Faapupulaina o Mata i le Tala Lelei

FAI mai le alagaupu faa-Tenemaka: “E tumau pea le lanumoana o le lagi e tusa lava pe lē vaai i ai le tagata tauaso.” Ae i o tatou olaga e tele naua mea e fai i lea aso ma lea aso, po o tatou iloa ai o le lagi e lanumoana, e pei ona masani ai? Po o tatou vaavaai ma le mautinoa i le lumanai? Po o tatou talitonu moni i le tala lelei ua aumaia e le Afioga a le Atua, le Tusi Paia?

I le mataupu muamua, sa tatou talanoaina ai vala o le tauaso faaletino. Ae seʻi o tatou iloiloina nei se ituaiga o vaaiga e sili mamao atu ona tāua. E aofia ai i lea lo tatou fiafiaga tumau faapea ma le lumanai o ē pele ia i tatou.

Ma le mautinoa lava, ua tatou fesagai ma “aso faigata.” (2 Timoteo 3:1) O le ā ua tupu a o tauivi tagata e sailia mea e ola ai, onosaia faigata o le soifua maloloina ma faafitauli i aiga, ma taumafai e fesāgai ma tulaga le tonu o le va fealoai ma le leai o se alofa? E faanoanoa lava, ona ua iloa e le toatele le tauāu ina mou atu lo latou faatuatuaina o uso a tagata, lotu, ma pulega a malo. I le lagona ua leai se vaifofo, ua faia ai e nisi se faaiuga e faapea, o le a lē mafai ona foia o ō latou faafitauli i se auala e masani ai. I le nusipepa a Pasili, le Jornal da Tarde, ua matauina ai e Jacob Pinheiro e faapea: “I le feagai ai o tagata ma faiga sauā moni, ua lagona ai le matuā feita ona o mea sese, ma ua latou lē o mafaufau lelei ai, ma ua latou faalagolago atu i faiga faamisitelio lē aogā.” Ae, e tusa lava pe i ai ni mea sese, tatou te mananao lava e faaaogā lelei le mafaufau, a ea?

Seʻi manatu mo sina minute e faapea, ua e manaomia se fale mo lou aiga, ma e te lē o popole po o le ā le tau. Atonu o le a e vaavaai solo ma asiasi atu i ni fale eseese i isi vaipanoa tuaoi. E ui lava o le a taumafai le tagata faatau fale e faamalie ou manaoga, ae e lē o maua lava le fale lea e te manao i ai. Ona talu ai o loo aafia le faamalieina ma le tulaga lelei o lou aiga, o lea e te lē faavaivai ai, a ea? Ae seʻi mafaufau nei la i le fiafia o le a oo ia te oe pe afai e maua le fale lea sa e moomoo i ai.

E pei lava ona e faaalu se taimi e vaavaai ai mo se fale fou, aisea e lē suesue ai le Tusi Paia ina ia maua se vaifofo mo ou faafitauli? E pei lava ona tatou mafaufau i tulaga uma pe a faia ni filifiliga e uiga i se fale, e manaomia ai foi ona tatou fefulisaia mea tatou te faitauina i le Afioga a le Atua. Ma o lo tatou iloa ma talia le upu moni e uiga ia Ieova le Atua ma Iesu Keriso, e sili atu ona aogā na i lo o le mauaina o se fale. Na fetalai Iesu: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”—Ioane 17:3.

Ae afai e matuā tāua le feau a le Tusi Paia, aisea e tumau ai pea ona tauaso le toatele i lana tala lelei? O le pogai, ona “o le lalolagi uma o loo nofo toilalo i loo leaga,” ma atonu o le a faateia ai le toatele. (1 Ioane 5:19) O le iuga, o Satani le Tiapolo, ua na “faatauasoina manatu o i latou o e le faatuatua . . . ina neʻi pupula atu ia te i latou le malamalama o le tala lelei i le mamalu o Keriso, o ia foi o le faatusa o le Atua.” (2 Korinito 4:4, LF) E ui lava tatou te vaai i o tatou mata, ae o le faiʻai na te faamatalaina le malamalama lea e aveina i totonu e o tatou mata. O lea, o le tauaso, ua faauiga foi i le “lē mafai po o le lē manao e faaaogā lelei le mafaufau pe faia se filifiliga.” E manatua ai i lenei mea se alagaupu masani: “E sili ona tauaso i latou e lē fia iloa se mea.”

E lē mafai e se tagata tauaso ona ia iloa mea o loo i ona luma, o lea atonu o le a lamatia ai o ia i se mea e afaina ai. O le toatele o tagata tauaso faaletino, atonu o le a lē toe mafai ona faaleleia la latou vaai, ae e leai se tasi e manao e tauaso pea faaleagaga.

Manumalo i le Tauaso Faaleagaga

E pei lava ona mafai e le tupalapalā ona faavaivaia le vaai o mata, e mafai foi e se siomaga leaga ona fesoasoani i le faatauasoina i amioga lelei. E lē gata i lea, na lapatai mai Iesu e faatatau i aʻoaʻoga ma uputuu a tagata. Sa ia faamanino mai e faapea, o taʻitaʻi lotu i tuā i inā, sa faaseseina a latou lafu: “O tauaso i latou e taʻitaʻi i e ua tauaso; afai foi e taʻitaʻiina le tauaso e le tauaso, ona la pauu uma ai lea i le lua.”—Mataio 15:14

Na i lo o le faaseseina e taʻitaʻi tauaso, maeu le fiafia o i latou o ē ua pupula o latou mata i le tala lelei e uiga i le Malo o le Atua! Na faalauiloa mai e Iesu e faapea: “O le faamasinoga, o le mea lea ua ou sau ai i le lalolagi nei; ina ia latou vaai o e le vaavaai.” (Ioane 9:39) E faapefea la ona vāai i latou o ē tauaso faaleagaga? Ia, seʻi faaauau pea la tatou talanoaga e uiga i le tauaso faaletino.

E eseese sauniuniga ua mafai nei ona maua e tagata tauaso. Ae sa leʻi masani ona i ai. Sa leʻi faia foi ni taumafaiga uigā moni e fesoasoani ai i tagata tauaso a o leʻi faavaeina e Valentin Haüy se aʻoga faapitoa mo tagata tauaso i le 1784. Mulimuli ane na maua ai e Louis Braille se faiga o loo tauaveina ai lona igoa; e fesoasoani ai i tagata tauaso ia mafai ona faitau.

Ae faapefea le tauaso faaleagaga? I tausaga na seʻi mavae atu, na faia ai ni taumafaiga uigā e folafola atu ai le tala lelei e oo lava i vaega aupito sili ona mamao o le lalolagi. (Mataio 24:14) E fiafia Molimau a Ieova e faaoo atu le faamoemoe i ē uma e tauaso faaletino ma tauaso faafaatusa.

Na tusi mai se fafine Pasili e faapea: “Ou te fia taʻu atu, e ui lava ina e lē o atoatoa le malosi o le tino, ae ua mafai ona ou vaai—faaleagaga. Maeu se Atua ofoofogia! Ua tatou fiafia e iloa ‘o le a faamafola e Ieova lona aao, ma faamalie le manao o mea ola uma.’” (Salamo 145:16) Ma ua manatua ai e Jorge, o lē e tauaso faaletino e faapea: “Ua mafai ona vaevaeina lelei loʻu olaga i vaega e lua: a o leʻi feiloai ma ina ua uma ona feiloai ma Molimau. . . . Ona o i latou na amata ai ona manino ma malamalama laʻu vaai i le lalolagi. Ua ou olioli i se faiā e sili ona lelei ma tagata uma i le faapotopotoga.” E ui ina matuā fiafia e pei o lena, ua faamautinoa mai i tatou e le Tusi Paia e faapea, ua lē o toe mamao se taimi, ona leai lea o se tasi i le lalolagi e toe tauaso —i le faaletino ma le faaleagaga. O le a faapefea ona faia o lena mea? O le a faapefea ona faamaonia le moni o lena mea i le lalolagi aoao e faapea: “E faafepulafia e Ieova e ua tauaso”?—Salamo 146:8.

Le Vaifofo Tumau e Tasi —le Malo o le Atua

E ui ina faateleina le poto faafomai, ae e anoanoai faamaʻi ua māfua ai le tauaso, tiga, ma le oti. O le ā la o manaomia ina ia aveesea atoatoa ai le maʻi paee, tulaga lē lelei o le soifua maloloina, ma mafatiaga ua lē gata ina tauaso ai mata, ae ua aveesea ai ma le olioli i le olaga? O le faamaloloina e Iesu o ē tauaso ma isi, o se fua itiiti lea o faamalologa sili o le a faia i le lumanai. E fiafia lava ona o lana galuega o le aʻoaʻo atu ma faia faamalologa, ua faaatagia ai faamanuiaga o le a faasalafa atu i le lalolagi i lalo o le pulega a le Malo o le Atua.

O faamalologa i le lalolagi aoao, ua latalata mai.a O lenei polokalama o faamalologa tauatua, ua matagofie ona faamatalaina faafaatusa mai e le aposetolo o Ioane: “Ona faaali mai lea e ia ia te au le vaitafe manino o le vai o le ola, e manino e pei o le maa lētioata, ua tafe ifo mai i le nofoālii o le Atua ma le Tamai mamoe. O i le moa o lona ala tele ma itu taitasi o le vaitafe le laau o le ola, o loo fua mai i fuata e sefulu ma le lua, e taitasi le masina ma fua mai ai lona fuata; o lau foi o le laau e faamalolo ai nuu.”—Faaaliga 22:1, 2.

O faaupuga e pei o le “vai o le ola” ma le “laau o le ola” ua faatusaina e faapea, pe a faaiuina le faiga leaga o mea i aso nei, ona siitia mālie lea e sauniuniga a le Malo o le Atua mo le faamaloloina o tagata ia lelei atoatoa. O le mea moni, o aogā o le taulaga togiola a Iesu (e aofia ai ma le faamagaloina atoatoa o agasala), faatasi ma le iloa o Iesu Keriso ma lona Tamā, o le a aumaia le soifua malōlōina lelei atoatoa ma le ola e faavavau.—Ioane 3:16.

Fiafiaga i le Lalolagi Fou a le Atua

Seʻi tagaʻi faalemafaufau i se lalolagi o le a aunoa ma ni solitulafono, polusione, po o le mativa. Seʻi vaai faalemafaufau i lou aiga a o nonofo filemu i le Parataiso ua toe faafoisia. (Isaia 32:17, 18) Maeu se olioli o le a iai i le matauina o le matalasi o lanu eseese faatasi ma le mafaufau ma lagona ua lelei atoatoa!

Fai mai Faber Birren: “O le tulaga o le natura faaletagata, e tatau ona ola i se siomaga fesuisuiai—o le malamalama, o lanu, ma ituaiga. E leai se mea e taʻu o se siomaga faalenatura e fiu ai. O le felanulanuai, o se tasi lea o fiafiaga masani o lenei lalolagi. O le tulafono o le natura, ae lē o se mea faaopoopo, ma o le tele o le olaga lelei e faalagolago i ai.”

Maeu se tautele o le meaalofa o le vaai! Maeu se olioli o le a iai pe a toe faapupulaina mata o ē na tauaso—i le faaletino ma le faaleagaga!

Ioe, i le Parataiso toe faafoisia o loo fotuai mai, o le tauaso ma isi faaletonu o le tino, o le a lē toe avea o se pogai o le lē fiafia! O le a leai se tasi e toe taitaiseseina. Talu ai o le a manumalo le alofa moni, ma o tagata uma o le a faamalamalamaina faaleagaga. O na mea ma le anoanoai o isi, ia o loo taatitia mai i luma, ae i le taimi nei, e tatau ona faamaonia e Lē o le ana faataunuuina lana folafolaga faavaloaga: “Ona faapupulaina ai lea o mata o e tauaso”!—Isaia 35:5.

[Faaopoopoga i lalo]

[Ata i le itulau 7]

I lena taimi, o le a faapupulaina ai mata o ē tauaso!