Aisea e Loto Faafetai Ai?

ONA o se taotoga na faia i le tuasivi o Harley na faamalosia ai o ia e suia lana galuega fai masini, i se galuega faaofisa. Ina ua fesiligia po o le ā sona faalogona i lea suiga, na faapea mai Harley: “Ua ou misia lava le faigaluega i masini. Ae o le mea moni lava, ua sili atu loʻu fiafia i laʻu galuega lea ua iai nai lo laʻu galuega muamua.”

I le tuuina atu o se mafuaaga o lona faamalieina, na taʻua faapea e Harley: “O uiga o tagata matou te faigaluega faatasi. E lē pei o i latou i laʻu galuega muamua, e talisapaia e loʻu fomeni ma tagata faigaluega o matou galulue nei mea ou te faia, ma latou te lē faatalatu i le aumaia o le faamālō. O le mea lenei e matuā eseese ai.” I le lagonaina o le aogā ma le manaomia, ua avea nei Harley ma se tagata faigaluega e fiafia.

O upu faamālō po o le loto faafetai, pe afai ua tatau ai, e faamafanafanaina moni ai lava le loto. I le isi itu, o aafiaga o le lē loto faafetai, e mafai ona taofia ai le faagaeetia e pei ona matauina e Shakespeare: “O le agi, agi mai o le matagi mālūlū, ua pei lou leaga o uiga lē loto faafetai o le tagata.” O le tulaga e faanoanoa ai, ona e toatele ua oo i ai na faiga lē alofa.

Leoleo Faasaga i le Lē Loto Faafetai

I le lalolagi i aso nei ua mou ese atu faailoaga faamaoni o le loto faafetai. Mo se faaaoaoga, na faatū mai e se tusitala se fesili: “Afai e maua e le teine faaipoipo se taimi e faatuatusi ai tusi valaaulia e 200 o le faaipoipoga, aisea la e lē mafai ai ona maua se taimi e tusi ai ni tusi faafetai mo meaalofa e 163?” E masani e oo lava i le upu faigofie o le “faafetai” e lē faia. O le loto faafetai ua faateteleina ona suia e le uiga o le faamuamua o le lelei o le tagata lava ia. O lenei tulaga o se tasi o faailoga vaaia o aso e gata ai. Na lapatai mai le aposetolo o Paulo: “E tatau ona e iloa o aso e gata ai o le a matuā matautia. O le a avea tagata ma ē e matuā manatu faapito . . . O le a latou matuā lē loto faafetai.”—2 Timoteo 3:1, 2, Phillips.

I nisi tulaga, ua suia le loto faafetai i le faaʻoleʻole. O upu o le loto faafetai e sau mai le loto e aunoa ma le manatu e maua ai se lelei totino. Peitai, o le faaʻoleʻole, e masani ona lē faamaoni ma soona faatele, e ono pogai mai i le uunaiga e iai se isi ona uiga o le fia siitia o le tulaga po o le mauaina o ni lelei totino. (Iuta 16) E lē gata i le faaseeina o lē ua faia i ai, a o ia foi tala suamalie e oo atu ai ina avea ma fua o le mimita ma le faamaualuga. O lea la, o ai o le a manao e olegia i ni faamatalaga lē faamaoni faaʻoleʻole? Ae o le loto faafetai moni e faafouina moni ai.

O le tagata e faaleoina atu le loto faafetai e mauaina aogā mai le faia faapea. O le lagona mafana lea e oo ia te ia ona o le loto faafetai, e saosaolaumea i lona fiafiaga ma le filemu. (Faatusatusa i le Faataoto 15:13, 15.) Ma i le avea o se uiga mautinoa, e puipuia e le loto faafetai o ia mai i faalogona lē lelei e pei o le ita, loto leaga, ma le tetee.

“Ia Outou Saga Faafetai”

Ua uunaia i tatou e le Tusi Paia e atiina ae se agaga o le loto faafetai, po o le talisapaia. Na tusi Paulo e faapea: “Ia outou faafetai i mea uma lava, auā o le finagalo lea o le Atua ia te outou, ia Keriso Iesu.” (1 Tesalonia 5:18) Ona fautua atu lea o Paulo i le faapotopotoga i Kolose: “Ia pule foi le filemu mai ia Keriso i o outou loto, . . . ma ia outou saga faafetai.” (Kolose 3:15) E tele salamo ua iai faaupuga o faafetai, e faailoa ai o le loto faafetai o se uiga lelei e faaleatua. (Salamo 27:4; 75:1) E manino la, e fiafia Ieova le Atua pe a tatou faaalia le loto faafetai i mataupu o le olaga i aso uma.

Ae o ā mea o i lenei lalolagi lē loto faafetai e faafaigata ai mo i tatou ona atiina ae le agaga o le loto faafetai? E mafai faapefea ona tatou faaalia se uiga loto faafetai i aso uma o le olaga? O nei fesili o le a talanoaina i le mataupu o sosoo mai.