Ua Tauaofia Avefeau o le Filemu Mai le Atua

UA FAAPEA mai se toeaina Kerisiano i le Iunaite Setete: “E atiina ae pea i tatou e ala i tauaofiaga itumalo uma lava tatou te auai. Ae peitai, e matuā ese lava lenei tausaga. E tatou te tuua le tauaofiaga i aso taitasi ma tau mānatu, po o le a faapefea ona faamalieina o tatou manaoga i le polokalame o le aso e sosoo ai, ma sa matuā faafiafiaina ai i tatou!”

Afai sa e auai i se tasi o Tauaofiaga Itumalo o “Avefeau o le Filemu Mai le Atua,” e lē taumatea la e te ioe faatasi ma lenei sui usufono fiafia. O aso taitasi o le tauaofiaga, sa taulai atu i le vala o le tofiga lea o loo tauaveina e Molimau a Ieova i le avea o ni avefeau a le Atua. Seʻi o tatou autaluina le polokalame o aso e tolu.

‘Maeu le Matagofie o Lē Taulogologo Mai le Filemu’

O le matua lenei o le uluai aso o le tauaofiaga. Sa faavae lea i le Isaia 52:7. I nei aso faigata, e toatele o loo auauna ia Ieova i lalo o tulaga faigata. O le lauga “Faalogologo Atu i Ē Folafolaina ma le Maelega le Filemu” e aofia ai ma faatalanoaga o nisi o nei tagata faamaoni. O le faalogo atu i a latou faamatalaga totino, sa avea o se mea na faalaeiauina moni ai, ma i lea, na faamautinoa ai i le ʻau usufono e faapea, e mafai foi ona faamalosia i latou e Ieova, e oo lava i le foaiina mai o le “matuā tele o le mana” e fesoasoani ia i latou ina ia tumau ai.—2 Korinito 4:7.

E lē mamafa mea e manaomia e Ieova. (1 Ioane 5:3) Sa faamanino mai lenei mea i le lauga mulimuli o le polokalame o le taeao, na taualuga i le tatalaina o le polosiua e 32 itulau, o lona matua, O le ā e Manaomia e le Atua Mai ia i Tatou? O lenei fesoasoani fou mo suesuega, ua iai ata matagofie, e lē taumatea o le a faia se vaega tāua e fesoasoani ai i le toatele o tagata e aʻoaʻo e uiga i fuafuaga a le Atua. O faamatalaga e uiga i le faaaogaina o lenei lomiga fou, o loo maua i le mataupu mulimuli mo suesuega i lenei mekasini, i le itulau e 16 ma le 17.

O le lauga, “Tumau i Galuega Lelei” na faamamafaina ai e faapea, o loo silafia lelei lava e Ieova o tatou tofotofoga. Ina ia tumau la, o lona uiga, ia tutū mausalī ma ʻaua neʻi vaivai le faamoemoe. Ua tuuina mai e Ieova ia i tatou lana Afioga, lona agaga, ma lana faalapotopotoga e fesoasoani ia i tatou. E manaomia le maumauai e talaʻi ai, auā o le talaʻi, ua fesoasoani ia i tatou e tumau ai, auā e faamalosia ai pea lo tatou faatuatua. Ona o lea ua matuā lata tele atu i le iuga, e lē tatau ai ona faatagaina o tatou faafitauli e faavaivaia lo tatou maelega, auā e na o i latou e tumau seia oo i le iuga, o le a faaolaina.—Mataio 24:13.

O le lauga autū, “La Tatou Matafaioi o ni Avefeau o le Filemu Mai le Atua,” na uaʻi atu ai manatu i le tatalaina mai Papelonia o tagata Iutaia na ave faatagataotauaina, ma le toe faafoisia o le tapuaiga mamā i Ierusalema i le 537 T.L.M. Na faamatala e le failauga e faapea, o lenei mea na tupu, sa na o se faataimuaga o le mea o le a faataunuuina e le Malo o le Atua i se taimi e lē o toe mamao, i le lalolagi aoao. (Salamo 72:7; Isaia 9:7) O lo tatou tofiga la i le taimi nei, o le talaʻia o le tala lelei e uiga i lenei Malo, ma ia ola e ogatusa ma lena feau. O le alofa mo le Atua ma tuaoi e ao ona uunaia ai i tatou ina ia ʻaua le mapu i le faaauauina o lenei galuega.—Galuega 5:42.

O le mea tāua i le polokalame o le Aso Faraile, o le lauga faasolo, “Ia Mataala i Mailei Lilo o Faafiafiaga.” O musika i aso nei, ata tifaga, vitiō, o ata i televise, taaloga i vitiō, tusi, mekasini, ma komi, e masani ona atagia mai ai mafaufauga faatemoni. O le mea lea, e manaomia ai ona tatou “inoino i le leaga” ma “pipii i le lelei.” (Roma 12:9) Ioe, e tatau ona tatou manatu i faafiafiaga leaga o se mea e inosia ma aloese mai ai, ae ia tatou mafaufau i mea e mamā, ma matagofie, ma viia. (Filipi 4:8) O lomiga ma mea faigaluega mo le faia o suesuega ua saunia e le faalapotopotoga a Ieova, ua faatupuina ai i o tatou mafaufau mafaufauga e atiae ai ma toleni ai i tatou e iloa le eseesega o le saʻo ma le sese. (Eperu 5:14) E tatau ona tatou pipii atu i nei sauniuniga e pei ona tatou pipii atu i se vaa faaola i se sami sousou.

Na sosoo ai ma le lauga, “Tetee Atu i le Tiapolo—Aua Neʻi Faatagaina se Mea Leaga.” I sina taimi puupuu lava ae latou te lei ulu atu i le Nuu o le Folafolaga, e faitau afe tagata Isaraelu na maileia i amioga lē mamā. E lei faatagaina e Fineaso ni mea leaga i le tapuaiga moni. Na ia faia foi se gaoioiga saʻo faasaga i tagata fai mea sese, ma o lona tuutoina atoatoa na faafiafiaina ai Ieova. (Numera 25:1-13) O le sini o Satani, o le taumafai lea e aua neʻi o tatou agavaa mo le ulu atu i le lalolagi fou a le Atua. O lea la, i le pei o Fineaso, e tatau ona tatou tetee atu i taumafaiga a le tiapolo e faaleagaina i tatou. E tusa lava po ua faaipoipo pe nofofua, e tatau ona tatou “sosola ese mai le faitaaga.”—1 Korinito 6:18.

O le lauga faaiu o le uluai aso o le tauaofiaga, “Ia Faamaoni i le Tausisia o le Moni o le Afioga a le Atua.” E toatele le ʻau faaliliu na soloia pe aveesea ni vaega o le Tusi Paia. Mo se faaaoaoga, ina ia faamalieina le ʻau lagolago o aiā tatau a fafine, na faasino atu ai le ʻau faaliliu o le New Testament and Psalms: I se tusi, An Inclusive Version, o loo faasino atu ai i le Atua e faapea, e lē o le Tamā, ae o le Tamā toe Tinā, ma ua faasino atu ia Iesu e faapea, “o le Tagata” nai lo o le “Atalii o le tagata.” I le faaeseesega, o loo matuā pipii atu ma le faamaoni le New World Translation i le uluai gagana na faaliliuina ai le Tusi Paia, lea ua mafai ai ona faamanino i o tatou mafaufau nisi o mataupu faale-Tusi Paia. Mo se faaaoaoga, na faapea mai le failauga: “Ona o le saʻo lelei o faasinoga i le New World Translation, ua māfua ai ona tatou toe faatulagaina faapotopotoga e ala lea i le tofiaina o toeaina, ua ogatasi lelei ai ma le faavae na faataatia e le faapotopotoga Kerisiano o le uluai senituri.” E tatou te faaalia lo tatou loto faamaoni i le Afioga a le Atua e ala lea i le faitauina i aso taitasi, ma e ala i le faatatauina o fautuaga o loo aumaia ai. Na faapea mai foi le failauga: “Tatou te faaalia lo tatou lagolagoina faamaoni o le Afioga a le Atua e ala i lo tatou talaʻia atu ma le maelega i isi, ma le faaaogaina ma le faaeteete a o tatou aʻoaʻoina ai isi, ma ʻaua lava neʻi taumafai e faaopoopo pe mimilo mea o fai mai ai ina ia faafetaui ma o tatou lava manatu.”

‘O le Filemu Mai le Atua e Silisili i Manatunatuga Uma’

O lenei matua, e faavae i le Filipi 4:7, ua faataatia ai le faavae mo le aso lona lua o le tauaofiaga. O le tele o faamatalaga na fofogaina mai, sa feagai lava ma le vaaiga saʻo i le faiva a le tagata lava ia, aiga, tuuina atu, ma isi lava vala o le olaga i aso faisoo.

Ina ua uma ona talanoaina le mau o le aso, na sosoo ai ma se lauga faasolo o le matua “O Avefeau o Loo Aumaia le Tala Lelei o le Filemu.” O la tatou feau, o le feau o le filemu, ma e tatau ona taulimaina i se auala filemu. (Efeso 6:15) O lo tatou sini, ia manumalo po o le pāʻia o loto, ae lē ia manumalo i ni finauga. O le toleniga ma lomiga ia o loo tatou maua mai le faalapotopotoga a Ieova, ua fesoasoani ia i tatou e faia le mea tonu lava lena. E lē tatau ona tatou faatagaina ni feeseeseaiga po o le lē manatu mai e faavaivaia ai i tatou. Nai lo lea, e tatau ona tatou faaauau e ‘fai le mea aupito sili tatou te mafaia,’ o le iai o se masaniga lelei e faia suesuega totino, auai i sauniga, ma le auai i le galuega talaʻi. (2 Timoteo 2:15) Aua foi neʻi galo ona faia le mea lelei i isi, ae maise lava ia i latou tatou te aiga i le faatuatua. (Kalatia 6:10) O le mea moni, o le faia o le mea aupito sili tatou te mafaia, e lē o lona uiga, o le sāga fai e tiga lava ona faalogo atu ua vaivai. O le mea e mafai e le tagata e tusa ai ma lona malosi ma ona tulaga, e talia e le Atua.

E faaavanoa atu e tagata o le Atua o latou taimi, malosi, ma alamanuia e faaauiluma ai manaoga o le Malo. O le lauga “Le Foai ma le Olioli o Loo Faia i Totonu o le Faalapotopotoga a Ieova,” na faailoa mai ai le manatu e faapea, a o faateleina pea tagata pei ni mamoe e tali mai i le feau o le Malo, ua iai foi ma se manaoga mo nisi mea faigaluega faaopoopo, nofoaga mo sauniga, ma fale mo lālā. O a tatou mea alofa tauofo ua mafai ai ona maua po o ā lava mea e manaomia ina ia faataunuuina ai le galuega talaʻi i le lalolagi aoao. O le foai ma le matamau, e viia ai foi Ieova ma maua ai le olioli o lē foai atu. O lea la, ona o ni Kerisiano, e lē tatau ona tatou faatalalē i lenei vala tāua o la tatou tapuaiga.—2 Korinito 8:1-7.

Na faaiuina le polokalame o le taeao i le lauga o le papatisoga—ua avea pea lea o se tumutumuga i faatasitasiga tetele a Molimau a Ieova. Maeu se olioli e vaai atu i ē fou ua tuuina atu o mulimuli i tulagaaao o Iesu e ala i le papatisoina i le vai! (Mataio 3:13-17) O i latou uma o ē ua faia lenei laasaga, sa aʻoaʻoina i le puna o le atamai silisili—le Tusi Paia. E lē gata i lea, ua latou maua le fuafuaga moni i le olaga, ma ua faamanuiaina i latou i le filemu ua maua mai le iloa o loo latou faia le mea saʻo.—Failauga 12:13.

O le lauga “Ia Leoleoina Oe e le Faautauta,” na avatua ai se fautuaga tuusaʻo. E tāua tele le faautauta e tusa ai ma feutagaiga i mataupu tau pisinisi. E lē tatau ona faia ni gaoioiga tau pisinisi i totonu o le Maota o le Malo, e lē tatau foi ona tatou faaaogaseseina uso Kerisiano e maua ai tupe faasili. (Faatusatusa i le Ioane 2:15, 16.) E manaomia foi le faautauta pe a tuuina atu ni tupe e faafaigaluegaina i se pisinisi mo ni pasene tului, po o le nonoina mai pe faaune atu ni tupe. Na mātauina e le failauga e faapea: “O le lē taulau o faiga pisinisi lamatia i le va o ni Kerisiano, ua iu ai i le lē fiafia ma oo ai ina lē lelei le tulaga faaleagaga o nisi o ē na faanatinati ona ulu atu i faigā pisinisi lamatia e vave maua ai ni tupe.” E ui e lē o se mea sese mo Kerisiano le faia o ni pisinisi ma isi foi Kerisiano, ae o se faiga atamai le faaeteete. Ma afai e faia se feagaiga faapisinisi i le va o ni itu se lua, e tatau pea lava ona tusia i lalo ia tuutuuga i le feagaiga.

O le lauga “Na Faia e Ia o i Laua o le Tane ma le Fafine,” na talanoaina ai tapulaa a le Atua mo tane ma fafine. Ua faauigaseseina ai le vaega a tane ma fafine i le faagasologa o le talafaasolopito. Na faapea mai le failauga: “E toatele ua manatu sese i uiga o tane e faapea e pule sauā, leai se alofa, po o le pulepuletutū.” “I nisi o tū ma aganuu, o se mea e lē masani ai, pe e masiasi ai foi mo se tamaloa ona tagi i luma o le lautele, pe a na o ia foi. Ae peitai, o loo faamatala mai i le Ioane 11:35 e faapea, a o iai faatasi ma le motu o tagata i fafo o le tuugamau o Lasalo, ‘na tagi Iesu.’” Ae faapefea fafine? E masani ona manatu i uiga o fafine e faapea, e lalelei faaletino. Ae na fesili mai le failauga: “Afai e lalelei se fafine ae leai se mafaufau ma e finauvale, e faatiga loto, pe faamaualuga, pe e lalelei moni o ia e tusa ai ma le uiga moni o le upu, fafine lalelei?” (Faatusatusa i le Faataoto 11:22; 31:26.) I a latou upu, amio, ma teuga, e taumafai ai tane ma fafine Kerisiano e mulimuli i tapulaa a le Tusi Paia. Na faapea mai le failauga: “O se tane na te faaalia fua o le agaga, e faigofie ona faaaloalo i ai, ma o se fafine na te faia faapea, e faigofie ona alofagia.”—Kalatia 5:22, 23.

Na sosoo ai ma le lauga faasolo “E Manatu Mai ia te Oe le Atua o le Filemu.” E toatele Kerisiano e iai popolega i mea tau tupe. Ae peitai, ua folafola mai e Ieova: “Ou te le tuua lava oe, ou te le tuulafoai lava ia te oe.” (Eperu 13:5) E ui i faigata tau tamaoaiga, ae ua faaalia pea e nisi le mautinoa e uiga i lana folafolaga e ala i le ulu atu i le auaunaga faapaeonia lagolago po o le sauatoa. O isi e lē o mafai ona paeonia nei, ua latou faamuamua manaoga o le Malo i le puʻea o avanoa e molimau atu ai. (Mataio 6:33) O na taumafaiga uma e tatau ona faamālō atu i ai! Ua saunia e le faalapotopotoga a Ieova le anoanoai o lomiga e fesoasoani ai ia i tatou i la tatou faiva, ma fesoasoani ai foi ia i tatou i le feagai ai ma o tatou faafitauli. Afai tatou te faaalia le talisapaia mo sauniuniga faaleagaga a Ieova, o le a ia faamanuia i tatou i le filemu i nei taimi o le fesouaina tau tamaoaiga.—Salamo 29:11.

I le lauga faaiu o le aso, “Ia Sailia le Filemu Mai le Atua i le Olaga Faaleaiga,” na faafiafiaina le ʻau usufono i le mauaina o le tusi fou, Le Ala e Maua ai le Fiafia i le Aiga. Na faamalosiau mai le failauga e faapea: “Ia suesue totino ma le filigā i lenei tusi, faapea foi le aiga.” “Ia taumafai ma le faamaoni e faatatau fautuaga e faavae i le Tusi Paia o loo aumaia ai, ma o le a e mautinoa ai ua faateleina le filemu ma le fiafia i lou aiga.”

‘Ia Tausia le Loto Gatasi i le Noataga o le Filemu’

E faavae i le Efeso 4:3, o se matua talafeagai lenei mo le aso mulimuli o le tauaofiaga. Ua aoaoina Molimau a Ieova mai atunuu uma lava o le lalolagi, ma ua aʻoaʻoina e le Atua. O le mea lea latou te fiafia ai i le filemu. Ua latou mulimuli i le faaaoaoga a Iesu ma taumafai e ‘tausia le autasi faaleagaga i le noataga o le filemu.’

O le filemu lea o loo iai i le faalapotopotoga a le Atua, na faatāuaina i le lauga faasolo “Faailoaina Ituaiga Moni o Avefeau.” Sa iai perofeta pepelo i Isaraelu anamua. Ae peitai, o avefeau moni a le Atua—e pei o Isaia, Esekielu, ma Ieremia—na latou valoia ma le saʻo le paʻū o Ierusalema, le vaitaimi o le faaaunuuaina, ma le faasaʻolotoina mulimuli ane o tagata o le Atua. O se tulaga faapena lea o loo iai i aso nei. E anoanoai avefeau pepelo o loo iai i nofoaga o faiga faapolotiki ma lotu sese. Peitai, ua faatūina e Ieova ana Molimau e folafola atu lana fuafuaga e faatatau i lenei faiga o mea. Ae maise lava talu mai le 1919, na faaaogaina ai auauna a Ieova e folafola atu le feau a le Atua. Maeu le eseese o i latou ma avefeau pepelo a Kerisinetoma! Seʻi o tatou faia ma le filigā se vaega i lenei galuega seia oo ina fetalai mai Ieova, ua uma.

O le lauga, “Faalogo ma Usitai i le Afioga a le Atua” na faamamafa ai e faapea, o Tusi Paia, o le puna aupito sili lea o taiala, faamafanafanaga, ma le faamoemoe. (Isaia 30:20, 21; Roma 15:4) Ua faateteleina le soona tuufau i le lalolagi i aso nei. O le mea lea, e manaomia ai i le taimi nei nai lo o se isi lava taimi ona tatou faalogo i fautuaga mai le Afioga a le Atua ma le faalapotopotoga. Ua silafia e Ieova o tatou vaivaiga, ma i lana Afioga, ua ia faaauivi manino mai ai le auala o le a aogā mo i tatou. I le iloa o loo lagolagoina i tatou e Ieova, ua tatou lagona ai le mautinoa e agaʻi ai i luma i so o se mea ua ia manaomia mai ia i tatou.

I lea mea, na āloālo atu ai le aofia mo le tala ma teuga matagofie lea na mulimuli mai. O lona matua “Aisea e Faaaloalo ai i Faatulagaga Faatiokarate?” I le faaaogaina o le tala i le Tusi Paia e uiga ia Kitiona e fai ma faavae, na faamamafaina ai i lenei tala se lesona tāua—e tatau ona tatou mulimuli i faatonuga a le Atua ma ʻaua le faia o tatou lava manatu pe taumafai e aloese mai fautuaga faatiokarate.

O le mataupu o le lauga lautele “O le a Oo Mai Lava le Filemu Moni!—Mai le ā le Puna?” O le filemu ua folafola mai e le Atua, e sili mamao atu nai lo so o se mea ua mafaufauina e lenei lalolagi. Na faapea mai le failauga: “O le filemu moni, o lona uiga, o le filemu i aso uma lava. O le filemu mai le Atua, o lona uiga, o se lalolagi e aunoa ma maʻi, tiga, faanoanoa, ma le oti.” Ua taʻu mai e le Tusi Paia ia i tatou e faapea, o Ieova, “ua faaiua e ia o taua e oo lava i tuluʻiga o le lalolagi.” (Salamo 46:9) O le a faapefea ona ia faia o lenei mea? E ala i le aveesea o lē na te faapogaia taua, o Satani le Tiapolo. (Faaaliga 20:1-3) O le a tatala ai e lenei mea le avanoa mo e agamalu ‘e fai mo latou le lalolagi ma matuā olioli ai i le tele o le filemu.’—Salamo 37:11.

Ina ua uma le otootoga o le mataupu mo suesuega o Le Olomatamata mo le vaiaso, ona sosoo ai lea ma le fofogaina mai o le lauga faaiu o le tauaofiaga. O lona matua “O Loo Agaʻi Pea i Luma o ni Avefeau o le Filemu Mai le Atua,” na faamamafa e lenei lauga e faagaeetia ai e faapea, o la tatou galuega talaʻi, e lē gata ina tutasi ae e faanatinati foi. E lē o se taimi la lenei e nofonofo ai, faifaiaga ai, pe toe liliu atu ai i manatu sese. Ua faaauupegaina i tatou i mea o loo tatou manaomia—o le feau a le Atua, lona agaga paia, ma le anoanoai o sauniuniga mai lana faalapotopotoga faatiokarate alofa. I le avea o ni auauna a Ieova, o le mea lea, seʻi o tatou agaʻi atu pea ia i luma i le avea o ni avefeau o le filemu mai le Atua!

[Pusa/Ata i le itulau 9]

Se Sauniuniga Alofa mo Aiga

Na matuā faafiafiaina i latou na auai i le aso lona lua o le Tauaofiaga Itumalo, o “Avefeau o le Filemu Mai le Atua,” i le mauaina o le lomiga fou o lona matua, Le Ala e Maua ai le Fiafia i le Aiga. O loo iai i lenei tusi faamatalaga faale-Tusi Paia o le a aogā mo aiga uma lava e alolofa i le Atua.

Na faapea mai se toeaina mai Connecticut, i le Iunaite Setete o Amerika e uiga i le tusi: “Ia Iuni 15, na matou mauaina ai a matou tusi o Le Ala e Maua ai le Fiafia i le Aiga. E oo atu ia Iuni 16, ua ʻafa le tusi i laʻu faitau. I le aso 17, na faia ai la matou uluai suesuega faale-Tusi Paia, ma sa matuā faalaeiauina ai i matou! I lena lava aso, na uma ai ona ou faitauina le tusi. O lenei lomiga manaia e mautinoa o le a sili ona tāua ia i latou uma o ē o le a faitau i ai. O le auliuligia o le tusi mai faiga faaituʻau ma le fetaui lelei o ona faamatalaga ma le taimi nei, ua faamaonia atili ai, o loo aumaia e le ‘auauna faamaoni ma le mafaufau’ ia ‘meaʻai i ona itu aso tatau’ ma o loo ia silafia lelei lava o tatou manaoga i nei taimi faigata.”—Mataio 24:45-47.

[Ata i le itulau 7]

O ē talavou ma ē matutua, o loo fia iloa mea o loo manaomia e le Atua