O Kerisiano ma le Lalolagi o Tagata
“Ia savavali ma le poto i e o i tua.”—KOLOSE 4:5.
1. O le ā na fetalai ai Iesu e faatatau i ona soo ma le lalolagi?
I SE tatalo i lona Tamā faalelagi, na fetalai ai Iesu e faatatau i ona soo: “Ua ʻinoʻino foi le lalolagi ia te i latou, auā e le ni o le lalolagi i latou, faapei o aʻu, ou te le so le lalolagi aʻu.” Ona ia toe faaopoopo atu lea e faapea: “Ou te le ole atu ina ia e ave ese ia te i latou i le lalolagi, a ia e tausi ia te i latou mai lē o loo leaga.” (Ioane 17:14, 15) Sa lei manaomia ona aveese atu Kerisiano mai le lalolagi lenei i se isi mea—mo se faataitaiga, o le faaesea i se nofoaga faalelotu e nonofo uma ai e pei o monaseri. Nai lo lena, na ‘auina atu i latou e Keriso i le lalolagi’ ina ia fai ma ana molimau ‘e oo lava i tuluʻiga uma o le lalolagi.’ (Ioane 17:18; Galuega 1:8) Ae ui i lea, na ia ole atu i le Atua ina ia tausi ia i latou ona o Satani, “le alii o lenei lalolagi,” o le a faapogaia le ita ia i latou ona o le suafa o Keriso.—Ioane 12:31; Mataio 24:9.
2. (a) O faapefea ona faaaogā e le Tusi Paia le upu “lalolagi”? (e) O le ā le uiga paleni o loo faaalia e Ieova i le lalolagi?
2 I le Tusi Paia, o le upu “lalolagi” (faa-Eleni, koʹsmos), e masani ona faamatala ai le sosaiete o tagata amioletonu lea “o loo nofo toilalo i loo leaga.” (1 Ioane 5:19) Ona e mulimuli Kerisiano i faatulagaga a Ieova ma usitai i le faatonuga e talaʻi le tala lelei o le Malo o le Atua i le lalolagi, o nisi taimi e tulai mai ai ni faafitauli i le va o le lalolagi ma i latou. (2 Timoteo 3:12; 1 Ioane 3:1, 13) Peitai, e faaaogā foi le koʹsmos i le Tusi Paia e faatatau atu i le aiga atoa faaletagata. I le talanoa e faatatau i le lalolagi i lona uiga lena, na fetalai Iesu: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau. Auā e lei auina mai e le Atua lona Atalii i le lalolagi ina ia faamasino i le lalolagi, a ia faaolaina le lalolagi ia te ia.” (Ioane 3:16, 17; 2 Korinito 5:19; 1 Ioane 4:14) O lea la, a o ʻinoʻino Ieova i mea ua mataulia ai le faiga amioleaga a Satani, ae ua ia faaalia lona alofa i le fanau a tagata e ala i le auina mai o lona Alo i le lalolagi ina ia faaolaina i latou uma lava o ē e ‘oo i le salamō.’ (2 Peteru 3:9; Faataoto 6:16-19) E ao i uiga paleni o Ieova agaʻi i le lalolagi ona taitaia ai ona tagata tapuai.
Le Faataitaiga a Iesu
3, 4. (a) O le ā le tulaga na filifilia e Iesu e faatatau i le avea ma pule? (e) Na faapefea ona manatu Iesu i le lalolagi o tagata?
3 A o toeitiiti lava oo i lona maliu, na taʻu atu e Iesu ia Ponotio Pilato: “E le mai le lalolagi nei loʻu malo.” (Ioane 18:36) I le ogatasi ma nei upu, na teena ai e Iesu i se taimi muamua atu le ofo a Satani e avatu ia te ia le pule i malo uma o le lalolagi, na ia teena foi le faataga o tagata Iutaia e fai o ia ma tupu. (Luka 4:5-8; Ioane 6:14, 15) Peitai ane, sa faaalia e Iesu lona alofa tele mo le lalolagi o tagata. O se faataitaiga o lenei mea sa lipotia mai e le aposetolo o Mataio e faapea: “Ua silafia e ia le motu o tagata, ona mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo.” Ona o lona alofa, sa ia talaʻi atu ai i tagata i o latou nuu ma faoāaai. Sa ia aʻoaʻo i latou ma faamalolo i o latou maʻi uma. (Mataio 9:36) Sa ia mataalia foi i manaoga faaletino o i latou uma o ē na ō mai ina ia aʻoaʻoina e ia. Tatou te faitau ai e faapea: “Ona valaau atu ai lea o Iesu i ona soo, ua faapea atu, ‘Ou te alofa atu i le motu o tagata, auā o le aso tolu lenei o tatou nonofo ma i latou, e leai foi ni a latou mea e ʻai. Ou te le mafai ona tuuina atu ia te i latou e ō mātelaina, neʻi latou lailoa i le ala.’” (Mataio 15:32) Maeu se manatu alofa atu!
4 Sa matuā malosi lava le faailoga tagata o tagata Iutaia agaʻi i tagata Samaria, ae sa talanoa atu Iesu i se fafine Samaria mo se taimi umi lava ma faaalu le lua aso i le avatuina o se molimau i se aai Samaria. (Ioane 4:5-42) E ui lava sa auina mai o ia e le Atua i “mamoe ua leiloloa o le aiga o Isaraelu,” ae sa tali atu Iesu mai lea taimi i lea taimi pe a faaalia le faatuatua e isi e lē o ni tagata Iutaia. (Mataio 8:5-13; 15:21-28) Ioe, sa faataitaia e Iesu faapea e mafai ona “leai sa tatou vaega i le lalolagi” ae i le taimi lava e tasi, ia faaalia le alofa i le lalolagi o le fanau a tagata, mo tagata. Pe tatou te faaalia ea le alofa naunau faapena i tagata i mea o tatou nonofo ai, i galuega, po o le mea e fai ai a tatou faatauga? Pe tatou te faaalia le manatu mamafa mo lo latou lelei—e lē gata i o latou manaoga faaleagaga ae faapena foi isi manaoga pe afai o se tulaga e mafai ona tatou fesoasoani atu i ai? Sa faia faapena e Iesu, ma o le faia faapea, sa ia tatala ai le avanoa e aʻoaʻo ai tagata i le Malo. E moni, tatou te lē mafai ona faia vavega faaletino e pei ona sa faia e Iesu. Peitai o sina gaoioiga o le agalelei, e masani ona pei lava o se vavega, e aveesea ai le faailoga tagata agaʻi mai i Molimau a Ieova.
Uiga o Paulo Agaʻi i Tagata “i Tua”
5, 6. Sa faapefea ona feutagai le aposetolo o Paulo ma tagata Iutaia o ē “o i tua”?
5 I nisi o ana tusi, e faasino atu ai le aposetolo o Paulo i tagata “i tua” po o ē “o i tua” e faauiga i ē e lē o ni Kerisiano, e tusa pe o ni tagata Iutaia pe o ni tagata o Nuu Ese. (1 Korinito 5:12; 1 Tesalonia 4:12; 1 Timoteo 3:7) Sa faapefea ona ia feutagai ma i latou na? ‘Sa avea o ia ma mea uma i tagata o ituaiga uma, ina ia mafai ona ia faaolaina nisi.’ (1 Korinito 9:20-22) Pe a ia taunuu atu i se aai, o lana auala e talaʻi ai o le muamua lea alu atu i tagata Iutaia o loo nonofo ai iina. Sa faapefea ona ia talanoa atu? I le faautauta atoa ma le faaaloalo na ia ofoina atu faamaoniga faale-Tusi Paia e faatalitonu ai e faapea ua uma ona afio mai le Mesia, na maliu i se maliu faataulagaina, ma ua uma ona toetu mai.—Galuega 13:5, 14-16, 43; 17:1-3, 10.
6 I le faia faapea na faalautele ai e Paulo le poto o tagata Iutaia e faatatau i le Tulafono ma le au perofeta ina ia mafai ai ona aʻoaʻo i latou e faatatau i le Mesia ma le Malo o le Atua. Ma sa ia taulau i le faatalitonuina o nisi. (Galuega 14:1; 17:4) E ui lava i teteega mai taʻitaʻi Iutaia, ae sa faaalia e Paulo uiga māfana i aumea Iutaia ina ua ia tusi atu: “Le au uso e, o le manao lava lenei o loʻu loto, ma laʻu tatalo i le Atua mo Isaraelu [tagata Iutaia], ia faaolaina i latou. Auā ou te molimau ia te i latou, ua latou maelega i la le Atua, a e le tusa ma le malamalama.”—Roma 10:1, 2.
Fesoasoani i Ē Talitonu e Lē o ni Tagata Iutaia
7. Na faapefea ona tali mai le toatele o tagata liulotu i le tala lelei sa talaʻia e Paulo?
7 O tagata liulotu o i latou ia e lē o ni Iutaia o ē na peritomeina ma faatinoina le faa-Iutaia. E foliga mai, sa iai tagata liulotu Roma, i Suria i Anetioka, i Aitiope, ma Anetioka i Pisitia—e foliga mai, i so o se mea lava sa nofoia e tagata Iutaia. (Galuega 2:8-10; 6:5; 8:27; 13:14, 43; faatusatusa i le Mataio 23:15.) I le lē pei o le toatele o taʻitaʻi Iutaia, e aliali mai sa lei avea tagata liulotu o ni ē faasausili, sa lei mafai foi ona latou gugutu faamaualuga atu e faapea o latou o fanau a Aperaamo. (Mataio 3:9; Ioane 8:33) Nai lo lena, ua latou lafoaia atua sese ae liliu mai ma le loto maulalo ia Ieova, ma maua sina poto e faatatau ia te ia ma ana tulafono. Ma sa latou talia foi le faamoemoe o tagata Iutaia e faatatau i le afio mai o le Mesia. Ona ua uma ona faaalia lo latou loto malie e fai ni suiga i o latou olaga ma talitonuga i le latou sailiga mo le upu moni, o le toatele o i latou sa nofo sauni e fai atili nisi suiga ma tali atu i le talaʻiga a le aposetolo o Paulo. (Galuega 13:42, 43) Pe afai o se tagata liulotu o lē sa tapuai muamua i atua faapaupau ae ua faaliliuina e avea ma Kerisiano, sa faapitoa le faaauupegaina o ia e molimau atu i isi tagata o Nuu Ese o ē o loo tapuai pea i na atua.
8, 9. (a) E ese mai tagata liulotu, o le ā le isi vasega o tagata o Nuu Ese sa tosina ane i le lotu a tagata Iutaia? (e) Sa faapefea ona tali mai ni tagata se toatele mai tagata lē peritomeina o ē matataʻu i le Atua i le tala lelei?
8 E ese mai i tagata liulotu sa peritomeina, sa iai foi isi e lē o ni Iutaia na tosina mai i le tapuaiga a tagata Iutaia. O le tagata muamua o i latou nei na avea ma Kerisiano o Konelio, o lē e ui e lei liliuina ma peritomeina, ae sa avea ma “tagata amio Atua, ma le mataʻu i le Atua.” (Galuega 10:2) I lana faamatalaga faaopoopo e uiga i le tusi o Galuega, na tusia e le polofesa o F. F. Bruce e faapea: “O nei tagata o Nuu Ese e masani ona taʻua o ‘ē matataʻu i le Atua’; e ui lava e lei aloaia faaletulafono lenei taʻu, ae o se taʻu sa talafeagai ma fetaui e faaaogā. O le toatele o tagata o Nuu Ese na iai, e ui e lei sauni e liliu atoatoa atu i le lotu faa-Iutaia (sa avea faapitoa le manaoga ina ia peritomeina ma mea e tautevateva ai tane), ae sa tosina atu i aʻoaʻoga faigofie o le tasi o le Atua o tagata Iutaia i a latou tapuaiga i sunako atoa ma amioga e faatulaga tatau i le soifuaga o tagata Iutaia. O nisi o i latou sa auai atu i sunako ma avea ai ma tagata liulotu o ē sa feoloolo so latou poto i tatalo ma lesona i tusitusiga paia, ia sa latou faalogologo i ai i le faaliliuga faa-Eleni.”
9 Sa fetaiai le aposetolo o Paulo ma le toatele o ē matataʻu i le Atua ina ua ia talaʻi atu i sunako i Asia Itiiti ma Eleni. I Anetioka i Pisitia sa ia fai atu ia i latou sa faapotopoto i le sunako e faapea, “outou Isaraelu e, ma outou o e matataʻu i le Atua.” (Galuega 13:16, 26) Na tusia e Luka e faapea ina ua mavae ona talaʻi atu Paulo mo le tolu Sapati i le sunako i Tesalonia, “ua talitonu mai [avea ma Kerisiano] foi nisi o i latou [tagata Iutaia], ma ua faaopoopoina i latou ia Paulo ma Sila; o Eleni foi o e matatau i le Atua e toatele lava, ma saʻo tamaitai e toatele foi.” (Galuega 17:4) E foliga mai, o nisi mai i Eleni o ē matataʻu i le Atua e lei peritomeina. O loo iai faamaoniga e faapea o le toatele o nei tagata o Nuu Ese o ē sa matataʻu i le Atua sa latou aufaatasi atu i tagata Iutaia.
Talaʻi Atu i ‘Ē Lē Talitonu’
10. Sa faapefea ona talaʻi atu Paulo i tagata o Nuu Ese o ē sa lē iloa le Tusi Paia, ma o le ā le iuga?
10 I Tusitusiga Kerisiano Eleni, o le faaupuga o ‘ē lē talitonu’ e mafai ona faatatau atu i tagata lautele i fafo atu o le faapotopotoga Kerisiano. O le tele o taimi e faatatau atu i ē faapaupau. (Roma 15:31; 1 Korinito 14:22, 23; 2 Korinito 4:4; 6:14, LT) I Atenai o le toatele o ē lē talitonu sa aʻoaʻoina i filosofia faa-Eleni e aunoa ma so latou malamalamaga i Tusi Paia. Pe sa faavaivaia ai ea Paulo ona o lenei mea mai le molimau atu ia i latou? E leai. Nai lo lena, sa fetuunai le auala sa ia talanoa atu ai. Sa ia avatu ma le atamai manatu mai le Tusi Paia e aunoa ma lona siiina saʻo mai o se mau mai Tusitusiga Eperu, lea sa lei iloaina e tagata Atenai. Sa lelei ona ia faaali atu mea e tali tutusa ai mea moni o le Tusi Paia ma nisi o manatu sa faaalia e fatusolo anamua i le talitonuga o le ituaiga o Setoiko. Sa ia faamatala atu foi le aʻoaʻoga e uiga i le Atua moni e toatasi mo tagata uma, o se Atua o lē o le a faamasino i le amiotonu e ala i le tagata o lē na maliu ma ua toe faatuina. O lea sa talaʻi atu Paulo ma le faautauta e uiga ia Keriso i tagata Atenai. O le ā na iu i ai? E ui lava o le toatele o tagata sa tauemu ma lē talitonu mai ia te ia, “ae sa pipii mai nisi tagata ia te ia ma avea ma e talitonu, e aofia ai ia i latou na ia Taionusio, o se faamasino o le faamasinoga i Areopako, ma se fafine e suafa ia Tamari, ma isi foi faatasi ma i laua.” —Galuega 17:18, 21-34.
11. O le ā le ituaiga aai na iai Korinito, ma o le ā le iuga o le galuega talaʻi a Paulo iina?
11 Sa iai se vaega toatele o tagata Iutaia i Korinito, o lea la sa amata le faiva a Paulo iina i le talaʻi atu i le sunako. Peitai ina ua aliali mai e tetee tagata Iutaia, sa agaʻi atu loa Paulo i tagata o Nuu Ese. (Galuega 18:1-6) Ma e maeu ia ituaiga tagata! Sa avea Korinito ma aai pisi, toatele tagata eseese sa mau ai, sa avea ma ogatotonu o fefaatauaiga, sa lauiloa i Roma ma Eleni atoa i amioga lē mamā. Na oo lava ina iai le faaupuga e faapea, “ia faa-Korinito,” o lona uiga ia fai amioga lē mamā. Ae ui i lea, ina ua uma ona teena e tagata Iutaia le talaʻiga a Paulo sa faaali atu i ai Keriso ma faapea atu ia te ia: “Aua e te fefe, a ia e tautala atu, . . . auā e toatele oʻu tagata o i lenei aai.” (Galuega 18:9, 10) Sa moni lava lena fetalaiga, sa faatūina e Paulo se faapotopotoga i Korinito, e ui lava o nisi o ona sui sa ola muamua i le olaga “faa-Korinito.”—1 Korinito 6:9-11.
Taumafaiga ia Faaolaina ‘Ituaiga Uma o Tagata’ i Aso Nei
12, 13. (a) E faapefea ona tai tutusa la tatou oganuu i aso nei ma lea sa iai i aso o Paulo? (e) O le ā le uiga e tatou te faaalia i oganuu ua leva ona iai lotu a Kerisinetoma po o oganuu o loo iai le toatele ua lē fiafia i lotu ua leva ona iai?
12 I aso nei, e pei lava foi ona sa iai i le uluai senituri, “o le alofa tunoa o le Atua ua au mai ai le faaolataga . . . i tagata uma lava.” (Tito 2:11) Ua faalautele atu le oganuu mo le talaʻiga o le tala lelei ia aofia ai konitineta uma ma le tele o atumotu o le vasa. Ma, e pei ona sa iai i aso o Paulo, ua mafai ona oo atu i “ituaiga uma o tagata.” O se faataitaiga, o nisi o i tatou o loo talaʻi i atunuu ua tele senituri o iai lotu a Kerisinetoma. I le pei o tagata Iutaia i le uluai senituri, o o latou tagata lotu atonu ua saisaitia malosi i faiga faalotu. Ae ui i lea, o loo tatou fiafia e saili atu pea ia i latou e lelei tulaga o o latou loto ma ati ae i luga i le po o le ā lava se poto o le Tusi Paia ua ia i latou. Tatou te lē talanoa faatauvaa pe manatu māmā ia i latou na e ui lava i nisi taimi e tetee mai ai ma sauāina i tatou e o latou taʻitaʻi lotu. Nai lo lena, tatou te amanaiaina e faapea o nisi o i latou atonu o iai ‘se maelega mo le Atua’ e ui lava e lē o ia i latou se poto saʻo. I le pei o Iesu ma Paulo, tatou te faaalia le alofa moni i tagata, ma e ia i tatou le faanaunauga moni ia faaolaina i latou.—Roma 10:2.
13 A o tatou talaʻi, o le toatele o i tatou e feiloai atu i tagata ua lē fiafia i lotu ua leva ona iai. Atonu pe o avea lava i latou ma ē matataʻu i le Atua, o loo iai so latou talitonuga i le Atua ma taumafai e ola i ni olaga lelei. Pe tatou te lē olioli ea e feiloai atu i tagata o ē o loo iai sina talitonuga i le Atua, i totonu o lenei tupulaga faapiopio ma le faateleina o le leai o se amioatua? Ma pe tatou te lē naunau ea e faasino i latou i le ituaiga tapuaiga lea e lē o faaleagaina e faiga faapiopio ma le sese?—Filipi 2:15.
14, 15. Ua faapefea ona avanoa mai se fanua tele mo le talaʻiga o le tala lelei?
14 I lana tala faatusa e uiga i le upega fagota, sa valoia ai e Iesu e faapea o le a telē le oganuu mo le talaʻiga. (Mataio 13:47-49) I le faamatalaina o lenei tala faatusa, na taʻua e Le Olomatamata o Oketopa 15, 1992, i le itulau e 20 e faapea: “I le gasologa mai o senituri, sa faia ai e sui o Kerisinetoma se vaega autū i le faaliliuina, le siiina mai, ma le faasalalauina atu o le Afioga a le Atua. Mulimuli ane, sa faavaeina ai ma lagolagoina e lotu ia sosaiete faale-Tusi Paia, sa faaliliuina le Tusi Paia i gagana a isi atunuu mamao. Na latou aauina atu foi misionare o [ni fomai], atoa ma faiaʻoga, o ē na maua mai ai Kerisiano faatagāfai. O le faiga lena sa aoaoina ai se aofaiga tele o iʻa leaga, o ē sa lē taliaina e le Atua. Ae o le mea e lelei ai, na faailoa atu ai i le tele o ē e lē o ni Kerisiano le Tusi Paia, atoa ma se faiga faa-Kerisiano, e ui ina faapiopio.”
15 O le faaliulotuina e Kerisinetoma o tagata sa matuā taulau faapitoa lava i Amerika i Saute, Aferika, ma nisi motu o le vasa. I o tatou aso, e toatele ē agamalu ua mauaina mai i nei vaipanoa, ma e mafai ona faaauau ona tatou taulau manuia pe a ia i tatou le vaaiga saʻo, ma uiga alofa agaʻi i nei tagata agamalu, pei lava o uiga sa ia Paulo agaʻi i tagata liulotu i le faa-Iutaia. E aofia ai ia i latou e manaomia la tatou fesoasoani o le faitau miliona o tagata o ē atonu e ono faaupuina o ē “alolofa” i Molimau a Ieova. Latou te fiafia i taimi uma tatou te asiasi atu ai ia i latou. O nisi sa suesueina le Tusi Paia ma i tatou ma auai mai i a tatou sauniga, ae maise lava le faamanatuina faaletausaga o le maliu o Keriso. Pe e lē o avea ea nei tagata ma oganuu tele mo le talaʻiga o le tala lelei o le Malo?
16, 17. (a) O ā ituaiga tagata o loo tatou talanoa atu i ai e uiga i le tala lelei? (e) E faapefea ona tatou faataitai ia Paulo i le talaʻi atu i ituaiga eseese o tagata?
16 E lē gata i lena, ae faapefea i latou e ō mai i aganuu e ese mai i Kerisinetoma—pe tatou te feiloai atu ia i latou i o latou atunuu ia po o lo latou faimalaga atu foi i atunuu i Sisifo? Ae faapefea le faitau miliona o i latou o ē ua matuā teena lava tapuaiga, ma avea ma ē e lē talitonu i le Atua, po o ē e māfua ona lē talitonu i le Atua ona e lē o mafai ona vaai atu i ai? E faaopoopo atu i lena, e faapefea i latou ua matuā liliu atu lava i filosofia faaonaponei po o ni talitonuga faapitoa ua faatāuaina e nisi ia o loo lomia i le tele o tusi o loo maua i faletusi? Pe e ao ea ona tatou lē amanaiaina nei tagata, e manatu i ai ua lē mafai ona toe fesoasoani i ai? O le tali e leai pe a tatou faataitai i le aposetolo o Paulo.
17 Ina ua talaʻi atu i Atenai, e lei aafia Paulo i le mailei o le finau ma lana au faalogologo i filosofia po o talitonuga. Nai lo lena, sa fetuunai le auala sa ia feutagai ai ma tagata na ia talanoa atu i ai, i le faamatala atu o upu moni o le Tusi Paia i se auala manino ma mautū. O le mea lava e tasi, e lē manaomia ona tatou iloa uma filosofia faalotu a tagata o loo tatou talaʻi atu i ai. Peitai, tatou te fetuunai la tatou talanoa ina ia uigā la tatou molimau atu, o le faia faapea e ‘avea ai ma mea uma i tagata uma.’ (1 Korinito 9:22) Ina ua tusi atu i Kerisiano i Kolose, na taʻu atu e Paulo e faapea: “Ia savavali ma le poto i e o i tua, ma faaaogaina e outou aso o lenei olaga. Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata e taitoatasi uma.”—Kolose 4:5, 6.
18. O le ā le tiute tauave ua ia i tatou, ma o le ā e lē tatau ona tatou faagaloina?
18 I le pei o Iesu ma le aposetolo o Paulo, seʻi tatou faaali le alofa i tagata uma. Ae maise lava, ia fai le mea tatou te mafaia ina ia fetufaai ai ma isi le tala lelei o le Malo. I le isi itu, aua neʻi galo na fetalai Iesu e faatatau i ona soo: “E le ni o le lalolagi i latou.” (Ioane 17:16) O le a talanoa atili i le mataupu o loo mulimuli mai po o le ā e uiga i ai lenei mea mo i tatou.
O se Autaluga
◻ Faamatala le uiga paleni o Iesu agaʻi i le lalolagi.
◻ Sa faapefea ona talaʻi atu le aposetolo o Paulo i tagata Iutaia ma tagata liulotu?
◻ Sa faapefea ona talanoa atu Paulo i ē na matataʻu i le Atua ma ē lē talitonu?
◻ E faapefea ona avea i tatou ma “mea uma mo tagata uma” i la tatou galuega talaʻi?
[Ata i le itulau 10]
E ala i le faia o gaoioiga o le agalelei i o latou tuaoi, e masani ona aveese ai e Kerisiano le faailoga tagata