Ia Faataʻitaʻi i le Lē Faailoga Tagata o Ieova
1 O loo manatu mamafa mai Ieova i tagata. E na te talia ma le lē faailoga tagata so o se tasi o lē e faia lona finagalo. (Galu. 10:34, 35) Ina ua talaʻi atu Iesu i tagata, sa faapena foʻi ona lē faailogaina e ia o tagata. (Luka 20:21) E manaʻomia ona tatou faataʻitaʻi ia la faaaʻoaʻoga, e pei foʻi ona faia e Paulo, o lē na tusi mai e faapea: “O le Alii e toatasi o tagata uma, e faulai lona alofa ia te i latou uma lava o e valaau atu ia te ia.”—Roma 10:12.
2 O le folafola atu o le tala lelei o le Malo o le Atua ia i latou uma o ē tatou te feiloaʻi atu i ai, e faamamaluina ai le Atua. E tatau ona faaauau ona tatou tufa atu lenei feʻau ofoofogia i isi, e tusa lava po o le ā lo latou lanu, le tulaga i le olaga, tulaga tau aʻoaʻoga, po o le tulaga tautupe. (Roma 10:11-13) O lona uiga, o le talaʻi atu lea ia i latou o ē o le a faalogo—o tane, fafine, talavou ma ē matutua. E manaʻomia ona tatou ō atu i fale uma lava, ina ia maua ai e tagata taʻitoʻatasi e ona fale se avanoa e faalogo ai i le upu moni.
3 Ia Iai se Naunau mo Tagata Uma: O lo tatou sini o le faafeiloaʻia lea o tagata uma tatou te mafai ona feiloaʻi atu i ai. I le manatuaina o lenei mea, ua taulau manuia ai nisi tagata talaʻi i le molimau atu i tagata i ofisa o fomaʻi, i falemaʻi, i fale e tausi ai tagata matutua, i ofisa mo le soifua manuia o tagata ma nofoaga o gafa ma le toe faaleleia o olaga o tagata. E lē gata i lea, ua molimau atu foʻi tagata talaʻi i pule o fale maliu, i pule o aʻoga ma le ʻau faufautua, faapea ma faamasino. Pe a tatou ō atu e faafeiloaʻi tagata maualuluga, e tatau lava ona faailoa atu lo tatou talisapaia mo a latou galuega fesoasoani o loo faia i le atunuu. Ia faaaloalo, ma ia fili ni mataupu talafeagai e patino tonu ma ituaiga o galuega o loo latou faia ma faafitauli e fesootaʻi atu i ai.
4 I se tasi taimi, na mafai ai e se tuafafine ona talanoa atu i se faamasino i lona ofisa. Ina ua uma se talanoaga uigā, na fai mai saʻo lava le faamasino faapea: “E te iloa le mea ou te fiafia ai i Molimau a Ieova? E iai a latou mataupu silisili e matuā faavaeina lelei e lē mafai ona latou ō ese mai ai.” Sa avatu se molimau lelei i lenei tagata taualoa.
5 E lē mafai ona tatou iloa atu mea o i loto o tagata. Ae peitaʻi, o le talanoa i tagata uma lava tatou te feiloaʻi, ua tatou faailoa atu ai lo tatou faatuatua i le tomai o le Atua i le taʻitaʻiina o la tatou galuega. E lē gata i lea, o lenei mea ua maua ai e tagata le faaeaga e faalogo ai ma tali mai i le feʻau o le faamoemoe. (1 Timo. 2:3, 4) Seʻi o tatou faaaogā ma le atamai lo tatou taimi ma taumafai e faataʻitaʻi i le lē faailoga tagata o Ieova, e ala lea i le ō atu ma le tala lelei i tagata uma e mafai ona tatou oo atu i ai.—Roma 2:11; Efe. 5:1, 2.