Ia Fesoasoani i Ē e Tauaso ia Iloa Ieova
1. Na faapefea ona faaalia e Iesu le alofa mutimutivale mo ē e tauaso?
1 Ua toe o ni nai aso maliu Iesu. A o ia tuua le aai o Ieriko, na ʻaiʻoi atu ni tagata tauaso ʻaisi se toʻalua: ʻLe Alii e, ia e alofa mai iā i maʻua!’ E ui sa mamafa i le mafaufau o Iesu mea o le a tutupu iā te ia, ae na tū ma fetalai atu i tauaso e ō mai iā te ia, ma na ia faamālōlō iā i laʻua. (Mata. 20:29-34) E faapefea ona tatou faaaʻoaʻo i le alofa mutimutivale o Iesu mo ē e tauaso?
2. E faapefea ona molimau atu i se tagata tauaso e tatou te feiloaʻi i ai i nofoaga faitele?
2 Ia Loto Fesoasoani: Pe a e feiloaʻi i se tauaso, atonu i se nofoaga faitele, ia taʻu atu lou igoa ma fesili i ai pe e manaʻomia se fesoasoani. Talu ai e masani ona lē amanaʻia e nisi ia tagata tauaso, pe a e talanoa atu la, e ono masalosalo le tagata tauaso. Peitaʻi, o le a uma lona masalosalo pe a e faaleuō ma naunau moni atu. Ia e manatua e eseese ituaiga tauaso, ma o le a e iloa ai le ituaiga fesoasoani e tuuina atu. Pe a uma ona fesoasoani atu, ia faailoa i ai o loo e aofia i se polokalame e suʻesuʻeina ai le Tusi Paia. Ia ofo atu e te faitauina se mau e pei o le Salamo 146:8 po o le Isaia 35:5, 6. Pe afai e iloa e le tagata tauaso faitau i le gagana patupatu, ia fesili i ai pe e manaʻo i se lomiga i le gagana patupatu, ina ia fesoasoani iā te ia e malamalama atili ai i le Tusi Paia. E mafai foʻi ona e fesoasoani iā te ia e kopi mai i le jw.org lomiga ua uma ona puʻeina ina ia faalogologo i ai. Pe afai e iai sana komepiuta e iai se polokalame e mafai ona faitauina mai mea iā te ia, atonu e fiafia o ia e lolomi mai mataupu mai i le jw.org, faatasi ai ma lomiga e mafai ona kopi mai e faaaogā ai le polokalame o le RTF (Rich Text Format).—Tagaʻi i le pusa “Pe a Fesoasoani i se Tagata Tauaso . . . ”
3. E faapefea ona tatou saʻilia ē e tauaso o loo i la tatou oganuu?
3 Saʻili Tagata Tauaso: E seāseā tatou feiloaʻi i tagata tauaso i le talaʻiga mai i lea fale i lea fale, ona o le toʻatele o i latou e lē fia talanoa i tagata ese e ō atu i o latou fale. O lea, e tele taumafaiga e manaʻomia ina ia “saʻili” ai tagata tauaso ma molimau atu i ai. (Mata. 10:11) Pe afai e te lua faigaluega pe aʻoʻoga faatasi ma sē e tauaso, ia tausolomua e talanoa i ai. Pe afai e iai i la outou oganuu se aʻoga mo ē e tauaso, ia avatu ni lomiga i le gagana patupatu mo la latou potu tusi. Pe e te iloa se tagata e iai sona tauaiga e tauaso? Pe e iai i la outou oganuu se faalapotopotoga e faia auaunaga fesoasoani mo ē e tauaso, po o nofoaga e nonofo ai ē e tauaso? Ia faailoa i aiga o ē e tauaso, tali telefoni po o pule o aʻoga ma faalapotopotoga, e matuā naunau Molimau a Ieova e fesoasoani i ē e tauaso, ma ia ofo atu e te toe foʻi atu e avatu lomiga i le gagana patupatu, ma lomiga ua uma ona puʻeina e faalogologo i ai. Ia faailoa i ai le folafolaga mai le Tusi Paia, o le a aveesea aʻiaʻi e le Atua le tulaga tauaso. E mafai foʻi ona e faaali i ai le vitiō mai le jw.org lea e faamatuaina “Without It, I Would Feel Lost,” o se tala moni e faatatau i se tamāloa tauaso ua tele aogā ua ia maua ona o le iai o sana Tusi Paia i le gagana patupatu. O le faailoa atu o le māfuaaga o lau asiasiga, atonu o le a e maua ai le avanoa e talanoa ai ma tagata tauaso.
4. O ā lesona e tatou te aʻoaʻoina mai iā Janet?
4 Na asiasi atu se tuafafine tauaso e igoa iā Janet i se nofoaga e nonofo ai tagata tauaso, ma talanoa ai ma se fafine talavou. Sa faapea atu Janet, “Na faamālōlō e Iesu tagata tauaso, ma ua faaalia mai ai mea o le a ia faia mo tagata tauaso uma.” Sa la talanoaina le Faaaliga 21:3, 4, ma na faamatala atu e Janet o le a faataunuu e le Malo o le Atua lenā folafolaga. Sa nofonofo teisi le fafine ona faapea mai lea: “Ou te leʻi faalogo lava i se manatu faapena mai i se tagata tauaso. O le toʻatele o tagata e vāai e talitonu ua māfua ona tauaso se tagata, ona o se mea na ia faia pe na faia foʻi e ona tuaa.” Na imeli atu e Janet i le fafine se auala vave e maua ai le tusi Aʻoaʻoga Moni i le Initaneti, ma e faalua i le vaiaso ona faia a la talanoaga faale-Tusi Paia.
5. E ui e lē mafai ona tatou faamālōlōina tagata tauaso, ae o ā faamanuiaga e maua pe a tatou faaalia le naunau iā i latou?
5 E lē mafai ona tatou faamālōlōina tagata tauaso e pei ona faia e Iesu, ae e mafai ona tatou fesoasoani i tagata ua faatauasoina e le atua o lenei faiga o mea, e aofia ai ma tagata e tauaso moni, ina ia malamalama i mea moni o le Afioga a le Atua. (2 Kori. 4:4) Na faamālōlō e Iesu tamāloloa tauaso e toʻalua i Ieriko, ona sa ʻmutimutivale lona alofa’ mo i laʻua. (Mata. 20:34) Pe a tatou naunau foʻi faapena i tagata tauaso, o le a tatou maua le faaeaga e fesoasoani ai iā i latou ia iloa Ieova, o lē o le a aveesea atoatoa le tulaga tauaso.