Aʻoaʻoina e Ieova Seia Oo mai Lava i Aso Nei

“Ua foai mai ia te au e le Alii o Ieova le laulaufaiva o e ua aʻoaʻoina.”—ISAIA 50:4.

1, 2. (a) E mo le ā na saunia ai e Ieova lana tagata aʻoga sa sili ona ia fiafia i ai, ma o le ā na iu i ai? (e) Na taʻutino atu faapefea e Iesu le Puna o ana aʻoaʻoga?

UA AVEA pea Ieova le Atua o se Faiaʻoga talu mai ona avea o ia ma Tamā. I se vaitaimi e lē mailoa ina ua uma ona fouvale nisi o lana fanau, ona ia sauniunia ai lea o lana tagata aʻoga e sili ona ia fiafia i ai, o lana Ulumatua, mo se faiva i le lalolagi. (Faataoto 8:30) Ua aumaia faavaloaga e le Isaia mataupu e 50 lenei tagata aʻoga i le faapea mai: “Ua foai mai ia te au e le Alii o Ieova le laulaufaiva o e ua aʻoaʻoina, ina ia ou iloa ona faamafanafana i se upu le ua tigaina.” (Isaia 50:4) O le iuga o le faatatauina o aʻoaʻoga a lona Tamā a o iai i le lalolagi, na avea ai Iesu ma puna o le faafouina ia i latou uma o ē na ʻvaivai ma mafatia i avega.’—Mataio 11:28-30.

² Na faia e Iesu le tele o galuega mamana i le vaitaimi o le uluai senituri. Na ia faapupulaina mata o ē tauaso ma faatutū ē na maliliu, e ui i lea, sa lauiloa o ia e i latou na latou ola faatasi aʻe o se faiaʻoga. Na taʻua o ia e ona soo, e faapena foi ma ona fili o le faiaʻoga. (Mataio 8:19; 9:11; 12:38; 19:16; Ioane 3:2) Sa lei taliaina e Iesu se viiga ona o mea na ia aʻoaʻoina atu, a e na ia faailoa atu ma le lotomaulalo e faapea: “O laʻu aʻoaʻoga e le o saʻu lava, a o lana na auina mai aʻu.” “Faapei ona aʻoaʻo mai e loʻu Tamā ia te au, o mea ia ou te tautala atu ai.”—Ioane 7:16; 8:28; 12:49.

Le Faiā e Talafeagai Lelei a le Faiaʻoga ma le Tagata Aʻoga

3. Ua faailoa mai faapefea e le valoaga a Isaia le naunau mai o Ieova ia i latou o ia aʻoaʻoina?

³ O se faiaʻoga e sili ona lelei, na te faaalia le matuā naunau totino atu, ma le naunau alofa i ana tagata aʻoga. Ua faailoa mai e le Isaia mataupu e 50 e faapea o loo ia Ieova le Atua lena ituaiga o naunau ia i latou o ia aʻoaʻoina. Ua matauina faapea e le valoaga: “Na te fagua aʻu i lea taeao ma lea taeao; na te fagua oʻu taliga, ina ia ou faalogologo e pei o e ua aʻoaʻoina.” (Isaia 50:4) O upu o iai iinei, ua taʻu mai ai se faiaʻoga o lē e fafagu i ana tagata aʻoga i le taeao po ina ia aʻoaʻo ia i latou. Na matauina e se tasi tagata poto o le Tusi Paia le faatatauina o upu o le valoaga, ma ia faaopoopo mai ai e faapea: “O le fuafuaga e faapea, o lē Laveai o le a avea . . . o se tasi sa i le aʻoga a le Atua, i se uiga faafaatusa; ma o lē e agavaa e faaoo atu faatonutonuga i isi. . . . O le a avea ai le Mesia e matilatila le agavaa, i aʻoaʻoga mai le Atua, ia avea ma faiaʻoga o tagata.”

4. Na tali atu faapefea Iesu i aʻoaʻoga a lona Tamā?

⁴ E talafeagai lelei ai le tali mai o tagata aʻoga i le aʻoaʻo atu a lo latou faiaʻoga. Na tali atu faapefea Iesu i le aʻoaʻo atu a lona Tamā? O lana tali atu na ogatusa ma le mea ua tatou faitau ai i le Isaia 50:5, NW: “Ua toina le puipui o oʻu taliga e le Alii o Ieova, a ou te lei finau vale; ou te le liliu i le itu sese.” Ioe, na naunau Iesu ia aʻoaʻoina. E pei ona fai mai ai le alagaupu, na logo faa-Tutuila o ia. A e sili atu i lena, sa naunau o ia e faia so o se mea e fetalai atu ai lona Tamā ia te ia. Sa lei fouvale o ia; a e na fetalai o ia e faapea: “E aua le faia loʻu loto, a o lou finagalo.”—Luka 22:42.

5. (a) O le ā ua faailoa mai ai na muai silafia e Iesu ia tofotofoga o le a puapuagatia ai o ia i le lalolagi? (e) Na faataunuuina faapefea le valoaga o i le Isaia 50:6?

⁵ Ua iloa mai i le valoaga e faapea, na faailoa atu i le Alo āuga e tulai mai ona o lona faia o le finagalo o le Atua. Ua faaalia lenei i mea na fetalai i ai lē na aʻoaʻoina: “Na aʻu tuuina atu loʻu tua i e sasa mai, ma oʻu alafau i e futi le ʻava; ou te lei ufiufi foi oʻu mata i le mā ma le feanu.” (Isaia 50:6) E pei ona faailoa mai e le valoaga, na feagai Iesu ma faiga sauā a o iai i le lalolagi. Na tusi faapea le aposetolo o Mataio: “Ona latou taufaifeanu ai lea i ona fofoga, . . . ua taufaipo atu foi isi.” (Mataio 26:67) Na faia lenei mea a o i le vaaiga a le au taʻitaʻi lotu i le po o le Paseka i le 33 T.A. I le aso na sosoo ai, na tuu ai e Iesu ia lava i le au faaoosala, a o sasaina ma le lē alofa o ia e fitafita Roma a o lei faatautauina o ia i se laau e maliu ai.—Ioane 19:1-3, 16-23.

6. O le ā ua faaalia ai sa tumau pea le mautinoa o Iesu i lona Faiaʻoga, ma na tauia faapefea lona mautinoa?

⁶ O le Alo, sa lelei tele le aʻoaʻoina muamua o ia, sa faatumauina pea lona mautinoa i lona Faiaʻoga. Ua faaalia mai lenei mea e ala i lana fetalaiga na sosoo ai e tusa ai ma le valoaga: “A o le Alii o Ieova e fesoasoani mai o ia ia te au; o le mea lea ou te le mā ai.” (Isaia 50:7) O le mautinoa sa ia Iesu i le fesoasoani a lona Faiaʻoga sa tauia tele. Na faaeaina o ia e lona Tamā, ma faamanuiaina o ia i se tulaga e sili atu ona maualuga nai lo isi auauna uma a le Atua. (Filipi 2:5-11) E anoanoai foi faamanuiaga sili o faatalitali mai mo i tatou pe afai tatou te pipii mau ma le usiusitai i aʻoaʻoga a Ieova ma ia aua neʻi “liliu i le itu sese.” Seʻi o tatou tagai nei la pe na faapefea ona mauaina lena aʻoaʻoga seia oo mai lava i o tatou aso.

Se Polokalama Tau Aʻoaʻoga ua Faateleina

7. Ua faaauauina faapefea e Ieova lana aʻoaʻoga i le lalolagi?

⁷ E pei ona tatou matauina muamua, na faaaogā e Ieova lona Sui i le lalolagi, o Iesu Keriso, ina ia faataunuuina aʻoaʻoga mai le Atua i le faagasologa o le uluai senituri. (Ioane 16:27, 28) Na faasino atu pea e Iesu e faapea, o le Afioga a le Atua, o le faavae lea o ana aʻoaʻoga, na faataatia ai se faaaʻoaʻoga mo i latou na ia aʻoaʻoina. (Mataio 4:4, 7, 10; 21:13; 26:24, 31) Mulimuli ane, na faaauau ai aʻoaʻoga a Ieova i le lalolagi e ala i le faiva a i latou ia na aʻoaʻoina. Ia manatua na poloaia e Iesu i latou e faapea: “O lenei, ia outou o atu e fai nuu uma lava ma soo, . . . aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) Ina ua faia ia soo, ona avea ai lea o i latou ma vaega o le “fale o le Atua, . . . le ekalesia lea a le Atua soifua.” (1 Timoteo 3:15) Na faamaopoopoina foi i latou i ni faapotopotoga taitasi na faapea ona aʻoaʻoina ai i latou e Ieova. (Galuega 14:23; 15:41; 16:5; 1 Korinito 11:16) Pe ua faaauau mai ea aʻoaʻoga mai le Atua i lena auala seia oo mai lava i o tatou aso?

8. Na faapefea ona faailoa mai e Iesu e faapea o le galuega talaʻi o le a faatonutonuina i le lalolagi a o lei oo mai le iuga?

⁸ E mautinoa lava, ua faia faapea! E tolu aso a o lei oo i lona maliu, na valoia ai e Iesu e faapea, a o lei oo mai le iuga o lenei faiga o mea, o le a faateleina le galuega talaʻi. Na ia fetalai e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” Ona faamatala mai ai lea e Iesu le meafaigaluega o le a faaaogā e faatonutonuina ai lenei polokalama o le talaʻi atu ma le aʻoaʻo atu lea o loo faia nei i le lalolagi aoao. Na ia taʻua “le auauna faamaoni ma le mafaufau,” lea o le a avea o se auala, po o se meafaigaluega, e saunia maia meaʻai faaleagaga mo Ana auauna. (Mataio 24:14, 45-47) Ua faaaogā e Ieova le Atua lenei “auauna” ina ia vaavaaia mea tau i le Malo i le lalolagi atoa.

9. O ai e faia aʻe ai le auauna faamaoni ma le mafaufau?

⁹ I aso nei, ua faia aʻe le auauna faamaoni ma le mafaufau i le vaega totoe o suli o le Malo. O i latou o Kerisiano faauuina, o le vaega totoe o le 144,000, “e o Keriso,” ma o i latou foi o le vaega o le “fanau . . . a Aperaamo.” (Kalatia 3:16, 29; Faaaliga 14:1-3) E mafai faapefea ona e iloaina le auauna faamaoni ma le mafaufau? E matauina faapitoa lava i le galuega o latou faia, ma e ala i lo latou pipii vavalalata atu i le Afioga a le Atua, o le Tusi Paia.

10. O ā meafaigaluega ua faaaogā e le vasega o le auauna ina ia faaauilumaina ai aʻoaʻoga a Ieova?

¹⁰ Ua faaaogā e Ieova lenei “auauna” o lana auala e aʻoaʻo ai tagata i aso nei. O i latou e i le vasega o le auauna, na faaigoaina i le igoa o Molimau a Ieova i le 1931. Talu mai lea taimi, e faitau miliona ua faatasitasi atu ma i latou ma ua taliaina lena igoa ma auai i le folafolaina o le Malo o le Atua. O lenei mekasini, Le Olomatamata Faasilasilaina le Malo o Ieova, o le meafaigaluega autū lea ua faaaogā e le “auauna” mo le galuega o le aʻoaʻo atu. E ui i lea, o loo faaaogaina foi isi lomiga, e aofia ai tusi, tamaitusi, polosiua, sāvali, ma le mekasini o le Awake!

11. O ā aʻoga ua faagaoioia e le “auauna,” ma o le ā le fuafuaga ua aogā i ai nei aʻoga taitasi?

¹¹ E faaopoopo atu i ai, ua faagaoioia foi e le “auauna” aʻoga eseese. Ua aofia ai le Aʻoga o le Tusi Paia o le Olomatamata i Kiliata, o se vasega e lima masina lona umi ua faapea ona saunia ai faifeau talavou mo le auaunaga misionare mo atunuu ese, ma le Aʻoga mo Toleniga i le Faiva e lua masina le umi, lea ua toleniina ai toeaina ma auauna o le faiva e lei faaipoipo mo tofiga faaleatua faapitoa. Ua iai foi le Aʻoga o le Faiva o le Malo, ua aʻoaʻoina ai toeaina Kerisiano ma auauna o le faiva mai lea taimi i lea taimi mo a latou tiute tauave faalefaapotopotoga, ma le Aʻoga mo le Auaunaga Paeonia, ua faapea ona faaauupegaina ai le au faievagelia faataimi atoa ina ia atili ai ona uigā la latou galuega talaʻi.

12. O le ā se vala faalevaiaso o le polokalama tau aʻoaʻoga?

¹² O se tasi vala o le polokalama o le aʻoaʻo atu, o sauniga ia e lima faalevaiaso ua faia i faapotopotoga e sili atu i le 75,500 o tagata o Ieova i le lalolagi aoao. Po o e maua aogā atoatoa i le tele e mafai ai mai nei sauniga? I lou uai atu i faatonuga ua aumaia, pe e te faaalia ea ua e talitonu moni lava ua pei lava o loo e iai i le aʻoga a le Atua? Po o lou agaʻi ea i luma faaleagaga ua matuā manino atu ai i isi e faapea ua ia te oe “le laulaufaiva o e ua aʻoaʻoina”?—Isaia 50:4; 1 Timoteo 4:15, 16.

Aʻoaʻoina i Sauniga a le Faapotopotoga

13. (a) O le ā se auala tāua ua faapea ona aʻoaʻo mai ai e Ieova ona tagata i aso nei? (e) E mafai faapefea ona faaalia lo tatou talisapaia mo Le Olomatamata?

¹³ O le auala faapitoa ua aʻoaʻoina ai e Ieova ona tagata e ala mai lea i se suesuega faalevaiaso o le Tusi Paia, e faaaogā ai Le Olomatamata e fai ma fesoasoani e aʻoaʻo atu ai. Pe e te vaai i lenei sauniga o se nofoaga e mafai ona aʻoaʻoina ai oe e Ieova? E ui lava ina faaautū le faatatauina o le Isaia 50:4 ia Iesu, a e mafai foi ona faatatauina ia i latou uma o ē e faaavanoaina atu i latou i sauniuniga mai le Atua, ina ia maua ai “le laulaufaiva o e ua aʻoaʻoina.” O se tasi o auala e mafai ai ona e faaalia e te faatauaina Le Olomatamata, e ala lea i le faitauina loa o lomiga taitasi pe a e mauaina. Ma, pe afai ua suesueina Le Olomatamata i le faapotopotoga, e mafai ona e faaalia lou talisapaia ia Ieova e ala i le auai ai ma faapena foi ma le sauniuni e faia se tautinoga i luma o le lautele o lou faamoemoe.—Eperu 10:23.

14. (a) Aisea ua avea ai le faia o tali i sauniga o se faaeaga tāua? (e) O ā ituaiga o tali mai i talavou e sili ona faalaeiauina ai?

¹⁴ Pe e te talisapaia e faapea e ala i au tali i sauniga, e mafai ona fai ai sau vaega i le polokalama tele tau aʻoaʻoga a Ieova o le aʻoaʻo atu? E mautinoa lava, o le faia o se tali i sauniga o se auala tāua lea tatou te atiina aʻe ai le tasi i le tasi i “le alofa ma galuega lelei.” (Eperu 10:24, 25) Pe e mafai foi ona iai se vaega a tamaiti i lenei polokalama o aʻoaʻoga? Ioe, e mafai ona iai. O tali a tamaiti e sau mai le loto e masani lava ona faalaeiauina ai ē e matutua. I nisi o taimi, o ē e fou mai i a tatou sauniga, ua uai atu ma le totoʻa i upu moni o le Tusi Paia ona ua faagaeetia i tali a tamaiti. O nisi talavou ua fai ma masani ona faitau saʻo mai a latou tali mai le palakalafa, po o le toe taʻu mai o se tali na musumusu atu i ai e se tagata matua. A e peitai ane, e sili atu ona faalaeiauina ai pe afai na saunia lelei a latou tali. O tali faapena e avatu moni ai lava le viiga i lo tatou Aʻoaʻo Sili ma lana polokalama faaeaina tau i le aʻoaʻoga.—Isaia 30:20, 21.

15. O le ā e mafai ona faia e mātua e fesoasoani ai i fanau ina ia uigā le faia o tali?

¹⁵ O se fiafiaga tele le vaai atu i tamaiti o mananao e auai i le viiaina o lo tatou Atua. Na talisapaia e Iesu upu o viiga mai tamaiti. (Mataio 21:15, 16) Ua taʻua mai e se tasi toeaina Kerisiano e faapea: “A o oʻu tama itiiti, sa ou manao e fai saʻu tali i le Suesuega o Le Olomatamata. Pe a uma ona fesoasoani mai loʻu tamā ia te aʻu e saunia saʻu tali, ona ia faatonuina loa lea o aʻu ina ia aʻo laʻu tali a itiiti mai o le faafitu.” E mafai i le taimi o la outou suesuega faaleaiga o le Tusi Paia ona fesoasoani atu ai outou mātua i a outou fanau e saunia ni tali i a latou lava upu, i palakalafa ua filifilia mai Le Olomatamata. Fesoasoani ia i latou ina ia talisapaia le faaeaga sili ua ia i latou o le faia o se vaega i le polokalama tau aʻoaʻoga a Ieova.

16. Ua aogā faapefea le Aʻoga o le Faiva Faatiokarate, ma o ai e mafai ona fai ai sa latou vaega i le aʻoga?

¹⁶ O aʻoaʻoga i isi sauniga faa-Kerisiano e tatau foi ona manatu mamafa i ai, e lē gata ia i latou ua faaeaina e faia atu mataupu, a e faapena ai foi ma ē o faalogologo i faatonuga o tuuina mai. Ua silia nei ma le 50 tausaga talu ona faaaogā e Ieova le Aʻoga o le Faiva Faatiokarate faalevaiaso e toleniina ai le faitau miliona o tane ma fafine ina ia tuuina atu le feau o le Malo i se auala e sili ona aogā. O i latou o auai pea ma le faapotopotoga e mafai ona faia sa latou vaega i le aʻoga, e aofia ai foi ma tagata faatoʻā amata ona auai i sauniga, pe afai o ola i latou i se olaga e talafeagai ma mataupu silisili faa-Kerisiano.

17. (a) O le ā le fuafuaga faapitoa na faavaeina ai le Sauniga mo le Lautele? (e) O ā ni mea e ao ona manatua e failauga o lauga lautele?

¹⁷ O se tasi vala ua leva ona iai o le polokalama tau aʻoaʻoga, o le Sauniga mo le Lautele. E pei ona aliali mai i lona igoa, na fuafuaina faapitoa lenei sauniga ina ia faamasani ai ē e lē o ni Molimau ma aʻoaʻoga faavae o le Tusi Paia. O lea, o lē o faia atu le lauga e manaomia ona ia tuuina atu le mataupu ina ia faapea ona malamalama ai ē o le taimi muamua lea faatoʻā faalogo ai i le feau. O le uiga o lenei mea, o le faamatala atu lea o faaupuga e pei o “isi mamoe,” “uso,” ma le “vaega totoe,” o faaupuga e lē malamalama i ai i latou e lē o ni Molimau. Talu ai o tagata o auai i Sauniga mo le Lautele atonu e iai o latou talitonuga po o loo ola i ni ituaiga o olaga ua matuā feteenai ma le Tusi Paia—e ui ina talia e le lautele i aso nei—a e o le a faautauta le failauga i taimi uma lava, ma ia ona lē ulagia ai na ituaiga talitonuga po o ituaiga olaga.—Faatusatusa i le 1 Korinito 9:19-23.

18. O ā isi sauniga faalevaiaso a le faapotopotoga o iai, ma o ā fuafuaga ua aogā i ai?

¹⁸ O le Suesuega Tautusi a le Faapotopotoga o se sauniga ua faia i vaiaso taitasi e suesueina ai lomiga ua saunia e ala mai le taʻitaʻiga a le auauna faamaoni ma le mafaufau, faatasi ai ma le Tusi Paia. O le Revelation—Its Grand Climax At Hand!, o le tusi lea o loo suesueina nei i le tele o atunuu. Ua fuafuaina le Sauniga o le Auaunaga ina ia faaauupegaina ai tagata o Ieova ina ia faia ai se vaega atoatoa i le talaʻiina o le tala lelei o le Malo ma le faia ma soo.—Mataio 28:19, 20; Mareko 13:10.

Aʻoaʻoina i Sauniga Tetele

19. O ā faatasitasiga tetele ua fuafuaina e le “auauna” i tausaga taitasi?

¹⁹ I le sili atu ma le selau tausaga, ua fuafua ai e le ʻauauna faamaoni’ tauaofiaga ma fonotaga mo le aʻoaʻoina ma le faalaeiauina faapitoa o Kerisiano moni. O sauniga tetele faapena ua faia faatolu nei i tausaga taitasi. E iai le fonotaga mo le aso e tasi, ua faapea ona faatasi atu i ai se vaega o faapotopotoga ua faia aʻe ai se matagaluega. I tausaga taitasi, ua faia ai e matagaluega taitasi se fonotaga matagaluega e aufaatasi ai mo aso e lua. E faaopoopo atu i ai, e iai foi se aufaatasiga e taʻua o le tauaofiaga itumalo, e faatasitasi atu i ai ni matagaluega. I nisi tausaga, e faia ai ni tauaofiaga faavaomalo. O nei faatasitasiga tetele e au atu ai Molimau mai le tele o atunuu, ua faamalosia moni ai lava le faatuatua o tagata o Ieova!—Faatusatusa i le Teuteronome 16:16.

20. O le ā ua matuā faamamafaina mai i tauaofiaga tetele a Molimau a Ieova?

²⁰ I le 1922 ina ua feiloai le 10,000 tagata i Cedar Point, Ohio, i le Iunaite Setete o Amerika, na faagaeetia ai le au usufono i upu faalaeiau a le failauga e faapea: “O le aso lenei ua silisili i aso uma. Faauta, ua pule le Tupu! O outou o ona sui i le lautele. O lea, ia faalauiloa, faalauiloa, faalauiloa, le Tupu ma lona malo.” O tauaofiaga tetele faapena, ua matuā tuu atu ai le faamamafaga i le galuega talaʻi. Mo se faaaʻoaʻoga, i le tauaofiaga faavaomalo i le Aai o Niu Ioka i le 1953, na faia ai se faasilasilaga e faatatau i le faavaeina o le polokalama o le toleniina mo le galuega i le fale i le fale, i faapotopotoga uma lava. O lona faatinoina na maua ai se āuga lelei tele i le talaʻiga o le Malo i le tele o atunuu.

Aʻoaʻoina e le Atua ina ia Aʻoaʻo Atu

21. O le ā le faaeaga tatou te mananao e taliaina, e aunoa ma le misia o lona faamoemoega?

²¹ E mautinoa lava, ua ia Ieova se polokalama ofoofogia tau aʻoaʻoga i le lalolagi i aso nei! O i latou uma e faaaogā tatauina ia sauniuniga, e mafai ona aʻoaʻoina e le Atua, ioe, e mafai ona iai ma i latou ua avatu i ai le “laulaufaiva o e ua aʻoaʻoina.” Maeu se faaeaga o le a iai, e pei lava o loo i le aʻoga a le Atua! E ui i lea, a o taliaina lenei faaeaga, e lē tatau ona tatou misia lona faamoemoega. Na aʻoaʻoina e Ieova Iesu ina ia ona aʻoaʻoina isi, ma na aʻoaʻo e Iesu ona soo ina ia mafai ona latou faia le galuega lava lea e tasi na ia faia, a e i se fua e sili atu ona telē. I se uiga tutusa foi la, ua toleniina i tatou i le polokalama sili tau aʻoaʻoga a Ieova mo le faamoemoe o le aʻoaʻoina o isi.—Ioane 6:45; 14:12; 2 Korinito 5:20, 21; 6:1; 2 Timoteo 2:2.

22. (a) O le ā le faafitauli sa ia Mose ma Ieremia, a e na faapefea ona foiaina? (e) O le ā le faamautinoaga ua ia i tatou e faapea o le a faamautinoa e le Atua lava ia ua faataunuuina le talaʻiga o le Malo?

²² Pe e te fai mai e pei ona sa taʻua e Mose, “o aʻu o le tagata e le iloa fai lauga,” po o Ieremia na fai atu “ou te le iloa ona tautala”? O le a fesoasoani Ieova ia te oe e pei ona sa ia fesoasoani ia i laʻua. Na ia taʻu atu ia Mose: “O aʻu foi ou te faatasi ma lou gutu.” Ma na ia fetalai atu ia Ieremia e faapea: “Aua e te fefe . . . auā ou te ia te oe.” (Esoto 4:10-12; Ieremia 1:6-8) Ina ua mananao taʻitaʻi lotu e taofia ia soo o Iesu mai le tautatala atu, na fetalai Iesu e faapea: “A le feganavai i latou nei, e alalaga mai lava o maa.” (Luka 19:40) A e sa lei tatau ona alalaga mai maa i tuā i inā, ma e lē manaomia foi ona faia faapea i le taimi nei ona o loo faaaogā e Ieova laulaufaiva o ē ua aʻoaʻoina ina ia faaooina atu lana feau o le Malo.

Pe e Mafai ona E Taliina?

◻ O le ā le faiā talafeagai lelei a le Faiaʻoga ma le tagata aʻoga ua faamatilatila mai i le Isaia mataupu e 50?

◻ Ua faaauauina faapefea e Ieova se polokalama tele tau aʻoaʻoga?

◻ O ā nisi o vala o le polokalama tau aʻoaʻoga a Ieova?

◻ Aisea ua avea ai o se faaeaga sili le faia o se vaega i le polokalama tau aʻoaʻoga a Ieova?

[Ata i le itulau 16]

O tali e sau mai le loto a tamaiti, e masani lava ona faalaeiauina ai ē matutua