Faaoo Atu le Tala Lelei i Tagata e Sili Ona Toatele

A O OʻU mafaufau i tagata o loʻu atunuu, sa ou iloa ai o le toatele o i latou e na o le pau le auala e latou te iloaina ai Molimau a Ieova e ala i faasalalauga o tala fou. Sa ou manatu ai faapea, o nei tagata e tatau lava ona faafesootaia, ina ia mafai ai ona latou iloa po o ai Molimau a Ieova ma o ā tonu lava mea e talitonu i ai. Ae e mafai faapefea ona ou fesoasoani atu? O laʻu tane o se toeaina Kerisiano, ma na te aumaia ia te au ni taiala ma ni fautuaga atamai.

Sa ma mauaina le manatu autū i le mataupu faapea “Magazines That Give Practical Comfort,” (O Mekasini e Maua ai Faamafanafanaga Aogā) sa lomia i le mekasini o le Awake! o Ianuari 8, 1995. E tusa ai ma le galuega a se Molimau, o loo faapea mai le mataupu: “Sa fai ma ona sini le aoina mai o nisi o lomiga tuai o le Awake! o loo faaputu e isi Molimau i o latou aiga. Ona ia asiasi atu lea i nisi o matagaluega lea ua ia manatu faapea, atonu e naunau ane i nisi o ia mataupu.”

Faatasi ai ma le fesoasoani a laʻu tane, na vave ai ona ou aoina mai le faitau selau o kopi o ia mekasini. Mai i nei mekasini sa mafai ona ou filifilia mai ai nisi o mataupu eseese e talafeagai mo tagata ia o le a ou taumafai e faafesootaia.

I le faaaogaina o tusi telefoni ma faamaumauga faalauaitele, sa ou aoaoina mai ai se lisi o falemai, falenofotumau o talavou, ma nofoaga e tausi ai tagata matutua. Sa ou lisiina foi i latou e galulue i le faiga o sauniga o maliu, supavaisa ma faufautua o aʻoga, o ē e suesueina togafitiga faafomai, ma tagata maualuluga o falepuipui ma fale faamasino. Sa aofia ai i laʻu lisi le au faatonu mo nofoaga o loo iai ē ua pulea e le ʻava malosi ma vailaau, o faalapotopotoga mo mataupu tau siosiomaga, o faalapotopotoga mo ē e lē atoatoa le malosi ma ē na afaina i le taua, faapea foi i latou e suesueina meaʻai aogā. Sa ou lē misia foi i latou o faauluulu i ai ofisa mo le lelei o tagata lautele, ma auaunaga faalauaitele faapea foi ma mataupu faaleaiga.

O le ā Laʻu Tala e Fai Atu?

O le mea muamua lava ou te faia pe a ou asiasi atu o le faailoa manino atu lea po o ai aʻu. Ona ou taʻu atu lea faapea o laʻu asiasiga e na o ni nai minute.

O le taimi lava e faafesagai ai ma se tasi e vaaia se ofisa, ou te faapea atu loa: “O aʻu o se tasi o Molimau a Ieova. Peitai, ou te lei sau iinei e fai se talanoaga faalelotu, lea atonu e lē o talafeagai i taimi faigaluega.” E masani lava ona oo ina sili atu le toafilemu o le siomaga. Ona ou faatatauina loa lea o laʻu faamatalaga i le tulaga o iai, ou te faaauau faapea: “E lua mafuaaga o laʻu asiasiga. Muamua lava, ou te manao ina ia faaali atu loʻu talisapaia o le galuega lea e faatinoina e lo outou ofisa. O le mea moni lava ia, e lē tatau ona manatu māmā i se tasi o loo faaalu lona taimi ma lona malosi mo tagata lautele. O la outou taumafaiga e mautinoa le tatau ona ave i ai le faamālō.” O le tele lava o taimi, o le tagata e faalatalata atu i ai i le auala lea e tele ina maofa.

O le taimi lea ua tau mānatu le tagata po o le ā le mafuaaga lona lua o laʻu asiasiga. Ou te faaauau atu e faapea: “O le mafuaaga lona lua lenei o laʻu asiasiga: Mai i la matou mekasini o le Ala Mai!, lea ua lomia faava-o-atunuu, ua ou filifilia mai ai nisi o mataupu ia e fesootai patino atu lava i le ituaiga galuega lea o loo outou faia atoa ai ma faafitauli e fesootai atu i ai. Ou te mautinoa e te fia silafia le auala ua manatu ai lenei lomiga faava-o-atunuu i nei faafitauli. Ou te fiafia lava e tuu nei kopi i a oe.” E masani lava ona taʻu mai ia te au faapea e latou te talisapaia tele aʻu taumafaiga.

Iuga e Maofa ma Tauia Ai

Pe a ou faaaogaina lenei faatomuaga, e toatele i latou e tali mai ma le faaleuo; e na o le toatasi mai le toʻa 17 e teena laʻu galuega. E tele ni mea na tutupu sa faateia ai ma maua ai iuga lelei.

O se faataitaiga, ina ua uma ona ou taumafai faafā ma faatali ma le onosai, sa iu ina ou feiloai ai i se asiasi aʻoga o se itumalo. O ia o se tagata e ese le pisi. Peitai, sa sili lava ona faaleuo ma talanoa mai ia te au mo sina taimi. Ina o le a ou alu, sa ia faapea mai: “Ou te matuā talisapaia lava au taumafaiga, ma le mautinoa lava o le a ou faitauina ma le faaeteete lau lomiga.”

I se tasi mea na tupu, sa ou asiasi atu ai i se falefaamasino itumalo, sa feiloai ai ma le faamasino sili, o se tamaloa faamatuā tagata. Ina ua ou ulu atu i lona ofisa, sa ia tepa aʻe mai ana faamaumauga ma le ita tele.

Sa ia faapea mai i se leo paū: “E na o taeao o le Aso Lua le taimi e ō mai ai i le ofisa, ona ou avanoa ai lea mo so o se faamatalaga.”

“Talia mai laʻu faatoesega ona o le oo mai i se taimi e lē talafeagai,” sa ou tali faatopetope atu ai ma toe faaopoopo atu, “Ua lelei, o le a ou fiafia lava e toe sau i se isi taimi. Ae o laʻu asiasiga o se mataupu patino.”

O le taimi lea ua naunau ai lava le faamasino e fia iloa. Sa ia fesili mai, i se leo agavaivai po o le ā le mea ou te manao ai. Sa ou toe faapea atu o le a ou toe asiasi mai i le Aso Lua.

“Faamolemole, alala mai i se nofoa,” o lana faatauanau mai lea, o se mea na faateia ai aʻu. “O le ā le mea e te faafinagaloina?”

Sa sosoo ai ma se talanoaga solo lelei, ma sa ia faatoese mai i le soona inainā mai i le amataga ona sa ia matuā pisi lava.

“E te silafia le mea ou te fiafia ai i Molimau a Ieova?” sa fesili ai le faamasino. “E iai a latou mataupu silisili faavae ia e lē tāitai ona liliu ese ai. Sa taumafai Hitila e fai so o se mea na te mafaia, ae sa tumau lava ona lē ō Molimau i le taua.”

Ina ua ma ulu atu i le ofisa, sa mataulia mai i maʻua e failautusi sa iai iina. Ona faalatalata lemū mai lea o le failautusi sili ma faapea mai, “O le peresitene e lē tāitai ona ia taliaina ni tagata se toatele i le taimi e tasi.”

“Ae o le a ia taliaina i maʻua,” o laʻu tali filemu atu lea, “auā o i maʻua o ni Molimau a Ieova. E lē o i maʻua o ni tagata aisi, ma o la ma asiasiga e lē sili atu i le tolu minute le umi.” Sa ou tatalo ma le faatauanau i loʻu loto ma faapea atu, “Ieova e, faamolemole seʻi e faataulauina lenei mea!”

Sa tali mai le failautusi i se uiga lē kea, “Ia, ua lelei, seʻi oʻu taumafai.” Sa savali ese atu o ia. Ina ua mavae le lua minute, lea sa foliga mai o se taimi umi ia te au, sa toe foi mai ae mulimuli mai ai i ona tua le peresitene. E leai se tala na fai mai, ae sa tataʻiina atu e le peresitene i maʻua i lona ofisa, e lua isi potu sa matou pāsia.

A o amata ona matou talanoa, sa iu lava ina matuā faaleuo mai o ia. Sa ia lotomalie e taliaina lomiga o le Ala Mai! ina ua ma ofoina atu. Sa ma faafetai atu ia Ieova mo lenei avanoa ua tuuina atu ai se molimau e uiga i le fuafuaga o la ma galuega.

I le toe tepa atu i le tele o mea ofoofogia na tutupu, ua ou talisapaia atili ai le mea sa taʻua e le aposetolo o Peteru: “E moni, ua ou iloa e le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.” (Galuega 10:34, 35) E finagalo le Atua ina ia avatu i tagata e eseese o latou talaaga, gagana, tulaga lautele ia le avanoa e iloa ai ana fuafuaga mo le fanau a tagata ma le lalolagi.—Se Tala na Tusia Mai.