Pe e Lava le Tau Ina Talitonu iā Iesu e Faaolaina Ai?
Tali a le Tusi Paia
E talitonu Kerisiano, na maliu Iesu mo agasala a tagata. (1 Peteru 3:18) Peitaʻi, o le faaolaina e manaʻomia ai nisi mea e sili atu i lo o le tau ina talitonu o Iesu o le Faaola. E iloa foʻi e temoni o Iesu o le “Alo o le Atua,” ae e latou te lē maua le faaolataga.—Luka 4:41; Iuta 6.
O le ā e tatau ona ou faia ina ia maua ai le faaolataga?
E tatau ona e talitonu na faataulaga e Iesu lona ola mo a tatou agasala. (Galuega 16:30, 31; 1 Ioane 2:2) E aofia ai le talitonu na soifua moni Iesu ma e saʻo aʻiaʻi faamatalaga uma a le Tusi Paia e faatatau iā te ia.
Ia aʻoaʻoina aʻoaʻoga moni a le Tusi Paia. (2 Timoteo 3:15) Ua faapea mai le Tusi Paia, na taʻu atu e Paulo ma Sila i se leoleo o le falepuipui e faapea: “Ia e talitonu i le Alii o Iesu Keriso, ona faaolaina ai lea o oe.” Ona la aʻoaʻo atu lea o “le afioga a Ieova”a iā te ia. (Galuega 16:31, 32) Ua faailoa mai i nei e lē mafai ona talitonu moni le leoleo o le falepuipui iā Iesu, seʻi vaganā ua ia malamalama i aʻoaʻoga faavae o le Afioga a le Atua. Na ia manaʻomia le poto saʻo e faavae mai i le Tusi Paia.—1 Timoteo 2:3, 4.
Ia salamō. (Galuega 3:19) E manaʻomia foʻi ona e salamō pe matuā faanoanoa i uiga ma mea sesē na e faia i le taimi ua teʻa. O le a matilatila i isi lou salamō pe a tuua le faia o mea e lē fiafia i ai le Atua ma faia “galuega ua tatau mo le salamō.”—Galuega 26:20.
Ia papatiso. (Mataio 28:19) Na taʻua e Iesu o i latou e avea ma ona soo, e tatau ona papatisoina. Na papatisoina le leoleo o le falepuipui lea na taʻua muamua. (Galuega 16:33) I se tulaga talitutusa, ina ua aʻoaʻoina e Peteru le upu moni e faatatau iā Iesu i se motu o tagata, ona ʻpapatisoina ai lea o i latou uma na talia ma le lotoatoa lana upu.’—Galuega 2:40, 41.
Ia usitaʻi i faatonuga a Iesu. (Eperu 5:9) O i latou uma e “tausi i mea uma” ua fetalai mai ai Iesu, e latou te faaalia i le auala e ola ai o i latou o soo o Iesu. (Mataio 28:20) E avea i latou ma “ē e usiusitaʻi i le upu ae e lē na o le faalogologo i ai.”—Iakopo 1:22.
Ia tumau e oo i le iʻuga. (Mareko 13:13) E tatau ona tumau soo o Iesu ina ia faaolaina ai. (Eperu 10:36) O se faataʻitaʻiga, na matuā usiusitaʻi Paulo i faatonuga a Iesu ma faamaoni i le Atua, ma na ia tumau i le faia o na mea mai lava i le aso na avea ai ma Kerisiano seʻia oo i lona maliu.—1 Korinito 9:27.
O le ā le “Tatalo a le Tagata Agasala”?
I nisi tapuaʻiga, e faia ai e tagata ni tatalo e pei o le “Tatalo a le Tagata Agasala” ma le “Tatalo mo le Faaolataga.” O na tatalo, e faaalia ai lo latou amanaʻia o a latou agasala ma faailoa ai lo latou talitonu na maliu Iesu mo agasala. E latou te talosaga atu foʻi ia afio Iesu i o latou loto ma olaga. Peitaʻi e lē o taʻua pe fautuaina e le Tusi Paia le faia o se tatalo e aʻo faatauloto, e pei o le “Tatalo a le Tagata Agasala.”
O nisi e manatu pe a uma ona faia le “Tatalo a le Tagata Agasala,” ona mautinoa lea o lona faaolaina e faavavau. Peitaʻi, e lē mafai e se tatalo ona faamautinoa ai lou faasaoina. E faaauau pea ona tatou faia mea sesē ona o lo tatou tulaga lē lelei atoatoa. (1 Ioane 1:8) O le māfuaaga lenā na aʻoaʻo ai e Iesu ona soo e tatalo e lē aunoa mo le faamagaloga o a latou agasala. (Luka 11:2, 4) E lē gata i lea, na iai nisi Kerisiano na leiloa lo latou faamoemoe na ono maua ai le faaolataga e faavavau, ona ua latou fulitua i le Atua.—Eperu 6:4-6; 2 Peteru 2:20, 21.
O fea na tupuga mai ai le “Tatalo a le Tagata Agasala”?
Ua feteenaʻi manatu o faitofā e faatatau i le mea na tupuga mai ai le “Tatalo a le Tagata Agasala.” Ua faapea mai nisi na tupuga mai lenei tatalo i vaitaimi o le Porotesano Toefuataʻiina (lea na amata i le 1517). O nisi e talitonu na amata ona fai e tagata le “Tatalo a le Tagata Agasala” a o leʻi amata isi lotu fou i le senituri 18 ma le 19. Po o le ā lava le tulaga, e lē o lagolagoina e le Tusi Paia nei tatalo. O le mea moni, e feteenaʻi ma aʻoaʻoga a le Tusi Paia.
a O Ieova o le suafa o le Atua o loo taʻua i le Tusi Paia.