau ma lou loto.

Ia Malamalama i Mea o E Faitauina

16. Aisea e tāua ai le faaalu o le taimi e mafaufau loloto ai i mea o tatou faitauina?

¹⁶ Ina o aʻoaʻo atu i ona soo, na faatāua atu ai e Iesu lo latou malamalama i mea o ia fetalai atu ai. O le mea sa tāua, e le o le poto faalemafaufau, a e ia “lagona [i] o latou loto,” ina ia faapea ai ona faatatauina i o latou olaga. (Mataio 13:14, 15, 19, 23) O le mea e taulia i le Atua, o uiga moni o le tagata o i totonu, ma o le mea lena o loo suitulaga ai le loto. (1 Samuelu 16:7; Faataoto 4:23) O lea la, e faaopoopo atu i le mautinoa po o tatou malamalama i le mea o faatatau i ai lea vaega o le Tusi Paia, e manaomia ona tatou mafaufau loloto i ai, manatunatu i lo latou faatatauga i o tatou lava olaga.—Salamo 48:9; 1 Timoteo 4:15.

17. O ā nisi o vala eseese atonu e mafai ona tatou mafaufau loloto ai i mea o tatou faitau i ai i le Tusi Paia?

¹⁷ Ia taumafai ina ia e iloaina mataupu silisili o tala o loo i ai i le Tusi Paia, ina ia mafai ai ona e faatatauina na mea i tulaga lua te fetaiai. (Faatusatusa i le Mataio 9:13; 19:3-6.) A o e faitauina ma mafaufau loloto i uiga ofoofogia o Ieova, ia faaaogā lena avanoa ina ia faamalosia ai lau faiā totino ma ia, ia atiaʻe ai i totonu ia te oe se uiga malosi mo le amioatua. Pe a e faitauina faamatalaga e faatatau i le fuafuaga a Ieova, ia e mafaufau po o le ā le mea e mafai ona e faia ina ia e galue soosoo tauʻau atu i ai. Pe a e faitauina fautuaga tuusao, nai lo lou faapea ifo ia te oe lava, ‘Ua ou iloa le mea lea,’ a e ia e fesili ifo, ‘Po o oʻu faia ea le mea lea o loo fai mai ai?’ Afai o loo faia, fesili ifo ia te oe lava, ‘O ā ni auala e mafai ai ona ou “faatatauina atoatoa?” ’ (1 Tesalonia 4:1, NW) A o e aʻoaʻoina tapulaa a le Atua, ia e matauina foi faaaʻoaʻoga a le Tusi Paia i olaga moni o i latou o ē na ola aʻe e talafeagai ai ma na tapulaa, faapea ma i latou sa lei faia faapena. Manatunatu i le mafuaaga na ala ai ona latou faia faapea ma pe o le a foi le iuga na oo i ai. (Roma 15:4; 1 Korinito 10:11) Pe a e faitau i le soifuaga o Iesu Keriso, ia manatua o Iesu o ia lea ua tuu atu i ai e Ieova le pule tau tupu i le lalolagi atoa; ia faaaogā le avanoa e faamausali atili ai ia te oe le faanaunau atili atu i le lalolagi fou a le Atua. E le gata i lea, ia iloilo ni auala e mafai ai ona e faaaʻoaʻo atoatoa atu ai i le Alo o le Atua.—1 Peteru 2:21.

18. E mafai faapefea ona tatou faapaleniina le faitauina o le Tusi Paia ma lo tatou faaaogāina o mataupu mo suesuega ua saunia e ala mai i le “auauna faamaoni ma le mafaufau”?

¹⁸ O le mea moni, o lau faitauga Tusi Paia e lē tatau ona suia ai lou faaaogaina o mataupu na e sili atu ona lelei mo suesuega ua faapea ona saunia e ala mai i le “auauna faamaoni ma le mafaufau.” O lena foi mea o se vaega o sauniuniga a Ieova—o se mea e matuā tāua tele. (Mataio 24:45-47) Ia mautinoa o le faitauina e lē aunoa o le Afioga a le Atua e i ai sona nofoaga tāua i lou olaga. Pe afai e mafai, “FAITAU LE AFIOGA A LE ATUA LE TUSI PAIA I LEA ASO MA LEA ASO.”

[Faaopoopoga i lalo]

O le a Faapefea ona E Tali Mai?

◻ Aisea e aogā ai le faia o sina faitauga Tusi Paia i aso taitasi?

◻ Aisea e manaomia ai ona tatou faitau ma toe faitau i le Tusi Paia e tusa lava pe ua soo faafia?

◻ I lau lava faasologa, o le ā le taimi e sili ona lelei mo le faitauina o le Tusi Paia i lea aso ma lea aso?

◻ A o e faitauina ma toe faitauina le Tusi Paia e tusa lava pe ua soo faafia, o le ā e mafai ona e faia ina ia suifefiloi ai lau polokalama faatulagaina o le faitauina o le Tusi Paia?

◻ Aisea e matuā tāua ai le mafaufau loloto i mea o tatou faitauina?

[Ata i le itulau 15]

Pe o e faitauina ea le Tusi Paia po o e faalogologo i ona lipine ua uma ona pueina i aso taitasi?