Aisea e Naunau ai i Lotu?

I ATUNUU uma lava o i lenei lalolagi, ua iai se naunau i lotu. I le isi itu, e toatele foi i latou e faapea mai ma le manino, latou te lē fiafia i lotu. Ae pe sa latou lagona ea faapena i taimi uma?

O le natura faaletagata e faapea, e lē faamalieina moni se tagata i na o mea faitino. E manaomia e tagata mea faaleagaga. O se olaga i aso taitasi ua faaautu i le na o le mauaina o mea faitino e manaomia, faatasi ma taimi o faafiafiaga, e lē faamalieina atoatoa ai manaoga i totonu o le tagata. E ese ai mai meaola, o tagata e naunau e fia iloa, ‘Po o le ā le fuafuaga o le olaga?’ ‘O lenei olaga puupuu, lea e aofia ai le tele o mea matagofie, ae e tele foi mea matagā, pe na pau ea lea?’ Pe e te leʻi fesiligia ea ni fesili e pei o nei?

Peitai, o le toatele o le faitau miliona o tagata o loo soifua mai nei, sa tutupu aʻe i ni siomaga sa faavaivaia ai so o se naunau uigā i le lotu. O lena taaʻiga atonu e faapogaia mai i o latou mātua, mai faiaoga, mai uo, pe mai le malo foi.

O Skalabrino, o se tama talavou mai Alapania, na ia faamatala mai e faapea, i lalo o pulega faa-Komunisi, sa aʻoaʻoina ai tagata e faapea e leai se Atua. E lē gata i lea, sa o se mea matautia mo i latou ona talanoa e uiga i lotu; o lo latou faia faapea e mafai ona oo ai i le faafalepuipuiina. Peitai, i le 1991, a o iai i Suisilani o se tagata sulufai, na ia mauaina ai le avanoa e suesue ai le Tusi Paia. Na ia taliaina. Aisea?

Ia, i Alapania, na ia faalogo ai e faapea, e iai se tusi e taʻua o le Tusi Paia, ae na te leʻi iloaina moni lava se mea e uiga i ai. O lona uiga, i le amataga atonu e lē o se faanaunauga moni e fia malamalama i le Tusi Paia na uunaia ai o ia. A o taʻuina atu ia te ia e faapea, o le a ia suesue e uiga i le fuafuaga a le Atua mo tagata ma le lalolagi, na ia vaai foi i ai o se avanoa e faaleleia ai lona faaaogāina o le gagana a le atunuu. Ae sa vave lava ona ia iloa e faapea, o mea na ia aʻoaʻoina ua faamalieina ai se manaoga loloto faaleagaga sa ia te ia. Sa faamafanafanaina lona loto i le folafolaga a le Atua e uiga i se lalolagi fou o le a pulea i le filemu, se lalolagi o le a mafai ai e tagata ona ola ai e faavavau ma olioli i le anoanoai o mea e manaomia mo le olaga. Sa faateleina lona naunau ina ua ia aʻoaʻoina e faapea, o le a mafai e ia ma lona aiga ona avea ma vaega o lenei lalolagi fou. Ona sa lē mafai ona ia taofia ia te ia lava le tala lelei, na ia telefoni ai loa i lona aiga i Alapania e taʻu atu ia i latou.

O Aleksei, e nofo i Rusia, sa faateia foi i iuga e mafai e le poto saʻo o le Tusi Paia ona iai i le olaga o se tasi. I le faatumulia i faafitauli ma le lē mafai ona maua o se faamatalaga e faamalieina ai e uiga i le fuafuaga o le olaga, na ia fuafua ai e pule i lona ola. Muamua, na alu atu o ia i Finilani e asiasi i se uo. A o malaga i le nofoaafi, na ia talanoa ai e uiga i ona faafitauli i nisi o le pasese. Sa iai faatasi ia i latou na se tasi o Molimau a Ieova, o lē na uunaia o ia e suesue le Tusi Paia, auā e maua ai vaifofo i na faafitauli. Sa masalosalo o ia. Ina ua toe foi mai le malaga, sa faapena foi se isi mea na tupu ia te ia. O le taimi lea, o le tasi o Molimau na talanoa ma fai atu ia te ia e faapea, sa faapena foi ona faafitauli, ae o le Tusi Paia na fesoasoani ia te ia e manumalo mai ai. Na faamalosiau atu foi le Molimau lea ia te ia ina ia suesue le Tusi Paia. Ina ua taunuu o ia i le aiga, ae tatagi loa ma le telefoni. O le isi ana uo, o lē na suesue faatasi ma Molimau ma ua matuā fiafia lava. Na amata ona iloa e lenei tamaloa e faapea, atonu e mafai moni lava e le Tusi Paia ona maua le mea o loo ia manaomia, ae ua ia iloa e faapea, a aunoa ma se fesoasoani, o le a lē mafai ona ia malamalama i ai. Sa ioe o ia e faia sana suesuega faale-Tusi Paia faifaipea ma Molimau a Ieova, ma na amata ai foi ona auai o ia i a latou sauniga. E leʻi umi ae malamalama loa o ia i le mafuaaga ua fiafia ai i latou, o ē e faatatauina i o latou olaga mea ua aʻoaʻoina e le Tusi Paia, e ui lava o loo fesagai foi i latou ma faafitauli ia ua masani ai tagata.

I lona malamalama i le fausaga o le tagata, na tusia ai e Iesu Keriso e faapea: “E le na o mea e ʻai e ola ai le tagata.” (Mataio 4:4) Na ia toe fetalai mai foi e faapea: “Amuia i latou o ē naunau i o latou manaoga faaleagaga.” (Mataio 5:3, NW) Latou te maua le fiafiaga ona ua latou iloa lelei o latou manaoga, uia laasaga tatau e faamalieina ai, ma ua oo ai ia i latou le faamanuiaga a le Atua. Ae peitai, o o tatou manaoga faaleagaga, e lē faamalieina e ala i le tau ina faatasi atu i se lotu, po o le auai i ni sauniga faalelotu. O le lotu e matele i sauniga, atonu e faafiafiaina ai faalogona o se tasi, ae pe e saunia ai ea se vaifofo moni mo faafitauli i le olaga? E tusa lava pe o se lotu e aumaia ni faatonuga faavae e aogā, ae afai e lē taulau ona saunia ai se malamalamaga moni e faatatau i le uiga moni o le olaga, pe o le a faamalieina ai ea ou manaoga faaleagaga? E sili atu ona tāua, pe o le faia ea o lea ituaiga lotu e taitaiina atu ai i se faiā lelei ma le Atua? A aunoa ma lena, o le a lē maua se lotomalie moni.

I lenei itu, e toatele tagata ua saili atu mo se mea latou te leʻi mauaina lava.

[Ata i le itulau 3]

Pe o le a faamalieina moni ea ou manaoga faaleagaga e ala i le auai i se lotu?

[Ata i le itulau 4]

Ua iloa e le toatele e faapea, pe a latou malamalama i le Tusi Paia, ona iai lea o se uiga fou o le olaga