Pe o le a E Viia ea Ieova?

“LE Atua e, e pei o lou suafa, e faapea lou viiga ona oo i tuluʻiga o le lalolagi.” O nei upu, e mai se pese faavaloaga a atalii o Koru. (Salamo 48:10) I aso nei, o se aufaipese toatele ua faia aʻe i le faitau miliona o Molimau a Ieova, o loo latou viia le Atua ma faalauiloa lona suafa e ala lea i le talaʻia o le tala lelei o lona Malo. E ala i lo latou faia faapea i atunuu ma motu o le sami e 232, ma i le sili atu i le 300 gagana, ua mafai ai ona latou ausia moni “tuluʻiga o le lalolagi.”

O le ā ua uunaia ai tagata mai aganuu, ituaiga, ma gagana eseese, e viia Ieova? O le mafuaaga autū, o lo latou loto faafetai mo le poto saʻo mai le Tusi Paia, le Afioga a le Atua. Ua faasaolotoina i latou e le upu moni faaleagaga mai uputuu ma talitonuga faalotu e pologa ai, e pei o le faapuapuagatia e faavavau. (Ioane 8:32) Ua fesoasoani foi le Tusi Paia i a i latou e talisapaia uiga matagofie o Ieova e pei o lona alofa, malosi, poto, ma le faamasinotonu lea e ō lua ma le alofa mutimutivale. I le mauaina o le malamalama e faatatau i le ofoina mai e le Atua o lona Alo e toatasi, o Iesu Keriso, e fai ma taulaga togiola mo tagata, ua uunaia ai tagata amiotonu e vivii ma auauna i a Ieova.

E tusa ai ma le tusi o le Tusi Paia, o le Faaaliga, ua alalaga faapea se aufaipese faalelagi: “Lo matou Alii e, ma lo matou Atua, e tatau lava oe ina ia tuuina atu ia te oe le viiga, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.” (Faaaliga 4:11) O sea ituaiga viiga, e lē māfua ona o se faalogona o se avega tauave lea e tatau ona fai. Ae, e māfua mai i le faaaloalo loloto mo Ieova.

Vivii i le Atua e Ala i le Talaʻia o le Tala Lelei

I le viia o Ieova, ua faataitai ai se tasi i le faaaoaoga matagofie a Iesu Keriso, le tagata autū i le viiaina o le Atua. Ua aofia ai i le mulimuli i tulagaaao o Iesu le auai lea i le galuega o le talaʻia o le tala lelei o le Malo o le Atua. (Mataio 4:17, 23; 24:14) Ua avea lenei galuega talaʻi ma taumafaiga aupito sili lea i le lalolagi aoao ina ia viia Ieova.

Ona o le tāua tele o lenei galuega talaʻi, ua faafesootai manino atu ai e le Tusi Paia lenei mea ma le faaolataga. Ua faapea le faitauina o le Roma 10:13-15: “E faaolaina i latou uma o e valaau i le suafa o le Alii. O lenei, pe faapefea ona latou valaau atu i le ua latou le faatuatua i ai? pe faapefea foi ona latou faatuatua i le ua latou le faalogo atu i ai? pe faapefea foi ona latou faalogo atu, pe a leai se talaʻi atu? Pe faapefea foi ona talaʻi atu, pe afai ua le aauina atu i latou? Pei ona tusia, E matagofie naua o latou vae o e au mai le tala lelei i le manuia!”

I le tausaga ua tuanai lava ia, e sili atu i le piliona itula na faaalu e Molimau a Ieova i le galuega talaʻi. Ma e maeu ni iuga lelei na oo i ai ona o lea vivii atu i le Atua! Pe ā ma le 314‚000 i latou na aufaatasi atu i le aufaipese o ē vivii, e ala i le tuuina atu i a Ieova i le papatisoina i le vai.

Ae a faapefea le aofaiga e 12,288,917 o ē na auai i le Faamanatuga o le maliu o Keriso i le 1994? E sili atu ma le 7,000,000 o i latou ia na auai e leʻi avea ma ē vivii atu i a Ieova e ala i le avea ma ē talaʻia le tala lelei. Ae o lo latou auai i lea faamanatuga tāua, e mafai ona iu i se faaopoopoga atili o nisi, e faitau miliona le toatele, i le aufaipese o ē vivii. O le ā e mafai ona faia ina ia fesoasoani ai i nei tagata loto fiafia ia avea ma ē vivii i a Ieova?

Fesoasoani ua Iai

Atonu ua i le toatele o tagata fiafia le faanaunauga e vivii i a Ieova ae lagona e lē mafai ona latou ausia tapulaa. E lelei pe a latou manatuaina upu a le faisalamo e faapea: “E faasaga ae oʻu mata i mauga, e oo mai ai loʻu fesoasoani. O loʻu fesoasoani mai ia Ieova lea, o le na faia le lagi atoa ma le lalolagi.” (Salamo 121:1, 2) E manino na faasaga atu mata o le faisalamo i mauga o Ierusalema, i le mea o loo iai le malumalu o Ieova ma le nofoaga i le lalolagi o le malo faatiokarate. Ona o lena, e talafeagai ai ona tatou faia se faaiuga e faapea, e na o Ieova ma lana faalapotopotoga e mafai ona tatou maua ai le fesoasoani e viia ai o ia ma faalauiloa le feau o le Malo.—Salamo 3:4; Tanielu 6:10.

I aso nei, o i latou e faanaunau e vivii i a Ieova e mafai ona latou faatalitalia le fesoasoani alofa mai lana faalapotopotoga faalelalolagi. Mo se faataitaiga, ua ofoina atu e Molimau a Ieova le fesoasoani e ala i le faia o suesuega faale-Tusi Paia ma tagata fiafia, e aunoa ma se totogi. Ua lē na o le aʻoaʻoina o talitonuga mai le Tusi Paia e aofia i lenei polokalama faaleaoaoga. E fesoasoani ai foi i lē o loo aʻoaʻoina ina ia atiina aʻe le talisapaia mo mea ua ia aʻoaʻoina, faapea foi mo le faalapotopotoga o loo faaaogaina e Ieova.

E tusa ai ma lea, e taumafai le Molimau o loo faia le suesuega faale-Tusi Paia ina ia faamautinoa, e lē gata ina pāʻia le mafaufau, ae faapea foi ma le loto, i upu moni fou. Ma e lē tatau foi ona taofiofi le faiaʻoga mai le faaalia atu i le tagata aʻoga o le auala o loo faaaogaina ai e Ieova Lana faalapotopotoga e faataunuuina ai Lana fuafuaga i luga o le lalolagi. Ua masani ona aogā le polosiua Molimau a Ieova—Autasi i le Faia o le Finagalo o le Atua i le Lalolagi Aoao ma le vitiō Jehovah’s Witnesses—The Organization Behind the Name ina ia faia lea tulaga.

Ua iai foi se vaega tāua a sauniga faa-Kerisiano i ē e ono avea ma tagata e vivii i a Ieova. I le amataga lava o le suesuega faale-Tusi Paia, e lelei ona valaaulia le tagata suesue ia auai i sauniga faa-Kerisiano. O le a oo ina ia aʻoaʻoina le tāua o le auai e lē aunoa, ma faia sana vaega, i sauniga uma. (Eperu 10:24, 25) E mafai e ovasia ona tuuina atu le fesoasoani tāua i uso talitonu, ma ē ono avea ma tagata e vivii i a Ieova, e ala i le saunia o sauniga e atiina aʻe faaleagaga ma aogā.

Fesoasoani i Tamaiti ia Vivii i a Ieova

Ua aofia ai tamaiti i le aofaiga o i latou e mafai ona avea ma ē faalauiloa le tala lelei i le lumanai lata mai. Ua faapitoa i tamā le avega tauave mai le Tusi Paia ina ia tausi atu i a latou fanau “i aoaiga ma apoapoaiga a le Alii.” (Efeso 6:4) E oo lava i tamaiti laiti, e mafai ona latou atiina aʻe se faanaunauga e vivii i a Ieova, pe afai e lelei ona aʻoaʻoina e mātua e auauna i le Atua.

Mo ni nai masina, na fai ai ma amio a se teineitiiti i Anitenitina ona alu atu pea i toeaina o le faapotopotoga e talosagaina sa latou fesoasoani ina ia mafai ona ia agavaa e avea ma sē talaʻia le Malo. I se taimi mulimuli ane, na oo ina malilie ai ōna mātua ma le au toeaina e faataga o ia e avea ma tagata talaʻi lē papatisoina. Ua mafai ona ia taulimaina le feau o le Malo ma le uigā i aiga. E ui lava e na o le lima tausaga o lenei teineitiiti ma e na te lē iloa faitau, ua ia taulotoina le mea e maua i ai mau o le Tusi Paia. A uma ona ia sueina le mau, ona ia fai atu lea i lē ōna le fale e na te faitauina, ma ia avatua mulimuli le faamalamalamaga.

Ua manino mai, e tele mea lelei e mafaia e toeaina ma mātua i le faalaeiauina ma le fesoasoani i a i latou, o loo agaʻi i le avea ma ē vivii i a Ieova.—Faataoto 3:27.

Se Faiā e Faavavau ma Ieova

Ae ā pe a faapea ua fai si umi o le taimi o tou aufaatasi ma Molimau a Ieova ae e te leʻi auai atu lava i la latou galuega talaʻi? Atonu e aogā ona e fesili ifo i a te oe lava i fesili nei, ‘Pe ou te talitonu ua ou maua le upu moni ma o Ieova o le Atua moni lea e toatasi? Pe ua ou mautinoa o le Malo o le Atua e na o le pau lea o le vaifofo mo faafitauli o tagata? Pe ua ou tuua tapuaiga sese uma ma tu ma faiga faalelalolagi ia e inoino i ai Ieova? Pe o i a te aʻu se alofa loloto mo le Atua ma āna tapulaa amiotonu?’ (Salamo 97:10) Afai e mafai ona e ioe mai ma le faamaoni i nei fesili, o le ā o loo taofia ai oe mai le vivii atu i a Ieova?—Faatusatusa i le Galuega 8:36.

E lē na o le talaʻia o le tala lelei e aafia ai i le vivii i a Ieova. Afai ua e aveina i fale le poto saʻo, maua le faatuatua moni, ma ua ogatusa lou olaga ma tapulaa tauatua, e manaomia ona faamalosia le lua faiā totino ma le Atua. E faapefea? I le faia o se tuuina atu i a te ia e ala i le tatalo ma faailogaina lea e ala i le papatisoina i le vai. E aafia ai lou ola e faavavau. O lea, ia gaoioi nei e tusa ai ma le fautuaga a Iesu e faapea: “Ia outou ulu atu i le faitotoa va apiapi; auā e va tele le faitotoa, e lautele foi le ala e alu atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.”—Mataio 7:13‚ 14.

Ona ua lata tele mai le faaumatiaga o lenei faiga o mea, e lē o se taimi lenei e faatautu ai. Ia faia loa laasaga agaʻi i se faiā e faavavau ma Ieova. E moni, o nei le taimi e tali atu ai ma le mautinoa i le fesili, Pe o le a e viia ea Ieova?