Le Mafuaaga e Lē na o Vavega e Mafai Ona Ati ae ai le Faatuatua
O LE vaai lava e talitonu ai. O le manatu lena o le toatele. Ua faapea mai nisi, e latou te talitonu i le Atua pe ana seʻi faaali mai o ia lava i se auala faavavega. Atonu e saʻo lena manatu, ae po o lena talitonuga e iu ai i le faatuatua moni?
Seʻi manatu i tagata Isaraelu o Koru, Tatano, ma Apiramo. Ua faaalia i le Tusi Paia e faapea, o i latou sa avea ma molimau vaaitino i nei vavega matautia ma le gatete ai mai le Atua: o mala e sefulu na oo ia Aikupito, le solaaga a le nuu o Isaraelu e ui atu i le Sami Ulaula, ma le faaumatiaina o le Farao o Aikupito ma ana ʻau tau. (Esoto 7:19–11:10; 12:29-32; Salamo 136:15) Na faalogo foi Koru, Tatano ma Apiramo o fetalai Ieova mai le lagi i luga o le Mauga o Sinai. (Teuteronome 4:11, 12) Peitai, e lei umi lava talu ona tutupu o nei vavega, na taupulepule ai nei tamaloloa e toatolu e fouvale ia Ieova ma ana auauna tofia.—Numera 16:1-35; Salamo 106:16-18.
Pe tusa ma le 40 tausaga mulimuli ane, na molimauina ai foi e se perofeta e igoa ia Palaamo se vavega. E oo lava i le faalaa ane o se agelu e lei taofia ai o ia mai le aufaatasi atu i tagata Moapi o fili a Ieova. E ui lava i lena vavega, ae lei taofia ai Palaamo mai lona alu atu e tetee ia Ieova le Atua ma Ona tagata. (Numera 22:1-35; 2 Peteru 2:15, 16) Ae peitai, o le lē faatuatua o Palaamo, o se mea noa pe a faatusatusa atu i le lē faatuatua o Iuta le Sekara. E ui lava sa avea o se aumea vavalalata a Iesu ma sa avea foi o se molimau vaaitino i le tele o vavega uiga ese na faia e Iesu, ae na faalataina lava e Iuta le Sekara le Keriso i tupe ario e tolusefulu.—Mataio 26:14-16, 47-50; 27:3-5.
Sa iloa lelei foi e taʻitaʻi lotu Iutaia le tele o vavega na faia e Iesu. Ina ua uma ona ia toe faatuina Lasalo, sa oo lava ina latou faapea mai: “Ua faia faailoga e tele e lea tagata.” Ae pe na suia ai ea o latou loto ma faatuatua ai ina ua vāai ua toe ola mai Lasalo? E matuā leai lava. Nai lo o lea, na latou taupulepule e fasioti ia Iesu ma Lasalo!—Ioane 11:47-53; 12:10.
E oo lava i le faalaa tuusaʻo mai o le Atua ae sa lē taulau ona avea ma mea na faatuatua ai tagata amio leaga. A o iai Iesu i totonu o le malumalu i le tasi aso, sa ia tatalo leotele ai: “Loʻu Tamā e, ia e tuuina atu le mamalu i lou suafa.” Na tali mai Ieova i se siufofoga mai le lagi: “Ua ou tuuina atu le mamalu, ou te toe tuuina atu foi i ai le mamalu.” Peitai, o lenei mea na tupu faavavega, sa lei faatuatua ai loto o i latou uma na iai. Ua faapea mai le Tusi Paia: “Ua ia faia faailoga e tele lava i o latou luma, a e lei faatuatua i latou ia te ia.”—Ioane 12:28-30, 37; faatusatusa i le Efeso 3:17.
Le Mafuaaga na Lē Ati ae ai e Vavega le Faatuatua
E faapefea ona iai lena lē faatuatua e ui lava i le tele o vavega na faia? O le teena o Iesu e taʻitaʻi lotu Iutaia, e foliga mai o se mea e faigata ona malamalama ai pe a e mafaufau i ai, ae maise lava i le taimi na amata ai lana faiva, na “faatalitalia” ai e le nuu atoa o Iutaia ia “le Keriso,” po o le Mesia. (Luka 3:15) Ae peitai, o le faafitauli e pogai i mea na latou faatalitalia. Na sii mai e le tusitala o W. E. Vine le faamatalaga a se tagata poto lauiloa o le Tusi Paia i le faapea mai, sa iai i tagata Iutaia le manatu e uiga i se Mesia o lē o le a na avatua ia i latou “le pule i le lalolagi” ma le “manuia tele tau tamaoaiga faaletino.” O lea, na latou lē sauniuni ai mo Iesu le Nasareta loto maulalo, e lē aafia i faiga faapolotiki, o lē na iai i lo latou lotolotoi e avea o le Mesia moni i le 29 T.A. Sa popole foi taʻitaʻi lotu ina neʻi avea aʻoaʻoga a Iesu ma mea e suia ai le tulaga o loo iai tagata ma lamatia ai o latou tulaga lauiloa. (Ioane 11:48) O o latou lava manatu i mea na latou faatalitalia ma le manatu faapito, na faatauasoina ai i latou i le uiga o vavega a Iesu.
Na teena mulimuli ane ai e taʻitaʻi lotu Iutaia ma isi le faamaoniga faavavega e faapea, na olioli soo o Iesu i le mauaina o le finagalo malie o le Atua. Mo se faaaoaoga, ina ua faamaloloina e ona aposetolo se tagata na pipili talu ina fanau mai, na fesili atu sui ua feita o le faamasinoga maualuga a Iutaia: “Se a se mea tatou te faia i nei tagata? auā ua matuā iloa e o nonofo i Ierusalema uma lava, ua faia lava e i laua le faailoga sili; e le mafai foi ona tatou faafiti i ai. A e peitai ina neʻi alualu ona salalau i le nuu, ia tatou matuā faamatau atu ia te i laua, ia soia lava le toe tautala i se tasi tagata i lena igoa.” (Galuega 3:1-8; 4:13-17) E manino lava, o lenei vavega ofoofogia, sa lei atiina ae ai pe fuaina mai ai le faatuatua i loto o na tagata.
O le fia tautaua, faamaualuga, ma le manao tele, o mea moni na sa uunaia ai le toatele e faamaaaina o latou loto. E foliga mai o le tulaga lenei na tupu ia Koru, Tatano, ma Apiramo, e pei ona taʻua i le amataga. O le loto leaga, o le fefe, ma le anoanoai o isi uiga faatiga, ua taofia ai isi. Ua faamanatu mai foi ia i tatou e uiga i agelu lē usiusitai, o temoni, o ē na muai maua le faaeaga e vaai totino ai i fofoga o le Atua. (Mataio 18:10) Latou te lei masalomia le soifua o le Atua. O le mea moni, “ua talitonu foi temoni—ma latou tetemu.” (Iakopo 2:19) Ae peitai, e leai so latou faatuatua i le Atua.
Le Uiga o le Faatuatua Moni
O le faatuatua, e sili atu nai lo o le na ona talitonu. E sili atu foi nai lo o ni faalogona ootia i le taimi e faia ai se vavega. Fai mai le Eperu 11:1: “A o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia.” O se tagata faatuatua, ua talitonu i lona loto e faapea, o mea uma ua folafola mai e Ieova le Atua, e pei lava ua faataunuuina. E lē gata i lea, o le faamaoniga lē mafaafitia o mea e lē vaaia, e matuā malolosi lava, e pei ona malosi o le faatuatua i ai. Ioe, o le faatuatua, e faavae i mea moni. Ma i aso ua mavae, na avea ai vavega o se vala tāua i le atiina ae po o le faatupuina foi o le faatuatua. O faailoga na faia e Iesu, sa avea ma faamautinoaga i isi e iloa ai o ia o le Mesia folafolaina. (Mataio 8:16, 17; Eperu 2:2-4) O mea alofa foi faapena mai le agaga paia, po o le mana galue, e pei o faamalologa faavavega ma le tautala i gagana ese, e faamaonia ai ua lē o toe maua e tagata Iutaia le finagalo malie o Ieova, ae o lana faamaoniga ua iai nei i luga o le faapotopotoga Kerisiano, na faavaeina e lona Alo, o Iesu Keriso.—1 Korinito 12:7-11.
Sa aofia i mea alofa faavavega a le agaga le tomai e perofeta ane ai. Ina ua maitauina e tagata lē talitonu lenei vavega, na uunaia ai nisi e tapuai atu ia Ieova, i le folafola atu e faapea: “E moni, o ia te outou le Atua.” (1 Korinito 14:22-25) Ae peitai, sa lei fuafuaina e Ieova e avea vavega ma vala tumau o le tapuaiga faa-Kerisiano. Ua talafeagai ai ona tusi mai le aposetolo o Paulo e faapea: “A e pe ni perofetaga, o le a faaleaogaina ia; pe ni gagana, o le a mavae ia.” (1 Korinito 13:8) E mautinoa o nei vavega, na mavae ina ua maliliu le au aposetolo ma i latou na mauaina na mea alofa mai le au aposetolo.
Po o le a tuulafoaia ai la tagata e aunoa ma se faavae mo le faatuatua? E leai, auā na faapea mai Paulo: “Ua le tuu e ia [le Atua] o ona faailoga, i lona agalelei mai, ma foai mai o ua mai le lagi ia te i tatou, ma tausaga o fuata a le tau, ma ona ua faamalilie i o tatou loto i le mea e ʻai ma le olioli.” (Galuega 14:17) E moni, o i latou o ē loto faamaoni e naunau e talia i o latou mafaufau ma loto mea moni o loo siomia ai i tatou, o “ana mea e le vaaia [mea a Ieova le Atua] talu ona faia o le lalolagi, e vaaia lava ia i le mafaufau i mea na faia, o lona mana faavavau lava lea ma lona Atua; o lea ua latou lē mautali ai i latou [o ē tetee i le Atua].”—Roma 1:20.
E lē lava le tau ina talitonu o loo soifua le Atua. Na augani mai Paulo: “Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.” (Roma 12:2) E mafai ona faia lenei mea e ala i le suesue ma le filigā i le Tusi Paia faatasi ma le fesoasoani a lomiga faa-Kerisiano, e pei o lenei mekasini. O le faatuatua e faavae i le poto saʻo o le Afioga a le Atua, le Tusi Paia, e lē vāivāi pe papaʻu. O i latou ua iloa le finagalo o le Atua ma faia i le faatuatua, ua latou tuuina atu le auaunaga paia i le Atua.—Roma 12:1.
Talitonu e ui e Lē o Vaaia
Sa faigata i le aposetolo o Toma ona talitonu i le toe faatuina mai o Iesu nai le oti. Ua faapea mai Toma: “Afai ou te le vaai atu i ona lima, i mea na tutuʻi ai fao, ma tuu loʻu tamatamai lima i mea na tutuʻi ai fao, ma tuu loʻu lima i lona itu, ou te le talitonu lava.” Ina ua faaali mulimuli ane Iesu i se tino faaletino e faaalia ai manuʻa o lona faasatauroina, sa talitonu ai Toma i lenei vavega. Ae peitai, na fetalai Iesu: “Amuia o e lē vaai mai, a e faatuatua mai pea.”—Ioane 20:25-29.
I aso nei, e faitau miliona Molimau a Ieova o loo ‘savavali i le faatuatua, ae lē o le tino mai o mea.’ (2 Korinito 5:7) E ui e latou te lei vāai i vavega o loo faamauina i le Tusi Paia, ae ua latou talitonu maumauaʻi e faapea, na tutupu moni nei mea. E faaalia e Molimau le faatuatua i le Atua ma lana Afioga. E ala i le fesoasoani a lona agaga, ua mafai ai ona latou malamalama i aʻoaʻoga a le Tusi Paia ma lona matua autū—le faalauiloaina o le pule silisili ese a Ieova le Atua e ala i lona Malo faalelagi. (Mataio 6:9, 10; 2 Timoteo 3:16, 17) I lo latou mauaina o aogā sili, ua faatatauina ai e nei Kerisiano faamaoni ia fautuaga atamai a le Tusi Paia i o latou olaga. (Salamo 119:105; Isaia 48:17, 18) Ua latou talia le faamaoniga lē ma sese e faapea, o valoaga o le Tusi Paia, ua faailogaina ai o tatou aso, “o aso e gata ai,” ma ua latou faatuatua e faapea, ua latalata mai le lalolagi fou folafolaina a le Atua. (2 Timoteo 3:1-5; Mataio 24:3-14; 2 Peteru 3:13) O se mea e latou te olioli ai le faia o se sao i le tufaina atu o le poto e uiga i le Atua i isi. (Faataoto 2:1-5) Ua latou iloa, e na o le suesueina lava o le Tusi Paia e mafai ai e i latou o loo saili i le Atua ona maua moni o ia.—Galuega 17:26, 27.
E te manatua Alapati lea na taʻua i le mataupu na seʻi mavae atu? Ina ua mavae ni nai aso talu lana tatalo mo se vavega ae sa lei talia, na asiasi atu ai se tasi o Molimau a Ieova ia te ia, o se tinā matua o lē na ia tuua ai ni lomiga faale-Tusi Paia. Na talia mulimuli ane e Alapati se suesuega faale-Tusi Paia i le aiga e aunoa ma se totogi. Ina ua amata ona ia masani lelei i le feau a le Tusi Paia, na liua lona faanoanoa i lona matuā fiafia. Sa amata ai ona ia iloa e faapea ua iu lava ina ia maua le Atua.
Ua timaʻi mai le Tusi Paia: “Ia outou saili ia Ieova manū o mafai ona maua o ia; ia outou valaau ia te ia manū o latalata mai o ia.” (Isaia 55:6) E mafai ona e faia lenei mea, e lē ala i le faatalitalia o se vavega mai le Atua i aso nei, ae ala i le mauaina o le poto saʻo o lana Afioga. O se mea e manaomia lenei, auā e lē na o vavega e mafai ona atiina ae ai le faatuatua.
[Ata i le itulau 5]
E oo lava i le toe faatuina faavavega o Lasalo sa lei uunaia ai fili o Iesu e faaalia le faatuatua
[Ata i le itulau 7]
O le faatuatua, e tatau ona faavae i le poto saʻo o le Tusi Paia