Le Auala e Faatumauina ai le Olioli i le Auaunaga Faataimi Atoa
UA FAAALIA manino i le faataunuuga o valoaga a le Tusi Paia e faapea, ua tatou ola nei i aso e gata ai o lenei faiga o mea faalemataʻu. Ona o le iloaina o lenei mea, ua faaaluina ai e auauna a Ieova le Atua le tele o le taimi latou te mafaia, i le faasalalauina atu o le tala lelei o lona Malo. E silia i le 600,000 Molimau a Ieova ua latou faia ni fetuutuunaiga i o latou olaga ina ia mafai ona latou auai i le auaunaga faataimi atoa. Ua avea nisi o i latou ma ē folafola atu faataimi atoa le Malo, ia ua faaigoaina o paeonia. O isi o loo auauna tauofo o ni tagata Peteli i le ofisa ulu o le Sosaiete o le Olo Matamata po o isi ona ofisa o lālā. Ae o isi foi o loo avea o ni misionare ma ni ovasia femalagaai.
Ua faaalia e le Tusi Paia faapea, i aso e gata ai, o le a oo mai ai “aso faigata.” (2 Timoteo 3:1-5) E faaaogā e le mau i le Tusi Paia Eleni le faaupuga lea atonu e taʻua faapea o “taimi matautia ua atofaina.” O lea la, e lē tatau i se tasi ona ia faatalitalia i o tatou aso se olaga e ʻasa mai faalavelave. Mo nisi faifeau Kerisiano, ua matuā matautia le tulaga mai o faafitauli ona latou fesiligia ai lea o i latou lava, ‘Pe mafai ea ona faaauau pea laʻu auaunaga faataimi atoa, po ua tatau loa ona tuu?’
O ā ni tulaga atonu e faapogaia ai se tasi e iloiloina lana auaunaga o se paeonia, o sē auauna i Peteli, o se ovasia femalagaai po o se misionare? Atonu ua tulai mai se faafitauli matuia i le soifua maloloina. Atonu e iai se tauaiga ua matua pe ua maʻi na te manaomia le tausiga faifai pea. Atonu o se ulugalii faaipoipo ua amata ona fai se la fanau. O so o se tasi lava e faamutaina lana auaunaga faataimi atoa ona o na mafuaaga pe ona o ni tiute tauave e tusa ai ma le Tusi Paia, e lē tatau ona ia te ia le lagona matamuli i le faia o na fetuunaiga.
Ae faapefea pe afai ua māfua ona lē faaauauina e se tasi lana auaunaga faataimi atoa ona ua leai sona olioli? Atonu e itiiti se talileleia o maua e se paeonia i lana faiva ona fesili ai lea, ‘Aisea ou te faaauau ai pea i loʻu olaga faataulagaina totino ae semanū e tau leai nisi o faalogologo mai?’ Atonu e lē o matuā fiafia se tagata Peteli i lona tofiga o loo galue ai. Pe atonu o se maʻi o le tino ua fai ma faalavelave, e ui lava e lē matuā taofia ai le auaunaga faapaeonia, ae e iu lava ina aveesea ai le fiafiaga o se tagata. E mafai faapefea e na tagata ona faatumauina lo latou olioli? Seʻi o tatou talanoaina mea ua fai mai ai nisi faifeau ua lava le poto masani.
Le Manumalo Mai le Lē Fiafia
O Ane, o lē sau mai Suisilani, sa auai o ia i le Aʻoga Faale-Tusi Paia a le Olomatamata o Kiliata i le 1950. Sa ia faatalitalia ma le naunautai sona tofiga faamisionare i se atunuu i fafo atu o atunuu Europa. Ae ina ua toe tofia Ane e galue o se auauna i Peteli i Europa, sa lē fiafia o ia. E ui lava i lea, sa ia talia lona tofiga i le Matagaluega o Faaliliuga, ma o loo ia faia pea lena galuega. Na faapefea ona ia manumalo mai lona lē fiafia? Ua faamatala mai e Ane: “Sa tele ma o loo tele pea galuega e tatau ona faia. E lē tāua oʻu faalogona ma ni mea ou te manao i ai, e pei o le tāua o le galuega.”
Pe afai tatou te lē fiafia i o tatou tofiga, atonu la e mafai ona tatou faatupuina aʻe le uiga sa iai ia Ane. E lē sili atu ona tāua ni mea tatou te mananao totino i ai. O le mea e sili ona faitaulia, ia lelei ona taulimaina tiute tauave eseese uma o loo sootaga atu i le faalauiloaina o le feau o le Malo. Ua taʻu mai e le Faataoto 14:23 ia i tatou e faapea o loo “i ai le mau [mea aogā] i galuega uma.” E tusa lava po o le ā le tofiga ua tuuina mai ia i tatou, ae o le faatinoina ma le faamaoni e saosaolaumea lea i le faataulauina o le galuega o le Malo. Ona mafai ai lea ona iai se faamalieina tele—ioe, le olioli—i lena galuega ua tuuina mai e le Atua.—Faatusatusa i le 1 Korinito 12:18, 27, 28.
Le Lelei o le Va ma Isi
O le auaunaga faataimi atoa e aofia ai le fesoo-tai atu vavalalata ma tagata o ituaiga uma—i le faiva i le fanua, i le Peteli, i le aiga misionare, pe i taimi e asiasi atu ai i faapotopotoga eseese a o avea o se ovasia femalagaai. O lea la, e faalagolago atu se vaega tele o le olioli i le lelei o le va ma isi. Peitai ane, o “taimi matautia” ua valoia mo nei aso e gata ai ua māfua ai tulaga faigata i faiā faaletagata. E mafai faapefea e se faifeau ona alofia le mou atu o lona olioli, e tusa lava pe faatiga mai se tasi ia te ia? Atonu tatou te aʻoaʻoina se lesona mai ia Wilhelm.
Na avea Wilhelm o se tasi o le aiga Peteli i Europa i le 1947. Ina ua mavae lena, ona ia faaaluina ai lea o se vaitaimi i le galuega faapaeonia ma le auaunaga o se ovasia femalagaai. Fai mai le faamatalaga a Wilhelm: “Pe afai e ma te vaaia ma laʻu avā ni mea ma te iloa e lē o saʻo pe faapopoleina ai foi i maʻua, e ma te taʻu atu lava ia Ieova o ma faalogona i na mea, ona tuu atu loa lea o mea ia te ia na te foiaina.”—Salamo 37:5.
Atonu po ua faaleagaina ou faalogona i se amio a se isi Kerisiano o lē na ia faia atu ni faamatalaga lē faaaloalo pe lē mafaufau ia te oe. Ia manatua o i tatou uma lava e tele taimi tatou te faatausuai ai i a tatou faamatalaga. (Iakopo 3:2) Aisea la e lē faaaogā ai lena tulaga e te faalatalata atu ai i “Le faafofoga tatalo”? (Salamo 65:2) Ia talanoa atu ia Ieova e faatatau i le mataupu, ona lafoai atu loa lea i ona aao le mataupu. Pe afai o le finagalo o le Atua ia faia ni suiga, o le a ia faia lava faapea. Atonu e manao-mia e i latou o loo nonofo i aiga misionare ona manatua lenei manatu pe afai e tutupu foi ia i latou na faafitauli, auā o le a fesoasoani lenei ia i latou e faatumauina ai lo latou olioli i le auaunaga a Ieova.
Pe a Faaletonu le Soifua Maloloina
E itiiti ni nai tagata o loo olioli i le sologa lelei pea o le soifua maloloina. E oo lava ia i latou o loo iai i le tulaga ua taʻua faapea o malaulau o le olaga, e mafai lava ona taia i mafatiaga po o faamaʻi. O maʻi o le tino e talafeagai ai mo nisi ona faamutaina le auaunaga faataimi atoa, ae mulimuli ane latou te faia ai ni galuega e sili ona lelei i le avea o ni tagata talaʻi o le Malo. Ae peitai, ua mafai e isi ona latou faaauau pea i le auaunaga faataimi atoa e ui lava ina faaletonu le soifua maloloina. Mo se faataitaiga, seʻi manatu ia Hartmut ma Gislind.
O Hartmut ma Gislind o se ulugalii faaipoipo e 30 tausaga na la faaaluina i le avea o ni paeonia, ni misionare, ma i le galuega femalagaai. E taufai aafia uma laua i ni maʻi matautia lea e iai nisi taimi e matuā faavaivaia ai i laʻua i le tino ma faalogona. E ui lava i lea, ua la faia se galuega e sili ona lelei ma ua mafai ona la faalaeiau atu i isi o loo oo foi i ai na tulaga faigata. O ā fautuaga la te ofoina atu? “Ia tepataulai atu i le lumanai ae lē o aso ua tuanai. Ia faia le mea e sili ona lelei i tulaga taitasi. Atonu e tofu le aso ma se avanoa e tasi e maua e vivii atu ai ia Ieova. Ia faaaogā lena avanoa, ma ia olioli i ai.”
Seʻi manatu i le tulaga o Hannelore. Ua mafatia o ia i se maʻi e fai ma oso i le vaitaimi o le 30 tausaga a o avea o ia o se paeonia, se misionare, a o iai i le galuega femalagaai ma lana tane, ma i le auaunaga i Peteli. Fai mai le faamatalaga a Hannelore: “Ou te mafaufau pea i le finauga na lāgā e Satani—faapea e faatoʻā auauna tagata ia Ieova pe afai e faigofie mo i latou le faia faapea. O le onosaia o tulaga faigata, e mafai ai ona fai saʻu vaega i le faamaonia atu o le sese o Satani.” E mafai ona avea lenei o se uunaiga malosi. Ia manatua e tāua tele ia Ieova lou faamaoni atu ia te ia a o e fesagaia tofotofo-ga.—Iopu 1:8-12; Faataoto 27:11.
A o e taumafai e faia se filifiliga paleni mo lou soifua maloloina, ia manatu i vala e lua o le valoaga a Iesu Keriso e faatatau i le vaitaimi faaiuiu o le faiga o mea. Na valoia e Iesu faamaʻi mai lea vaipanoa i lea vaipanoa. Na ia fetalai foi: “E talaʻiina atu foi lenei tala lelei o le malo i le atu laulau uma.” (Mataio 24:3, 14; Luka 21:11) Na silafia e Iesu o le a pagatia ona soo i maʻi i aso e gata ai. Peitai ua ia iloa o le a faaauauina le galuega talaʻi e lē gata e tagata o loo maua le soifua maloloina ae o i latou foi o loo fesagai ma gasegase matuiā. Pe afai e mafai ona tatou faaauauina le auaunaga faataimi atoa e ui lava i maʻi o le tino, o le a lē faagaloina e Ieova le alofa o loo tatou faaalia mo lona suafa.—Eperu 6:10.
Faatumauina o le Olioli e Ui i Uiga Lē Fiafia Mai
E mafai ona afaina o tatou uiga faaalia ona o le auala e tali mai ai tagata i le galuega talaʻi o le Malo. Na faapea mai se tasi faifeau ua iai le poto masani: “E oo lava i paeonia, ua latou iloa le faigata ona amataina se talanoaga ma se tagata o le aiga. E tatau ia i tatou uma lava ona taumafai malosi e faatumauina lo tatou olioli.” Ioe, o uiga lē fiafia mai o le lautele e mafai ona faaitiitia ai lo tatou olioli i le auaunaga i le fanua. E mafai la faapefea e se paeonia o lē o loo fetaiai pea ma uiga lē fiafia mai ona faatumauina lona olioli? Ua ofoina mai e ni faifeau ua iai le poto masani fautuaga ua uma ona faataitaia ma tofotofoina, ia o loo mulimuli mai.
O se luʻi le faaalia mai o uiga lē fiafia, peitai e lē faapea ai ua toilalo. O le mea moni lava, o le taatele o uiga lē fiafia mai e lē o le mafuaaga lea e faamutaina ai le auaunaga faataimi atoa. E mafai ona tatou faatumauina lo tatou olioli a o fesagai ma uiga lē fiafia mai, pe afai e lava se taimi tatou te faataatia ese mo le suesueina maeʻaeʻa o le Tusi Paia. O na mea e ‘faaauupegaina ai i tatou mo galuega lelei uma lava,’ ma e aofia ai le tautala atu ia i latou o ē e lē o faalogo mai i le tala lelei. (2 Timoteo 3:16, 17) E ui sa lē fia faalogo atu tagata i le perofeta o Ieremia, ae sa lei taofia ai o ia. (Ieremia 7:27) Pe a suesueina le Tusi Paia faatasi ma le fesoasoani a lomiga faa-Kerisiano, e mafai ona tatou maua ai aogā e tele pe afai tatou te matauina manatu na e faamalosia ai lo tatou faatuatua ma fesoasoani ia i tatou ina ia faafetaiaia uiga lē fiafia mai.
I le ioeina o le avea o uiga lē fiafia mai o se luʻi, seʻi o tatou iloiloina ai o tatou uiga faaalia ia i latou o ē o loo tatou talaʻi atu i ai. Aisea latou te faaalia ai uiga lē fiafia mai? Mo se faataitaiga, o se tasi o pogai mo le taatele o uiga lē fiafia mai i nisi vaega o Europa, ona o le talaaga lē manuia o lotu sese. Ua lē o toe iai i tagata se lagona faapea e iai se tāua o lotu i o latou olaga, e lē o toe mananao foi e iai ma sina a latou vaega i ai. E manaomia ona tatou fetuutuunai, i le talanoa atu i tagata i mataupu o loo aafia ai i latou, e pei o le leai o ni galuega, le soifua maloloina, o solitulafono, o amioga tuufau, le siosiomaga, ma le faamataʻu mai o taua.
I a tatou upu amata lava i lē ona le fale, atonu tatou te taʻua ai se mea o loo alu uma i ai manatu o tagata o lea vaipanoa. O le mea lena sa taumafai Dietmar e fai ina ua ia talaʻi atu i se nuu sa itiiti se taulau na ia maua ai. Na taʻua e se tagata o le isi aiga e faapea sa tupu se faalavelave i le nuu i le aso na faatoʻā mavae atu. I isi uma loa aiga na sosoo ai, sa faaali atu ai e Dietmar ona lagona tiga alofa ona o le faalavelave na tupu. Fai mai o ia: “Na faafuasei lava, ona amata talanoa mai tagata. Sa mafaufau uma tagata i le faalavelave na tupu. E tele ni talanoaga mananaia na ou faia i lena aso auā sa ou faaalia le naunau fiafia i o latou olaga.”
Tatou te mananao e avatu se molimau o le Malo i tagata i so o se mea lava tatou te maua i ai i latou. E mafai ona fua tele mai le molimau atu lē fuafuaina, ma e mafai ona tatou toleniina i tatou lava i le faia o lenei galuega e ala i le faaaogā o manatu o loo ofoina mai i lomiga faale-Tusi Paia. E mafai ona maua le olioli i ni nai upu faaleuo pe ala i le tuuina o ni kopi o Le Olomatamata ma le Ala Mai! i lē ona le fale. Pe afai tatou te faia toe asiga ma amataina se suesuega faale-Tusi Paia ma se tagata fiafia, atonu tatou te maua ai ma se isi e manao i lea lava mea e ala i le fesili atu: “Pe e te silafia se isi tagata o loo manao e suesueina le Tusi Paia?” E mafai ona taitaiina atu lenei mea i le faavaeina o se isi suesuega faale-Tusi Paia i aiga. I so o se tulaga lava, tau ina ia mautinoa la tatou vaai, ia faalagolago atu ma le tatalo ia Ieova, ma ia lē faatagaina uiga lē fiafia mai e faavaivaia ai i tatou.
O Faalaeiauga Mai Isi
O Jürgen ma Christiane ua silia i le 30 tausaga o paeonia ma auai i le galuega femalagaai. Na iai se taimi na maua ai so la tofiga sa aofia ai le talaʻi atu i se vaipanoa o le toatele lava o tagata e faaali mai uiga lē fiafia ma lē fia faalogo. Maeu le faanaunau atu o Jürgen ma lana avā mo ni faalaeiauga! Peitai, ona o se mafuaaga e lē manino mai, sa lē tali lelei atu isi o le faapotopotoga i o la manaoga.
O lea ua iloa ai e Jürgen mai mea na tutupu e faapea, “ua fesagai nisi paeonia ma ni taimi faigata. E latou te manaomia ni faalaeiauga atili mai toeaina ma isi tagata talaʻi.” Sa fetalai atu le Atua ia Mose ina ia faalaeiau ma faamalosi atu ia Iosua. (Teuteronome 3:26-28) Ma e tatau ona avea Kerisiano ma puna o faalaeiauga o le tasi i le isi. (Roma 1:11, 12) E mafai e tagata talaʻi o le Malo ona faalaeiau atu ia i latou o loo iai i le auaunaga faataimi atoa, e ala i upu faalaeiau ma le galulue faatasi ma i latou i le faiva mai lea taimi i lea taimi.
Le Olioli ia Ieova—Lo Tatou Malosi Lea
O Kerisiano o ē ua faaaluina le taimi tele o o latou olaga i le avea o ni paeonia po o ni misionare, le auauna atu i Peteli, po o le asiasi atu i faapotopotoga i le galuega femalagaai, ua latou iloa o le tele lava o faafitauli e lē faaumiumi ona iai, peitai e iai foi nisi faafitauli e umi ona iai. E oo lava i faafitauli e foliga mai e lē mafai ona foia, e lē tatau ona aveesea ai lo tatou olioli. Fai mai se fautuaga a Rimoni, o lē ua silia i le 45 tausaga o auauna i sona tofiga i nuu ese, o le taimi lava tatou te faanoanoa ai ona o ni faafitauli, “e tatau ona tatou mafaufau i le tele o faamanuiaga ua tatou maua ma le faitau afe o isi tagata o loo mafatia i ni faafitauli e sili atu ona matautia.” Ioe, o loo mafatia o tatou uso talitonu i le lalolagi aoao i puapuaga, ma o loo tausi moni mai lava Ieova ia i tatou uma.—1 Peteru 5:6-9.
O lea la, pe afai e mafai e o tatou tulaga o loo iai ona faia ai so tatou sao i le auaunaga faataimi atoa ma tumau ai, seʻi o tatou faatumauina la lo tatou olioli e ala i le faalagolago atu i lo tatou Tamā faalelagi. E na te faamalosia ana auauna, ma e tatau ia i tatou uma ona manatua faapea, ‘o le olioli ia Ieova o lo tatou malosi lea.’—Neemia 8:10.
[Ata i le itulau 21]
“E lē tāua oʻu faalogona ma ni mea ou te manao i ai, e pei o le tāua o le galuega”
[Ata i le itulau 22]
“E ma te taʻu atu lava ia Ieova o ma faalogona i na mea, ona tuu atu loa lea o mea ia te ia”
[Ata i le itulau 23]
“Ia faia le mea e sili ona lelei i tulaga taitasi. Atonu e tofu le aso ma se avanoa e tasi e maua e vivii atu ai ia Ieova”
[Ata i le itulau 23]
“O le onosaia o tulaga faigata, e mafai ai ona fai saʻu vaega i le faamaonia atu o le sese o Satani”
[Ata i le itulau 24]
“Ua fesagai nisi paeonia ma ni taimi faigata. E latou te manaomia ni faalaeiauga atili mai toeaina ma isi tagata talaʻi”
[Ata i le itulau 24]
“E tatau ona tatou mafaufau i le tele o faamanuiaga ua tatou maua”