Leoleoina ma le Alofa le Lafu Mamoe a le Atua
“Ia outou leoleo i le lafu mamoe a le Atua o ia te outou.”—1 PETERU 5:2.
1, 2. O le ā le uiga autū o Ieova, ma ua faapefea ona faaalia mai?
I LE Tusi Paia atoa, ua faamanino mai ai o le alofa, o le uiga autū lea o le Atua. Ua taʻua i le 1 Ioane 4:8: “O le Atua, o le alofa lava ia.” Talu ai ua faaalia lona alofa i ana gaoioiga, ua taʻua ai i le 1 Peteru 5:7 e faapea o le Atua, “o loo manatu mai o ia ia te outou.” Ua faatusaina i le Tusi Paia le auala o loo tausi mai ai e Ieova ona tagata, e pei lea o le tausiga alofa faapelepele a se leoleo mamoe i ana mamoe: “Faauta, e afio mai le Alii o Ieova . . . Na te leoleoina lona lafu e pei o le leoleo mamoe; na te sapaia tamai mamoe i ona lima, ma tauave i latou i lona fatafata; na te taʻitaʻi filemu i mamoe ua fananau.” (Isaia 40:10, 11) Maeu se faamafanafanaloto na oo i a Tavita ua mafai ai ona ia faapea mai: “O Ieova, o loʻu leoleo mamoe o ia; e leai se mea ou te mativa ai”!—Salamo 23:1.
2 Ua talafeagai le faatusaina e le Tusi Paia i mamoe, tagata o loo fiafia i ai le Atua, auā o mamoe e fifilemu, e gauai gofie, e usiusitai i ō latou leoleo mamoe alolofa. Ona o Ieova o ia o se Leoleo Mamoe e alofa, ua matuā tausi mai ai o ia i ona tagata o ē ua pei ni mamoe. Ua ia faaalia lea i le saunia o mea faitino ma mea faaleagaga mo i latou, atoa ma le taitaiina o i latou i taimi faigata o “aso e gata ai” o lenei lalolagi amio leaga, ina ia oo atu ai i lana lalolagi fou o loo fotuai mai.—2 Timoteo 3:1-5, 13; Mataio 6:31-34; 10:28-31; 2 Peteru 3:13.
3. Na faapefea ona faamatalaina e le faisalamo le auala o loo tausia ai e Ieova ana mamoe?
3 Seʻi mātau le tausiga alofa a Ieova mo ana mamoe: “O fofoga o Ieova o loo faasaga i e amiotonu, e liliu mai foi ona taliga i a latou alaga. . . . Ua alalaga e ua amiotonu, ona faafofoga mai ai lea o Ieova; ua ia laveai mai foi ia te i latou ai o latou puapuaga uma. Ua latalata mai Ieova i e ua loto momomo; ua ia faaola foi i e ua loto nutimomoia. E tele lava mea leaga e oo i le ua amiotonu; a e laveaiina o ia e Ieova ai ia mea uma.” (Salamo 34:15-19) Maeu se faamafanafanaga tele ua saunia mai e le Leoleo Mamoe Sili mo ona tagata o ē ua pei ni mamoe!
Le Faaaoaoga a le Leoleo Mamoe Lelei
4. O le ā le matafaioi a Iesu i le tausiga o le lafu mamoe a le Atua?
4 Sa maua atoatoa e Iesu le Alo o le Atua, aʻoaʻoga mai lona Tamā, auā ua taʻua Iesu i le Tusi Paia o “le leoleo mamoe lelei.” (Ioane 10:11-16) O lana auaunaga tāua i le lafu mamoe a le Atua, o loo faamauina i le Faaaliga mataupu e 7. I le fuaiupu e 9, ua taʻua ai auauna a le Atua i ō tatou aso o “le motu o tagata e toatele mai atu nuu uma, ma aiga, ma nuu, ma gagana eseese.” Ona faapea mai lea o le fuaiupu e 17: “O le Tamai Mamoe [o Iesu] . . . na te fafaga ia i latou, ma taʻitaʻi ia te i latou i puna o vai ola; e sōloieseina foi e le Atua o loimata uma nai o latou mata.” Ua taʻitaʻi atu e Iesu mamoe a le Atua i vai o le upu moni, na e maua ai le ola e faavavau. (Ioane 17:3) Ia mātau, o loo taʻua Iesu o “le Tamai Mamoe,” e faaalia ai ona lava uiga e pei o se mamoe, ua avea ai o ia o le faaaoao sili o le gauai atu i le Atua.
5. O ā lagona sa iai i a Iesu e faatatau i tagata?
5 A o iai Iesu i le lalolagi, sa soifua faatasi o ia ma tagata, ma na ia silafia ō latou tulaga mafatia i lagona. Sa faapefea ona ia tali atu i ō latou tulaga mafatia? “Ona mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo.” (Mataio 9:36) O mamoe e leai so latou leoleo, e matuā mafatia lava mai i ō latou fili, e faapena foi i mamoe e lē alolofa ō latou leoleo. Peitai sa matuā alofa Iesu, auā na ia fetalai: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.”—Mataio 11:28-30.
6. O le ā le silasila a Iesu i ē ua vaivai?
6 Na valoia i valoaga a le Tusi Paia e faapea, o le a faaaogā e Iesu le alofa e feutagai ai ma tagata: “Ua faauuina aʻu e Ieova . . . e fusifusi i e loto momomo, . . . e faamatalaloto i e faanoanoa uma lava.” (Isaia 61:1, 2; Luka 4:17-21) Sa lē taitai tagaʻi maulalo Iesu i ē matitiva ma ē ua oo i ai ni tulaga faaletonu. Ae sa ia faataunuuina le Isaia 42:3: “O le u gapēpē na te le gausia; o le vavae ua mu itiiti na te le tineia.” (Faatusatusa i le Mataio 12:17-21.) O ē ua mafatia sa pei o ni ū gapēpē, sa pei foi o vavae o molī ua faasolo ina pepē ona ua leai se suauu. Ina ua silafia ō latou tulaga mafatia, sa faaalia ai e Iesu i a i latou le alofa mutimutivale ma foai atu i a i latou le malosi ma le faamoemoe, i le faamaloloina lea o i latou i le itu faaleagaga ma le faaletino.—Mataio 4:23.
7. O fea na faasino i ai e Iesu tagata o ē na latou talilelei atu i a te ia?
7 E tele aofaiga o tagata e pei ni mamoe ua talilelei atu i a Iesu. Sa matuā logolelei ana aʻoaʻoga, o lea na oo lava i fitafita na aauina atu e pue i a te ia, sa latou faapea mai: “Ua leai lava se tagata e tautala pei o lena tagata.” (Ioane 7:46) Ioe, na faitio mai le ʻau taʻitaʻi lotu pepelo e faapea: “Ua mulimuli atu le lalolagi ia te ia”! (Ioane 12:19) Ae sa leʻi finagalo Iesu ia viiviia ma faamamaluina o ia. Na ia faasino atu tagata i lona Tamā. Sa ia aʻoaʻoina i latou ina ia auauna i a Ieova ona o lo latou alolofa i Ona uiga tausaafia: “E te alofa atu i le Alii lou Atua ma lou loto atoa, ma lou agaga atoa, ma lou malosi atoa, ma lou manatu atoa.”—Luka 10:27, 28.
8. Ua faapefea ona eseese le usiusitai atu o tagata o le Atua i a te ia, mai le usiusitai atu o isi i taʻitaʻi faalelalolagi?
8 Ua viia Ieova ona ua lagolagoina lana pule silisiliesee aoao e ona tagata o ē ua pei ni mamoe, e mafua mai ona o lo latou alofa mo ia. Ua latou filifili ma le loto e auauna i a te ia, ona ua latou malamalama i ona uiga alofa. Pagā le ese o lenei mea, mai taʻitaʻi o lenei lalolagi o ē, ua na o le pau lava le mafuaaga ua usitaia ai i latou e ō latou tagatanuu ona o lo latou matatau, po o le usiusitai ma le oono, pe ona o nisi mafuaaga lilo o ō latou loto! E lē taitai ona taʻua i tulaga o Ieova po o le tulaga o Iesu, mea e pei ona taʻua e faatatau i le pope o le Lotu Katoliko Roma e faapea: “Sa mataina o ia e le toatele, e fefefe uma i ai tagata, e leai se tasi e alofa i ai.”—Vicars of Christ—The Dark Side of the Papacy, na tusia e Peter De Rosa.
O Leoleo Mamoe Sauā i Isaraelu
9, 10. Faamatala mai ituaiga taʻitaʻi lotu sa iai i Isaraelu anamua ma i le vaitaimi o le uluai senituri.
9 O taʻitaʻi lotu o Isaraelu, sa leʻi pei o Iesu a o iai i ona taimi, auā sa latou lē alolofa i mamoe. Sa faapei i latou o taʻitaʻi anamua o Isaraelu, o ē na fetalai i ai Ieova e faapea: “Oi talofa i leoleo mamoe o Isaraelu o e fafaga ia te i latou lava! E le tatau ea i leoleo mamoe ona fagaina o le lafu? . . . Ua outou le faamalosia e ua vaivai; ua outou le faamalolo i le ua maʻi; ua outou le fusia foi le ua gau; o le ua tulia ua outou le toe aumaia, o le ua sē ua outou le sailia; a ua outou pule faamalosi ma faasaua ia te i latou.”—Esekielu 34:2-4.
10 Ua tutusa pau lava taʻitaʻi lotu Iutaia ma leoleo mamoe faapolotiki o le uluai senituri, i le loto maaa. (Luka 11:47-52) Ina ia faataitaia lenei mea, sa fetalai Iesu e uiga i se tagata Iutaia o lē na gaoia ana mea, na sasaina, ona tiaʻi ai lea ua toe ina oti i autafa o le auala. Sa tau atu i ai le savaliga a se ositaulaga a Isaraelu, ae ina ua vaai atu o le tagata Iutaia, ona ia ui ane lea i le isi itu o le auala. Sa faapena foi le mea na fai i ai e se tagata sa Levī na tau atu i ai. Ae oo ane loa ma se tagata e lē se Isaraelu, o se tagata Samaria ua inosia, ma sa mutimutivale lona alofa i le tagata manuʻa. Sa ia fusifusi i ona manuʻa, na ia faatietie o ia i se manu ma avatu i se faletalimalo, ma tausi i a te ia. Na ia totogia foi lē ana le fale ma taʻu atu i ai o le a ia toe foi ane e totogi faauma le tau mo nisi mea e toe manaomia.—Luka 10:30-37.
11, 12. (a) Na faapefea ona matuā oo i se tulaga matautia le amioleaga a taʻitaʻi lotu i aso o Iesu? (e) O le ā le mea na iu lava ina faia mulimuli e autau a Roma i taʻitaʻi lotu?
11 Sa matuā leaga taʻitaʻi lotu i aso o Iesu, auā ina ua faatuina e Iesu Lasalo mai le oti, ona talo ai lea e le au ositaulaga sili ma le au Faresaio le au taupulega o le Fono ma faapea atu: “Se a sa tatou mea e fai? Auā ua faia faailoga e tele e lea tagata [o Iesu]. Afai e faapenei ona tatou tuu ai pea o ia, e talia o ia e tagata uma lava; e o mai foi tagata Roma, ona faaumatia lea o la tatou nei mea atoa ma lo tatou nuu.” (Ioane 11:47, 48) Sa latou lē amanaia mea lelei na faia e Iesu mo le tagata na oti. Sa latou manatu mamafa i ō latou tulaga. O lea, “talu foi i lea aso ua latou taupulepule ai e fasioti ia [Iesu].”—Ioane 11:53.
12 I le faaopoopo atu i a latou amio leaga, “ua taupulepule le au ositaulaga sili, e fasioti foi ia Lasalo. Auā e toatele Iutaia na o ese ona o ia, ma latou faatuatua ia Iesu.” (Ioane 12:10, 11) O ā latou taumafaiga manatu faapito ina ia tauleleia ō latou tulaga sa lē aogā, auā na fetalai atu Iesu i a i latou: “Ua tuua lo outou fale, e faatafunaina.” (Mataio 23:38) I le faataunuuga o na upu, na ō mai ai autau a Roma i lena lava augā tupulaga, ma faoa ‘lo latou aai ma lo latou malo,’ ma fasiotia foi i latou.
Leoleo Mamoe Alolofa i le Faapotopotoga Kerisiano
13. O ai lea na folafola e Ieova o le a ia auina mai e leoleo i lana lafu mamoe?
13 Na i lo o le auina mai o ni leoleo mamoe sauā ma le manatu faapito, ae sa auina mai e Ieova le Leoleo Mamoe Lelei, o Iesu, na te tausia Lana lafu mamoe. Na ia folafola mai foi lona aumaia o ni leoleo mamoe lagolago o ē alolofa, ina ia tausia mamoe. “Ou te tofia foi mo i latou o leoleo mamoe e leoleo ia te i latou; latou te le toe fefefe, latou te le matatau foi.” (Ieremia 23:4) O lea, i le pei o faapotopotoga Kerisiano i le uluai senituri, ua faapena foi i aso nei, ona “tofia toeaina i lea aai ma lea aai.” (Tito 1:5) O nei tane matutua faaleagaga, o ē ua ausia agavaa o loo faataatia mai i le Tusi Paia, e ao ona latou “leoleo i le lafu mamoe a le Atua.”—1 Peteru 5:2; 1 Timoteo 3:1-7; Tito 1:7-9.
14, 15. (a) O le ā le uiga na faafaigata i le au soo ona maua? (e) O le ā na faia e Iesu e faaalia ai i a i latou le tatau i toeaina ona avea o ni auauna loto maulalo?
14 Mo le tausiga o mamoe, e “muamua ai i mea uma lava” le tatau i toeaina ona iai le “alofa naunau” mo mamoe. (1 Peteru 4:8) Peitai o soo o Iesu, ia sa popole naua i ni tofi ma ni ō latou tulaga, sa tatau ona latou aʻoaʻoina lenei mea. O lea ina ua fai atu le tinā o ni soo e toalua i a Iesu: “Ia e fetalai ane, ia nonofo aʻu nei tama e toalua, o le tasi i lou itu taumatau, o le isi foi i lou itu tauagavale i lou malo,” sa matuā tiga ai isi soo. Ona fetalai atu lea o Iesu i a i latou: “O alii o nuu ese ua aliitai i latou, o e ua sili foi ua pule ia te i latou; a e le faapea outou; a o sē fia sili ia te outou, ia fai o ia ma a outou auauna; o sē fia muamua foi ia te outou, ia fai o ia ma a outou tautua.”—Mataio 20:20-28.
15 I se isi foi taimi, ina ua faatoʻā uma ona “fefinauai [le au soo] i le ala po o ai so latou e sili,” ona fetalai atu lea o Iesu i a i latou: “Afai e fia muamua se tasi, e avea o ia ma mulimuli i tagata uma, ma auauna a tagata uma.” (Mareko 9:34, 35) O le loto maulalo ma le lotomalie e auauna atu sa tatau ona avea ma vaega o ō latou uiga totino. Peitai sa tumau pea ona faafaigata i le au soo na manatu, auā i le toe po a o leʻi maliu Iesu, i lana tausamiga mulimuli i le afiafi, na latou matuā “fefinauai” ai foi po o ai o i latou e sili! Na tupu lena mea e ui lava ua uma ona faailoa atu e Iesu i a i latou le auala e ao ona auauna atu ai se toeaina i le lafu mamoe; sa ia faamaulalo i a te ia lava ma mulumulu i ō latou vae. Na ia fetalai atu: “Afai o aʻu le Alii, ma le aʻoaʻo, ua ou mulumuluina o outou vae, e tatau ona outou femulumuluai o outou vae. Auā ua ou avatu le faaaʻoaʻo ia te outou, e pei ona ou faia ia te outou, ia faapea lava e outou ona fai.”—Luka 22:24; Ioane 13:14, 15.
16. I le 1899, o ā manatu na faia e le Olo Matamata e faatatau i le uiga e sili atu ona tāua mo toeaina?
16 Ua aʻoaʻo atu pea e Molimau a Ieova le tatau i toeaina ona amioai faapea. Pe toetoe selau tausaga ua tuanai, i le Olo Matamata o Aperila 1, 1899, na tusia ai upu a Pauro ia o loo i le 1 Korinito 13:1-8, ona faapea mai lea: “Ua matuā faamaʻoti mai e le Aposetolo e faapea, o le lava o le iloa ma le atamai faafailauga e lē o le poto lena e sili atu ona tāua, ae o le alofa lea e ulufia ai le loto ma faasolo atu i le gasologa atoa o le olaga, ma uunaia ma faagaoioi ai ō tatou tino, o le poto moni lena—o le faamaoniga moni o la tatou faiā ma le Atua. . . . O le uiga totino autū lava e ao ona tulimataia i ē uma o le a talia e avea ma auauna a le lotu, e auauna mo mea paia, e ao ona faamuamua lava i le uiga o le alofa.” Na taʻua ai foi e faapea, o tane o ē e lē o auauna ma le loto maulalo ma le alofa “e lē o ni aʻoaʻo maufaatuatuaina, ma e foliga mai e tele atu mea leaga latou te faia na i lo o ni mea lelei.”—1 Korinito 8:1.
17. Ua faapefea ona faamamafa e le Tusi Paia uiga e ao ona iai i toeaina?
17 O lea, e lē tatau i tane matutua ona ‘fia pule’ i mamoe. (1 Peteru 5:3) Ae tatau i a i latou ona taimua i le “feagaleleiai, ia femutimutivaleai . . . [i le] alofa.” (Efeso 4:32) Na faamamafa mai e Pauro faapea: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, . . . A o le alofa, e lautua lea i nei mea uma, o le fusi lea e atoatoa ona lelei ai.”—Kolose 3:12-14.
18. (a) O le ā le faaaoaoga lelei na faataatia e Pauro i le feagai ai ma mamoe? (e) Aisea e lē tatau ai i toeaina ona faaleamanaiaina manaoga o mamoe?
18 Na aʻoaʻoina Pauro e fai lenei mea, i lona faapea mai: “A ua matou agamalu ina ua matou i ai ia te outou na, faapei o se failele na te tausi lelei i ana lava tama. Sa faapea lava lo matou maelega i le alofa ia te outou, na matou manao i le fia avatu ia te outou e le na o le tala lelei i le Atua, a o matou lava ola foi, auā na alofaina outou e i matou.” (1 Tesalonia 2:7, 8) I le ogatusa ma lena mea, na ia faapea mai ai: “Ia faamafanafana i e loto iti, ia fesoasoani i e o vaivai, ia outou onosai i tagata uma lava.” (1 Tesalonia 5:14) E tusa lava po o ā ituaiga o faafitauli atonu e ō atu ma mamoe i a i latou, ae ao i toeaina ona manatua le Faataoto 21:13 o loo faapea mai: “O le na te punitia ona taliga i le valaau a le tagata mativa, e valaau lava o ia, a e le talia.”
19. Aisea ua avea ai toeaina alolofa o se faamanuiaga, ma ua faapefea ona tali mai i ai mamoe i lena alofa?
19 O tane matutua o ē leoleoina ma le alofa le lafu mamoe, o se faamanuiaga lea i mamoe. Na muai valoia mai i le Isaia 32:2 e faapea: “E fai foi le tagata e pei o se lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foi o le papa tele i le nuu ua le o i ai se vai.” Tatou te fiafia e iloa, o loo amioai le toatele o ō tatou toeaina i aso nei ma lena ata matagofie e faalaeiauina ai. Ua aʻoaʻoina i latou e ao ona latou usitaia le mataupu silisili lenei: “Ia fefaapelepeleai i le fealofani o uso; ia tausolomua ona ava o le tasi i le tasi.” (Roma 12:10) Pe a faaalia e toeaina lenei ituaiga o alofa ma le loto maulalo, ona tali mai lea i ai o mamoe e ala i lo latou “matuā mānatua [o] i latou ma le alofa, ona o la latou galuega.”—1 Tesalonia 5:12, 13.
Ia Amanaia le Faaaogaina o le Saolotoga e Filifili Ai
20. Aisea e ao ai i toeaina ona latou amanaia le saolotoga e filifili ai?
20 Na foafoaina e Ieova tagata ma se saolotoga e filifili ai e fai ā latou lava faaiuga. E ui e tatau i toeaina ona fautua ma aoai atu, ae lē tatau ona latou fia puleaina le olaga po o le faatuatua o le isi tagata. Na faapea mai Pauro: “E leai foi so matou fia pule i lo outou faatuatua, a o fesoasoani i matou i lo outou olioli; auā o le faatuatua tou te tumau ai.” (2 Korinito 1:24) Ioe, “e taitasi ma ave i lana lava avega.” (Kalatia 6:5) Ua foaiina mai e Ieova i a i tatou le saolotoga tele ae ua puipuia e ana tulafono ma ana mataupu silisili. E ao ai la i toeaina ona alofia le faia o ni tulafono i tulaga e lē o solia ai ni mataupu silisili faale-Tusi Paia. Ma e ao foi ona latou teena so o se faanaunauga ina ia faatutū atu ō latou lava manatu totino e fai ma tulafono po o le avea o so latou taofi totino e fai ma faauilavea pe afai e lē o ioe se tasi i na manatu.—2 Korinito 3:17; 1 Peteru 2:16.
21. O le ā e mafai ona aʻoaʻoina mai le uiga sa faaalia e Pauro i a Filemoni?
21 A o iai Pauro i le falepuipui i Roma, seʻi mātau le auala na feagai ai o ia ma Filemoni, o se Kerisiano sa fai ni ana pologa i Kolose i Asia Itiiti. Na sola atu i Roma le pologa a Filemoni e igoa i a Onesemo, ma o i inā na avea ai o ia ma Kerisiano, ma sa fesoasoani o ia i a Pauro. Ona tusi mai lea o Pauro i a Filemoni e faapea: “Na ou loto ina ia taofi pea ia te ia ma te nonofo ma aʻu, ina ia fai mou sui, na te auauna mai ia te au i oʻu noanoataga ona o le tala lelei. A ou te le fia faia se mea e tasi pe a le to mai sau pule, ina neʻi pei o se mea ua faatauanauina lou agalelei mai, a ia faia ma le loto.” (Filemoni 13, 14) Sa toe faafoi atu e Pauro Onesemo, ma talosaga atu i a Filemoni ina ia feagai ma ia e pei o se uso Kerisiano. Sa iloa e Pauro e lē o ia e ana le lafu mamoe; o le lafu a le Atua. E lē o ia o se matai o le lafu ae o se auauna i ai. Sa leʻi pule malosi atu Pauro i a Filemoni; sa ia amanaia le saolotoga o Filemoni e filifili ai.
22. (a) E ao faapefea ona malamalama toeaina i lo latou tulaga e tatau ona iai? (e) O le ā le ituaiga o faalapotopotoga o loo faatupuina e Ieova?
22 A o tuputupu aʻe le faalapotopotoga a le Atua, ua faatoateleina foi toeaina ua tofia. O i latou nei, faatasi ma isi toeaina ua tele atu lo latou poto masani, e ao ona malamalama, o ō latou tulaga o se tasi o auaunaga e faatauvaa. O le faia faapea, a o taitaia atu e le Atua lana faalapotopotoga i le lalolagi fou, o le a faaauau ai pea ona tuputupu aʻe e pei ona ia finagalo i ai—ua lelei ona faamaopoopoina, ae e lē tuulafoaia ai le alofa ma le mutimutivale o le alofa ona o le faia ina ia matuā lelei. Ona atili faatosinaloto ai lea o lana faalapotopotoga i ē e pei ni mamoe, o ē o le a latou faamaonia e faapea, “e galue le Atua i mea uma lava mo le lelei faatasi ma i latou o e ua alolofa atu ia te ia.” O le mea lena e ao ona faatalitalia e iai i se faalapotopotoga e faavae aʻe i le alofa, auā “e le uma le alofa.”—Roma 8:28; 1 Korinito 13:8.
O le a Faapefea ona E Tali?
◻ Ua faamatalaina faapefea e le Tusi Paia le tausiga a Ieova i ona tagata?
◻ O le ā le matafaioi ua faatino e Iesu i le tausiaina o le lafu mamoe a le Atua?
◻ O le ā le uiga totino autū e ao ona iai i toeaina?
◻ Aisea e ao ai i toeaina ona amanaia le saolotoga o mamoe e filifili ai?
[Ata i le itulau 16]
Sa faaalia e Iesu, le “leoleo mamoe lelei” le alofa mutimutivale
[Ata i le itulau 17]
Sa faufau taʻitaʻi lotu amioleaga e fasiotia Iesu