E Ao ona Muai Talaʻiina Lenei Tala Lelei

“Ia muai talaʻiina foi le tala lelei i nuu uma lava e ao ai.”—MAREKO 13:10.

1, 2. O le ā le faailoga ua iloga ai Molimau, ma aisea?

AISEA ua talaʻi ai ma le maumauai Molimau a Ieova? Ma le mautinoa lava, ua iloa i tatou i le lalolagi aoao i la tatou faiva i le lautele, a lē o le fale i le fale, i magāala, po o i fesootaiga e leʻi fuafuaina. I so o se tulaga fetaui e tulai mai, tatou te faailoa atu i tatou o ni Molimau ma taumafai ma le faautauta e taʻu atu le tala lelei ua tatou faatāuaina. O le mea moni, e mafai ona tatou taʻu atu o lenei faiva o se fua iloga lea ua iloa ai i tatou!—Kolose 4:6.

² Seʻi manatu ifo lava—i soo se taimi e vaaia ai e tagata i lo latou vaipanoa se vaega o alii, o tamaitai, ma tamaiti ua laei lelei faatasi ma ni ato taʻitaʻi, o le ā le manatu muamua e oso aʻe i o latou mafaufau? Pe faapea ea, ‘Se, o lea ua toe ō mai foi Katoliko (po o tagata o le Lotu Orthodox)!’ po o le faapea foi, ‘O le Penetekoso (po o tagata o le Lotu Papatiso) lea foi ua toe ō mai!’ E leai. Ua iloa e tagata e lē o faia e na lotu, i se tulaga e ō atu ai le aiga atoa i le faiva mai lea fale i lea fale. Atonu o nisi o vaega faalelotu e auina atu ē ua taʻua o “misionare” mo se tuutuuga e lua tausaga i nisi o nofoaga, ae o sui taitoatasi o lea lotu latou te lē auai lava i lea faiva. Ua na o Molimau lava a Ieova ua iloa aloaia i le lalolagi aoao i lo latou maelega i le faailoa atu lea o la latou feau i isi i soo se avanoa e talafeagai ai. Ma ua lauiloa foi i latou ia latou mekasini, o Le Olomatamata ma le Awake!—Isaia 43:10-12; Galuega 1:8.

Eseese ma Faifeau a Kerisinetoma

3, 4. Ua masani faapefea ona faailoa mai faifeau a Kerisinetoma i faasalalauga ma nusipepa?

³ I se eseesega tele, ua tala mai i lipoti ma faailoa mai le toatele o faifeau i nisi o atunuu o ni ē faataugā i tamaiti, e piopio i tupe, ma faiga taufaavalea. O a latou galuega o fua o le tino ma olaga faalialia i le tele o tupe o ola ai ua iloa uma e tagata. Sa manino ona faamatala mai e se tasi fatupese lauiloa i lana pese e faapea lona matua, “Pe o le a Taulimaina e Iesu se Rolex [se uati auro e sili ona taugata] i Lana Polokalama i le Televise?” Ua ia faia se fesili faapea: “Pe o le a aafia Iesu i polotiki pe a toe afio mai o Ia i le Lalolagi? Fai se isi Ona fale ma tu i Palm Springs [le mea o iai fale e sili ona taugata i Kalefonia] ma taumafai e nanā Lona tamaoaiga?” Pagā le moni o upu a Iakopo: “Ua outou nonofo i le nuu ma le sololelei, ma le fiafia i la le tino; ua fafagaina outou e outou faapei o manu mo le aso e fafasi ai.”—Iakopo 5:5; Kalatia 5:19-21.

⁴ O le mafutaga a faifeau ma taʻitaʻi faalemalo, e oo foi lava i le auai i le palotaina o sui o le malo ua faaalia manino ai, o i latou o tusiupu ma Faresaio o onaponei. I le taimi foi lava e tasi, ua tele tupe e maimau ai a vaega o lotu ona o tagi faaletulafono ma faamasinoga faasaga i faifeau, e mafua mai ona o amioga matagā lē pulea a latou faifeau i tamaiti ma ē ua fai si matutua i atunuu e pei o le Iunaite Setete ma Kanata.—Mataio 23:1-3.

5. Aisea ua faamaonia ai ua lē avea faifeau a Kerisinetoma ma vasega o le “auauna faamaoni ma le mafaufau”?

⁵ Sa talafeagai ona fai atu ma le tonu Iesu i faifeau i ona aso e faapea: “Oi talofa ia te outou tusiupu ma faresaio, tagata pepelo! auā e tutusa outou ma tuugamau ua faasinasinaina, o loo matagofie i fafo, a o totonu ua tutumu i ivi o tagata oti, ma mea leaga uma. E faapea foi outou, o fafo ua mataamiotonu i luma o tagata, a o totonu, ua tutumu outou i le pepelo ma le amioletonu.” O lea, ua lē tuuina atu ai e le Atua i faifeau o Kerisinetoma, pe Katoliko, pe Porotesano, pe Orthodox, po o isi vaega faalelotu, le poloaiga ina ia talaʻi le tala lelei. Ua faamaonia e lē o i latou o le “auauna faamaoni ma le mafaufau.”—Mataio 23:27, 28; 24:45-47.

Aisea e Muai Talaʻiina ai le Tala Lelei?

6. O ā mea ua toeitiiti nei ona tutupu lea?

⁶ I lana faaupuga sologa lelei o le poloaiga a Iesu ina ia talaʻiina le tala lelei i nuu uma lava, e na o Mareko lava o faaaogaina le upu “muai.” (Mareko 13:10; faatusatusa i le Mataio 24:14.) Ua faitauina faapea le faaliliuga a J. B. Phillips: “A o leʻi oo mai le iuga e ao ona folafola atu le tala lelei i nuu uma lava.” O le faaaogaina faasui veape o le upu “muai,” e faaalia ai e iai isi mea o le a sosoo ai i le galuega o le faalauiloaina o le tala lelei i le lalolagi uma. O na mea e tutupu o le a aofia ai le puapuaga tele ua folafolaina mai ma le pulega amiotonu a Keriso i le lalolagi fou.—Mataio 24:21-31; Faaaliga 16:14-16; 21:1-4.

7. Aisea ua finagalo ai le Atua ina ia muai talaʻia le tala lelei?

⁷ Aisea la ua finagalo ai le Atua ia muaʻi talaʻiina le tala lelei? O se tasi o mafuaaga ona o ia o se Atua o le alofa, faamasinotonu, atamai, ma le malosi. Ua tatou iloa ai le faaalia mai ma le ofo o nei uiga o Ieova i le faataunuuga o fetalaiga a Iesu o faamauina i le Mataio 24:14 ma le Mareko 13:10. Seʻi o tatou iloiloina nei uiga taitasi ma tagai i ai pe faapefea ona fesootai atu i le talaʻiina o le tala lelei.

Le Tala Lelei ma le Alofa o Ieova

8. Ua avea faapefea le talaʻiina o le tala lelei ma auala e faaalia ai le alofa o le Atua? (1 Ioane 4:7-16)

⁸ Ua faapefea ona faaatagia mai i le talaʻiina o le tala lelei le alofa o le Atua? E muamua lava, ona o se feau ua lē o fuafuaina faapitoa mo se lanu po o se vaega e tasi. O le tala lelei mo “nuu uma lava.” E alofa le Atua i le aiga faaletagata, o le tele o lea alofa ua ia auina mai ai lona Alo e toatasi i le lalolagi, ina ia avea ma taulaga togiola mo agasala a tagata uma lava, ae lē mo na o se ituaiga e tasi. Na tusi mai le aposetolo o Ioane e faapea: “Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Auā e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia.” (Ioane 3:16, 17) E mautinoa o le tala lelei, o se feau ua folafolaina mai ai se lalolagi fou filemu, autasi, ma le faamasinotonu, o se faamaoniga lea o le alofa o le Atua.—2 Peteru 3:13.

Le Tala Lelei ma le Malosi o Ieova

9. Aisea ua lē faaaogaina ai e Ieova lotu malolosi a Kerisinetoma e talaʻia le tala lelei?

⁹ Ua faapefea ona faaalia le malosi o Ieova i le talaʻiina o le tala lelei? Manatu i mea nei, o ai ua ia faaaogaina mo le faataunuuina o lenei poloaiga? Pe o faalapotopotoga lotu ea e sili ona malolosi o Kerisinetoma, e pei o le Ekalesia Katoliko Roma, po o vaega tāua o le Lotu Porotesano? E leai, ua lē agavaa i latou i lenei tofiga ona o lo latou aafia i faigamalo. (Ioane 15:19; 17:14; Iakopo 4:4) O le tele o lo latou tamaoaiga ma a latou fesootaiga ma taaiga, i ē o loo pule, ua lē taitai ona faafiafiaina ai Ieova le Atua, ua faapena foi i ana aʻoaʻoga e faavae aʻe i uputuu. Ua lē taitai ona manaomia se malosi mai le tagata e faataunuuina ai le finagalo o le Atua.—Sakaria 4:6.

10. O ai ua filifilia e le Atua e faia le talaʻiga?

¹⁰ Ua pei o lea na taʻua e le aposetolo o Pauro i lana tusi i le faapotopotoga i Korinito e faapea: “Auā ua outou iloa lo outou valaauina, le au uso e; e le toatele o e popoto i la le tino, e le toatele faipule, e le toatele alii; a e peitai ua filifilia e le Atua mea vālea a le lalolagi, ina ia faamāina ē popoto, ma mea vaivai a le lalolagi ua filifilia ia e le Atua e faamāina ai mea malolosi; ma mea a tagata nuu, ma mea faatauvaa a le lalolagi, ua filifilia ia e le Atua, atoa ma mea e leai, ina ia faaleaogaina e ia mea o i ai; ina neʻi mitamita se tagata e toatasi i ona luma.”—1 Korinito 1:26-29.

11. O ā ni mea moni e faatatau i Molimau ua matuā iloga ai i latou?

¹¹ O Molimau a Ieova e toaitiiti lava ē mauoa o loo iai i la latou faalapotopotoga ma e mautinoa e leai se tasi o iai e tāua sona tulaga i upufai faalemalo. O lo latou solitu aʻiaʻi i mataupu faapolotiki o lona uiga e lē mafai ona iai sa latou taaiga faalemalo. Na i lo lena, ua masani ona avea i latou ma ē ua afaina ona o sauaga ogoogo ua faapogaia mai i taʻitaʻi lotu ma taʻitaʻi faalemalo o lenei luasefulu senituri. Peitai ane, e ui lava i nei sauaga ogoogo ua faatulai mai faasaga ia i latou e ē lagolagoina le faa-Nasi, le faa-Tautalatasi, le faa-Komunisi, le lotonuu ma lotu sese, ua lē gata ina talaʻia e Molimau le tala lelei i le lalolagi atoa, ae ua ofoofogia le faatupulaia o lo latou faitau aofai.—Isaia 60:22.

12. Aisea ua manuia tele ai taumafaiga a Molimau?

¹² O le ā ua tuu atu i ai e Molimau le manuia i ā latou taumafaiga? Na folafola atu e Iesu i ona soo e faapea: “A e maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au i Ierusalema ma Iutaia uma lava, ma Samaria, e oo lava i le tului‘ga o le lalolagi.” O lea la, o le ā moni lava le pogai o lo latou taulau manuia? Na fetalai Iesu: “E maua e outou le mana, pe a afio ifo le Agaga Paia i luga ia te outou.” E pei foi o aso nei, e lē o se tomai o le tagata a o le mana mai le Atua, ua fai lea ma pogai autū o le taulau manuia o Molimau i la latou faiva o le malo i le lalolagi aoao. Ua aliali manino mai, o tagata e sili ona vaivai ua faaaogaina lea e le Atua e faataulauina le galuega tau aʻoaʻoga sili i le talafaasolopito.—Galuega 1:8; Isaia 54:13.

Le Tala Lelei ma le Atamai o Ieova

13. (a) Aisea ua tautua ai Molimau i se uiga tauofo ma e lē totogia i latou? (e) Ua tali atu faapefea Ieova i le faifaiga a Satani?

¹³ Ua talaʻia le tala lelei e le aufaigaluega tauofo. Na fetalai Iesu e faapea: “Ua maua fua e outou, ia outou foaifuaina atu.” (Mataio 10:8) O lea, e leai lava se tasi o Molimau a Ieova e maua se totogi ona o le auauna atu i le Atua, e faapea foi ona latou lē saili atu i ai. O le mea moni, e lē aoina lava se peleti ia latou sauniga. Ua fiafia i latou, e ala i lo latou tuuina atu atoatoa ma le lē manatu faapito o i latou lava i le auaunaga, e avatu ai i le Atua se mafuaaga e tali atu ai i lē o faifai atu ia te ia, o Satani le Tiapolo. Ua fai mai lenei agaga e tetee i le Atua i se uiga e faapea, e lē auauna tagata i le Atua e aunoa ma se manatu faapito o aafia ai. I lona atamai, ua saunia ai e Ieova se tali manino i le faifaiga a Satani—e faitau miliona Molimau Kerisiano faamaoni o loo talaʻia le tala lelei mai lea fale i lea fale, i fetaulaiga o ala, ma i tulaga lē fuafuaina.—Iopu 1:8-11; 2:3-5; Faataoto 27:11.

14. O le ā le “upu lilo” sa natia lea ua faasino i ai Pauro?

¹⁴ O se tasi faamaoniga o le atamai o le Atua i le talaʻia o le tala lelei, ona o le folafolaga o le Malo lava ia o se faailoaga mai lea o le atamai o le Atua. Na tusi mai le aposetolo o Pauro e faapea: “A e matou te tautala atu i le poto i e ua uma ona aʻoaʻoina; a e le o le poto o lenei lalolagi, po o le poto o alii o lenei lalolagi ua faaleaogaina; a e peitai matou te tautala atu i le poto o le Atua i le upu lilo sa natia, na tofia e le Atua anamuā anamuā lava, ina ia tatou manuia ai.” O le “upu [“poto,” NW] lilo” ua faasino i le ala atamai a le Atua e faaiua ai le fouvale lea na amataina i Etena. O le atamai e uiga i lea upu lilo paia na faailoa mai ia Iesu Keriso, o lē o faaautu i ai le tala lelei o le Malo o le Atua.a—1 Korinito 2:6, 7; Kolose 1:26-28.

O le Tala Lelei ma le Faamasinotonu a le Atua

15. E mafai faapefea ona tatou iloa o Ieova o le Atua o le faamasinotonu? (Teuteronome 32:4; Salamo 33:5)

¹⁵ I le fesootai faapitoa atu i le faamasinotonu, pe o tatou iloa ai ea le tāua o le upu “muai” i le Mareko 13:10. O Ieova o le Atua o le faamasinotonu ma e faapea ona ō lua ma le agaalofa. Ua tulei mai e ala i lana perofeta o Ieremia e faapea: “A o lē mitamita, ina mitamita ia o ia i lenei mea, ina ua mafaufau o ia, ma ua iloa aʻu, o aʻu lava o Ieova, o lē faia le alofa, ma le faamasinoga [“faamasinotonu,” NW], ma le amiotonu i le lalolagi; auā o mea ia ou te fiafia i ai, o loo fetalai mai ai Ieova.”—Ieremia 9:24.

16. E mafai faapefea ona faataitaia faapea, e manaomia e le faamasinotonu le tuuina atu muamua o se lapataiga?

¹⁶ Ua faapefea ona faaalia mai le faamasinotonu o Ieova i le talaʻia o le tala lelei? Seʻi o tatou faatusaina i se tala i se tina o fai sana keke sukalati manaia lava o le a faaaogaina mulimuli ane mo malō pe a taunuu atu i se taimi o le aso. Pe afai e tuu ai pea i luga o le laulau ʻai e aunoa ma le faia o se tala i lana fanau e faatatau i le taimi e faatoa ʻai ai, o le ā le faanaunauga masani e oso aʻe i tamaiti? O i tatou uma sa tatou laiti! O le a tui foi i ai le limatusi o se tamaitiiti e tofo le keke! Afai na lē tuuina atu e le tinā se lapataiga i le taimi sa tatau ai, o lona uiga la e faalemautu se faavae mo se aoaiga malosi. I le isi itu, pe afai na te taʻuina atu ma le manino e faapea, e faatoa ʻai lava le keke i se taimi mulimuli ane pe a taunuu malō ma e lē tatau lava ona tago i ai se isi, o lea ua ia tuuina atu ai ma le manino le lapataiga. Pe afai e lē usiusitai i ai se isi, ua talafeagai la ona ia faaoo atu se aoaiga mausali ma le tonu.—Faataoto 29:15.

17. Ua faaalia mai faapefea e Ieova le faamasinotonu i se ala faapitoa talu mai le 1919?

¹⁷ I le faamasinotonu a Ieova, o le a na lē faaooina mai ai iuga taufaamasinoga i lenei faiga amioleaga o mea a o leʻi tuuina mai muamua lapataiga e talafeagai ai. O lea, ae maise lava talu mai le 1919, ina ua uma ona faaoo mai e le taua muamua a le lalolagi “le amataga o . . . puapuaga,” na aauina atu ai e Ieova ana Molimau i le lalolagi atoa e folafola ma le maelega le tala lelei. (Mataio 24:7, 8, 14) E lē mafai la e atunuu ona latou faia ma le tonu se faamolemolega i le lē amanaiaina o lenei lapataiga iloga.

O le ā le Tele ua Oo atu i ai le Tala Lelei i le Lalolagi?

18. (a) O ā ni faamaoniga o le oo atu o galuega a Molimau a Ieova i atunuu tu ese? (e) O ā nisi faaaoaoga ua e iloaina?

¹⁸ O se fua e iloa ai le aogā tele o lenei galuega tau le aʻoaʻoga i le lalolagi aoao, ua aliali mai lea i le tusi ua taʻua o le Last Places—A Journey in the North. Fai mai lē na tusia lea tusi ina ua ia tilofaia le faafanua o folauga i le sami mo le motu tu ese o Foula, o se tasi o motu i le atu motu o Shetland i le itu i matu o Sikotilani, o loo faaalia mai i lenei faafanua le “siomia atoa le motu i faailoilo nei, WKS (vaatuia), RKS (papa), LDGS (āʻau e lē o āli), ma le OBS (e iai se faalavelave).” O nei faailoilo o i le faafanua ua “lapataia ai tagata o faamoemoe e ō atu i nei ogasami ina ia faamamao ese mai ai. O ogasami o Foula sa tumu i lamatiaga, ma ua avea ai le motu ma tulaga e faigata ona ō atu iai vaa failā, o ē folau atu iai i le ao ma toe foi, e oo lava i ē faia galuega faapitoa a Lana Masiofo (masiofo o Peretania), peitai e lē faapea—Molimau a Ieova—e pei ona ou iloaina mulimuli ane.” Ua faapea atili mai o ia: “E pei lava ona latou saili maeaea i le tele o aai ma Atunuu Tauatiaʻe ina ia faaliliu mai isi, ua faapena i Molimau ona latou faaliliu tagata i le latou faatuatuaga i motu tu ese o Foula.” Na ia tautino mai e faapea, sa iai i se tasi o tagata o le nuu, o Anetelu se kopi o Le Olomatamata na tuu atu i lalo o lona faitotoa i ni masina na muamua atu. Ona ia toe faaopoopo mai foi lea: “I le vaiaso na sosoo ai, na ou vaai ai i se kopi o le [Awake! faa-Danish] i Faeroes [atu motu o le Vasa i Matū] ma i le lua masina mulimuli ane, o se kopi o [Le Olomatamata i le faa-Danish] i Nuuq i Greenland.” Maeu se faamautinoaga manino o galuega maelega a Molimau a Ieova i na vaipanoa i matū!

O le ā ua Uunaia Molimau ina ia Faaauau Pea?

19, 20. (a) O le ā ua uunaia Molimau a Ieova ina ia faia pea le talaʻiga? (e) O ā fesili o le a sosoo mai ona taliina?

¹⁹ O le mea moni, o le talaʻi mai i lea fale i lea fale i tagata e lē masani ai e lē faigofie, e tusa lava po o le ā le leva ua avea ai ma Molimau. Ae o le ā la ua uunaia ai nei Molimau ina ia faaauau pea? O lo latou tuuina atu faa-Kerisiano ma se lagona o se tiute e ao ona fai. Na tusi mai Pauro e faapea: “Auā afai ou te folafola le tala lelei, e le se mea lea ou te mitamita ai, auā ua leai saʻu faitalia i lea mea; oi talofa foi ia te au, pe a ou le folafolaina le tala lelei!” Ua iai i Kerisiano moni se feau e faapea ona faaolaina ai, e mafai la faapefea ona latou teuina ae lē faaali atu i isi tagata? Ua avea le mataupu silisili o le nofosala i le toto ona o le lē taulau ona lapatai atu i taimi o faigata ma mafuaaga e uunaia ai e talaʻi le tala lelei.—1 Korinito 9:16; Esekielu 3:17-21.

²⁰ O lea, o faapefea ona talaʻia le tala lelei? O le ā le pogai autū o le taulau manuia o Molimau? O ā vala eseese o la latou faiva ma le faalapotopotoga ua fesoasoani e iloa ai o i latou o le lotu moni? O le a taliina e la tatou mataupu o sosoo mai na fesili.

[Faaopoopoga i lalo]

Pe E te Manatua?

◻ O le ā ua iloga ai le ese o Molimau a Ieova mai taʻitaʻi lotu?

◻ Ua faapefea ona atagia atu le alofa, le malosi, ma le atamai o le Atua ona o le talaʻiga?

◻ Ua faapefea ona atagia atu le faamasinotonu o le Atua ona o le talaʻiina o le tala lelei?

◻ O le ā ua mafua ai ona faia pea e Molimau a Ieova la latou faiva?

[Ata i le itulau 15]

E tusa lava po o le ā le tu ese o nofoaga o nonofo ai tagata, e mananao Molimau a Ieova e oo atu i a i latou