“O Fea e Maua Mai ai Tupe?”

UA MATUĀ maofa lava i latou ua matamata i le ata vitio a le Sosaiete o le Olo Matamata, “Jehovah’s Witnesses—The Organization Behind the Name.” Latou te vaaia ai foliga matuā mamā o tane ma fafine mai lanu ma talaaga eseese, o galulue ma fiafia faatasi. E lē gata ina maofa le au matamata i le vaaia o le faitau afe o le aufaigaluega laumata fiafia, ae faapea foi ma fale tetele i le nofoaga autū o le Sosaiete i Brooklyn ma a latou faatoaga i Wallkill, Niu Ioka. Ua faaalia i le ata vitio e faapea, i totonu o nei fale tetele, o loo mafai ona maua ai le poto i matātā eseese faaonaponei—o masini lomitusi ma masini e sili ona televavave ia e tuufaatasia ai tusi, ua saunia ai le faitau miliona o lomiga i masina taitasi, le tele o masini komepiuta eseese, ma le anoanoai o auaunaga maopoopo e lagolagosua i ai.

Ua atagia ai i lenei mea le tele o tupe faaalu. O lea, ua fesili ai nisi e faapea, “O fea e maua mai ai le tupe?”

Ua faapena foi ona maofa tagata asiasi atu i le ofisa ulu o le Sosaiete i le lalolagi. E tau maʻauʻau o latou ua e autilo i le fale fou fogafale 30 o loo nonofo ai le aufaigaluega, o se tasi lea mai le tele o fale sa faaaogā e nonofo ai le sili atu i le 3,000 faifeau tauofo o ē e galulue ai iina. O se asiasiga i le Nofoaga Tutotonu fou Faaleaʻoaʻoga pe tusa ma le 70 maila po o le 110 kilomita i mātū o Brooklyn, ua matuā maofa ai foi le toatele o tagata maimoa. O loo fausia pea ma o loo nonofo ai le 1,200 o le aufaigaluega. E lua vasega o misionare o le a toleniina ai iina i tausaga taitasi, ma aauina atu i o latou tofiga i isi atunuu. O le nofoaga foi lenei o loo tuuina atu ai faatonuga i faapotopotoga o Molimau a Ieova e sili atu i le 10,000 i totonu o le Iunaite Setete. E tele lālā i le lalolagi aoao na toe faia foi ni faateteleina o o latou fale, po o le agaʻi atu foi i le faia faapea. O le faagaoioiga o nei galuega uma, e matuā tele se tupe e faaalu ai. Ua fesili ai tagata, “O fea e maua mai ai le tupe?”

O le tali, e maua mai tagata lautele e pei o i tatou. O tagata i le lalolagi aoao, o ē e naunau e faia le mea latou te mafaia e faaauiluma ai le galuega tāua faa-Kerisiano o le talaʻi ma aʻoaʻo atu. O lena ituaiga o agaga o le foai ma le loto malie, sa iai foi i aso ua mavae.

Le Faaaoaoga na Faataatia e Isaraelu Anamua

E sili atu i le 3,500 tausaga ua mavae, na mapuna aʻe ai se manaoga mo ni meaalofa tauofo. Na poloaiina e Ieova Mose ina ia faia se fale apitaga po o se “fale fetafai o le faapotopotoga” e faaaogā i le tapuaiga ia te Ia. O le ata na tuuina mai e le Atua na manaomia ai le tele o mea tāua eseese. Na poloai Ieova e faapea: “Ina fai ia e outou se meaalofa ia Ieova. Ia taitoatasi tagata uma ona aumaia o se meaalofa ia Ieova ma le loto malie.” (Esoto 35:4-9, NW) Na faapefea ona tali mai tagata? Ua faailoa mai e le faamatalaga ia i tatou e faapea, “ona latou o mai lea, o i latou uma o e ua uai i ai o latou loto, ma i latou uma o e ua manatu i ai o latou loto, ua latou aumaia le taulaga ia Ieova mo le galuega o le fale fetafai o le faapotopotoga mo ona sauniga uma, atoa ma ofu sa.” O lenei ‘foai tauofo’ na oo lava ina ‘matuā tele mea na foai ane nai lo o mea na manaomia mo le galuega na poloaiina e Ieova e faia.’ (Esoto 35:21-29; 36:3-5) Maeu se agaga lima foai lē manatu faapito na faaalia e tagata!

E itiiti mai i le 500 tausaga mulimuli ane, na toe alu atu ai foi le valaau mo ni foai tauofo mai tagata Isaraelu. Sa faanaunau le tupu o Tavita e fia faia se fale tumau mo Ieova i Ierusalema, lea o le a faia e lona atalii o Solomona. Na aoina foi e Tavita ma foaiina e ia lava se vaega sili ona tele o mea na manaomia. Na faia foi se vaega a isi tagata ina ua tuuina atu e Tavita le valaau ina ia aumaia “se meaalofa ia Ieova.” O le ā le iuga? “Ona fiafia lava lea o le nuu, auā na foai ma le loto, auā na latou foai ma le fiafia ma le loto atoatoa ia Ieova. Ua fiafia foi Tavita le tupu ma le fiafia tele lava.” (1 Nofoaiga a Tupu 22:14; 29:3-9) E na o siliva lava ma auro, ae tusa lo latou tau ma le $50 piliona talā Amerika pe a faatusatusa atu i tau o aso nei!—2 Nofoaiga a Tupu 5:1.

Ua tatou mātauina mai nei faaaoaoga, e lei iai se tasi na faamalosia e faia se foai. O mea uma sa ‘foai tauofo’ ma na foaiina atu ma le “loto atoa.” Auā e leai se isi mea e sili ona fiafia i ai Ieova, nai lo o mea e foai ma le loto atoa. E faapena foi ina ua mapuna aʻe le avanoa e foai ai tupe e fesoasoani ai i Kerisiano matitiva, na tusia e le aposetolo o Paulo e faapea, e lē o ‘se mea e fai faamalosia.’ Na ia faaopoopo mai: “Ia taitoatasi ma foai e pei ona filifili i lona loto; aua ma le tiga, aua foi ma le faatauanauina; auā e alofa le Atua i le ua foai ma le loto mālie.”—2 Korinito 9:5, 7.

Le Manaoga i Aso Nei

O iai se manaoga mo ni foai tauofo i aso nei? O le mea moni e iai, ma o le a sili atu foi ona faateleina a o faagasolo le taimi. Aisea?

Ua tuuina mai i Kerisiano se faatonuga maumauai mo lenei taimi o le iuga. Na poloaiina e Iesu ona soo e faapea: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou.”—Mataio 28:19, 20.

Ina ia faataunuuina lenei galuega sili o le talaʻi ma aʻoaʻo atu a o tatou tu lalata atu i le taualuga o le faaiuga ‘o lenei faiga o mea,’ e manaomia ai se taimi tele ma alamanuia. Aisea? Auā o na mea uma o loo aofia ai i le faaooina atu o le feau o le Malo o le Atua “i le tuluʻiga o le lalolagi.” (Galuega 1:8) E toatele tagata e latou te lē iloa lelei le Tusi Paia e pei ona sa iai tagata Iutaia o le uluai senituri. O le mea moni o se vaega e toatele o tagata o loo aināina le lalolagi, e lē masani lelei foi ma le Tusi Paia ma e lē manatu i ai e faapea o le Afioga a le Atua. E tatau ona aʻoaʻoina ni tagata talaʻi ma aauina atu i atunuu mamao. (Roma 10:13-15) Ma seʻi manatu i le aofai o gagana e aafia ai! O i latou o loo talaʻi atu i ai, e manaomia ona iai ni a latou Tusi Paia ma ni lomiga e faavae i le Tusi Paia e faitau ma suesue i ai i a latou lava gagana. Ina ia ausia tagata uma i se tulaga faifai pea ma agaigai ai i luma i le taʻumatuaina faaleagaga ina ia mafai ai ona latou fesoasoani atili atu e oo lava i nisi o loo manaomia ona faamaopoopoina i se auala sili.—2 Timoteo 2:2.

Na fetalai Iesu e faapea, o le “tala lelei o le malo” e tatau ona muai “talaiina atu . . . i le atu laulau uma e fai ma molimau i nuu uma; ona oo mai ai lea o le gataaga.” (Mataio 24:14) O lea, o le taimi la lenei e tuutoina atu ai mea uma lava e mafai ona tatou maua ina ia faataunuuina ai lena galuega e matuā tāua lava. E leai lava se isi auala e sili ona lelei e faaaogā ai a tatou alamanuia a o lei oo ina matuā leai se aogā o oa faaletino.—Esekielu 7:19; Luka 16:9.

O Fea o Alu i ai Tupe?

E lomia e le Sosaiete o le Olo Matamata lomiga faale-Tusi Paia i gagana e sili atu i le 230, faapea ma lomiga mo ē tauaso (Braille) atoa ma lipine vitio i gagana e faaaogā ai tāga mo ē tutuli. O na mea, e manaomia ai se ʻau faaliliu ma ni tagata e faitau ma faasaʻosaʻoina gagana taitasi. Pe a tau ina manatu i le faia o lenei galuega uma, ae maise lava le mekasini o Le Olomatamata lea o loo lomia i masina taitasi i gagana e 121, ma o le 101 o na gagana e lomia ai Le Olomatamata i le taimi lava e tasi, o se mea e maofa ai. Ae peitai, o se mea tatau ina ia mafai ai e tagata uma i le lalolagi aoao ona maua ma faitau i ia lava faamatalaga e tasi. I tausaga uma, e faateleina ai le siitai o le tau o pepa ma isi mea e faaaogā mo le saunia o lomiga e tauaveina ai le feau o le Malo e ala i lomiga po o le pueina i lipine po o ata vitio. O na tau e tatau ona totogia i le faaaogaina o meaalofa tauofo mai le auuso.

O loo faia le galuega talaʻi ma le aʻoaʻo atu i oganuu o loo iai faapotopotoga e sili atu i le 75,000 o Molimau a Ieova i le lalolagi aoao. Ina ia autasia ma faalaeiauina i latou, e asiasia ai faalua i tausaga uma faapotopotoga taitasi e ovasia faimalaga ua uma ona aʻoaʻoina. E matuā tāua foi le vaega ua faia e fonotaga, i le tuuina mai o faatonuga. E tatau ona totogia ni fale tetele mo tauaofiaga na e matuā faamalosia ai le faatuatua. O a outou foai tauofo, o loo faaaogaina foi mo nei fuafuaga.

A o masani ona na o le faatolu ona faia fonotaga i le tausaga, e faapotopoto faatasi ai faapotopotoga mo sauniga faalevaiaso e lima. (Faatusatusa i le Esoto 34:23, 24.) O le lolofi mai o tagata fou e tali mai i le tala lelei, ua faaopoopoina ai foi le faitau afe o faapotopotoga fou i tausaga taitasi. Ona o le fesoasoani o le faitau miliona o nogatupe ua faamatuu mai e ala i le Sosaiete, ua mafai ai ona fausia le faitau selau o Maota fou o le Malo i tausaga taitasi, faapea ma le tele o isi fale ua mafai ona toe faafou ma toe faatetelē. E ui lava o lenei tupe e faaaogā mo le fuafuaga lava e tasi, ae ua faateleina pea mea e manaomia.

O se tasi vaipanoa ua faatuputeleina ai le galuega i se tulaga sa lei faapea ona iai, o atunuu ia o Europa i Sasae ia sa i ai muamua i lalo o le pulega a Rusia. Maeu le olioli i se tala faafiafia loto, ona ua tatalaina nei le galuega i na nofoaga! Ua aauina atu nei i ai misionare i le tele o nei atunuu. Ua faavaeina lālā fou i nisi o atunuu, ua matuā faateleina ai le aofai o faifeau galulue tauofo i le sili atu i le 15,000, o ē o loo galulue i aiga Peteli i le lalolagi aoao. O le mea moni, e tatau ona faatauina mai pe fausia ni fale o lālā e nonofo ai i latou. O a outou foai tauofo, ua fesoasoani ina ia faatinoina ai lea manaoga.

O lenei galuega atoa, o le mea moni o loo mātauina e Satani ma ana temoni. O loo latou faia mea uma latou te mafaia ina ia faaleaogaina ai taumafaiga a auauna faamaoni a Ieova ma faapogaia faafitauli mo i latou. (Faaaliga 12:17) O le uiga o lenei mea, o le faateleina lea o taua faaletulafono i fale faamasino ina ia puipuia ai aiā a tagata o le Atua e talaʻi ai ma ola ai e tusa ma ana tulafono amiotonu. E faaopoopo i ai, o le matautia o taua o loo tauina i le faiga o mea a Satani, faapea ma mala faalenatura, ua manaomia ai pea le aauina atu o fesoasoani mo o tatou uso ma tuafāfine o loo pagatia ai, faapea ma isi o loo mau faatasi ma i latou. O a outou foai tauofo, ua fesoasoani e maua ai pea lenei fesoasoani e matuā tāua.

O le a Tauia Outou e Ieova

O le faaaogaina ma le matamau o o tatou taimi ma alamanuia e faaauiluma ai le galuega a le Alii, e mafai ona aumai ai faamanuiaga e sili. E faapefea? Auā o le Atua e ona mea uma lava, o le a na tauia i tatou. Ua taʻua i le Faataoto 11:25 e faapea: “E faatamaoaigaina le tagata matamau; o ia foi lē faasūsū i nisi, e faasūsūina lava o ia.” O le mea moni, e fiafia Ieova pe afai e faia la tatou vaega i le faaauilumaina o lana tapuaiga. (Eperu 13:15, 16) Na ia folafola atu i tagata Isaraelu anamua o ē na aumaia meaalofa tauofo sa manaomia e le feagaiga o le Tulafono e faapea: “Ia outou tofotofo mai ai ia te au i lenei mea, ua fetalai mai ai Ieova o ʻau; pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele.” (Malaki 3:10) O le tulaga manuia faaleagaga o loo olioli ai auauna a Ieova i aso nei, o le faamaoniga lea e iloa ai o loo tausia e le Atua lana folafolaga.

O lenei galuega sili o le folafola atu i tagata uma lava o le aso o le faaolataga ma fesoasoani i tagata loto faamaoni e ui atu i le ala i le ola, o le a lē faavavau ona faia. (Mataio 7:14; 2 Korinito 6:2) Ae o i latou uma o “isi mamoe” a le Alii, e tatau ona aoaoina mai. (Ioane 10:16) Maeu le matuā talafeagai ona faafetaiaia o lena luʻi i aso nei! Ma maeu lo tatou fiafia pe a toe tepa i tua mai lena lalolagi fou amiotonu, ma faapea ifo, ‘Na faia atoatoa ai soʻu sao i lena galuega faaiu o le aoaoina’!—2 Peteru 3:13.

[Pusa i le itulau 30, 31]

Le Auala ua Faia ai e Nisi Foai i le Galuega Talaʻi o le Malo

MEAALOFA MO LE GALUEGA I LE LALOLAGI AOAO: E toatele tagata latou te tuuesea se vaega tupe pe faasoa se tupe e lafo i pusa o loo faailogaina o: “Meaalofa mo le Galuega a le Sosaiete i le Lalolagi Aoao—Mataio 24:14.” E avatu e faapotopotoga i masina taitasi ia tupe i le ofisa ulu i Brooklyn, i Niu Ioka, po o so o se ofisa o le lālā e latalata ane.

MEAALOFA: O foai tauofo o tupe, e mafai ona aauina saʻo atu lava i le Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, pe auina atu i le ofisa o le Sosaiete lena o loo vaavaaia lo outou atunuu. E mafai foi ona foai atu maatāua po o isi mea tāua. O na foai e tatau ona aauina atu faatasi ma se tusi puupuu e faamanino atu ai o lena foai o se foai patino lava.

FUAFUAGA O FOAI E IAI MA NI TUUTUUGA: E mafai ona auina atu i le Watch Tower Society se tupe e teuina ai o se mavaega seia maliu lē na ia foaiina atu lena vaega tupe, ma se fuafuaga o le toe faafoi i le tagata e ana le foai pe afai na te manaomia.

INISIUA: E mafai ona faaigoaina le Watch Tower Society o sē e mauaina le aogā o le inisiua o ola o tagata po o taui e maua pe a faamālōlō litaea pe penisione le tagata. E ao ona logoina le Sosaiete pe a faia sea fuafuaga.

TEUGA TUPE: O teuga tupe, o tusi o teuga tupe tetele, po o ni vaega tupe a le tagata pe a mālōlō litaea, e mafai ona tuu faamavaega i le Watch Tower Society pe totogi atu i ai pe a maliu lē e ana, ina ia tusa ai ma faatulagaga manaomia a le faletupe o lea atunuu. E tatau ona logoina le Sosaiete pe a faia so o se fuafuaga faapea.

OLOA MA PEPA FAAMAONIA MO TUPE: O oloa ma pepa faamaonia mo tupe e mafai ona foai atu i le Watch Tower Society a lē o se meaalofa e tuusaʻo, po o se fuafuaga e faapea o se tupe maua e faaauau pea ona totogi atu i le tagata e ona le foai.

FANUA MA FALE: O fanua ma fale e mafai ona faatauina atu, e mafai ona foai atu i le Watch Tower Society e ala i le faia o se meaalofa e tuusaʻo po o le taofia lea ia faaauau ona nofo ai pea lē e ana seia maliu. E ao i lena tagata ona faafesootai le Sosaiete a o ia lei faapepaina faaletulafono so o se fanua totino o le a ia foai atu mo le Sosaiete.

UILI MA MAVAEGA: E mafai ona faaui atu se mea totino po o se vaega tupe i le Watch Tower Society e ala i se uili ua faatulafonoina, pe avea foi le Sosaiete ma ē e mauaina le mavaega. O se mavaega e faia mo le manuia o se faalapotopotoga faalelotu atonu o le a iai ni lelei i le itu tau lafoga. E tatau ona auina atu i le Sosaiete se kopi o le uili po o mavaega.

FOAI UA UMA ONA FUAFUAINA: Ua faia e le Sosaiete ni faamatalaga e faatatau i “Foai ua Uma ona Fuafuaina.” O i latou o loo fuafua e faia se meaalofa faapitoa i le Sosaiete i le taimi nei, po o le tuu o se faamaoniga tusitusia i le taimi o le maliu, atonu o le a aogā i ai lenei faamatalaga. Ua moni lenei mea, ae maise lava pe a latou mananao e faia nisi fuafuaga a le aiga po o ni meatotino ua fuafuaina, a o faaaogaina ai tupe o lafoga e faaitiitia ai le tupe e totogi mo lafoga na e manaomia ona totogia.

Mo ni faamatalaga atili e tusa ai ma ia tulaga, faamolemole ia tusi atu i le Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, po o se ofisa o le lālā a le Sosaiete o vaaia lo outou atunuu (mo Samoa, ia tusi atu i le I.B.S.A., Box 673, Apia, Western Samoa).