Pe E te Manatua?

Pe ua e iloa le aogā ia te oe o lomiga talu ai nei o Le Olomatamata? Aisea la e lē tofotofoina ai po o e manatuaina ni mea e ala i le faaaogā o fesili o loo mulimuli mai?

◻ O le a faapeī Amaketo? (Faaaliga 16:14, 16)

O le a lē avea o se taua faaniukilia po o se mala e faatupuina e tagata. E leai, o le taua lea a le Atua e faaiuina ai taua uma a tagata, e matuā faatamaia ai i latou uma o loo faatupuina na taua, ma e aumaia ai le filemu moni ia i latou o ē mananao i le filemu. O le a lē faatuai mai. (Sapakuka 2:3)—4/15, itulau 17.

◻ O le ā le ituaiga o faaipoipoga e viia ai Ieova?

O se faaipoipoga e faasilisilia ai vala faaleagaga nai lo ala faalelalolagi, o le a viia moni ai lava Ieova. O le a olioli Kerisiano i le faatasiga pe afai latou te alofia tū matagā faalelalolagi, o talitonuga faanuupo, ma faiga soonafai; pe afai e lē faalavelaveina ai gaoioiga masani faatiokarate; ma pe afai latou te faaalia ai uiga onomea nai lo faiga faalialiavale.—4/15, itulau 26.

◻ O le ā e mataulia ai se tagata faamaoni?

O se tagata faamaoni e mafai ona maufaatuatuaina, e lē na o ona uso faaletagata, ae sili ona tāua o le maufaatuatuaina e le Atua. O le mamā o le loto o lena tagata e mafai ona vaaia i ana gaoioiga. E lē faaʻoleʻole o ia. E lē faitogafiti pe faapiopio o ia. (2 Korinito 4:2)—5/1, itulau 6.

◻ Aisea na faapea mai ai Ieremia: “E lelei i le tagata ina ia tauave e ia le amo ina o taulealea”? (Auega 3:27)

O le aʻoaʻoina o le auala e faafetaiaia ai tofotofoga a o talavou e fesoasoani lea i le sauniunia o se tasi mo le faafetaiaia o luʻi a o agaʻi atu i le avea ma tagata matua. (2 Timoteo 3:12) O aogā o le faamaoni e matuā sili atu nai lo so o se isi lava mapusaga lē tumau lea e ono maua mai i le faagutugutulua.—5/1, itulau 32.

◻ O le ā na faaatagia e le aliai mai o Mose ma Elia i le vaaiga o le liliuga?

I le manatu o taulai atu i ai le liliuga, sa fetaui ai le faaatagia mai e Mose ma Elia o soo faauuina o Iesu. O i latou na, e pei foi o Iesu, ‘sa faaali mai ma le mamalu’ e fai ma faailoga e iloa ai, o le a ‘faamanuiaina faatasi’ Kerisiano faamaoni faauuina ma Iesu i le faatulagaga o le Malo faalelagi. (Luka 9:30, 31; Roma 8:17; 2 Tesalonia 1:10)—5/15, itulau 12, 14.

◻ O le ā le “mea lilo paia” a le Atua? (1 Korinito 2:7)

O le “mea lilo paia” a le Atua e faaautū atu ia Iesu Keriso. (Efeso 1:9, 10) Ae peitai, ua lē na ona faailoaina mai o Iesu i le avea ma Mesia folafolaina. E aofia ai le pulega faalelagi, le Malo Faa-Mesia o le Atua, ma e aofia ai le matafaioi ua tofia Iesu na te faatinoina i fuafuaga a le Atua.—6/1, itulau 13.

◻ O le ā le manatu e tatau ona iai i se Kerisiano e faatatau i le olaga matua po o maʻi?

Nai lo le vaai i na faafitauli ua faaitiitia ai lana auaunaga ia Ieova, e tatau ona ia vaai i na mea o se avanoa e faateleina ai lona faalagolago ia te ia. E tatau foi ona ia manatua, e lē fuaina le aogā o se Kerisiano i na o le tele o ana galuega, ae o lona faatuatua foi ma le loloto o lona alofa. (Mareko 12:41-44)—6/1, itulau 26.

◻ Na faapefea i le faaaogaina e Ieova o tagata nai lo agelu e tusiaina le Tusi Paia ona faaalia ai le tele o lona atamai?

Pe ana fai e matuā leai lava ni faamatalaga e faaaogaina ai le gagana ua masani ai tagata, atonu o le a faafaigata ia i tatou ona malamalama i le feau a le Tusi Paia. E lē gata i lea, ua iai i le Tusi Paia faalogona mafana, mea eseese, ma lagona faafiafia loto ua maua mai le faaaogaina o tagata e tusiaina.—6/15, itulau 8.

◻ O le ā le auala e maua ai le fiafia i le aiga? O le auala o loo taʻua mai i totonu o le Afioga a le Atua, le Tusi Paia, ma i le faatatauina o ona mataupu silisili, e pei o le pulea totino, le amanaiaina o le tulaga ulu, o fesootaiga lelei, ma le alofa.—6/15, itulau 23, 24.

◻ E faapefea i faamalologa na faia e Iesu ona matuā ese mamao mai faamalologa ia ua taatele ona faia e i latou o ē faapea mai ua ia i latou ni mana faifaamalologa i aso nei?

Sa lei iai ni faaaliga o faalogona malolosi na faaali mai e le motu o tagata ma sa lei iai ni uiga matuā inainā na faaalia e Iesu. E lē gata i lea, sa lē tāitai ona lē taulau Iesu e faamālōlō tagata mamaʻi i se faamolemolega faapea talu ai sa lē lava le tele o a latou foai pe sa leai so latou faatuatua.—7/1, itulau 5.

◻ Ua faapefea ona fesoasoani Ieova i ona tagata ina ia iai sa latou vaega i lana fuafuaga tauatua e faatatau i lona suafa ma le Malo?

Muamua lava, ua tuuina mai e Ieova i ona tagata le upu moni. Lona lua, sa ia foai mai ia i latou lona agaga paia. Ma le lona tolu, ua iai lo tatou auuso i le lalolagi aoao ma le fuafuaga tau faalapotopotoga a Ieova mo le tapuaiga.—7/1, itulau 19, 20.

◻ O le ā le amio lelei?

O le amio lelei e faauiga i amioga tatau e silisili ona lelei, o uiga lelei, o gaoioiga ma mafaufauga e saʻo. E lē o se uiga e lē gaoioi ae o se uiga e olaola pea, o se uiga mautinoa. E iai isi mea e aofia ai i le amio lelei nai lo le alofia o le agasala; e faauiga atu i le tausisia pea o mea e lelei. (1 Timoteo 6:11)—7/15, itulau 14.

◻ O le ā le tofi e sili ona tāua e mafai e mātua ona faasolo atu i a latou fanau?

O le tofi e sili ona tāua o la latou lava faaaoaoga i le faaalia o le alofa i isi. E sili atu ona mataina, le manaomia e le fanau ona vaai ma faalogo a o faaleo atu ma faaalia e o latou mātua le alofa moni o le Atua i mea uma latou te fai.—7/15, itulau 21.

◻ O ā nisi o mea e sili ona manaomia mo se suesuega uigā a le aiga?

E tatau i le suesuega a le aiga ona faifai pea. E ao ona outou ‘faaavanoa le taimi’ mo le suesuega. (Efeso 5:15-17) Ia ola le faiga o suesuega mo le fanau e ala i le uigā o le auala o loo faaaogā ai le Tusi Paia. Ina ia olioli ai le fanau, e tatau ona latou lagona o loo faaaofia ai i latou i le suesuega.—8/1, itulau 26, 28.