O Loo Auauna o ni Avefeau o le Filemu Mai le Atua
“E matuā matagofie i luga o mauga o vae o . . . lē logologo mai le filemu.”—ISAIA 52:7, NW.
1, 2. (a) E pei ona valoia i le Isaia 52:7, o le ā le tala lelei e ao ona faasalalauina? (e) O le ā na uiga i ai upu faavaloaga a Isaia i le tulaga o Isaraelu anamua?
O LOO iai se tala lelei e ao ona folafolaina! O le tala lelei o le filemu—le filemu moni. O se feau o le faaolataga e aafia ai le Malo o le Atua. I aso ua mavae na tusi ai le perofeta o Isaia e faatatau i lea tala lelei, ma ua faasaoina mai mo i tatou ana upu, i le Isaia 52:7, lea tatou te faitau i ai e faapea: “E matuā matagofie i luga o mauga o vae o le ua fai mai le tala lelei, o lē logologo mai le manuia [“filemu,” NW], ua tala mai le tala lelei; ua faailoa mai le olataga; ua fai mai ia Siona, O loo pule lou Atua.”
2 Na faagaeeina e Ieova lana perofeta o Isaia ina ia tusia lena feau ina ia aogā ia Isaraelu anamua ma e aogā foi mo i tatou i aso nei. O le ā lona uiga? Na tusia e Isaia na upu i le taimi atonu ua mavae le ave faatagataotauaina o le malo i le itu i mātū, o Isaraelu, e tagata Asuria. Mulimuli ane, o ē na nonofo i Iuta, le malo i le itu i saute, o le a avea faatagataotauaina i Papelonia. O vaitaimi na o mafatiaga ma puapuaga i le malo talu ai sa lē usiusitai tagata ia Ieova ma na latou lē maua ai se filemu ma le Atua. E pei ona sa fetalai atu Ieova ia i latou, na avea a latou agasala ma pa pupuni ia i latou ma lo latou Atua. (Isaia 42:24; 59:2-4) Ae peitai, na valoia mai e Ieova e ala ia Isaia e faapea e oo mai le taimi tatau o le a toe matalatala ai faitotoa o Papelonia. O le a faasaʻolotoina tagata o le Atua e toe foi atu i lo latou laueleele, o iina e toe fausia ai le malumalu o Ieova. O le a toe faafoisia Siona, ma o le a toe faaauau i Ierusalema le tapuaiga a le Atua moni.—Isaia 44:28; 52:1, 2.
3. Na faapefea ona avea le folafolaga i le toe faafoisia mo Isaraelu ma valoaga foi o le filemu?
3 O lenei folafolaga o le laveaiina sa avea foi o se valoaga o le filemu. O le toe faafoisia atu i le nuu na avatu e Ieova i le fanauga a Isaraelu o le a faamaonia ai le alofa mutimutivale o le Atua ma faaalia ai foi lo latou salamō. O le a faaalia ai ua ia i latou le filemu ma le Atua.—Isaia 14:1; 48:17, 18.
“Ua Avea ma Tupu lo Outou Atua!”
4. (a) I le ā le uiga e mafai ai ona faapea atu o le 537 T.L.M. ‘na avea ai Ieova ma tupu’? (e) Na faapefea ona fetuunai e Ieova mea mo le manuia o ona tagata i tausaga mulimuli ane?
4 Ina ua faatino e Ieova lenei laveaiina i le 537 T.L.M., sa mafai ai ona fetaui lelei le faasilasilaga ia Siona e faapea: “Ua avea ma Tupu lo outou Atua!” E moni, o Ieova o “Le Tupu o le vavau.” (Faaaliga 15:3, NW) Peitai o lenei laveaiina o ona tagata sa avea o se faaaliga fou o lona pule silisili ese. I se auala ofoofogia, sa faaalia ai le silisili o lona mana ma le pule e sili atu nai lo le emepaea o tagata sa sili ona malosi i lena vaitaimi. (Ieremia 51:56, 57) O le iuga o le gaoioiga a le agaga o Ieova, na faaleaogaina ai isi fouvalega na faasagatau ane i ona tagata. (Eseta 9:24, 25) Na faalaa ane pea lava pea Ieova i auala eseese ina ia uunaia ai tupu o Metai ma Peresia e felagolagomai faatasi i le faataunuuina o lona finagalo silisili ese. (Sakaria 4:6) O mea ofoofogia na tutupu i na aso ua faamauina mo i tatou i le Tusi Paia i tusi o Esera, Neemia, Eseta, Hakai, ma Sakaria. Ma e maeu le faalaeiauina ai o le faatuatua i le autaluina o na mea!
5. O ā mea tutupu mataina ua faasino atu i ai i le Isaia 52:13–53:12?
5 E ui i lea, o mea na tutupu i le 537 T.L.M. ma mulimuli mai ai sa na o se amataga. Ina ua uma le valoaga o le toe faafoisiaina i le mataupu e 52, na sosoo ai lea ma le tusi o Isaia e faatatau i le afio mai o le Mesia. (Isaia 52:13–53:12) E ala i le Mesia, o lē ua faamaonia o Iesu Keriso, na saunia ai e Ieova se feau o le laveaiina ma le filemu e sili atu ona tāua nai lo le mea lea na tupu i le 537 T.L.M.
O le Avefeau Silisili o le Filemu a Ieova
6. O ai le avefeau silisili o le filemu a Ieova, ma o le ā le tofiga na ia faatatauina ia te ia lava?
6 O Iesu Keriso o le avefeau silisili lea o le filemu a Ieova. O ia o le Upu a le Atua, o le Fofoga Fetalai totino a Ieova. (Ioane 1:14) I le talafeagai ma lenei manatu, i se taimi ina ua mavae ona papatisoina i le Vaitafe o Ioritana, na tulai atu ai Iesu i le sunako i Nasareta ma faitau leotele lona tofiga mai le Isaia mataupu e 61. O lena tofiga na faamanino ai e faapea o le mea na aauina mai o ia e talaʻi sa aofia ai le “saolotoga” ma le “faamalolo,” faapena foi ma le avanoa e maua ai le finagalo malie mai o Ieova. Peitai, na sili atu nisi mea na faia e Iesu nai lo le tau ina folafola atu le feau o le filemu. Na aauina atu foi o ia e le Atua e saunia le faavae mo le filemu tumau.—Luka 4:16-21.
7. O le ā ua iu i ai le filemu mai le Atua lea ua faaavanoaina e ala mai ia Iesu Keriso?
7 I le taimi o le soifua mai o Iesu, na faaali atu ai agelu i leoleo mamoe e latalata i Peteleema, o loo vivii atu i le Atua ma faapea atu: “O le viiga i le Atua i mea aupitoaluga; ma le manuia [“filemu,” NW] i le lalolagi i tagata ua alofagia e ia!” (Luka 2:8, 13, 14) Ioe, o le a iai le filemu mo i latou o ē faaalia i ai le finagalo malie o le Atua ona o lo latou faatuatua i le sauniuniga na ia faia e ala mai i lona Alo. O le ā le uiga o lena mea? O lona uiga, e ui ina fananau mai tagata i le agasala, ae mafai ona latou maua se tulaga mamā ma le Atua, se faiā talileleia ma ia. (Roma 5:1) E mafai ona latou olioli i le toʻafilemu i totonu, le filemu, lea e lē mafai ona maua mai i se isi lava auala. I le taimi atofaina a le Atua, o le a iai se faasaʻolotoina mai āuga uma o le agasala lea na tuufaasolo mai ia Atamu, e aofia ai le maʻi ma le oti. O le a lē toe tauaso pe tutuli tagata, pe pipili. O vaivaiga e faatupu ai le loto vaivai ma tulaga lē atoatoa o le mafaufau e faamomoi loto o le a aveesea e faavavau. O le a mafai ona olioli i le olaga i le lelei atoatoa e faavavau.—Isaia 33:24; Mataio 9:35; Ioane 3:16.
8. O ai ua ofoina atu i ai le filemu mai le Atua?
8 O ai ua ofoina atu i ai le filemu mai le Atua? Ua ofoina atu ia i latou uma o ē faaalia le faatuatua ia Iesu Keriso. Na tusi le aposetolo o Paulo e faapea ‘na finagalo le Atua ina ia faaleleia e Keriso o mea uma lava ma ia, ina ia lelei i le toto o Iesu i le satauro.’ Na faapea mai atili le aposetolo o lenei leleiga e aofia ai “mea o i le lagi”—o lona uiga o i latou o le a fai ma suli faatasi ma Keriso i le lagi. O le a aofia ai foi “mea i le lalolagi”—o lona uiga, o i latou o le a faamanuiaina i le avanoa e ola ai e faavavau i luga o lenei lalolagi pe a oo ina atoatoa ona lelei ona tulaga o se Parataiso. (Kolose 1:19, 20) Ona o lo latou faaaogaina o le tāua o le taulaga a Iesu ma faapena foi ma lo latou usiusitai i le Atua mai le loto, o le a mafai ai e i latou uma lava nei ona olioli i se faauooga māfana ma le Atua.—Faatusatusa i le Iakopo 2:22, 23.
9. (a) O ā isi faiā e aafia ai ona o le filemu ma le Atua? (e) Ona o le faanaunauga ina ia iai le filemu tumau i so o se mea, o le ā le pule na tuuina atu e Ieova i lona Alo?
9 Maeu le tāua o se filemu faapena ma le Atua! Pe afai e leai se filemu ma le Atua, e lē mafai la ona iai se filemu tumau pe uigā i so o se isi lava faiā. O le filemu ma Ieova o le faavae lea mo le filemu moni i luga o le lalolagi. (Isaia 57:19-21) Ma le talafeagai lava, o Iesu Keriso o le Perenise o le Filemu. (Isaia 9:6) O ia lenei ua mafai ai e tagata ona toe fai se leleiga ma le Atua, ma ua tuuina atu foi i ai e Ieova le pule i le Malo. (Tanielu 7:13, 14) Ma e tusa ai o āuga o le pulega faaperenise a Iesu i luga o tagata, ua folafola ai e Ieova e faapea: ‘E leai se mea e gata mai ai le filemu.’—Isaia 9:7; Salamo 72:7.
10. Na faapefea ona faataatia e Iesu se faaaoaoga i le faasalalauina atu o le feau o le filemu a le Atua?
10 E manaomia e tagata uma le feau o le filemu a le Atua. Na faataatia e Iesu se faaaoaoga totino maelega i le talaʻia o lea filemu. Na ia faia lena mea i le malumalu i Ierusalema, i auvae mauga, i tala ane o le auala, i se fafine Samaria i le vaieli, ma i fale o tagata. So o se mea lava na iai tagata, na saunia ai e Iesu avanoa ina ia talaʻia ai le filemu ma le Malo o le Atua.—Mataio 4:18, 19; 5:1, 2; 9:9; 26:55; Mareko 6:34; Luka 19:1-10; Ioane 4:5-26.
Ua Toleniina e Savavali i Tulagaaao o Keriso
11. E mo le ā le galuega na aʻoaʻo ai e Iesu ona soo?
11 Na aʻoaʻo e Iesu ona soo ina ia talaʻi le feau o le filemu a le Atua. E pei lava ona avea Iesu o le “molimau moni ma le faamaoni” a Ieova, ua faapena foi ona latou iloa sa ia i latou foi le avega tauave ina ia molimau atu. (Faaaliga 3:14; Isaia 43:10-12) Na latou vaavaai atu ia Keriso o ia o lo latou Taʻitaʻi.
12. Na faaalia faapefea e Paulo le tāua o le galuega talaʻi?
12 Sa taʻua e le aposetolo o Paulo le tāua o le galuega talaʻi, i lona faapea mai: “Ua faapea mai le Tusi, E le mā se tasi e faatuatua ia te ia.” O lona uiga, o so o se tasi o lē e faaalia le faatuatua ia Iesu Keriso i le avea ma Sui Sili a Ieova o le faaolataga, o le a taulau lona faamoemoe. Ma e lē avea le ituaiga na tupuga mai ai se tasi ma mafuaaga o le a lē agavaa ai o ia, auā na faapea mai atili Paulo: “E le eseese le Iutaia ma le Eleni; auā o le Alii e toatasi o tagata uma, e faulai lona alofa ia te i latou uma lava o e valaau atu ia te ia; auā e faaolaina i latou uma o e valaau i le suafa o le Alii.” (Roma 10:11-13) Ae na faapefea ona iloa ma aʻoaʻoina tagata i lena avanoa?
13. O le ā na manaomia pe afai sa tatau ona faalogo tagata i le tala lelei, ma na faapefea ona tali atu Kerisiano o le uluai senituri i lena manaoga?
13 Na faailoa mai e Paulo lena manaoga e ala i le tuuina mai o fesili e lelei i auauna taitoatasi a Ieova ona mafaufau i ai. Na fesili le aposetolo: “Pe faapefea ona latou valaau atu i le ua latou le faatuatua i ai? pe faapefea foi ona latou faatuatua i le ua latou le faalogo atu i ai? pe faapefea foi ona latou faalogo atu, pe a leai se talaʻi atu? Pe faapefea foi ona talaʻi atu, pe afai ua le aauina atu i latou?” (Roma 10:14, 15) O le talaaga o le uluai Faa-Kerisiano ua aumaia ai se molimau manino lea e faapea o tane ma fafine, o ē talavou ma ē matutua, na latou talia lelei le faaaoaoga sa faataatia e Keriso ma ona aposetolo. Na avea i latou ma ē maelega i le folafolaina o le tala lelei. I le faataitai atu ia Iesu, na latou talaʻi atu ai i tagata i so o se mea lava na mafai ona maua i ai i latou. Sa ia i latou se faanaunauga ina ia lē misia se tasi, o lea na latou faatinoina ai la latou faiva e lē gata i nofoaga lautele ae faapea foi mai lea fale i lea fale.—Galuega 17:17; 20:20.
14. Sa faapefea ona faamaonia le moni o le “matagofie” o “vae” o i latou o loo folafolaina le tala lelei?
14 O le mea moni, e lē o tagata uma na latou talia ma le agalelei Kerisiano na talaʻi atu. E ui i lea, sa faamaonia le moni o upu a Paulo na sii mai i le Isaia 52:7. Ina ua uma ona fesiligia le fesili, ‘Pe faapefea ona talaʻi atu, pe afai ua lē aauina atu i latou?’ ona ia toe faapea mai lea: “Pei ona tusia, E matagofie naua o latou vae o e au mai le tala lelei i le manuia [“filemu,” NW]!” O le toatele lava o i tatou e tatou te lē mafaufau i o tatou vae e faapea e matagofie pe mananaia. O le ā la, le faauigaina o lenei mau? O vae e masani lava ona faagaoioia ai se tagata i so o se mea a o ia alu atu e talaʻi i isi. O vae na ua fai moni lava ma sui o le tagata. Ma e mafai ona tatou mautinoa sa avea moni nei uluai Kerisiano o se vaaiga matagofie i le toatele o ē na faalogologo i le tala lelei mai le ʻau aposetolo ma isi soo o Iesu Keriso i le uluai senituri. (Galuega 16:13-15) Ae lē gata i lea, sa tautele i latou i le silafaga a le Atua.
15, 16. (a) Na faapefea ona faataitaia e uluai Kerisiano e faapea o i latou moni lava o avefeau o le filemu? (e) O le ā e mafai ona fesoasoani ia i tatou ina ia tauaveina ai la tatou faiva i le auala tutusa e pei ona sa fai ai e na Kerisiano o le uluai senituri?
15 Sa iai i soo o Iesu se feau o le filemu, ma na latou momoliina atu i se auala filemu. O faatonuga nei na tuuina atu e Iesu i ona soo: “O le fale tou te ulu atu i ai, tou te muai fai atu, Ia manuia [“filemu,” NW] le aiga nei. Pe afai o i ai le tagata o le manuia [filemu], e oo atu ia te ia la outou faamanuia; a leai, e toe foi mai ai ia te outou.” (Luka 10:5, 6) O le faaupuga sha·lohmʹ, o lona uiga o le “manuia” po o le “filemu,” o se upu faafeiloai faa-Iutaia. Peitai ane, e tele atu nisi mea na aafia ai i faatonuga a Iesu nai lo lenei mea. I le avea o ni ‘sāvali mo Keriso,’ na faalaeiau atu ai ona soo faauuina i tagata e faapea: “Ia outou lelei ma le Atua.” (2 Korinito 5:20) I le ogatusa ma faatonuga a Iesu, na latou talanoa atu ai i tagata e uiga i le Malo o le Atua ma le mea e mafai ona faauiga i ai mo i latou taitoatasi. O i latou na faalogo na latou maua se faamanuiaga; o ē na teteeina le feau na latou misia le faamanuiaga.
16 O le auala foi lena o loo tauaveina ai e Molimau a Ieova la latou faiva i aso nei. O le tala lelei lea o loo latou aveina atu i tagata e lē o sa latou; o le tala lelei a Lē na aauina atu i latou. O lo latou tofiga o le faaooina atu. Pe afai e talia e tagata, ona latou iai lea i se tulaga e mauaina ai faamanuiaga matagofie. Pe afai latou te teteeina, o lona uiga ua latou teena le filemu ma Ieova le Atua ma lona Alo, o Iesu Keriso.—Luka 10:16.
O Loo Fifilemu i Totonu o se Lalolagi Vevesi
17. E tusa lava pe fetaiai ma tagata e taufaaleaga mai, ae o ā a tatou amio e tatau ona faaali atu, ma aisea?
17 Po o ā lava uiga faaalia o tagata, ae e tāua mo auauna a Ieova ona manatua o i latou o avefeau o le filemu mai le Atua. Atonu e auai tagata o le lalolagi i ni feteenaiga matuia ma fefaaaliai o latou lagona ita i le faia o ni faaupuga leaga po o le soona feei i upu faatiga i isi o loo faatiga mai ia i latou. Atonu na faia e nisi o i tatou nei mea i taimi ua tuanai. Peitai ane, pe afai ua tatou oofu i le tagata fou ma ua lē o toe avea nei i tatou o se vaega o le lalolagi, o le a tatou lē faataitai ai la i o latou ala. (Efeso 4:23, 24, 31; Iakopo 1:19, 20) E tusa lava pe faapeī gaoioiga a isi, ae o le a tatou faatatauina le fautuaga: “Afai e mafaia ia te outou, ia outou nofo lelei ma tagata uma lava.”—Roma 12:18.
18. E ao faapefea ona tatou tali atu pe afai e soona inainā mai se tagata mautofiga o le malo ia i tatou, ma aisea?
18 E iai taimi tatou te tulai ai i luma o ni tagata mautofiga o le malo ona o la tatou faiva. I le fia faamalosia o la latou pule, latou te ono ‘tāpa ai mai ia i tatou’ se faamalamalamaga i le pogai tatou te faia ai nisi o mea po o le pogai tatou te lē auai ai i nisi o gaoioiga patino. Atonu latou te fia iloa pe aisea tatou te talaʻi ai le feau o loo tatou talaʻia—o se feau o loo faaalialia ai lotu sese ma taʻu atu ai le iuga o le faiga o mea o iai nei. O lo tatou faaaloalo i le faaaoaoga na faataatia e Keriso o le a uunaia ai i tatou e faaali atu se uiga agamalu ma le matuā faaaloalo. (1 Peteru 2:23; 3:15) E masani lava, e omia na tagata mautofiga o le malo ona o taʻitaʻi lotu, ia po o nisi foi o loo maualuluga atu o latou tulaga nai lo latou. O se tali agamalu e ono fesoasoani ia i latou ia talisapaia ai e faapea ua lē o avea la tatou galuega o se faamataʻu ia i latou pe i le filemu o le atunuu. O se tali faapena e faatupuina ai se agaga o le faaaloalo, le felagolagomai, ma le filemu ia i latou o ē taliaina mai le feau.—Tito 3:1, 2.
19. O ā gaoioiga e lē tāitai ona auai atu i ai Molimau a Ieova?
19 Ua lauiloa Molimau a Ieova i le lalolagi aoao o ni tagata o ē e leai sa latou vaega i feʻainaiga a le lalolagi. Latou te lē aafia i feteenaiga a le lalolagi i le va o lanu, o lotu, po o faiga faapolotiki. (Ioane 17:14) Talu ai o loo faatonuina i tatou e le Afioga a le Atua ina ia “usiusitai . . . i faipule silisili,” o le a tatou lē fuafua ai foi e faia se vaega i ni gaoioiga o le lē usiusitai i pulega lautele e tetee ai i tulafono a le faiga malo. (Roma 13:1) E lē tāitai ona auai atu Molimau a Ieova i so o se gaoioiga na fuafua e foua ai se faiga malo. Talu ai tapulaa ua faatulaga mai e Ieova mo ana auauna Kerisiano, ua lē tāitai ai ona mafaufauina so latou auai atu i ni faiga faamasaatoto po o so o se faiga sauā! E lē gata ina tāutala Kerisiano moni i le filemu; ae latou te ola aʻe ai foi e tusa ma mea o loo latou talaʻia.
20. E tusa ai o le filemu, o le ā le ituaiga o talaaga ua faia e Papelonia le Aai Tele?
20 I le faaeseesega mai Kerisiano moni, o i latou o loo lolotu i faalapotopotoga faalotu a Kerisinetoma ua lē o faamaonia le avea o ni avefeau o le filemu. O lotu a Papelonia le Aai Tele—o lotu a Kerisinetoma faapea foi ma lotu e lē faa-Kerisiano—ua latou lē amanaia, ae ua lagolagoina, ma taʻimua moni ai i taua a malo. Ua latou faatupuina foi sauāga ma oo lava ina fasiotia auauna faamaoni a Ieova. O le mafuaaga lena ua faapea mai ai le Faaaliga 18:24 e faatatau ia Papelonia le Aai Tele: “Ua iloa foi ia te oe le toto o perofeta ma le au paia, ma i latou uma ua fasiotia i le lalolagi.”
21. Ua faapefea ona tali mai le toatele o ē loto faamaoni ina ua latou vaaia le eseesega i amioga a tagata o Ieova ma amioga a i latou o ē o loo auai i lotu sese?
21 I le lē pei o lotu a Kerisinetoma ma le isi vaega uma o Papelonia le Aai Tele, ae ua avea le lotu moni o se uunaiga lelei o le autasi. Na fetalai atu Iesu Keriso i ona soo moni: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) O le alofa lena ua manumalo mai feeseeseaiga i le va o malo, o le va fealoai o tagata, i le tamaoaiga, ma i le va o ituaiga e tupuga mai ai, lea o loo fevaevaeai ai nei isi tagata. Ona o le mātauina o lenei mea, e faitau miliona tagata i le lalolagi aoao o loo faapea atu i auauna faauuina a Ieova: “Tatou te o ma outou; auā ua matou faalogo, o loo ia te outou le Atua.”—Sakaria 8:23.
22. O le ā la tatou vaaiga i le galuega o le molimau atu lea e manaomia ona faamaeʻaina?
22 Ona o i tatou o tagata o Ieova, ua tatou olioli ai i mea ua faataunuuina, peitai e lei maeʻa le galuega. Pe a uma ona luluina fatu ma faatoʻa lona fanua, e lē lafoaia ai loa iina e se faifaatoaga. E faaauau pea ona galue o ia, ae maise lava pe a latalata atu i le vaitau o le seleselega. O le taimi o le seleselega e manaomia ai ni taumafaiga faifai pea ma le naunautai. Ma i le taimi lava lenei o loo iai se seleselega o tagata tapuai o le Atua moni, ua sili atu ona tele nai lo o se isi lava taimi muamua. O le taimi lenei o le olioli. (Isaia 9:3) E moni, o loo tatou fesagai ma teteega ma uiga e lē ano mai. Atonu o loo tatou taitoatasi ma tau onosaia ni maʻi tugā, ni tulaga faigata i totonu o aiga, po o ni faigata tau i le tamaoaiga. Ae o le alofa mo Ieova e uunaia ai i tatou ina ia finafinau pea. O le feau ua tuuina mai e le Atua ia i tatou o se mea e manaomia ona faalogo i ai tagata. O se feau o le filemu. Ioe, o le feau lea na talaʻia e Iesu lava ia—le tala lelei o le Malo o le Atua.
O le ā Lau Tali?
◻ O le ā le faataunuuga na iai o le Isaia 52:7 ia Isaraelu anamua?
◻ Na faapefea ona faamaonia le avea o Iesu ma avefeau silisili o le filemu?
◻ Na faapefea ona faafesootai e le aposetolo o Paulo le Isaia 52:7 ma le galuega lea o loo faia ai se sao o Kerisiano?
◻ O le ā o loo aofia ai i le avea ma avefeau o le filemu i o tatou aso?
[Ata i le itulau 13]
I le pei o Iesu, ua avea ai foi Molimau a Ieova o ni avefeau o le filemu mai le Atua
[Ata i le itulau 15]
E tausisia pea e Molimau a Ieova le filemu e tusa lava po o ā uiga o tagata e faaali mai i le feau o le Malo