Faamalosia o lo Tatou Faatuatua i le Afioga a le Atua

E SILI atu ona toatele tagata latou te faitauina le Tusi Paia nai lo se isi lava tusi. Ae pe toafia o faaalia se faatuatua i le feau o loo taʻuina mai e le Tusi Paia? Ua faamatala mai e le Tusi Paia lava ia e faapea “e le o i tagata uma le faatuatua.” (2 Tesalonia 3:2) E manino lava, tatou te lē fananau mai ua iai le faatuatua. E ao ona atiina ae. E oo lava ia i latou ua iai le faatuatua e lē tatau ona manatu māmā i ai. E mafai ona faaleagaina ma mou atu le faatuatua. O lea, e manaomia ai taumafaiga ina ia “faamaoni [pea] i le faatuatua.”—Tito 2:2.

O se mafuaaga lelei la, ua filifilia ai e le Vaega Pule o Molimau a Ieova le matua, “Faatuatua i le Afioga a le Atua” mo la latou faasologa o tauaofiaga itumalo mo le 1997/1998. E faitau miliona Molimau ma isi ua latou maua ai se faaeaga e faapotopoto faatasi ina ia faamalosia lo latou faatuatua i le Afioga a le Atua.

O le Afioga a le Atua o le Upu Moni —Le Faavae o lo Tatou Faatuatua

O le matua lena o le uluai aso o le tauaofiaga. Sa amata i upu faamālō i ē uma na aofia ai. O le auai i le tauaofiaga sa avea o se faamaoniga o le faaaloalo mo le Tusi Paia. Peitai, sa faatulai mai ni fesili faaoso manatu e faatatau i le uigā o lo tatou faatuatua. ‘Pe e mafai ona tatou tali atu mo o tatou talitonuga ma faaaogā le Afioga a le Atua o le puna o faamatalaga? Pe tatou te faaalia ea le talisapaia mo meaʻai faaleagaga, e aunoa ma le manatu māmā i le Tusi Paia, sauniga a le faapotopotoga, ma lomiga faale-Tusi Paia? Po o tatou tutupu aʻe ea i le alofa, le poto saʻo, ma le faautauta?’ Sa faalaeiau e le failauga tagata uma ina ia faalogologo ma le faaeteete, i lona taʻuina mai faapea “ua sauniunia lenei Tauaofiaga o le ‘Faatuatua i le Afioga a le Atua’ e fesoasoani ina ia tatou mataituina ai i tatou lava ma iloiloina po o le ā le tele ma le uigā o le faatuatua o loo ia i tatou taitoatasi.”

O le matua o le lauga autū “Savavali i le Faatuatua, ae Lē o le Tino Mai o Mea.” (2 Korinito 5:7) Na faapea mai le failauga: “O le faatuatua o i latou ua fai ma Molimau a Ieova e lē talitonu gofie.” Maeu le moni o lenei manatu! E lē tauaso le faatuatua moni. E faavae aʻe i mea moni. Ua faapea mai le Eperu 11:1: “O le faatuatua o le faalagolago lea i mea ua faamoemoe i ai, o le mautinoa lea o mea e le o vaaia.” Na taʻua e le failauga: “Afai o le a tatou savavali moni lava i le faatuatua, tatou te manaomia le faatuatua e mautu lona faavaeina.” Talu ai o loo tatou savavali i le faatuatua, ae lē o le tino mai o mea, tatou te lē manaomia la ni auiliiliga i le faapefea ma o afea o le a faataunuuina ai e Ieova vala taitasi o lana fuafuaga. O mea ua uma ona tatou iloa e uiga ia te ia e aumaia ai ia i tatou se mautinoa aʻiaʻi i lona mana lea e faataunuuina ai ana folafolaga i le alofa ma le amiotonu.

O le lauga “Talavou Kerisiano—O se Vaega Tāua Tele o le Faapotopotoga” sa faamanatu mai ai i talavou le tautele o i latou i le silafaga a Ieova. Sa faalaeiauina i latou ina ia tutupu aʻe faaleagaga e ala i le tuliloaina o sini e pei o le faitauina o le Tusi Paia atoa, ma ia ausia mea manaomia mo le tuuina atu ma le papatisoga. O le sailia o aʻoaʻoga faaopoopo o se mataupu patino e ao ona filifilia e mātua o se tasi, ae pe afai e faatinoina, e tatau pea ona avea ma sini le faaauupegaina ai mo le auauna atu i le Atua i se tulaga e sili ona uigā. O aʻoaʻoga faalelalolagi e mafai ona iai sona fuafuaga aogā pe afai tatou te “faamautinoaina mea e sili atu ona tāua” lea e fesootai mai i lo tatou faatuatua.—Filipi 1:9, 10, NW.

Ona sosoo ai lea ma le faasologa o lauga e tolu i le matua “O Tapulaa a Ai E te Usitaia?” O le faatuatua i le Afioga a le Atua e uunaia ai i tatou e pipii atu i tapulaa a le Tusi Paia. E usitai Kerisiano i tulafono ma mataupu silisili a Ieova. Mo se faataitaiga, ua timai mai le Tusi Paia ia i tatou ina ia lē faaaogaina gagana matagā ma gagana masoā. (Efeso 4:31, 32) Na fesili mai le failauga: “Pe a e ita pe tiga lou loto, pe e te soona ee atu ma tuuaʻia lau paaga po o lau fanau?” O le mea moni, e lē faa-Kerisiano lena faiga. Ua iai foi tapulaa a le Atua e tusa ai ma o tatou foliga vaaia. E tatau i Kerisiano ona oofu i latou i “ofu e onomea.” (1 Timoteo 2:9, 10) O le upu “onomea” e faaalia ai le manatu o le faaaloalogia e le tagata o ia lava, se uiga o le āva atu, le faamamalu, ma le fai fuafua lelei. Ua uunaia i tatou e le alofa mo isi ma ua taitaia e mataupu silisili o le Tusi Paia ma se uiga o le lagonaina o mea ua talafeagai.

Ona sosoo ai lea ma lauga mulimuli e lua o lauga faasolo, na faaaofia ai le talanoaina o fuaiupu taitasi o le Eperu 3:7-15 ma le 4:1-16. O nei fuaitau o le Tusi Paia ua lapataia ai i tatou e faatatau i le lamatiaga o le ‘faamaaaina i le pepelo o le agasala.’ (Eperu 3:13) E mafai faapefea ona tatou taulau manuia i la tatou taua e tetee atu ai i le agasala? E fesoasoani Ieova ia i tatou e ala mai i lana Afioga. O le mea moni, “o loo ola le afioga a le Atua, o loo matuā galue foi . . . o loo vaevae foi e oo lava i le vavaeeseina o le loto ma le agaga.”—Eperu 4:12.

O le lauga faaiu o le uluai aso o le tauaofiaga e faapea lona matua, “Se Tusi mo Tagata Uma.” Sa faamatilatila mai ai le moni, le saʻo aʻiaʻi, ma le aogā o le Tusi Paia. Maeu se faagaeetia ina ua faalogo atu o loo faasilasila mai e le failauga le tatalaina o se polosiua fou faa-Peretania e 32 ona itulau ua faaulutalaina A Book for All People! Sa saunia faapitoa lenei lomiga fou mo tagata o ē, e ui ina maualuluga a latou aʻoaʻoga, ae itiiti lava so latou iloa i le Tusi Paia. Na faaiu mai le lauga i upu nei: “E manaomia e tagata ona iloiloina le Afioga a le Atua mo i latou lava. Tatou te mautinoa pe afai latou te muai iloiloina e i latou lava, o le a oo ai ina latou iloa o lenei tusi tutasi, le Tusi Paia, o se tusi moni mo tagata uma!”

Faaaʻoaʻo i “Le na te Faaatoatoaina le Faatuatua”

O lenei matua o le aso lona lua o le tauaofiaga na tataʻi atu ai manatu ia Iesu Keriso, o ‘Lē na te faaatoatoaina lo tatou faatuatua.’ E manaomia ona tatou “mulimuli atu i ona tulagāaao.” (Eperu 12:2; 1 Peteru 2:21) E toatele tagata i Kerisinetoma ua taʻu atu i ai: ‘Ia talitonu i le Alii o Iesu ona faasaoina lea o oe!’ Ae pe ua na o le pau ea lena o le mea e aofia ai i le faatuatua? Ua faalauiloa mai e le Tusi Paia e ‘mate le faatuatua pe a leai ni galuega.’ (Iakopo 2:26) O lea la, e lē gata i le talitonu ia Iesu, ae tatau foi ona tatou faia galuega sa ia faia, ae maise lava le talaʻia o le tala lelei o le Malo o le Atua.

Sa taulai atu le polokalame o le taeao i le galuega faaevagelia. I le pei o Paulo, e tatau ona tatou mataalia e folafola atu le tala lelei o le faaolataga. (Roma 1:14-16) Sa talaʻi atu Iesu i tagata i so o se mea. E ui o loo maua iuga lelei i la tatou faiva mai lea fale i lea fale e lē aunoa, ae o loo faateleina pea tagata e lē maua i o latou fale pe a tatou talaʻi atu. (Galuega 20:20) E toatele o loo i aʻoga, o loo faigaluega, o loo fai faatau, po o faimalaga solo. O lea, tatou te manaomia ai foi ona talaʻi atu i nofoaga faitele ma so o se mea lava e mafai ona maua i ai tagata.

O le lauga “Ia Mauaa ma Mautu i le Upu Moni” sa faamanatu mai ai ia i tatou le aofaiga tele o soo fou ua papatisoina—o se faatatauga e silia i le 1,000 e papatisoina i aso taitasi! E tāua tele ona mauaa ma mautu i latou fou nei i le faatuatua. (Kolose 2:6, 7) Sa faamatala mai e le failauga e faapea o aa na te sailia maia vai ma meaʻai mo le laau, ae i le taimi foi e tasi o loo avea ma taula po o se lagolago mo le laau. I se uiga tutusa, e ala i le masani e suesue ma ia iai ni aumea lelei, e mafai ai e soo fou ona mautu i le upu moni.

Sa talafeagai faapitoa lenei fautuaga mo i latou na papatisoina. Ioe, i le aso lona lua o le tauaofiaga, sa papatisoina ai se vaega toatele o soo fou, i lo latou mulimuli atu i le faaaoaoga a Iesu. O le lauga “Faatuatua i le Afioga a le Atua e Taʻitaʻi Atu ai i le Papatisoga” na faamanatu atu ai i le au papatiso e faapea o le faatofuina ifo atoatoa i le vai o se faailoga fetaui lea o lo latou oti mai o latou uluai ala manatu faapito sa iai o le olaga. O le toe ea aʻe i luga mai le vai ua faaatagia mai ai lo latou ola mai e faia le finagalo o le Atua.

O le lauga “Ia Faamalolosi Ona Finau mo le Faatuatua” sa faavae aʻe i le tusi o le Tusi Paia o Iuta. Sa faalaeiauina ai i tatou ina ia puipuia lo tatou faatuatua e ala i le teteeina o aafiaga leaga, e pei o amioga lē mamā, le fouvale, ma le faaaposetasi. Na sosoo ai ma le uaʻi faapitoa mai i mātua—ae maise lava tamā—o le lauga “Ia Faia Sauniuniga mo Lou Auaiga.” O le tausia o manaoga faaleagaga, faaletino, ma tau i faalogoa, o le aiga o se tiute tauave faale-Tusi Paia. (1 Timoteo 5:8) E manaomia ai i lenei mea le taimi, fesootaiga, ma le vavalalata. E mautinoa lava o loo faamanuia mai Ieova le Atua i galuega mamafa uma o loo faia e mātua Kerisiano ina ia tausi aʻe ai a latou fanau i le upu moni.

O le lauga faasolo na sosoo ai, “Seʻi o Tatou Gasolo Atu i le Fale o Ieova,” sa faatupu aʻe ai se agaga talisapaia mo sauniga faa-Kerisiano. E aumai ai le malologa mai popolega o lenei lalolagi. O sauniga ua tatou maua ai se avanoa mo le fetufaaiga o faalaeiauga, ma e mafai ona tatou faaalia atu ai lo tatou alofa mo o tatou uso talitonu. (Eperu 10:24, 25) Ua aogā foi sauniga ia i tatou ina ia faamaʻaiina ai o tatou tomai o ni faiaʻoga, ma ua faalolotoina ai lo tatou malamalamaga i fuafuaga a le Atua. (Faataoto 27:17) Tau ina ia aua lava neʻi o tatou faaesea i tatou mai le faapotopotoga, ma seʻi o tatou manatua fetalaiga a Iesu: “O le mea ua faapotopoto ai se toalua, po o se toatolu i loʻu igoa, ou te i ai faatasi ma i latou.”—Mataio 18:20.

O le lauga mulimuli o le aso e faapea “Le Uigā o Lou Faatuatua—Ua Tofotofoina Nei.” O le faatuatua e lei tofotofoina e lē o faamaonia pe aogā, ma e lē iloa foi sona uigā. Ua faapei o se siaki e lei talaina lava se tupe o iai. Po o aogā moni lava la se aofaiga tupe o loo tusia mai ai? Ua faapena foi i lo tatou faatuatua, e ao ona tofotofoina ina ia faamaonia pe o iai se aogā ma se uigā moni. (1 Peteru 1:6, 7) Na faapea mai le failauga: “I nisi taimi, e faaseseina ai e taʻitaʻi lotu ma aposetate tagata o loo faia faasalalauga faapea ma faipule silisili, ina ia tuuaʻia sese i tatou, i le faauigaseseina o o tatou talitonuga faa-Kerisiano ma le auala o loo tatou ola ai. . . . Po o le a tatou faatagaina ea i latou o loo faatauasoina e Satani ina ia faafefe ma faalotovaivaiina i tatou ma tatou lagona ai le mā i le tala lelei? Po o le a tatou faatagaina ea pepelo o loo faia i le upu moni e faaaafia ai lo tatou auai e lē aunoa i sauniga ma la tatou galuega talaʻi? Po o le a tatou tutū mau-salī ma ia loto tetele ma sili atu ona maumauai nai lo muamua e faaauau ona faalauiloa atu le upu moni e uiga ia Ieova ma lona Malo?”

Ola i le Faatuatua

O le matua o le aso lona tolu o le tauaofiaga sa faavae aʻe i upu a Paulo: “E le taʻuamiotonuina se tasi i luma o le Atua i le tulafono; auā, E ola le tagata amiotonu i le faatuatua.” (Kalatia 3:11) O le lauga faasolo, “O Upu Faavaloaga a Ioelu mo o Tatou Aso,” sa avea o se tasi o vaega matilatila o le taeao. Ua faasino mai le tusi a Ioelu i o tatou taimi ma faapea mai i se uiga faanatinati: “Aue, le aso e! auā ua latalata mai le aso o Ieova, e oo mai e pei o se malaia ai Le e ona le malosi uma lava.” (Ioelu 1:15) I se uiga e tali tutusa i sē akerise ua faapena foi ona lē faatagaina e Kerisiano faauuina se mea e faalavelave i le folafolaina atu o le Malo i lenei taimi o le iuga.

Ua aumaia foi e le tusi a Ioelu se faamoemoe, i le faapea mai: “E iu foi ina faaolaina o i latou uma lava o e valaau atu i le suafa o Ieova.” (Ioelu 2:32) O lenei mea e sili atu se isi ona faauigaina nai lo le tau ina faaaogā le suafa o Ieova. E manaomia le salamō moni mai le loto, ma e aofia ai lo tatou teena o le faia o mea sese. (Ioelu 2:12, 13) E leai se taimi mo se toe tolopo auā ua lē pine ona faaoo mai lea e Ieova le faamasinoga i luga o nuu, e pei ona sa ia faia ia Moapi, Amoni, ma le vaega maugā o Seira i aso o le tupu o Iosefatu o Iuta.—2 Nofoaiga a Tupu 20:1-30; Ioelu 3:2, 12.

Sa faalaeiauina tagata uma i le lauga “Ia Faaalia le Faatuatua e Ala i le Faatalitali Atu ia Ieova.” Nei la i le ooooga o taimi o le iuga, e mafai ona tatou toe tepa i tua i le faataunuuga o le tele o folafolaga a Ieova, ma ua tatou naunautai atu i mea o le a mavae atu. E tatau i tagata o Ieova ona onosai pea, i le manatua faapea, o mea uma lava ua folafola mai e le Atua o le a faataunuuina.—Tito 2:13; 2 Peteru 3:9, 10.

Sa faaiuina le polokalame o le taeao i le tala “Ia Faafaigofie Lau Vaai.” O lenei vaaiga moni sa faatinoina i le tala na faalaeiauina ai i tatou ina ia iloiloina o tatou uiga e faatatau i le sailia o meafaitino. Po o fea lava o loo tatou ola ai, ae afai tatou te mananao ina ia leai ni popolega i o tatou olaga, e tatau la ona tatou usitaia le fautuaga a Iesu ina ia faafaigofie la tatou vaai, ia taulai saʻo atu i le Malo o le Atua.—Mataio 6:22.

O le lauga lautele sa iai lona matua faatupu naunau e faapea “Le Faatuatua ma Lou Lumanai.” Sa taʻuina mai ai faamaoniga o le leai o se tomai i taʻitaʻi faaletagata e foiaina ai faafitauli o le lalolagi. (Ieremia 10:23) O loo faifai pea ona toe faia o mea ua uma ona faia i le talafaasolopito o le tagata—i se tulaga faateteleina ma le matuā faatamaia ai. O le ā le lagona o Molimau a Ieova e faatatau i le lumanai? Tatou te talitonu ua iai i tagata faamaoni se lumanai pupula i le pulega a le Malo o le Atua. (Mataio 5:5) O le a faataunuuina e le Atua ana folafolaga mo le lelei o ē uma o loo faatuatua i lana Afioga, lea o loo timai mai: “Ia outou saili ia Ieova manū o mafai ona maua o ia; ia outou valaau ia te ia manū o latalata mai o ia.”—Isaia 55:6.

Sa lāgā e Iesu se fesili tāua tele a o ia mafaufauina o tatou aso. Sa ia fesili: “A sau le Atalii o le tagata, pe maua ea e ia le faatuatua i le lalolagi?” (Luka 18:8) O le lauga faaiu na toe autalu ai le polokalame o le tauaofiaga ma faaalia ai auala ua saunia mai ai ni faamaoniga moni e faapea o loo ola le faatuatua i le Afioga a le Atua, e ui lava ina tatou ola i se lalolagi lē faatuatua ma tumu i ona lava faanaunauga faalelalolagi.

Peitai, e mafai foi ona tatou taitoatasi ma fesili ifo ia i tatou lava, ‘Po o aofia ai ea aʻu ia i latou o loo iai le faatuatua lē maluelue i le Atua ma lana Afioga?’ O le Tauaofiaga Itumalo o le “Faatuatua i le Afioga a le Atua” e tatau ona fesoasoani ia i tatou e tali mai ai i le ioe i lena fesili. Ma e maeu lo tatou loto faafetai ia Ieova mo le faamalosia o lo tatou faatuatua ia te ia ma lana Afioga faagaeeina, le Tusi Paia!

[Ata i le itulau 24]

E toatele le au tauofo sa galulue ma le fiafia i le saunia o āpi mo le faitau afe o le au usufono

[Ata i le itulau 25]

Sa faaaogā malae tetele o taaloga i nisi o nofoaga i itu eseese o le lalolagi

[Ata i le itulau 25]

O loo tatalaina mai e L. A. Swingle o le Vaega Pule le polosiua fou

[Ata i le itulau 26]

E toatele na papatisoina e fai ma faailoga o lo latou tuuina atu ia Ieova

[Ata i le itulau 27]

Sa usuina ma le olioli e le au usufono pese o le Malo. Tamai ata faaopoopo: le tala “Ia Faafaigofie Lau Vaai”