Faaolataga—Lona Uiga Moni

‘PO UA faaolaina oe?’ O le tele o taimi, o le toatele e fesili i lenei fesili ua iai se lagona e faapea, ua faaolaina i latou ona ua latou ‘talia Iesu e avea ma o latou lava Faaola.’ Peitai, ua lagona e isi e faapea, e tele auala eseese i le faaolataga, ma ‘a e talia Iesu i lou loto,’ e lē afaina po o le ā e te talitonu i ai po o le ā foi le lotu e te auai atu i ai.

Ua faapea mai le Tusi Paia, o le finagalo o le Atua, “ina ia faaolaina o tagata uma lava.” (1 Timoteo 2:3, 4) O le faaolataga la, e mafai ona maua e tagata uma o ē o le a taliaina. Ae o le ā moni le uiga o le faaupuga, ia faaolaina? Po o se mea moni ea e mafai ona tupu ia te oe i le faia e tau lava o sina taumafaiga itiiti po o le matuā leai lava o se taumafaiga?

O le upu “faaolaina” o lona uiga o le “faasaoina mai se lamatiaga po o se faaumatiaga.” O lea la, o le faaolataga moni e aofia ai e sili atu nai lo o le na o se tulaga toafilemu o le mafaufau. O lona uiga, o le faasaoina mai le faaumatiaga o lenei faiga leaga o mea, ma iu ai ina faaolaina mai le oti! Ae po o ai i latou o le a faaola e le Atua? Ina ia maua le tali, seʻi o tatou iloiloina le mea na aʻoaʻo atu e Iesu Keriso e faatatau i lenei mataupu. Atonu o le a faateia oe i le iuga o la tatou iloiloga.

Faaolataga—Pe Maua i Lotu Uma?

I se tasi taimi, na talanoa ai Iesu ma se fafine Samaria. E ui lava e lē o ia o se Iutaia, ae mautinoa sa talitonu moni o ia e faapea, o le a afio mai le Mesia “o le ua igoa ia Keriso.” (Ioane 4:25) Pe sa lava lena talitonuga mo ia e faaolaina ai? E leai, auā na taʻu atu ma le lototele e Iesu i le fafine e faapea: “Tou te tapuai ma le le iloa.” Sa silafia e Iesu e faapea, afai e manao lenei fafine e maua le faaolataga, e tatau ona suia le auala e tapuai ai. O lea, na faamatala atu ai e Iesu: “A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le faamaoni [“upu moni,” NW]; auā o loo saili le Tamā i e tapuai faapena ia te ia.”—Ioane 4:22, 23.

I se tasi taimi na faailoa atu ai e Iesu lona manatu e uiga i le faaolataga e aofia ai le au Faresaio, o se vasega maualuga o le lotu Iutaia. Na faavaeina e le au Faresaio se faiga faaletapuaiga ma talitonu e faapea ua faamaonia e le Atua. Ae seʻi faafofoga atu i fetalaiga a Iesu i le au Faresaio: “O outou tagata faafiaamiotonu! E saʻo lava le valoaga a Isaia e faatatau ia te outou: ‘Ua āva mai ia te au nei tagata i o latou laugutu, a o latou loto ua taumamao ia te au. E tapuai fua mai i latou ia te au; o a latou aʻoaʻoga, ua na o ni tulafono na aʻoaʻoina e tagata.’ ”—Mataio 15:7-9, New International Version.

Ae faapefea le tele o vaega faalotu i aso nei ua faapea mai e talitonu ia Keriso? Po o le a talia e Iesu i latou uma e faapea o ni auala faamaonia e maua ai le faaolataga? E lē tatau ona tatou taumatemateina lenei mea, auā na fetalai manino mai Iesu e faapea: “E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o loʻu Tamā o i le lagi. E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou taʻutino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.”—Mataio 7:21-23.

Le Poto Saʻo e Uiga ia Iesu e Tāua mo le Faaolataga

O nei fetalaiga a Iesu, e iai se uiga faatupu manatu. Ua faaalia ai i na fetalaiga e faapea, o le toatele o tagata tuutoina i lotu, ua lē taulau ona latou ‘faia le finagalo o le Tamā.’ E mafai la faapefea ona maua e se tasi le faaolataga moni? Ua tali mai le 1 Timoteo 2:3, 4: “O le finagalo [o le Atua] ina ia faaolaina o tagata uma lava ma ia oo ina iloa lelei [“le poto saʻo,” NW] le upu moni.”—Faatusatusa i le Kolose 1:9, 10.

O lena poto e tāua mo le mauaina o le faaolataga. Ina ua fesili atu se pule o le falepuipui Roma i le aposetolo o Paulo ma lana aumea o Sila, “Alii e, se a le mea e tatau ona ou faia ina ia faaolaina ai o aʻu?” na la tali atu: “Ina faatuatua ia i le Alii o Iesu Keriso, e faaolaina ai oe atoa ma lou aiga.” (Galuega 16:30, 31) Po o le uiga o lena mea, e na o le pau lava le mea na manaomia ona faia e le pule o le falepuipui ma lona aiga o le iai lea o se faalogona faapitoa i o latou loto? E leai, auā e lē mafai ona latou ‘talitonu moni i le Alii o Iesu,’ seiloga ua latou maua se malamalamaga i le po o ai Iesu, po o ā mea na ia faia, ma mea na ia aʻoaʻoina atu.

Mo se faaaoaoga, na aʻoaʻo e Iesu le faavaeina o se pulega faalelagi—“le Malo o le Atua.” (Luka 4:43) Sa ia faataatitiaina foi ni mataupu silisili mo amioga tatau faa-Kerisiano. (Mataio, mataupu 5-7) Sa ia faaauivi mai le tulaga o le a tutū ai ona soo pe a oo i mataupu faapolotiki. (Ioane 15:19) Sa ia faavaeina se polokalame faaleaʻoaʻoga i le lalolagi aoao ma poloaiina ona soo ina ia faia ai se sao i lea polokalame. (Mataio 24:14; Galuega 1:8) Ioe, o le ‘talitonu ia Iesu,’ o lona uiga, ia malamalama i le tele o mea! E letioa la ona talaʻi atu e Paulo ma Sila le ‘afioga a Ieova i le [pule o le falepuipui] faapea ma i latou uma i lona aiga’ a o lei papatisoina nei tagata talitonu fou.—Galuega 16:32, 33.

Le Poto Saʻo e Uiga i le Atua e Tāua Foi

O se vaega tāua o le talitonu moni ia Iesu, e aofia ai le tapuai atu i le Atua lea e tapuai i ai Iesu. Na tatalo Iesu e faapea: “O le ola faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”—Ioane 17:3.

I le taimi o lana faiva i le lalolagi, sa tataʻi atu pea e le Alo o le Atua manatu i lona Tamā ae lē o ia. E lei fai mai lava o ia e faapea o ia o le Atua e Ona le Malosi Uma Lava. (Ioane 12:49, 50) I le tele o taimi, sa faamanino atu ai e Iesu lona tulaga i faatulagaga a le Atua i lona taʻua e faapea, e usiusitai pea lava o ia i lona Tamā. (Luka 22:41, 42; Ioane 5:19) Ioe, na faalauiloa mai e Iesu e faapea: “E sili loʻu Tamā ia te au.” (Ioane 14:28) Po o aʻoaʻo atu e lau lotu ia te oe le faiā moni i le va o le Atua ma Keriso? Po o le mea o taitaiina oe e te talitonu o Iesu, o le Atua e Ona le Malosi Uma Lava? O lou faaolataga e faalagolago i le mauaina o le malamalamaga saʻo.

I le Tatalo a le Alii, na uunaia ai e Iesu ona soo e tatalo e faapea: “Ia paia lou suafa.” (Mataio 6:9) I le tele o faaliliuga o le Tusi Paia, ua aveesea ai le suafa o le Atua, ae sui i le “Alii.” Ae peitai, i kopi anamua o le “Feagaiga Tuai,” o loo maua ai le suafa o le Atua e sili atu i le faaafe onoselau taimi! Ua faitauina faapenei le Salamo 83:18: “Ina ia iloa e i latou, o oe, e ou le suafa o Ieova, na o oe lava o le Silisili ese i le lalolagi uma.” Pe na aʻoaʻoina oe e faaaogā le suafa o le Atua, o Ieova? Afai e leai, ua tulaga faaletonu la lou faaolataga, auā “e iu foi ina faaolaina o i latou uma lava o e valaau atu i le suafa o [Ieova]”!—Galuega 2:21; faatusatusa i le Ioelu 2:32.

I le Agaga ma le Upu Moni

Sa tatai atu foi e Iesu Keriso manatu i le Afioga a le Atua, le Tusi Paia. Pe a faamatalaina le manatu o le Atua e faatatau i nisi o mataupu, e masani lava ona ia faapea atu: “Ua tusia.” (Mataio 4:4, 7, 10; 11:10; 21:13) I le po a o lei maliu o ia, na tatalo ai Iesu e faatatau i ona soo: “Ia e faapaiaina i latou i le upu moni; o lau afioga o le upu moni lea.”—Ioane 17:17.

O le mauaina o le malamalama e uiga i aʻoaʻoga o le Afioga a le Atua, le Tusi Paia, o se tasi lea vala manaomia mo le faaolataga. (2 Timoteo 3:16) E na o le Tusi Paia lava e mafai ona taliina fesili e pei o lenei: O le ā le uiga o le olaga? Aisea ua faatagaina ai e le Atua le amioleaga e faaauau pea mo se taimi umi? O le ā e tupu i se tagata pe a oti? Pe e faapuapuagatia moni e le Atua tagata i se afi i seoli? O le ā le fuafuaga a le Atua mo le lalolagi?a E lē mafai e se tasi ona tapuai i le Atua i le auala saʻo e aunoa ma le maua o le malamalamaga saʻo e uiga i na mataupu, auā na fetalai Iesu: “O e tapuai faamaoni latou te tapuai i le Tamā i le agaga ma le faamaoni [“upu moni,” NW].”—Ioane 4:23.

O le Faatuatua e Mafai ai Ona Faia se Gaoioiga

O le faaolataga e aofia ai mea e sili atu nai lo o le tau ina mauaina o ni faamatalaga. I se loto e talisapaia, o le mauaina o le poto saʻo i le Atua, e oo ai ina faatuatua. (Roma 10:10, 17; Eperu 11:6) O se faatuatua faapena e uunaia ai se tasi e faia se gaoioiga. Mo se faaaoaoga, ua apoapoai mai le Tusi Paia: “Ina salamo ia outou ma outou liliu, ina ia sōloiesea a outou agasala, ina ia oo mai ai o tausaga e filemu ai mai luma o le Alii [“Ieova”].”—Galuega 3:19.

Ioe, o le faaolataga e aofia ai foi le faatatauina atu o le olaga o se tasi i tapulaa tau amio tatau a le Atua. E ala i le mana e faaliliuina ai o le Afioga a le Atua, ua suia ai masaniga na ola mai ai, o le pepelo ma le faaʻoleʻole, i le faamaoni ma le amio saʻo. (Tito 2:10) Ua lafoaia amioga lē mamā e pei o le tauatane, mulilua, ma le faitaaga, ae ua suia i amioga mamā. (1 Korinito 6:9-11) E lē o se faamamao mai amioga lē mamā mo sina taimi e faavae aʻe i lagona ootia, ae o se suiga tumau ona o le suesueina ma le faaeteete ma faatatauina le Afioga a le Atua.—Efeso 4:22-24.

I se taimi, o le a uunaia ai e le alofa ma le talisapaia mo le Atua se tagata loto faamaoni e faia se tuuina atu atoatoa i le Atua ma faatinoina i le papatisoga i le vai. (Mataio 28:19, 20; Roma 12:1) O Kerisiano papatisoina ua faaolaina i le silafaga a le Atua. (1 Peteru 3:21) I le taimi o le oo mai o le faaumatiaga o lenei lalolagi amioleaga, o le a faaolaina atoatoa ai i latou e le Atua e ala i le faasaoolaina atu i lena puapuaga.—Faaaliga 7:9, 14.

Le Uiga o le Faaolataga mo Oe

Ua manino mai i lenei talanoaga puupuu e faapea, o le mauaina o le faaolataga e aofia ai ni mea e sili atu nai lo o le tau ina ‘talia le Alii o Iesu i lou loto.’ O lona uiga, o le ave i fale o le poto saʻo e uiga ia Ieova le Atua ma Iesu Keriso, ma faia suiga manaomia i le olaga o se tasi. O le faia o lenei mea e ono avea o se mea e mataʻu ai, ae ua naunau Molimau a Ieova e fesoasoani atu ia te oe i lenei taumafaiga. E ala i le faia o se suesuega faale-Tusi Paia i le aiga e aunoa ma se totogi, ua mafai ai ona latou fesoasoani atu ia te oe e amata ona e ui i le ala i le faaolataga moni.b

I le vaai atu i le lalata tele mai o le aso o le faamasinoga a Ieova, ua sili atu ai ona faanatinati le faia o lenei mea nai lo o se isi lava taimi! O le taimi lenei e utagia ai upu a le perofeta: “Manū o lei oo mai ia te outou le aso o le toasa o Ieova. Ia outou saili ia Ieova, outou uma ua agamalu i le nuu, o e ua faia lana faamasinoga; ia outou saili le amiotonu, ia outou saili le agamalu, atonu e lilo ai outou i le aso o le toasa o Ieova.”—Sefanaia 2:2, 3.

[Faaopoopoga i lalo]

[Pusa i le itulau 6]

E Maua le Faaolataga Mai le . . .

◻ Mauaina o le poto saʻo e uiga i le Atua ma Iesu.—Ioane 17:3.

◻ Faaalia o le faatuatua.—Roma 10:17; Eperu 11:6.

◻ Salamō ma liliu ese.—Galuega 3:19; Efeso 4:22-24.

◻ Tuuina atu ma papatisoina.—Mataio 16:24; 28:19, 20.

◻ Faaauau ona folafola atu i le lautele.—Mataio 24:14; Roma 10:10.

[Ata i le itulau 7]

O le suesueina o le Tusi Paia, le faatatauina o mea ua aʻoaʻoina, le tuuina atu ma papatisoina, o laasaga ia e taitaiina atu ai i le faaolataga